Atënë so azo ahunda
Tongana mbeni Chrétien amû nginza wala matabisi na mbeni wakua ti letäa ndali ti akusala ti lo, a lingbi ti bâ ni tongana petengo goro?
Na ndo kue so ala yeke dä, aChrétien ayeke gi ti sala ye na ndara na ndo aye so ayeke tambela na yâ ti kodoro ni. Ala yeke dabe ti ala so ye so ayeke nzoni nga ndia ayeda na ni na yâ ti mbeni kodoro alingbi ti duti mbeni ye so na mbeni kodoro nde a yeda na ni pëpe nga ndia ake ni (aProverbe 2:6-9). Biani, a lingbi mbeni Chrétien adabe ti lo lakue so zo kue so aye ti duti gene na “Tabernacle ti [Jéhovah]”, a yeke ngbanga ti lo ti ke petengo goro.—Psaume 15:1, 5; aProverbe 17:23.
Petengo goro ayeke nyen? Na lege ti mbeni bakari (The World Book Encyclopedia), “petengo goro ayeke mungo mbeni ye ti ngele ngangu na . . . mbeni zo so lo yeke na kota ndo ti tene lo doro ndia ti kua ti lo ti sala nzoni na zo so amû goro ni.” Tongaso, na yâ akodoro kue, tongana zo amû mbeni ye wala nginza na mbeni wafango ngbanga wala na mbeni turugu ti lapolice ti tene lo sala ye so ndia ayeda na ni pëpe, wala tongana lo mû aye ni so na mbeni zo so kua ti lo ayeke ti gi yâ ti akungba ti tene lo kanga lê na ndo aye so lo wara so ague nde na ndia, so petengo goro la. Nga, tongana mo mû mbeni matabisi ti tene a zia iri ti mo na kozo ndo, na tapande na popo ti azo so ayeke ku ti tene a mû ala na kua wala na popo ti azo so akpo molongo ti ku mbeni ye, so kue gi petengo goro. Mara ti salango ye tongaso afa so ndoye atia mo.—Matthieu 7:12; 22:39.
Ka tongana mo mû mbeni matabisi wala nginza na mbeni wakua ti letäa ti tene lo sala na mo mbeni kua so ndia ayeda na ni, wala ti kanga lege na lo si lo sala ye ti kirikiri na mo pëpe, so kue gi petengo goro? Na tapande, na yâ ti ambeni kodoro, tongana mbeni zo amû nginza pëpe, awakua ti letäa aye pëpe ti mû amolenge ti lo hio na da-mbeti, ti yeda ti gbanzi lo na yâ mbeni hôpital wala ti sû maboko ti ala na ndo ti ambeti so amû lege na lo ti sala kodoro na ndo ni. Wala tongana lo ye ti kiri ti sala ambeni fini mbeti so amû lege na lo ti sala ambeni ye, ala lingbi ti pusu gi na devant lango ti mungo na lo ambeti ni.
Bango ndo so azo ayeke na ni na ndo mungo kete pata na bê ti mo mveni na mbeni zo ti tene lo sala na mo mbeni ye ayeke legeoko pëpe na yâ ti akodoro kue. Na yâ akodoro so a ga tongana mbeni ngobo ti salango ye wala a ku ti tene mbeni zo asala ni, ambeni Chrétien alingbi ti tene na bê ti ala so teti ndia ake ni pëpe, tongana ala mû kete pata na bê ti ala mveni na mbeni wakua ti letäa si lo sala kua ti lo, ala yeke doro pëpe akpengba-ndia ti Bible. Na ambeni kodoro, azo alingbi même ti bâ mara ti ye tongaso tongana mbeni matabisi so a zia na ndo nginza ti kua ti mbeni wakua ti letäa so akono pëpe. Kota ye ti dabe na ni ayeke so kangbi ayeke na popo ti mungo mbeni matabisi ndali ti mbeni kua so ndia ayeda na ni nga na petengo goro ti tene a sala nzoni na mo na mbeni lege so ndia ake.
Na mbeni mbage, tongana ala yeke hunda aye so ndia ayeda na ni, ambeni Témoin ti Jéhovah ake ti mû mbeni pata na bê ti ala mveni na azo so kua ti ala ayeke ti gi yâ ti akungba, azo ti douane nga na ambeni zo atâa tongana a yeke ye so a yeke sala ka ni lakue. Teti so a hinga aTémoin ndali ti salango ye alingbi na yingo-ti-hinga ti ala nga salango ye ti ala na tâ lege ni, ngoi na ngoi ala yeke wara ye so ala ye atâa so mingi ti azo ayeke wara ni gi tongana ala mû mbeni pata.—aProverbe 10:9; Matthieu 5:16.
Tënë ti nda ni ayeke so: wakua oko oko ti Jéhovah alingbi ti mû desizion lo mveni wala lo yeke mû mbeni pata ndali ti mbeni kua so ndia ayeda na ni, wala ti kanga lege si a sala ye ti kirikiri na lo pëpe. Kota ye ni ayeke so, a lingbi lo sala ye so ayeke sala si yingo-ti-hinga ti lo agi lo pëpe, ayeke bi zonga na ndo iri ti Jéhovah pëpe nga asala pëpe si mbeni zo apika gere ti lo.—Matthieu 6:9; 1 aCorinthien 10:31-33; 2 aCorinthien 6:3; 1 Timothée 1:5.