Mo dabe mo na ni?

Dikongo anuméro ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:

• Ye nyen ayeke lani na peko ti sorongo lango 25 ti décembre tongana matanga ti dungo Jésus?

Tënë ti Nzapa afa ye oko pëpe na ndo lango ti dungo Jésus. Mbeni bakari (Enciclopedia Hispánica) atene: “Lango 25 ti décembre so a soro ni teti matanga ti Noël ayeke tâ lango ti dungo Jésus pëpe, nde na so a yeke mbeni lango so a soro ni ti tene a mû matanga ti sigingo ti lâ so a yeke sala ni giriri na Rome ti ga matanga ti aChrétien.” A-Romain ayeke sala lani matanga ti sigingo ti lâ na ngoi ti dê na lege ti akota matanga, apumba kirikiri nga na kangbingo amatabisi na popo ti ala.​—15/12, lembeti 4-5.

• Kusala 7:59 aye ti tene so Etienne asambela Jésus?

Oko pëpe. Bible afa so asambela ague gi na Jéhovah Nzapa. Na bango Jésus na yâ ye so akpa suma, Etienne abâ so ye akanga lege na lo pëpe ti hiri ndo tâ gi na Jésus mveni, na tenengo: “Seigneur Jésus, kamata yingo ti mbi.” Etienne ahinga lani so a mû na Jésus ngangu ti zingo akuâ (Jean 5:27-29). Ndani la lo hunda wala lo hiri ndo na Jésus ti bata ngangu ti fini ti lo juska na lâ ti londongo ti akuâ.​—1/1, lembeti 31.

• E hinga tongana nyen so a diko kozoni pëpe gigi ti kekereke ti mbeni zo?

Liberté ti sorongo ye so Nzapa amû na zo ake tënë so atene Nzapa adiko kozoni awe ye so ayeke si na zo. Tongana Jéhovah aleke kozoni ye so ayeke si na e na yâ fini ti e nga na pekoni lo hunda tënë na e na ndo ye so e sala, a yeke pëpe ndoye nga a yeke na lege ni pëpe (Deutéronome 32:4; 1 Jean 4:8).​—15/1, lembeti 4-5.

• Ngbanga ti nyen a yeke ye ti tâ be-ti-molenge oko pëpe ti tene so amiracle alingbi ti si pëpe?

Na hingango so ala yeke gi na hingango ye kete na ndo ndara so ayeke na peko ti aye so Nzapa aleke, ti tene so mbeni ye ayeke si lâ oko pëpe, ambeni wasenda-ye alingbi pëpe ti yeda na ni na bê kue. Ala yeke ndulu ti tene so a yeke ngangu ti tene mbeni ye asi.​—15/2, lembeti 5-6.

• Ngbanga ti nyen Samson atene lani na babâ na mama ti lo so lo ye ti mû mbeni wali na popo ti aPhilistin? (aJuge 14:2).

Ndia ti Nzapa ake ândö ti tene zo asala mariage na mbeni zo so avoro tâ Nzapa pëpe (Exode 34:11-16). Ye oko, wali Philistin so ayeke “nzoni mingi” na lê ti Samson. Samson ‘agi aPhilistin na tënë’, na wali ni alingbi biani ti mû lege na lo ti sala ye so. Yingo ti Nzapa amû maboko lani na Samson (aJuge 13:25; 14:3, 4, 6).​—15/3, lembeti 26.

• Mbeni Chrétien alingbi ti mû nginza wala matabisi na mbeni wakua ti letäa ndali ti akusala ti lo?

A yeke sioni mingi ti pete goro na mbeni kota zo, ti mû na lo mbeni ye ti ngele ngangu ti tene lo sala mbeni ye so ndia ake, ti buba fango ngbanga wala ti sala mbeni ye ti nzoni teti mo. Me a yeke petengo goro pëpe ti mû nginza wala matabisi na mbeni wakua ti letäa teti salango kua ti lo, wala ti wara na mbeni ye so ndia ayeda na ni wala ti tene a sala mbeni ye ti kirikiri na mo pëpe.​—1/4, lembeti 29.