Atënë so azo ahunda
Tongana bazengele Paul atene na gbele Sanhédrin: “Mbi yeke Farizien”, a yeke belengo mabe ti lo pëpe?
Ti gbu nda ti tënë ti Paul so ayeke na Kusala 23:6, a lingbi e bâ atënë so angoro ni.
Na peko ti so aJuif apika lani lo na Jérusalem, Paul asala tënë na azo mingi so abungbi. Lo tene na ala so ni yeke kozoni ‘na gbe ti Gamaliel [na Jérusalem], lo so afa na ni tâ lege ti Ndia ti akotara ti e’. Atâa so azo ni amä lo teti mbeni ngoi, na nda ni ala sala ngonzo na tele ti lo, tongaso mokonzi ti aturugu ni amû Paul ague na lo na gbagba ti ala. Na ngoi so ala ga ti pika lo, Paul atene na turugu ni: “Ndia amû lege na mo ti se zo so ayeke Romain na chicotte? tongana a de a fâ ngbanga na li ti lo pëpe.”—Kusala 21:27–22:29.
Na lango ti pekoni, mokonzi ti aturugu ni ague na Paul na gbele Sanhédrin, kota da-ngbanga ti aJuif. Paul abâ ndo yeke yeke na popo ti azo ti ngbanga ni, na lo bâ so ambeni ayeke aSadducéen na ambeni ayeke aFarizien. Na lo tene na ala: “Aita, mbi yeke Farizien, molenge ti Farizien; a yeke teti tënë ti beku na londongo ti awakinda si ala hiri mbi na ngbanga.” Ye so asi ayeke so papa alondo ngangu na popo ti aFarizien na aSadducéen, “teti aSadducéen atene londongo ti awakinda ayeke pëpe, na ange na yingo ayeke nga pëpe; me aFarizien aye tënë so kue.” Ambeni so ayeke aFarizien atene na ngonzo: “E bâ ye ti sioni na li ti zo so pëpe.”—Kusala 23:6-10.
Teti azo ahinga lo lani tongana mbeni ngangu Chrétien, Paul alingbi pëpe ti gue na azo ti ngbanga ni ti yeda so lo yeke mbeni Farizien so angbâ ti sala kua ni. Nga, aFarizien so ayeke lani dä alingbi nga pëpe ti yeda na mbeni Farizien so amä na bê na atënë ti ala kue pëpe. Tongaso, na tenengo so lo yeke Farizien, Paul aye ti fa so na yâ ti ambeni ye, tënë ti lo ague oko na ti aFarizien, na aFarizien so abungbi lani amä yâ ti tënë ti lo ni tongaso.
Na tenengo so a yeke fâ ngbanga na li ti ni na ndo beku na londongo ti akuâ, Paul aye ti tene polele so na ndo ti tënë so, ni yeke legeoko tongana aFarizien. Na yâ mbeni dengo gaba na ndo tënë so, a lingbi ti bâ so mabe ti Paul ague oko na ti aFarizien, me pëpe na ti aSadducéen, so ala mä na bê oko pëpe na londongo ti akuâ.
Aye so Paul amä na bê dä tongana Chrétien ague nde pëpe na ambeni tënë so aFarizien amä na bê dä tongana londongo ti akuâ, a-ange na ambeni tënë ti Ndia (aPhilippien 3:5). Ni la, gi na ndo atënë so, Paul alingbi ti tene so ni yeke tongana aFarizien, na a yeke lani tongaso si azo kue so abungbi na yâ Sanhédrin amä yâ ti atënë ti lo. Tongaso, lo mû kozo dutingo ti lo ti sala na tënë na gbele azo ti kota da-ngbanga ti aJuif so asala ye lani na lege ti mbilimbili pëpe.
Ye oko, kota ye so afa atene Paul abele mabe ti lo pëpe ayeke so Jéhovah angbâ ti yeda na lo. Na bï ti lango ti pekoni so Paul atene tënë so, Jésus atene na lo: “Bê ti mo aduti nzoni; teti legeoko tongana mo sala tënë ti témoin ti Mbi na Jérusalem, tongaso a lingbi mo sala tënë ti témoin na Rome nga.” Teti so Nzapa angbâ ti yeda na Paul, a lingbi e tene so Paul abele lani mabe ti lo ti Chrétien pëpe.—Kusala 23:11.