Tongana nyen la e lingbi ti mû maboko na azo so ayeke na yâ ti bezoin?

FRANÇOIS, mbeni ancien so ayeke na yâ ti mbeni kodoro so ye ague na li ni dä mingi ape, atene: “Mbeni ye ti ngangu so asi na kodoro ni na peko ti mbeni vote so a sara, so ambeni zo atene so a tambela na lege ni ape, apusu aTémoin ti Jéhovah saki na saki ti zia ada ti ala ti hon. Warango kobe na yorö aga ngangu nga ngere ti aye ague na li ni mingi. Abanque akanga, nga nginza ayeke pëpe na ndo so azo ayeke mû ka nginza dä na lege ti carte bancaire wala a kanga ndo ni so.”

Aita ti filiale atokua nginza nga na ambeni ye hio na aita so abungbi si alango na aDa ti Royaume na yâ ti kodoro ni. Agroupe ti azo ni mbage na mbage, so tënë alondo na popo ti ala, akanga alege me ala zia lege na a-oto ti filiale ndali ti so ala hinga so aTémoin ti Jéhovah ayeke yôro ka tere ti ala pëpe na yâ ti poroso.

François atene: “Na ngoi so e yeke gue na mbeni Da ti Royaume, ambeni zo ni so ahonde tere ti ala apika ngombe na ndo ti oto ti e me alê ti ngombe ni ahon na milieu ti e. Mbeni turugu ni aga na mbage ti e na loro, na ngombe na maboko ti lo, e kiri na oto ni na peko, e turnê e kiri na filiale. E kiri singila na Jéhovah so e ngbâ lani na fini so. Na lango so aga na pekoni, aita 130 so ayeke na Da ti Royaume so awara lege ti gue na mbeni nzoni ndo. Ambeni ita ni aga na filiale, na e mû na ala aye so ala yeke na bezoin ni na lege ti yingo nga na ti mitele juska kpale ni ahunzi.”

François atene: “Na peko ti ye so, aita mingi ti yâ ti kodoro ni asû mbeti na aita ti filiale ti kiri singila mingi na ala. Ye so aita ti ala asara na ando nde nde ti mû maboko na ala, a sara si ala kiri azia bê ti ala na Jéhovah mingi.”

Tongana akpale so aga na lege ti aye tongana yengingo ti sese wala ngu so asuku amû ndo wala so azo la ayeke na gonda ni asi na aita ti e, e tene na ala pëpe ala ‘tomba dê na tere ti ala na ala te ye nzoni’. (Jacq. 2:15, 16). Me e gi ti mû na ala ye so ala yeke na bezoin ni na lege ti mitele. Legeoko nga, na ngoi ti akozo Chrétien na pekoni so a fa na ala so mbeni kota nzara ayeke ga, “adisciple . . . aleke na bê ti ala ti tene zo oko oko amû ye alingbi na ye so lo yeke na ni, ti tokua ni si a mû maboko na aita so alango na Judée”.​—Kus. 11:28-30.

E aTémoin ti Jéhovah, e ye mingi ti mû maboko na azo so ayeke na bezoin ti aye ti mitele. Me azo ayeke nga na bezoin ti aye ti yingo (Mat. 5:3). Jésus ahunda na adisciple ti lo ti sara si ambeni zo aga adisciple, ti mû maboko na ala ti hinga so ala yeke na bezoin ti aye ti yingo nga ti kaï bezoin ti ala ni (Mat. 28:19, 20). E oko oko kue e yeke mû mingi ti angoi ti e, ngangu ti e, nga na aye ti e ti sara na kusala so. A-offrande so e yeke mû la bungbi ti Jéhovah ayeke sara kua na ni ti mû maboko na aita na lege ti mitele, me mingi ni, a yeke ti maï na akusala ti Royaume nga ti sara si nzoni tënë amû ndo. Na sarango tongaso, e fa so e ndoye Nzapa nga na amba ti e.​—Mat. 22:37-39.

Azo so ayeke mû a-offrande ti mû maboko na kua ti aTémoin ti Jéhovah na ndo ti sese kue ahinga so a sara kua nzoni nga na lege ni na a-offrande ti ala. Mo lingbi ti mû maboko na aita ti mo so ayeke na yâ ti bezoin? Mo yeke na nzara ti mû mbage na kusala so ayeke sara si azo aga adisciple? Tongana ayeke tongaso, “gbanzi nzoye pëpe na lo so alingbi na ni, tongana ye ni ayeke na tïtî mo ti sara na ni.”​—aProv. 3:27.