Nzoni tambela aga na aye ti nzoni

NA MBENI kete zoa ndulu na Japon, mbeni mama na amolenge ti lo ota ato nda ti manda Bible na aTémoin ti Jéhovah. Kodoro so ala yeke dä ayo mingi na tanga ti akodoro ti zoa ni, na azo ni aluti mingi na ndo ngobo ti salango ye ti kodoro ti ala. Ni la, tongana ala bâ so sewa so ayeke manda Bible, ala to nda ti bi lê ti ala na ngonda tongana ala bâ mama ni. Mama ni atene: “Ye so aso bê ti mbi ayeke pëpe so ala bi lê ti ala na ngonda tongana ala bâ mbi, me a yeke so ala ke ti bala koli ti mbi nga na amolenge ti mbi.” Me kamême lo tene na amolenge ti lo, lo tene: “A lingbi e ngbâ lakue ti bala azo ndali ti iri ti Jéhovah.”​—Matthieu 5:47, 48.

Na yanga-da, lo fa na amolenge ti lo ti kpe azo atâa ala ke ala. Lakue tongana ala mû kutukutu ti gue na ando so ngu ti wâ asigigi na gbe ti sese dä, na lege amolenge ni ayeke manda tongana nyen ti bala azo ni ande kâ. Tongana ala si na ndo ni awe, si ala lï na yâ ti da, ala yeke tene lakue na kota go nga na ngia na yanga, “Konnichiwa!” wala “Bala ala!” Azo kue so ala yeke tingbi na ala, ala yeke bala ala lakue, même tongana azo ni ake ti kiri bala ni na ala. Me kamême azo ni so ayeke bâ nzoni salango ye ti amolenge ni.

Na nda ni, mbeni zo ni ayeda, na ambeni amû peko ti lo, ala tene: “Konnichiwa!” Na peko ti ngu use, mingi ti azo ti gbata ni akiri peko ti abala ti sewa ni na ala. Ala to nda ni nga ti bala tele na popo ti ala na ti sala lisoro na popo ti ala. Ndali ti ye so amolenge ni asala si aye agbian aga tongaso, use mokonzi-gbata ni aye ti gonda ala na lê ti azo. Me mama ni atene na lo so ala yeke sala gi ye so a hunda na aChrétien ti sala. Na pekoni, na ngoi ti mbeni mandako so a hunda na azo ti mû tënë na gbele azo so aga, mbeni oko ti amolenge ni afa tongana nyen mama ti ala afa na ala ti bala azo nzoni atâa ala ke ala. Lo wara kota matabisi ni, na a sû peko ti atënë ti lo ni na yâ ti mbeti-sango ti gbata ni. Laso, sewa ni ayeke na ngia mingi, ngbanga ti so ala bata akpengba-ndia ti aChrétien, na ala wara ye ti nzoni tongaso. Biani, tongana azo ayeke ndulu ti sala lisoro, fango tënë ayeke yapu mingi.