Harmaguédon ayeke mbeni kota futingo ti sese?

HARMAGUÉDON! Tongana mo mä tënë so, ye nyen aga hio na li ti mo? Kota futingo ti ye kue na sese? wala dunia kue so agbi? Na yâ ti ambeni kodoro, na popo ti atënë kue so ayeke na yâ Mbeti ti Nzapa, a yeke tënë ti “Harmaguédon” si amû yanga ti azo. Mingi ni, azo ayeke mû tënë so ti fa aye ti vundu so ala bâ atene ayeke si ande na ndo ti azo. Andokua ti salango alimon ayôro na yâ ti li ti azo a-image ti mbito mingi na ndo gango ti “Harmaguédon”. A honde tâ nda ti tënë ni na a fa na azo atënë kirikiri na ndo ni. Atâa so gbâ ti atënë ayeke na ndo ti Harmaguédon, mingi ni atënë so ague oko pëpe na ye so Bible afa, ndo so a wara tënë ni dä.

Teti so Mbeti ti Nzapa atingbi Harmaguédon na “nda ti ngoi so” wala nda ti sese so, mo yeda pëpe so a yeke kota ye mingi ti gbu nda ti tënë ni mbilimbili? (Matthieu 24:3). Gunda ti tâ tënë ayeke Tënë ti Nzapa. Tongaso, ti hinga mbilimbili kiringo tënë na ndo ti Harmaguédon nga na ye so a ye ti tene teti mo na sewa ti mo, a yeke na lege ni pëpe ti diko ye so lo tene na ndo ni?

Gingo nda ni ayeke fa so Harmaguédon ayeke pëpe mbeni kota futingo ti sese kue, me a yeke zi lege na mbeni nzoni tongo nda ti aye teti azo so ayeke na nzara ti duti na ngia na yâ mbeni fini sese so mbilimbili ayeke dä. Tongana mo gbu li na ndo tâ nda ti tënë Harmaguédon so a fa ni na yâ article ti peko, fade mo yeke hinga nda ti kpengba tâ tënë ti Bible so polele, na bê ti mo ayeke dë.

[Encadŕe/Foto na lembeti  3]

TI MO, HARMAGUÉDON AYEKE NYEN:

• mbeni ngangu bira so afuti azo mingi?

• mbeni futingo ti aye kue so angoro e?

• mbeni kota ndao na popo ti sese na mbeni ye ti le-nduzu?

• mbeni futingo so Nzapa aga na ni na ndo azo ti sioni?