Lege so nzoni ayeke hon ande ndo ti sioni

Gbia David ayeke lani mbeni nzoni zo. Lo ndoye Nzapa mingi, lo ye fango ngbanga ti mbilimbili ngangu na lo yeke na bê ti ndoye teti azo ti mawa. Ye oko, gi oko nzoni gbia so asara lango-sioni na Bath-Séba, wali ti mbeni oko ti aturugu ti lo so lo zia bê ti lo na ala. Na pekoni, David abâ so lo zia ngo na yâ ti wali ni; na nda ni, lo leke aye ti tene a fâ koli ti Bath-Séba. Na pekoni lo sara mariage na Bath-Séba ti honde ndo ti asioni so lo sara.​—2 Samuel 11:1-27.

A YEKE polele so azo alingbi ti sara nzoni mingi. Me ngbanga ti nyen si ala yeke sara aye ti sioni mingi tongaso? Bible afa akota ye so ayeke na gunda ni. Lo fa nga tongana nyen Nzapa ayeke zi ande sioni biaku biaku na lege ti Christ Jésus.

Bibe so apusu zo ti sara gi sioni

Gbia David afa mbeni ye so ayeke na gunda ti sarango aye ti sioni. Na peko ti so a fa na gigi asioni ye so lo sara, lo yeda na ni kue. Na vundu na bê, lo tene: “Bâ, a dü mbi na yâ sioye; na mama ti mbi amë ngo ti mbi na yâ siokpari.” (Psaume 51:7). Nzapa aye lâ oko pëpe ti tene amama adü amolenge so na pekoni ayeke sara siokpari. Ye oko, lâ ni so Eve nga Adam asoro ti ke yanga ti Nzapa, ala girisa ngangu ti ala ti dü amolenge so ayeke na siokpari na tere ti ala pëpe (aRomain 5:12). Tongana azo so ayeke awasiokpari ayeke wu na ndo lê sese, a sigigi polele so bibe ti ala na lâ ni kâ ayeke pusu ala gi ti sara sioni, ngbanga ti so Genèse 8:21 atene so “suma ti bibe ti bê ti zo ayeke sioni, a komanse tongana lo de pendere”.

Tongana zo agi ti kanga lege na ni pëpe, bibe ti sarango sioni so ayeke gue na lo na “lango sioni, . . . kengo tere, gingo tënë, sarango mbanda, ngonzo, papa, tënë ti kangbi, tënë ti secte nde nde, bê” na ambeni sioni sarango ye so Bible atene ayeke “kusala ti mitele”. (aGalate 5:19-21). Ti David, a yeke nzara ti mitele si ague na lo ti sara lango-sioni, ye so aga na aye ti ngangu na ndo ti lo (2 Samuel 12:1-12). Lo lingbi fade ti kanga lege na bibe ti sarango lango-sioni. Nde na so, lo ngbâ ti sara gi nzara ti Bath-Séba. Tongaso, David asara ye so disciple Jacques asara tënë ni ngu mingi na pekoni, lo tene: “Ye so ahanda zo ti sara siokpari ayeke nzara ti tere ti lo mveni so agbu lo na ahanda lo. Na ndani, tongana nzara so amë ngo awe, a dü siokpari; na siokpari, tongana a ga kota awe, adü kui.”​—Jacques 1:14, 15.

Fango azo mingi teti mara ti ala, gbungo na ngangu awali ti lango na ala na gbungo na ngangu akungba ti azo so aturugu asara, so e sara tënë ni na yâ kozo article ni, ayeke atapande ti sioni mingi ti aye so asi tongana azo azia lege na asioni nzara ti bê ti ala ti fa na ala aye ti sarango ni.

Hingango ye pëpe ahuru wâ na gbe ti sioni

Ye so asi lani na bazengele Paul agboto lê na ndo use ye so ayeke na gunda ti sarango aye ti sioni. Na lâ ni so lo kui, azo ahinga lo tongana zo ti nzobe, ti ndoye. Lo mû tere ti lo kue ti sara kua teti aita ti lo aChrétien (1 aThessalonicien 2:7-9). Ye oko, na lâ ti maseka ti lo, so azo ahinga lo na iri ti Saul, lo “hu ngangu na tënë ti zingo na tënë ti fâ azo” na tere ti a-oko Chrétien so (Kusala 9:1, 2). Ngbanga ti nyen Paul ayeda nga lo mû mbage na tere ti azo ti sara sioni na akozo Chrétien? Lo tene ngbanga ti “mbi de mbi hinga pëpe”. (1 Timothée 1:13). Biani, giriri Paul ayeke “na nzara teti Nzapa, me na lege ti hingango ye pëpe.”​—aRomain 10:2.

Tongana Paul, azo mingi so bê ti ala ayeke nzoni abi tere ti ala na yâ sarango aye ti sioni ngbanga ti so tâ hingango ye ti ye so bê ti Nzapa aye atia ala. Ti mû mbeni tapande, Jésus agboto mê ti awamango, lo tene: “Fade ala lungula i na yâ synagogue; biani, fade l’heure ni ayeke ga tongana zo so afâ i atene na bê ti lo, lo yeke sara kusala ti Nzapa.” (Jean 16:2). A-Témoin ti Jéhovah ti ngoi ti e ahinga na lege ti aye so asi na ala so tënë ti Jésus so ayeke tâ tënë. Na akodoro mingi, a sara ngangu na ala na même azo so atene ala yeke sara kua ti Nzapa afâ ala. Biani, mara ti sarango ye na wâ tongaso, me so ayeke na lege ni pëpe, amû ngia na bê ti tâ Nzapa pëpe.​—1 aThessalonicien 1:6.

Zo so ayeke na gunda ti sioni

Jésus afa mbilimbili ndani so sarango sioni ayeke laso. Tongana lo yeke sara tënë na amokonzi-nzapa so aye lani ti fâ lo, lo tene: “I yeke ti babâ ti i zabolo, na i ye ti sara ye so babâ ti i aye. Lo yeke wafango zo giriri kozoni.” (Jean 8:44). Tongaso a yeke lani Satan, ndali ti bibe ti kion so ayeke na yâ ti lo, si ahanda Adam na Eve ti ke yanga ti Nzapa. Kengo yanga so aga na siokpari, so aga na kuâ, kuâ na ndo ti azo kue.

Bibe ti Satan so ayeke ti fâ zo akiri asigigi polele na yâ ti ye so lo sara lani na Job. Lâ ni so Jéhovah azi lege na lo ti tara be-biani ti Job, Satan angbâ gi pëpe na ndo futingo amosoro ti lo kue. Lo sara nga si amolenge ti lo bale-oko kue awara kuâ (Job 1:9-19). Na yâ ti angu so ahon, azo ti sese kue abâ mbeni kota guengo na li ni ti sioni ndali ti siokpari so ayeke na tere ti azo na hingango ndo so atia ala, nga ndali ti so Satan ayôro tere ti lo kue na yâ tënë ti azo. Bible atene so a “bi [Zabolo] na sese, na ala bi a-ange ti lo na sese legeoko na lo.” Oko prophétie ni atene mbilimbili so bingo Satan na sese ayeke sara ande si “vundu aga na sese”. Atâa so Satan alingbi pëpe ti gbu azo na ngangu ti sara asioni ye, lo yeke biani kota “wahanda ti azo ti sese so kue”.​—Apocalypse 12:9, 12.

Lege so a yeke zi bibe so apusu zo ti sara gi sioni

Ti tene a zi biaku biaku na popo ti azo sarango ye ti sioni, a lingbi a lungula bibe so ayeke pusu zo ti sara gi sioni, a mû na zo tâ hingango ye na a zi yamba ngangu ti Satan na ndo azo. Kozoni, tongana nyen ti lungula na yâ bê ti zo bibe so ayeke pusu lo ti sara gi siokpari?

Mbeni wanganga wala mbeni yorö so zo asara alingbi ti sara kua so pëpe. Jéhovah Nzapa asara mbeni yorö ndali ti siokpari so zo ayeke na ni teti azo kue so aye ti mû ni. Bazengele Jean asû na mbeti, lo tene: “Mênë ti Jésus . . . asukula siokpari kue ti e.” (1 Jean 1:7). Na lâ ni so Jésus so ayeke na siokpari na tere ti lo pëpe akui teti e, lo “yô siokpari ti e na tere ti Lo mveni na keke, si e so akui awe ti zia siokpari, e lingbi ngbâ na fini ti sara mbilimbili.” (1 Pierre 2:24). Jésus so akui awe, fade sandaga ti lo ayeke lungula asioni ye so siokpari ti Adam asara na ndo ti e. Paul atene so Christ Jésus aga lani “tongana wen teti azo kue”. (1 Timothée 2:6). Biani, kuâ ti Christ azi lege na azo kue ti sese ti kiri ti wara dutingo ti mbilimbili-kue so Adam agirisa ni ândö.

Me mo lingbi ti hunda ndo: ‘Tongana kuâ ti Jésus so asara laso ngu 2 000 tongaso awe alingbi mû lege na azo ti ga mbilimbili-kue, ngbanga ti nyen si sioni na kuâ angbâ?’ Kiringo tënë na hundango tënë so ayeke mû lege ti zi use ye so ayeke na gunda ti sioni: tâ hingango ye ti aye so Nzapa aye ti sara so atia azo.

Tâ hingango ye asara si nzoni amaï

Tongana mbeni zo ti nzoni bê ahinga biani ye so Jéhovah na Jésus ayeke sara na ndembe so ti zi biaku biaku sioni, ye so alingbi ti kanga lege na lo ti yeda na mbana na asarango ye ti sioni, wala ti sara sioni ye so ayeke ti ga zo so “ayeke sara bira na Nzapa.” (Kusala 5:38, 39). Tongana mbeni zo asara sioni giriri na ngoi so lo de ti hinga Nzapa pëpe, Jéhovah ayeke nduru ti girisa asioye so zo ni asara. Tongana lo yeke lani na gbele azo na gbata ti Athènes, Paul atene na ala: “Ngoi so azo ahinga ye pëpe, Nzapa abâ senge; me fadeso Lo komande azo kue na ndo kue ti changé bê ti ala; teti Lo diko lâ ni so fade Lo fâ ngbanga ti sese so mbilimbili na lege ti Zo so Lo hiri Lo na gigi; Lo sara si azo kue alingbi hinga tënë so ayeke biani teti Lo yä Lo na popo ti awakinda.”​—Kusala 17:30, 31.

Na lege ti aye so asi na lo, Paul ahinga lani so a yä Jésus na popo ti awakinda, teti Jésus lo mveni asara tënë na Paul na lo kanga lege na lo ti tene lo sara ngangu na aChrétien (Kusala 9:3-7). Gi na peko ti so lo hinga biani ye so Nzapa aye ti sara, lo gbian bê ti lo na lo ga biani mbeni nzoni zo so amû tapande ti Christ (1 aCorinthien 11:1; aColossien 3:9, 10). Na ndo ni, Paul afa na wâ “Tene-nzoni so ti royaume”. (Matthieu 24:14). Ngbene ye so a zingo Jésus na kuâ a sara laso ngu 2 000 tongaso awe, Christ ayeke soro na popo ti azo ti sese azo so, tongana Paul, fade ala lë gbia na lo na yâ Royaume ti lo.​—Apocalypse 5:9, 10.

Ti londo na ngu 1900 ti si laso, aTémoin ti Jéhovah asara kue ti tene tokua ti Jésus so aga tâ tënë: “I gue, i fa tënë na amara kue si ala ga adisciple, i batize ala na iri ti Babâ, na ti Molenge, na ti Yingo Vulu; i fa na ala ti bata ye kue so Mbi komande i.” (Matthieu 28:19, 20). Ala so ayeda na bê kue na tokua so ayeke na beku ti duti lakue lakue na gbe ti ngorogbia ti Christ so ayeke na yayu. Jésus atene: “So ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.” (Jean 17:3). Ti mû maboko na mbeni zo ti wara hingango ye so ayeke tâ kota ye ti nzoni mingi so zo alingbi ti sara na mba ti lo.

Ala so ayeda na nzo tënë ti Royaume so alingbi ti fa na yâ sarango ye ti ala aye tongana “ndoye, tâ ngia, siriri, be-nze-pepe, nzobe, bê ti sara nzoye, be-biani, tâ be-ti-molenge, na ngangu ti kanga nzara ti tere”, atâa so asarango ye ti sioni angoro ala (aGalate 5:22, 23). Na tapande ti Jésus, ala ‘kiri sioni pëpe na zo so asara sioni na ala’. (aRomain 12:17). Zo oko oko ayeke sara ngangu ti lo kue ti ‘zia sioni ahon ndo ti lo pëpe, me lo hon ndo ti sioni na lege ti ye ti nzoni.’​—aRomain 12:21; Matthieu 5:44.

Ndangba hongo na ngangu ti nzoni na ndo sioni

Azo mveni alingbi ande lâ oko pëpe ti hon na ngangu Satan Zabolo so ayeke na gunda ti sioni. Ye oko, a ngbâ gi kete, fade Jéhovah na lege ti Jésus ayeke neka li ti Satan (Genèse 3:15; aRomain 16:20). Fade Jéhovah ayeke fa nga na Christ Jésus ti ‘fâ nduru nduru’ aye ti poroso kue so ayeke tambela laso, so mingi na popo ni asara aye ti sioni mingi na yâ mbaï ti azo (Daniel 2:44; Zo-ti-fa-tene 8:9). Na ngoi ti lâ ti fango ngbanga so ayeke ga so, azo kue so ‘ake ti mä Tene-nzoni ti Seigneur ti e Jésus, fade ala wara ngbanga na A futi ala lakue lakue’.​—2 aThessalonicien 1:8, 9; Sophonie 1:14-18.

Gi na peko ti so a yeke pusu ande yamba Satan na azo so amû peko ti lo, fade Jésus so ayeke na yayu kâ ayeke mû maboko na ala so asö kuâ ti leke sese ni ti ga pendere tongana ti so Nzapa aleke ni ândö kozoni. Christ ayeke zingo ande na kuâ azo so alingbi na ni biani ti mû na ala pasa ti duti na ndo sese so akiri aga pendere awe (Luc 23:32, 39-43; Jean 5:26-29). Na sarango tongaso, fade lo miro biaku biaku ambeni sioni sarango ye so azo ahu pono ndali ni.

Jéhovah ayeke gbu azo na ngangu ti sara ye alingbi na nzo tënë ti Jésus pëpe. Me, lo yeke mû na azo pasa ti wara hingango ye so ague na zo ti wara fini. A yeke kota ye ti tene mo gbu biani lege so azi na mo laso! (Sophonie 2:2, 3). Tongana mo sara ni, fade mo yeke hinga lege ti tiri na ye ti sioni kue so ayeke buba fini ti mo laso. Fade mo yeke bâ nga tongana nyen Christ, ti ndangba ni, ayeke hon ande na ngangu sioni.​—Apocalypse 19:11-16; 20:1-3, 10; 21:3, 4.

[Foto na lembeti 5]

Teti so tâ hingango ye atia lani Saul, lo yeda na asioni sarango ye

[Foto na lembeti 7]

Ti mû maboko na mbeni zo ti wara tâ hingango ye ti Nzapa ayeke tâ kota ye ti nzoni mingi so zo alingbi ti sara na mba ti lo