A fa nda ti zo so ayeke na gunda ti aye ti sioni!

NA NGOI ti akozo Chrétien, aJuif mingi ayeke ku gango ti Messie ti zendo (Jean 6:14). Na ngoi so Jésus aga na ndo sese, lo sara si bê ti azo adë nga lo sara si azo ahinga ye nzoni na ndo Mbeti ti Nzapa. Lo kaï kobela, lo mû kobe na azo so nzara asara ala, lo sara si kota pupu akaï nga lo zingo même akuâ (Matthieu 8:26; 14:14-21; 15:30, 31; Marc 5:38-43). Na ndo ni, lo fa peko ti atënë ti Jéhovah nga lo mû na azo zendo ti fini ti lakue lakue (Jean 3:34). Na lege ti aye so Jésus atene nga na aye so lo sara, lo fa polele so lo yeke Messie ni, lo so ayeke zi ande azo na yâ ti siokpari ti ala nga na aye ti sioni so aga na pekoni.

Amokonzi-nzapa ti aJuif alingbi fade ti duti akozo zo ti yambango Jésus, ti mango lo nga ti yengo dä na fango lege ti lo. Ye oko, ala sara ni pëpe. Nde na so, ala ke lo, ala sara ye ti ngangu na lo nga ala mä tere ti fâ lo.​—Marc 14:1; 15:1-3, 10-15.

Jésus asara ye na lege ni tongana lo fâ ngbanga na ndo ti amokonzi-nzapa so, so tënë ayeke na li ti ala (Matthieu 23:33-35). Ye oko, lo hinga so mbeni zo nde ayeke nga na gunda ti aye ti sioni so ayeke na bê ti ala. Lo tene na ala: “I yeke ti babâ ti i zabolo, na i ye ti sara ye so babâ ti i aye. Lo yeke wafango zo giriri kozoni, na lo duti na tene-biani pëpe, teti tene-biani ayeke na yâ lo pëpe. Tongana lo tene mvene, lo sara tënë ti lo mveni, teti lo yeke wamvene na babâ ti mvene.” (Jean 8:44). Atâa so Jésus ahinga so azo alingbi ti sara aye ti sioni, lo fa tâ zo so ayeke na gunda ti aye ti sioni ni: a yeke Satan Zabolo.

Na tenengo so Satan ‘aduti na tene-biani pëpe,’ wala lo ngbâ na yâ ti tâ tënë pëpe, Jésus afa so créature ti yingo so ayeke lani mbeni wakua ti Nzapa so ayeke be-ta-zo, me lo zia nzoni lege so. Ngbanga ti nyen Satan ake yanga ti Jéhovah? Ngbanga ti so lo bâ tere ti lo kota mingi na a sara si lo sara nzara ti tene azo avoro lo ahon ti voro oko tâ Nzapa.a​—Matthieu 4:8, 9.

A bâ lani so Satan ayeke zo ti kengo yanga na ngoi so lo handa Eve na yâ ti yaka ti Eden ti te lê ti keke so Nzapa agbanzi na ala ti te ni. Na tenengo kozo mvene, nga na zongango Jéhovah, Satan asara si lo wani aga “babâ ti mvene.” Na ndo ni, na pusungo Adam na Eve ti ke yanga, Satan asara si ala tï na gbe ti siokpari, na ye so ague na ala nga na ahale ti ala na kuâ. Tongaso, Satan aga nga “wafango zo”, na biani, lo yeke kota zo ti fango zo so ahon atanga ni kue!​—Genèse 3:1-6; aRomain 5:12.

Asioni sarango ye ti Satan asara ye même na ndo ti a-ange so ayeke na yayu, ndo so lo pusu ambeni ti ala ti mû peko ti lo na yâ kengo yanga so (2 Pierre 2:4). Legeoko tongana ti Satan, asioni ange so ayeke bi bê na azo na mbeni lege so ayeke na lege ni pëpe. Ye oko, nde na Satan, asioni ange so abi bê ti ala ti bungbi na azo, na aye so aga na pekoni ayeke sioni mingi.

Sioni amû ndo ti sese kue

Bible atene: “Tongana azo akomanse ti wu . . . na a dü amolenge-wali na ala, Amolenge ti Nzapa abâ so amolenge-wali ti azo ayeke pendere. Ala kamata awali na popo ti azo tongana bê ti ala aye.” (Genèse 6:1, 2). “Amolenge ti Nzapa” ni ayeke lani azo wa? Ala yeke acréature ti yingo, me pëpe azo (Job 1:6; 2:1). E hinga ni tongana nyen? E hinga so a sara lani ngu 1 500 awe so azo ayeke sara mariage na popo ti ala, na a yeke pëpe mbeni ye so a yeke gboto lê ti azo na ndo ni. Tongaso, tongana tondo ni atene so “Amolenge ti Nzapa” so amû tere ti zo abungbi na “amolenge-wali ti azo”, a ye ti sara tënë ti mbeni ye so ade ti si lâ oko pëpe, mbeni ye so ayeke na lege ni pëpe.

Gi na bango amolenge so a-ange adü na awali, zo alingbi ti tene so mara ti bungbingo tongaso ayeke na lege ni pëpe. A iri amolenge so aNephilim, azo so ayo na akono mingi. Ala yeke nga azo so ayeke sara sioni na zo senge senge. Biani, tënë “aNéphili” aye ti tene “azo so akinda azo”, wala “azo so asara si azo atï.” A sara tënë ti azo so tongana “awalombe so ayeke ti giriri, azo so iri ti ala awu mingi.”​—Genèse 6:4.

A-Nephilim na ababâ ti ala asara si aye akiri aga sioni ahon ti kozo. Genèse 6:11 atene so “sese so afuti na gbele Nzapa; sese so asi na sioye ti ngangu.” Biani, azo agi ti sara ye ti ngangu tongana ti asioni ange nga na aNephilim so ayeke na popo ti ala.

Na lege wa aNephilim nga na ababâ ti ala apusu azo ti sara aye ti sioni so? Na lege so ala gi ti sara kusala na nzara ti sarango aye ti sioni so ayeke na bê ti azo. Ye ti pekoni ayeke so wa? Ye ti pekoni ayeke so “mi kue afuti lege ti ala na ndo sese awe.” Na nda ni, Jéhovah afuti azo ti sioni ti ngoi ni so na lege ti Kota Moa, na lo bata gi Noé so ayeke zo ti mbilimbili nga na sewa ti lo (Genèse 6:5, 12-22). Ye oko, a-ange so amû tere ti azo akiri na yayu na kamene. Teti so ala yeke ayingo-sioni, ala ngbâ ti ke Nzapa nga na a-ange ti lo so ayeke be-ta-zo. A lingbi ti bâ so ngbene ye na ngoi ni so, Nzapa akanga lege na asioni ange ti mû tere ti zo (Jude 6). Me, ala ngbâ lakue ti sara ngangu na ndo ti azo.

A fa nda ti zo ti sioni polele!

Na 1 Jean 5:19, Bible afa so aye ti sioni so Satan ayeke na gunda ni amû ndo mingi. Versê ni atene: ‘E hinga e yeke ti Nzapa, na sese so kue ayeke na tïtî wato-sioni.’ Zabolo ayeke sara si azo atï na yâ ti angangu kpale so amû vundu mingi, na akpale ni so angbâ gi lakue ti gue na li ni. Biani, lo leke na bê ti lo ti sara aye ti sioni mingi ahon ti kozo. Ndali ti nyen? Ndali ti so a tomba lo na adémon ti lo na yayu na pekoni so Royaume ti Nzapa abâ gigi na ngu 1914. Na ndo tënë so, Bible atene: “Vundu aga na sese . . . Teti zabolo azu na sese na i na ngonzo mingi, teti lo hinga lâ ti lo angbâ mingi pëpe.” (Apocalypse 12:7-12). Tongaso, na lege wa Satan ayeke sara ngangu na ndo ti azo laso?

Mingi ni, Satan ayeke sara ni na lege so lo yeke maï mbeni bibe so ayeke sara ngangu na ndo pensé ti azo nga na sarango ye ti ala. A yeke ndali ni la si aEphésien 2:2 airi Zabolo “mokonzi ti angangu ti nduzu, yingo [wala, bibe so mingi ni ayeke pusu azo] so ayeke sara na yâ amolenge ti azo so ake tënë.” Ahon ti pusu azo ti kpe mbeto ti Nzapa nga ti sara aye ti nzoni, ‘ngangu ti nduzu’, wala sioni bibe so alondo na ayingo sioni ayeke pusu ala ti ke yanga ti Nzapa nga na akpengba-ndia ti lo. Tongaso, Satan na adémon ti lo ayeke maï aye ti sioni nga ala yeke sara si a ngbâ lakue ti mû ndo.

“Bata bê ti mo”

A yeke hinga mbeni sarango ye ti “yingo” so na lege ti tënë ti porno so amû ndo mingi, so ayeke pusu zo ti sara lango-sioni nga ayeke sara si zo abâ asioni sarango ye tongana aye so ayeke nzoni (1 aThessalonicien 4:3-5). Bungbingo na zo na ngangu, sarango zo na pasi ti wara nzerengo tere dä, gbâ ti azo so abungbi na mbeni wali na ngangu, bungbingo na nyama nga na bungbingo na amolenge ayeke ambeni ye so a yeke fa ni na yâ ti porno ti tene azo abâ wala ala diko ni. Atâa tongana a yeke mbeni porno so afa amara ti aye so dä pëpe la mbeni zo abâ wala lo diko mbeti na ndo ni, ye so lo bâ wala lo diko ayeke sara sioni na ndo ti lo, na a yeke sara si lo ga zo so aye lakue ti bâ porno wala ti diko ambeti na ndo ni.b Bango porno ayeke buba songo ti azo na popo ti ala nga ayeke buba songo ti ala na Nzapa. Aye so a yeke fa na yâ ti porno afa na gigi sioni bibe ti adémon so asara si a mû ndo: ala yeke a-ange so ayeke na bibe ti kengo yanga so ayeke lani na nzara ti bungbi na awali kozoni na ngoi ti Kota Moa ti ngoi ti Noé.

A yeke na lege ni so wandara Salomon amû wango na e, lo tene: “Bata bê ti mo ahon mbeni ye ti mo kue so mo bata, teti lege ti fini kue alondo dä.” (aProverbe 4:23). Ti tene zo abata bê ti lo si lo tï pëpe na yâ ti gbanda ti bango porno, a lingbi ti hunda na lo ti changé limon so lo yeke bâ wala ti kanga ni na ngoi so a fa aye so andu porno dä. Na a yeke kota ye ti sara ni hio nga na bê kue. Sara ye tongana ti mbeni turugu so ayeke gi ti kpe lê ti ngombe so a ye ti pika na bê ti lo. Ye so Satan ayeke gi ti komande ni na ti buba ni ayeke bê ti mo so ayeke pusu mo ti sara ye na ti sara nzara ti ye.

Mo yeke nga na bezoin ti bata bê ti mo si mo ye pëpe sarango aye ti ngangu, ngbanga ti so Zabolo ahinga so ‘Jéhovah ake zo ti sioni na zo so andoye sioye ti ngangu.’ (Psaume 11:5). Ti tene mo ga wato ti Nzapa, Satan ayeke na bezoin pëpe ti sara si mo ga zo ti fango zo; ye so lo yeke sara ayeke ti pusu mo ti ndoye sarango ngangu. A yeke senge ye pëpe so fani mingi, a yeke wara tënë ti aye ti magie na yâ ti alimon so afa sarango ye ti ngangu, na mara ti alimon so asi singo. A-Nephilim ayeke dä mbeni pëpe, me sarango ye ti ala nga na bibe ti ala angbâ lakue! Angia so mo yeke soro ti sara afa so mo yeke ke aye so Satan ayeke sigigi na ni na mayele?​—2 aCorinthien 2:11.

Lege ti ke asioni sarango ye ti Satan

A lingbi ti duti ngangu na zo ti ke asioni sarango ye ti Satan na adémon ti lo. Bible afa polele so azo so ayeke sara ngangu ti sara ye so anzere na Nzapa ayeke “tiri na . . . ayingo sioni” nga na wokongo ti ala wani. Ti tene e sö benda na yâ ti bira so na ti tene Nzapa ayeda na e, e yeke na bezoin ti sara kusala nzoni na gbâ ti aye so Nzapa amû na e.​—aEphésien 6:12; aRomain 7:21-25.

Na popo ti aye so, mo yeke wara yingo vulu ti Nzapa so ayeke kota ngangu so ahon atanga ni kue na yâ ti dunia. Bazengele Paul asû lettre na akozo Chrétien lo tene: “E wara yingo ti sese so pëpe, me e wara Yingo so alondo na Nzapa.” (1 aCorinthien 2:12). Azo so yingo ti Nzapa afa lege na ala ayeke ndoye aye so Nzapa andoye ni nga ala yeke ke aye so Nzapa ake ni (Amos 5:15). Na lege wa zo alingbi ti wara yingo vulu? Kozoni kue na lege ti sambela nga na mandango Bible, so yingo vulu amû lege na azo ti sû ni. Na ndo ni, a lingbi zo ni atambela na azo so andoye Nzapa na bê ti ala kue.​—Luc 11:13; 2 Timothée 3:16; aHébreu 10:24, 25.

Tongana mo sara kusala na aye so Nzapa amû na mo, mo yeke yü “ye ti bira ti Nzapa kue,” so ayeke tâ ye so alingbi ti bata mo nde na “mayele ti zabolo.” (aEphésien 6:11-18). A yeke kota ye ti sara kusala hio fadeso na aye so. Ngbanga ti nyen a yeke kota ye?

A ga nduru ti hunzi aye ti sioni awe!

Zo ti sungo psaume atene so “tongana azo ti sioni ako tongana pere, na tongana ala kue so asara sioye ambumba, a yeke ti futi ala teti lakue.” (Psaume 92:8). Biani, legeoko tongana ti so a si na ngoi ti Noé, guengo na li ni ti aye ti sioni laso afa so Nzapa ayeke nduru ti fâ ngbanga. Lo yeke sara ni gi pëpe na ndo ti azo ti sioni, me lo yeke sara ni nga na ndo ti Satan na adémon ti lo, so fade a yeke zi ngangu so ala yeke sara na kusala kozoni si a futi ala biani biani (2 Timothée 3:1-5; Apocalypse 20:1-3, 7-10). Zo wa la ayeke dë ande ngbanga so? A yeke mbeni zo nde pëpe, me Jésus Christ so Bible asara tënë ti lo atene: “A yeke teti so si Molenge Ti Nzapa aga ti futi kusala ti zabolo.”​—1 Jean 3:8.

Mo yeke na kota nzara ti bâ aye ti sioni ahunzi? Tongana a yeke tongaso, a lingbi mo dë bê ti mo na lege ti azendo so ayeke na yâ ti Bible. Mbeni buku nde so afa polele nda ti Satan, zo so ayeke na gunda ti aye ti sioni, ayeke dä pëpe. Na ndo ni, mbeni buku ayeke dä pëpe so afa tongana nyen a yeke futi ande lo nga na asioni kusala ti lo kue. E wa mo mingi ti gi ti wara tâ hingango ye so ayeke na yâ ti Bible ti mû lege na mo ti bata tere ti mo nde fadeso na asioni sarango ye ti Satan. Nga, e wa mo ti sara kue ti duti na beku ti wara fini na yâ ti mbeni sese so aye ti sioni ayeke ande dä pëpe.​—Psaume 37:9, 10.

[Akete tënë na gbe ni]

[Encadré/Foto na lembeti 6]

Apande so ambeni tâ tënë ayeke kamême na yâ ni

Na ndo ti sese kue, a yeke fa apande na ndo ti azo so a bâ ala tongana anzapa, na ndo ti azo so akono na ayo mingi nga na ndo ti mbeni moa so afâ azo. Na tapande, na yâ ti atënë ti pande ti a-Akkadien, so ayeke ândö na sese ti Mésopotamie na ngoi ti Gilgamesh, a sara tënë ti mbeni moa, ti mbeni mangboko nga na ti ambeni zo so asö kuâ. A sara tënë ti Gilgamesh ni wani tongana mbeni zo ti sarango lango-sioni, mbeni zo so a bâ lo tongana nzapa na so lo sara aye ti ngangu mingi. Atënë ti pande ti a-Aztèque, so ayeke ândö na kodoro ti Mexique asara tënë ti mbeni sese ti giriri so azo ni akono na ayo mingi, nga a sara tënë ti mbeni kota moa. Pande ti aNordique, so ayeke ândö na yâ ti akodoro ti banga-do ti Poto asara tënë ti mara ti ambeni zo so akono na ayo mingi. Pande ti ala ni asara nga tënë ti Bergelmir, mbeni zo ti ndara so asara mbeni kota mangboko nga asö fini ti lo wani nga na ti wali ti lo. Atënë ti pande so kue aye ti gue oko na tënë ti Bible so atene azo kue abâ gigi na lege ti azo so asö kuâ na yâ ti mbeni kota moa so afuti azo ti sioni giriri.

[Foto]

Tableau ti tênë so asara tënë ti ngoi so Gilgamesh ayeke na fini

[Lingu ti foto ni]

The University Museum, University of Pennsylvania (neg. # 22065)

[Foto na lembeti 5]

A yeke bâ sarango ye ti aNephilim na lege ti azo ti laso

[Foto na lembeti 7]

Tâ hingango ye so ayeke na yâ ti Bible amû na e ngangu ti ke asioni sarango ye ti Satan