KIRINGO TËNË NA AHUNDA TI AZO
A-ange alingbi ti mû maboko na e?
Tongana ti so a-ange amû maboko na Daniel, kota wakua ti Nzapa ândö, laso nga ala yeke mû maboko na azo ti bâ nzoni na lege ti nzoni tënë
Jéhovah Nzapa acréé a-ange kutu mingi depuis giriri kozo ti tene lo créé azo (Job 38:4, 7). A-ange ni so ayeke ngangu mingi nga ala yeke sara kua na Nzapa. Ândö giriri, Nzapa atokua ala ngoi na ngoi ti fa lege na awakua ti lo ge na ndo ti sese nga ti bata ala (Psaume 91:10, 11). Laso nga, a-ange ni ayeke mû maboko na azo ti bâ nzoni na lege ti nzoni tënë so adisciple ti Jésus ayeke fa.—Diko Apocalypse 14:6, 7.
A yeke nzoni e sambela a-ange ti tene ala mû maboko na e? Ên-ën. Sambela ayeke mbeni fason ti vorongo Nzapa la, na teti so gi lo oko la a lingbi e voro lo, a yeke nga gi lo oko la a lingbi e sambela lo (Apocalypse 19:10). Teti so a-ange ayeke awakua ti Nzapa, ala yeke sara gi ye so lo fa na ala ti sara ahon ti sara ye so azo afa. Ni la, a yeke nzoni e tene asambela ti e lakue gi na Nzapa, me na lege ti Jésus.—Diko Psaume 103:20, 21; Matthieu 26:53.
Asioni ange ayeke dä?
Legeoko tongana ti azo, Nzapa amû na a-ange liberté ti soro ye so ala ye nga ala lingbi ti soro ti sara nzoni ye wala ti sara sioni ye. Mawa ni ayeke so, a-ange mingi asara kpengbango-li na Nzapa (2 Pierre 2:4). Kozo ange ni ayeke Satan, na pekoni ambeni amû peko ti lo na ala ga adémon. Na yâ ti ambeni ngu so ahon, a tomba Satan lo na adémon ti lo a bi ala ge na sese.—Diko Apocalypse 12:7-9.
Asioni ye nga na sarango ngangu na zo so ague na li ni depuis 1914 afa so Nzapa aga nduru awe ti kanga Satan lo na adémon ti lo. Na pekoni, lo yeke kiri ti leke sese si aga Paradis tongana ti so lo ye lani na tongo nda ni.—Diko Apocalypse 12:12; 21:3, 4.