Mû tapande ti be-nze-pepe ti Jéhovah

“Seigneur ayeke [sara ye yeke, NW ] pëpe tënë ti zendo ti Lo, . . . me bê ti Lo anze na i pëpe.”​—2 PIERRE 3:9.

1. Kota matabisi wa Jéhovah aye ti mû na azo?

JÉHOVAH aye ti mû na e mbeni ye so mbeni zo nde alingbi ti mû na e pëpe. A yeke mbeni ye so ayeke pendere mingi nga ngere ni ane mingi, ye oko, zo alingbi ti vo ni pëpe wala lo lingbi na ni pëpe. Ye ni so ayeke fini ti lakue lakue: so ti tene fini so ayeke hunzi pëpe na yâ paradis na ndo sese (Jean 3:16). A yeke duti ande biani ye ti mû ngia! Aye ti mungo vundu tongana papa, sioye ti ngangu, nzinga, kengo ndia, kobela na même kuâ ayeke hon ande. Fade azo ayeke duti na tâ siriri na beoko na gbe ti komandema ti ndoye ti Royaume ti Nzapa. Bâ tongana nyen e yeke ku kungo paradis so!​—Esaïe 9:5, 6; Apocalypse 21:4, 5.

2. Ngbanga ti nyen Jéhovah ade ti lungula sese ti Satan so pëpe?

² Jéhovah ayeke ku kungo ngoi so fade lo yeke leke paradis na ndo sese. A yeke tâ tënë ngbanga ti so Jéhovah andoye mbilimbili na fango ngbanga ti mbilimbili (Psaume 33:5). A nzere na lo pëpe ti bâ azo ti sese abâ ambilimbili kpengba-ndia ti lo tongana senge ye wala ti ke ni, ti bâ azo ake na mbana yanga-ti-komande ti lo na asara ngangu na azo ti lo. Ye oko, tongana Jéhovah ade ti lungula sioni sese ti Satan so pëpe, ndani ayeke dä. A gue oko na atënë ti ye so lo bâ ayeke nzoni wala sioni nga na yanga-ti-komande ti lo. Na lekengo atënë so, Jéhovah ayeke fa na gigi mbeni pendere sarango ye ti lo so ayeke be-nze-pepe, so atia azo mingi.

3. (a) Nda ti tënë ti Grec na Hébreu so a kiri pekoni na “be-nze-pepe” na yâ ti Bible ayeke nyen? (b) Fade e yeke bâ ahundango tënë wa?

³ Tënë ti Grec so a sû pekoni na “be-nze-pepe” aye mbilimbili ti tene “yongo ti bibe.” Bible ti Sango akiri pekoni fani mingi na tënë “be-nze-pepe,” “bê so anze pëpe” na “bê . . . anze pëpe.” Atënë ni use kue ti Hébreu na ti Grec so a sû pekoni na “be-nze-pepe” aye ti tene ti kanga bê na ti sara ngonzo hio pëpe. Tongana nyen be-nze-pepe ti Jéhovah asara nzoni na e? Aye wa e lingbi ti manda na ndo be-nze-pepe nga na kangango bê ti Jéhovah na ti awakua be-ta-zo ti lo? E hinga tongana nyen so be-nze-pepe ti Jéhovah ayeke na katikati? Zia e bâ tënë so.

E bâ be-nze-pepe ti Jéhovah

4. Tënë wa bazengele Pierre asû na ndo be-nze-pepe ti Jéhovah?

⁴ Na ndo be-nze-pepe ti Jéhovah, bazengele Pierre asû tënë so: “I girisa ye oko so pëpe, i so mbi ndoye i mingi; na lê ti Seigneur, lâ oko ayeke tongana ngu kutu oko, na ngu kutu oko ayeke tongana lâ oko. Seigneur ayeke [sara ye yeke, NW ] pëpe tënë ti zendo ti Lo, na lege so ambeni zo abâ [sarango ye yeke, NW ]; me bê ti Lo anze na i pëpe, Lo ye mbeni zo oko akui pëpe, me Lo ye azo kue achangé bê ti ala.” (2 Pierre 3:8, 9). Zia e bâ atënë use so asigigi ge so alingbi ti mû maboko na e ti gbu nda ti be-nze-pepe ti Jéhovah.

5. Tongana nyen lege so Jéhovah ayeke diko ngoi andu sarango ye ti lo?

⁵ Kozo tënë ni ayeke so Jéhovah adiko ngoi tongana ti e pëpe. Ti Lo so ayeke kpu na kpu, ngu “kutu” wala saki oko ayeke gi lango oko. Hongo ti ngoi alingbi ti kanga lege na lo wala ti pusu lo na ngangu ti sara ye pëpe, na lo yeke sara ye yeke yeke pëpe. Teti ndara ti lo ayeke na katikati pëpe, Jéhovah ayeke ku mbilimbili ngoi ti sara ye teti nzoni ti azo kue, na lo yeke ku na be-nze-pepe ngoi ni so. Ye oko, zia e tene pëpe so Jéhovah ayeke bi bê oko pëpe na apasi so awakua ti lo ayeke bâ. Lo yeke Nzapa ti “be-nzoni,” lo so ayeke tâ ndoye ni mveni (Luc 1:78; 1 Jean 4:8). Lo lingbi ti lungula teti biaku biaku sioye kue so pasi so lo zia lege na ni teti kete ngoi aga na ni.​—Psaume 37:10.

6. Tënë wa ayeke nzoni e tene pëpe na ndo Nzapa? Ngbanga ti nyen?

⁶ Biani, a yeke kete ye pëpe ti ku a ninga ye so mo ye ti wara (aProverbe 13:12). Ni la, tongana azo asara ye hio alingbi na azendo ti ala pëpe, ambeni ayeke tene so ala leke fade na bê ti ala ti sara ni pëpe. A yeke lege ti ndara oko pëpe ti tene tënë tongaso na ndo ti Nzapa! Tongana e handa tere ti e, e tene Nzapa ayeke sara ye gi yeke yeke, hongo ti ngoi alingbi ti sara si e dë kite nga bê ti e anze, na e lingbi ti lango na lege ti yingo. Na ye so ayeke sioni mingi ayeke so, azo so Pierre agboto mê ti e kozo ndali ti ala tongana awahengo ndo, wala azo so ayeke na mabe pëpe, alingbi ti handa e. Na hengo ndo azo so atene: “Zendo ti singo ti Lo ayeke na ndo wa? teti, a komanse na lâ ni so akotara alango awe, ye kue angbâ legeoko tongana a yeke giriri, a komanse na lâ ni so A créé ye kue.”​—2 Pierre 3:4.

7. Kamba wa ayeke na popo ti be-nze-pepe ti Jéhovah na nzara ti lo ti tene azo achangé bê ti ala?

⁷ Use tënë ni so Pierre agboto lê na ndo ni ayeke so Jéhovah asara ye na be-nze-pepe ngbanga ti so lo ye si azo kue achangé bê ti ala. Azo so na kpengbango li ake ti zia asioni lege ti ala, fade Jéhovah afuti ala. Ye oko, Nzapa awara ngia na yâ kui ti zo ti sioni pëpe; me lo ye si azo agbian bê ti ala, azia sioni lege ti ala, na ala ngbâ na fini (Ezéchiel 33:11). Ndani la lo sara ye na be-nze-pepe ti tene a fa nzo tënë na ndo sese kue si ala wara ngoi nzoni ti mä tënë ni si ala ngbâ na fini.

8. Na lege wa a bâ be-nze-pepe ti Nzapa na yâ ye so lo sara na mara ti Israël?

⁸ A bâ nga be-nze-pepe ti Jéhovah na yâ ye so lo sara giriri na mara ti Israël. Teti angu ngbangbo mingi, lo kanga bê ti lo na gbele kengo yanga ti ala. Na lege ti aprophète ti lo, fani mingi Jéhovah awa ala, lo tene: “I zia sio lege ti i, na i bata komandema na kpengba-tene ti Mbi, ndia kue so Mbi mû na akotara ti i na ndia so Mbi to na i na lege ti aprophète, aboi ti Mbi.” Na ala sara ye tongana nyen? Mawa ni ayeke so “ala mä tënë pëpe”.​—2 aGbia 17:13, 14.

9. Tongana nyen Jésus afa na gigi be-nze-pepe ti Babâ ti lo?

⁹ Na nda ni, Jéhovah ato Molenge ti lo so anze pëpe ti iri aJuif ti kiri ti leke songo na Nzapa. Jésus afa na lege so ayeke mbilimbili-kue be-nze-pepe ti Babâ ti lo. Na hingango nzoni so a ngbâ na lo ngoi mingi pëpe ti tene a fâ lo, Jésus adema, lo tene: “Jérusalem, Jérusalem, mo so mo fâ aprophète, na mo bolo na tênë azo so Nzapa ato ala na mo! Lege mingi Mbi ye ti bungbi amolenge ti mo, legeoko tongana mama ti kondo abungbi amolenge ti lo na gbe ti kpangbi ti lo, na i ye pëpe!” (Matthieu 23:37). Atënë so, so alondo tâ na bê ti lo, ayeke pëpe atënë ti mbeni juge so nzobe atia lo, so ayeke nduru ti fâ gi ngbanga na ndo mbeni zo; me a yeke atënë ti mbeni kamarade ti nzobe so asara ye na be-nze-pepe. Tongana Babâ ti lo na yayu, Jésus aye lani ti tene azo agbian bê ti ala si ala kpe ngbanga so ayeke fâ na ndo azo ti sioni. Lani ambeni ayeda na agbotongo mê ti Jésus na ala kpe ngbanga ti ngangu so atï lani na ndo Jérusalem na ngu 70.​—Luc 21:20-22.

10. Na lege wa e wara nzoni na yâ be-nze-pepe ti Nzapa?

¹⁰ Be-nze-pepe ti Nzapa ayeke mbeni pendere ye pëpe? Atâa so azo ti sese ayeke ke yanga na mbana, Jéhovah amû na e oko oko kue nga na azo kutu mingi lege ti hinga lo na ti yeda na beku ti wara salut. Bazengele Paul asû tënë so na afon lo Chrétien: “A lingbi i bâ be-nze-pepe ti Seigneur ti e tongana salut.” (2 Pierre 3:15). So be-nze-pepe ti Jéhovah azi na e lege ti wara salut, e kiri singila na lo pëpe? Zia e sambela Jéhovah ti ngbâ ti fa be-nze-pepe ti lo na e tongana e yeke sara na lo lâ na lâ.​—Matthieu 6:12.

11. Ti hinga nda ni so Jéhovah ayeke fa be-nze-pepe ayeke pusu e ti sara nyen?

¹¹ Tongana e hinga ndani so Jéhovah ayeke fa be-nze-pepe, a yeke mû maboko na e ti ku salut so lo yeke ga na ni, teti na nda ni e yeke tene pëpe so lo ne nengo ti sara si azendo ti lo aga tâ tënë (Toto ti Jérémie 3:26). Na ngoi so e ngbâ ti sambela ti tene Royaume ti Nzapa aga, e yeke na beku so lo Nzapa, lo hinga mbilimbili lango ti kiri tënë na sambela so. Na ndo ni, bê ti e apusu e ti mû tapande ti Jéhovah na fango na gigi be-nze-pepe tongana lo na yâ sarango ye ti e na aita ti e nga na azo so e fa tënë na ala. E nga e ye ti tene mbeni zo akui pëpe, me e ye ti bâ ala changé bê ti ala na ti duti na oko beku ti fini ti lakue lakue so e yeke na ni.​—1 Timothée 2:3, 4.

E bâ be-nze-pepe ti aprophète

12, 13. Tongana ti so Jacques 5:10 atene, tongana nyen lani prophète Esaïe afa na gigi be-nze-pepe?

¹² Ti bâ be-nze-pepe ti Jéhovah ayeke mû maboko na e ti gonda ni nga ti maï ni. A yeke ngangu na azo so ayeke awasiokpari ti maï be-nze-pepe na yâ sarango ye ti ala, me ala lingbi ti sara ni. E manda ni na ndo awakua ti Nzapa ti giriri. Disciple Jacques asû na mbeti: “Aita, i kamata tapande ti aprophète so asara tënë na iri ti Seigneur giriri, i bi bê ti i na tënë ti pono na be-nze-pepe ti ala.” (Jacques 5:10). A yeke ye ti dengo bê na ti mungo ngangu ti hinga so ambeni zo ândö awara lege nzoni ti hon ndo ti amara kpale so e yeke na ni.

¹³ Na tapande, prophète Esaïe ayeke lani na bezoin ti be-nze-pepe na yâ kusala ti lo. Jéhovah afa ni na lo tongana lo tene: “Gue, mo tene na azo so, I mä ndo biani, me i hinga nda ni pëpe; i bâ ndo biani, me i bâ nda ni pëpe. Sara si bê ti azo so aga mafuta, sara si mê ti ala amä ndo nzoni pëpe, na kanga lê ti ala; wala peut-être fade ala bâ na lê ti ala, ala mä na mê ti ala, ala hinga nda ti ye na bê ti ala, na ala changé lege ti ala si A lungula kobela ti ala.” (Esaïe 6:9, 10). Atâa so azo ni amä lo pëpe, na be-nze-pepe Esaïe atene atokua ti Jéhovah teti ngu 46 tongaso! Legeoko nga, fade be-nze-pepe ayeke mû maboko na e ti gbu ngangu na yâ fango nzo tënë ti e, même tongana azo mingi ake ti mä.

14, 15. Ye wa amû lani maboko na Jérémie ti hon ndo ti aye ti ngangu nga na nzengo bê?

¹⁴ Ti bâ ye so nzoni, lani tongana aprophète asara kua ti ala, kpale ni ayeke gi kengo tënë ti azo ni pëpe; ala bâ nga pasi na ye ti ngangu. A zia lani Jérémie na yâ olombo, a kanga lo na yâ ti da, na a bi lo na yâ mbeni dungu (Jérémie 20:2; 37:15; 38:6). Lo hu apono so na maboko ti azo so lo ye ti mû maboko na ala. Ye oko, Jérémie abata ngonzo na bê ti lo pëpe, wala lo gi ti futa kula pëpe. Lo kanga bê ti lo teti angu mingi.

¹⁵ Ye ti ngangu na hengo ndo akanga lani yanga ti Jérémie pëpe, na aye so ayeke kanga yanga ti e nga laso pëpe. Tâ tënë, ngoi na ngoi bê ti e alingbi ti nze. Bê ti Jérémie anze lani. Lo sû na mbeti: “Tënë ti L’Eternel aga ye ti zonga na lê ti mbi, na ye ti he lakue. Na . . . mbi tene, Fade mbi sara tënë ti Lo pëpe, wala mbi sara tënë na iri ti Lo mbeni pëpe.” Ye nyen asi na pekoni? Jérémie azia lani ti fa tënë? Tënë ni angbâ na yanga ti lo: “Ye [tënë ti Nzapa] aga na yâ bê ti mbi tongana wâ so agbi ye, a gbi na yâ bio ti mbi; mbi woko na lege ti batango ye so, na mbi lingbi bata ye so na yâ mbi mbeni pëpe.” (Jérémie 20:8, 9). Bâ so na ngoi so Jérémie azia lani bê ti lo na ndo hengo ndo ti azo ni, lo girisa ngia ti lo. Me tongana lo zia lê ti lo na ndo pendere nga na nene ti tokua so, ngia ti lo akiri. Na ndo ni, Jéhovah ayeke lani na Jérémie “tongana walombe ti ngangu,” ti kpengba lo si lo fa tënë ti Nzapa na wâ nga na mbeto pëpe.​—Jérémie 20:11.

16. Tongana nyen e lingbi ti bata ngia ti e na yâ kusala ti e ti fango nzo tënë?

¹⁶ Jérémie ayeke lani na ngia na yâ kusala ti lo? Biani! Lo tene na Jéhovah: “A wara tënë ti Mo, na mbi te awe, tënë ti Mo aga ye ti ngia na tâ ngia na bê ti mbi; teti a di iri ti Mo na ndo mbi, O L’Eternel Nzapa Ti Sabaoth.” (Jérémie 15:16). Jérémie awara ngia na yâ matabisi ti lo ti sara kua na iri ti tâ Nzapa na ti fa tënë ti lo. E nga e lingbi ti wara ngia. Na ndo ni, legeoko tongana a-ange ti yayu, e yeke na ngia ti bâ azo mingi ti ndo lê sese kue ayeda na tokua ti Royaume, achangé bê ti ala na ala mû lege ti fini ti lakue lakue.​—Luc 15:10.

‘Job so agbu ngangu’

17, 18. Na lege wa lani Job agbu ngangu? Na ye ni ahunzi tongana nyen?

¹⁷ Tongana lo hunzi ti sara tënë na ndo aprophète ti giriri awe, disciple Jacques atene: “I mä tënë ti Job so lo gbu ngangu, na i bâ ye so Seigneur asara na lo na nda ni, teti Seigneur asi na be-ti-ndoye na be-nzoni.” (Jacques 5:11). Nda ti tënë ti Grec so a kiri pekoni ge na “gbu ngangu” akpa tere na ti so Jacques asû ni na versê 10 na “be-nze-pepe”. Ti fa kangbi so ayeke na popo ti atënë use so, mbeni wandara asû tënë so: “Kozo tënë ni andu kangango bê tongana a sara sioni na e, na tanga ni andu bê so azia pëpe na gbe ti ye ti ngangu.”

¹⁸ Kota ye ti vundu asi lani na Job. Mosoro ti lo kue afuti, amolenge ti lo akui kuâ ti ngangu na lo bâ pasi na kobela. Lo tiri nga na atënë ti wataka so atene a yeke Jéhovah si ayeke sara na lo pasi so kue. Lani Job adema gi na yâ ti lo pëpe; lo tene dutingo ti ni na même mbilimbili ti ni ahon ti Nzapa (Job 35:2). Ye oko, mabe ti lo atï pëpe, na lo ngbâ be-ta-zo na Nzapa. Lo zonga lani Nzapa pëpe tongana ti so Satan atene lani so lo yeke sara ni (Job 1:11, 21). Nyen la asi na nda ni? Jéhovah “airi tënë nzoni na ndo lâ ti nda ni ti Job ahon ti lâ ti kozoni.” (Job 42:12). Jéhovah akiri na seni ti Job, akono mosoro ti lo fani use na lo futa lo na lege so lo na sewa ti lo akiri awara ngia mingi. Teti so Job agbu ngangu na lo ngbâ be-ta-zo, a mû lege na lo lani ti hinga Jéhovah nzoni mingi.

19. Ye wa e manda na ndo gbungo ngangu ti Job so akanga bê?

¹⁹ Ye wa e manda na ndo gbungo ngangu ti Job so akanga bê? Tongana Job, e lingbi ti hu pono na kobela wala na ambeni ye ti ngangu. E lingbi ti hinga kue pëpe ndani so Jéhovah azia si e bâ pasi na mbeni ye ti ngangu. Ye oko, zia e hinga na bê ti e tënë so: tongana e ngbâ be-ta-zo, fade e yeke wara adeba nzoni. Lâ oko Jéhovah amanke ti futa ala so agi lo pëpe (aHébreu 11:6). Jésus atene lani: “Zo so agbu ngangu juska na nda ni, fade A sö lo.”​—Matthieu 10:22; 24:13.

‘Fade lâ ti Jéhovah aga’

20. Ngbanga ti nyen e hinga biani so fade lâ ti Jéhovah ayeke ga?

²⁰ Atâa so Jéhovah ayeke sara ye na be-nze-pepe, lo yeke sara nga ye mbilimbili na lo yeke kanga ande lê lakue pëpe na ndo sioni. Be-nze-pepe ti lo ayeke na katikati ni. Pierre atene: ‘[Nzapa] abata sese ti giriri pëpe.’ Atâa so lani a bata fini ti Noé na ti sewa ti lo, sese ni so ake Nzapa awara futingo na lege ti ngu. Jéhovah afuti nga Sodome na Gomorrhe na lege so lo gbi ala na wâ. Angbanga so aga “tapande teti azo so aduti na lege ti ke Nzapa.” Ti so ni so, zia e hinga ye oko: “Fade lâ ti [Jéhovah] aga.”​—2 Pierre 2:5, 6; 3:10.

21. Tongana nyen e lingbi ti fa be-nze-pepe nga na gbungo ngangu ti e? Tënë wa e yeke bâ ande na yâ article ti peko?

²¹ Tongaso, zia e mû tapande ti be-nze-pepe ti Jéhovah na lege so e yeke mû maboko na azo ti gbian bê ti ala si ala lingbi ti sö kuâ ande. Zia e mû nga tapande ti aprophète so, na be-nze-pepe, afa nzo tënë atâa so ambeni zo adengi mê oko pëpe. Na ndo ni, e lingbi ti hinga so fade Jéhovah ayeke iri tënë nzoni na ndo ti e mingi, tongana e gbu ngangu tongana Job na e bata be-biani ti e. E yeke na anda ti tënë kue ti wara ngia na yâ kusala ti e tongana e bâ lege so Jéhovah airi tënë nzoni na ndo ngangu so azo ti lo asara ti fa nzo tënë na ndo sese mobimba. Fade e yeke bâ tënë so na yâ article ti peko.

Mo dabe mo na ni?

• Ngbanga ti nyen Jéhovah afa be-nze-pepe?

• E manda nyen na ndo be-nze-pepe ti aprophète ti Jéhovah?

• Tongana nyen lani Job afa so lo gbu ngangu? Ye wa asi na lo na nda ni?

• Tongana nyen e hinga so be-nze-pepe ti Jéhovah ayeke na katikati?

[Foto na lembeti 18]

Jésus afa na lege so ayeke mbilimbili-kue be-nze-pepe ti Babâ ti lo

[Afoto na lembeti 20]

Tongana nyen Jéhovah afuta be-nze-pepe ti Jérémie?

[Afoto na lembeti 21]

Tongana nyen Jéhovah afuta Job teti gbungo ngangu ti lo?