Kanga bê tongana ti Jéhovah na Jésus

“Bâ kangango bê ti Seigneur ti e tongana salut.”​—2 PI. 3:15.

KIRINGO TËNË NI AYEKE SO WA?

Na lege wa Jéhovah afa so lo kanga bê?

Ngbanga ti nyen a lingbi Jésus akanga bê teti angu mingi?

Nyen la e lingbi ti sara ti kanga bê tongana ti Nzapa?

1. Tënë wa la ambeni zo so ayeke be-ta-zo ayeke hunda?

MBENI ita-wali be-ta-zo so agbu ngangu teti angu mingi na yâ ti aye ti ngangu ahunda, a tene: “Mbi yeke bâ ande nda ni kozoni si mbi kui?” Ambeni zo so asara na Jéhovah teti angu mingi ayeke hunda mara ti tënë so. E yeke ku kungo lango so Jéhovah ayeke sara si aye kue aga fini, na zingo akpale kue so e yeke wara laso (Apoc. 21:5). Atâa so e yeke na araison mingi ti hinga na bê ti e kue so a ga nduru awe ti futi dunia ti Satan, a lingbi ti duti ngangu ti kanga bê ti ku lango ni so.

2. Ahundango ndo wa so andu kangango bê e yeke sara tënë na ndo ni?

² Bible afa so a lingbi e kanga bê. Na tapande ti awakua ti Nzapa ti giriri, e yeke wara ande aye so Nzapa amû zendo ni tongana e yeke na kpengba mabe nga e kanga bê e ku ngoi so lo yeke sara ande si azendo ti lo ni aga tâ tënë. (Diko aHébreu 6:11, 12.) Jéhovah lo wani akanga bê. Lo lingbi ti hunzi aye ti sioni na ngoi kue, me lo yeke ku ngoi so alingbi biani (aRom. 9:20-24). Ngbanga ti nyen la lo kanga bê tongaso? Na lege wa Jésus amû tapande ti Babâ ti lo so ahinga ti kanga bê nga lo zia na e mbeni tapande? Aye ti nzoni wa e yeke wara tongana e kanga bê tongana ti Nzapa? Akiringo tënë na ahundango ndo so ayeke mû maboko na e ti kanga bê nga ti duti na kpengba mabe, même tongana na lê ti e e bâ so Jéhovah asara ye hio pëpe.

NGBANGA TI NYEN JÉHOVAH AKANGA BÊ?

3, 4. (a) Ngbanga ti nyen la Jéhovah akanga bê? (b) Na ngoi so Adam na Ève ake yanga, nyen la Jéhovah asara?

³ Jéhovah ayeke na nzoni raison ti kanga bê. A yeke tâ tënë so na ngoi kue lo la lo yeke na ngangu na ndo ti aye kue na yâ ti dunia; me kengo yanga so alondo lani na Éden asara si ambeni kota hundango tënë so andu a-ange nga na azo abâ gigi. Jéhovah akanga bê, lo hinga so ti kiri tënë na ahundango tënë so na mbeni lege so alingbi kue ahunda ngoi. Teti so lo hinga nzoni mingi sarango ye nga na apensé ti a-ange nga na ti azo oko oko kue, ye so lo sara ayeke biani ndali ti nzoni ti e.​—aHéb. 4:13.

⁴ Ye so Jéhovah aleke lani ti sara ayeke ti tene ahale ti Adam na Ève amû ndo ti sese kue. Na ngoi so Satan ahanda Ève, nga Adam ake yanga, Nzapa azia pëpe lege ti ye so lo leke ti sara. Tere ti lo adö pëpe, lo mû desizion na loro pëpe, wala lo dö sewa ti azo lo zia pëpe. Me, lo leke mbeni ye ti sara ti tene ye so lo leke ti sara teti azo nga na sese aga tâ tënë (És. 55:11). Ti sara si ye so lo leke ti sara aga tâ tënë nga ti fa so lo la lo yeke na droit ti komande dunia, Jéhovah akanga nzara ti bê ti lo nga lo kanga bê, lo ku même teti angu saki mingi ti tene ambeni ye so lo leke ti sara atambela na mbeni lege so ayeke nzoni mingi.

5. Nzoni raison wa ndali ni Jéhovah akanga bê lo ku?

⁵ Mbeni raison so ndali ni Jéhovah akanga bê lo ku ayeke so azo mingi alingbi ti wara fini ti lakue lakue. Ti fadeso, lo yeke leke aye ti sö “azo mingi mingi”. (Apoc. 7:9, 14; 14:6). Na lege ti fango tënë, Jéhovah ayeke tisa azo ti tene ala manda ye na ndo ti Royaume ti lo nga na aye so lo hunda ti tene azo asara so ayeke mbilimbili. Tënë ti Royaume la ayeke “nzoni tënë” teti azo. Ni la ayeke nzoni sango so ahon atanga ni kue (Mat. 24:14). Zo kue so Jéhovah atisa lo ayeke ga mbeni membre ti bungbi so ayeke na ndo ti sese kue ti atâ kamarade so andoye ye so ayeke mbilimbili (Jean 6:44-47). Nzapa so asara ye na ndoye ayeke mû maboko na azo tongaso ti nzere na lo. Lo soro nga ambeni zo ti ga amembre ti ngorogbia ti lo na yayu. Tongana ala gue na yayu, ala yeke mû ande maboko na azo so amä yanga ti lingbi kue nga ti wara fini ti lakue lakue. Biani, même na ngoi so Jéhovah angbâ ti kanga bê ti ku, lo yeke sara kusala ti tene azendo ti lo aga tâ tënë. Aye so kue ayeke ndali ti nzoni ti e.

6. (a) Na lege wa Jéhovah akanga bê na ngoi ti Noé? (b) Na lege wa Jéhovah akanga bê na ngoi ti e?

⁶ Jéhovah akanga bê même na ngoi so azo asara aye so ayeke sioni mingi ti son bê ti lo. Na tapande, gbu li na ndo ti ye so lo sara na gbele aye ti sioni kozoni na kota ngu so apika na ngoi ti Noé. “Vundu agbu bê” ti Jéhovah lani ndali ti so azo asara si lango-sioni nga na sarango ngangu na zo amû ndo kue, nga ala ye ti sara gi ye ti sioni (Gen. 6:2-8). Lo zia lani lege na aye ti sioni ti gbâ lakue lakue pëpe. Ni la lo sara si kota ngu-nzapa apika afuti azo so ake yanga. Na ngoi so Jéhovah “angbâ lani ti kanga bê ti ku na ngoi ti Noé,” lo leke aye ti sö Noé na azo ti sewa ti lo (1 Pi. 3:20). Na ngoi so alingbi, Jéhovah atene na Noé tënë ti kota ngu-nzapa so ayeke pika nga lo hunda na lo ti leke mbeni arche (Gen. 6:14-22). Jéhovah aye nga si Noé atene na azo tënë ti futingo so ayeke pusu nduru nduru. Bible atene so Noé ayeke lani “wafango tënë ti ye so ayeke mbilimbili”. (2 Pi. 2:5). Jésus atene ngoi ti e ayeke tongana ngoi ti Noé. Jéhovah asoro awe ngoi so lo yeke futi ande sioni dunia so, me zo oko ahinga pëpe ‘lango nga na ngbonga so’ futingo ni ayeke si na ni (Mat. 24:36). Laso, Nzapa ahunda na e ti gboto mê ti azo nga ti fa na ala tongana nyen ti sö kuâ.

7. Jéhovah asara ye hio pëpe ti sara si azendo ti lo aga tâ tënë? Fa ndani.

⁷ Biani, so Jéhovah akanga bê aye pëpe ti tene so lo ku gi senge ti tene ngoi ahon. Nga, a lingbi e pensé pëpe so lo yeke bi bê na ndo ti e pëpe wala lo yeke bâ lege ti e pëpe. Me a yeke ngangu pëpe ti pensé tongaso tongana e yeke ga mbakoro wala e yeke bâ pasi na yâ ti sioni dunia so. Bê ti e alingbi ti nze wala e bâ so Nzapa asara ye hio pëpe ti sara si azendo ti lo aga tâ tënë (aHéb. 10:36). Girisa pëpe so lo yeke na anzoni raison ti kanga bê nga so lo yeke sara kusala na ngoi ni so ti tene awakua be-ta-zo ti lo abâ nzoni dä (2 Pi. 2:3; 3:9). Zia e bâ fadeso tongana nyen la Jésus amû tapande ti Babâ ti lo so akanga bê.

NA LEGE WA JÉSUS AZIA NZONI TAPANDE TI KANGANGO BÊ?

8. Na yâ ti aye wa la Jésus akanga bê?

⁸ Jésus asara ye so bê ti Nzapa aye nga lo yeke na ngia ti sara ni teti angu saki mingi. Na ngoi so Satan ake yanga lani, Jéhovah asoro ti tene oko Molenge ti lo aga na ndo ti sese tongana Messie. Bâ tongana nyen Jésus akanga bê na ngoi so lo yeke ku teti angu saki mingi ti tene ngoi ni so alingbi. (Diko aGalate 4:4.) Na yâ ti ngoi so kue lo duti gi senge senge ti ku ape. Lo sara kusala so Babâ ti lo amû na lo. Na ngoi so lo ga na sese, lo hinga so Satan ayeke fâ lo, tongana ti so prophétie afa (Gen. 3:15; Mat. 16:21). Lo kanga bê lo sara ye so bê ti Nzapa aye, atâa so a hunda ti tene lo bâ pasi juska lo kui. Jésus abi bê ti lo na ndo ti lo wani pëpe. Lo sara tere ti lo kete nga lo yeke nduru ti bâ pasi atâa so lo yeke Molenge ti Nzapa. Jésus ayeke mbeni tapande so alingbi kue na ndo ti tënë ti dutingo be-ta-zo na Nzapa, nga a yeke nzoni e mû tapande ti lo.​—aHéb. 5:8, 9.

9, 10. (a) Nyen la Jésus asara na ngoi so lo ku Jéhovah? (b) Na lege wa e lingbi ti gi ti duti na mara bango ndo ti Jésus?

⁹ Na pekoni so a zingo Jésus na kuâ, a mû na lo komandema na yayu nga na sese (Mat. 28:18). Lo sara kusala lakue na komandema ni so ti sara si ye so Jéhovah aleke ti sara aga tâ tënë alingbi na ngoi so Jéhovah asoro. Jésus aduti na mbage ti maboko ti Nzapa ti koli lo kanga bê lo ku juska na ngu 1914 ti tene a zia awato ti lo tongana mbata ti gere ti lo (Ps. 110:1, 2; aHéb. 10:12, 13). Na yâ ti kete ngoi lo yeke futi dunia ti Satan. Na ngoi so Jésus ayeke ku, lo yeke kanga bê ti mû maboko na azo ti nzere na lê ti Nzapa nga lo gue na ala na “ngu so ayeke mû fini na zo.”​—Apoc. 7:17.

¹⁰ Mo bâ tongana nyen mo lingbi ti gi ti duti na bango ndo ti Jésus? Lo hinga so Jéhovah asoro mbeni ngoi ti londo ti sara ye. Tâ tënë, Jésus aye mingi ti sara ye so Babâ ti lo ahunda na lo. Me lo yeke nduru ti ku ngoi so Nzapa asoro. Na ngoi so e yeke ku futingo ti dunia ti Satan, e kue e yeke na bezoin ti kanga bê. A lingbi e ku ti tene Nzapa afa lege na e nga e zia lege ni pëpe tongana bê ti e anze. Nyen la e lingbi ti sara ti duti na mara ti kangango bê so?

NA LEGE WA MBI LINGBI TI KANGA BÊ TONGANA TI NZAPA?

11. (a) Na lege wa mabe so zo ayeke na ni alingbi ti mû lege na lo ti kanga bê? (b) Ngbanga ti nyen e yeke na nzoni raison ti duti na kpengba mabe?

¹¹ Kozo si Jésus aga na sese, aprophète nga na ambeni wakua be-ta-zo ti Nzapa afa na lege ti tapande ti ala so même azo so siokpari ayeke na tere ti ala alingbi ti kanga bê ti gbu ngangu. Mabe ti ala amû lege na ala ti kanga bê. (Diko Jacques 5:10, 11.) Tongana ala mä na bê biani pëpe na azendo so Jéhovah amû na ala, tongana mabe ti ala awoko, ala yeke kanga bê ti ku gango tâ tënë ti azendo so? Ala gbu ngangu na yâ ti angangu tara mingi ndali ti so ala mä na bê so Nzapa ayeke sara aye so lo mû zendo ni (aHéb. 11:13, 35-40). E yeke na araison mingi ti duti na kpengba mabe laso ndali ti so Jésus ayeke sara kusala laso tongana “Lo so asara si mabe ti e alingbi kue.” (aHéb. 12:2). Lo sara si aprophétie mingi aga tâ tënë nga lo mû maboko na e ti kiri ti gbu nda ti ye so Nzapa aleke ti sara nzoni mingi.

12. Nyen la e lingbi ti sara ti kpengba mabe ti e?

¹² Nyen la e lingbi ti sara ti kpengba mabe ti e tongaso si e kiri e kanga bê mingi? Kota ye ni ayeke ti sara ye alingbi na wango ti Nzapa. Na tapande, gbu li na ndo ti ndani so a yeke nzoni mo zia Royaume na kozo ndo na yâ ti fini ti mo. Mo lingbi ti kiri ti sara ngangu mingi ahon ti kozo ti sara ye alingbi na wango so ayeke na Matthieu 6:33? Ye so ahunda peut-être ti mû ngoi mingi ti fa tënë wala ti gi ti duti na aye mingi pëpe na yâ ti fini ti mo. Jéhovah airi tënë nzoni awe na ndo ti angangu so mo sara ti sara ye alingbi na aye so lo hunda. Lo lingbi ti sara si mo wara mbeni fini zo ti manda Bible na lo wala ti mû maboko na mo ti wara “siriri ti Nzapa so ahon ndo ti bibe kue”. (Diko aPhilippien 4:7.) Tongana mo zia lê ti mo na ndo ti aye ti nzoni so mo wani mo wara na sarango ye alingbi na aye so Jéhovah afa, mo yeke bâ so a yeke nzoni mo kanga bê.​—Ps. 34:9.

13. Tapande wa afa tongana nyen mabe ti e alingbi ti sara si e kiri e kanga bê mingi?

¹³ Tapande ti zo ti fango yaka alingbi ti mû maboko na e ti hinga tongana nyen la mabe ti e alingbi ti sara si e kiri e kanga bê mingi. Zo ti fango yaka ayeke lu ngongoa ti kobe, lo yeke zi asioni pere na yâ ni, nga lo yeke ko alê ti kobe ni. Lakue tongana zo ti fango yaka ni awara gbâ ti lê ti kobe, a yeke sara si lo yeke ku kungo na bê ti lo kue ngoi ti peko ti tene lo lu mbeni ngongoa ni. Lo lingbi même ti lu gbâ ti ngongoa na ngoi ti peko. Lo yeke lu ni atâa so lo hinga so a lingbi lo kanga bê lo ku juska na ngoi ti kongo alê ti kobe ni. Lo hinga biani so lo yeke ko ande alê ti kobe. Legeoko nga, tongana e manda aye so Jéhovah afa na e, e sara ye alingbi na ni, e wara aye ti nzoni na pekoni, e yeke kiri ti zia bê ti e na Jéhovah mingi nga mabe ti e ayeke kpengba. A yeke duti ande ngangu pëpe ti kanga bê nga ti ku aye ti nzoni so e hinga so ayeke ga ande.​—Diko Jacques 5:7, 8.

14, 15. Bango ndo wa a lingbi e duti na ni na ndo ti pasi so azo ayeke bâ?

¹⁴ Mbeni ye so e lingbi ti sara ti kiri ti kanga bê mingi ayeke ti bâ dunia nga na dutingo ti e wani tongana ti so Jéhovah ayeke bâ na ni. Na tapande, gi ti bâ bê ti Jéhovah na ndo ti apasi so azo ayeke bâ. Teti angu mingi, Jéhovah abâ pasi so azo ayeke bâ na amû vundu na lo mingi. Me lo zia lege pëpe na vundu ni so ti kanga lege na lo ti sara ye so ayeke nzoni. Lo tokua oko Molenge ti lo “ti futi akusala ti Zabolo” nga ti zi apasi kue so Satan aga na ni na ndo ti azo (1 Jean 3:8). Ti tâ tënë ni, Nzapa aga nduru awe ti zi apasi biani biani. Ni la, e ye pëpe ti zia lege na aye ti sioni ti dunia so ti sara si mabe ti e awoko. E yeke kanga nga bê ti ku ngoi so Nzapa ayeke futi aye ti sioni. Zia e mä na bê na azendo ti Nzapa. Jéhovah asoro awe mbeni ngoi ti hunzi aye ti sioni na a si na mbilimbili ngoi ni lo yeke sara ni.​—És. 46:13; Na. 1:9.

¹⁵ Na alango ti nda ni so ayeke ngangu mingi, e lingbi ti tingbi na ambeni kpale so atara mabe ti e. Ahon ti sara ngonzo tongana a sara ye ti ngangu na e wala tongana azo so e ye ala abâ pasi, a lingbi e ngbâ ti zia bê ti e kue na Jéhovah. Ti sara ni ayeke kete ye pëpe teti so siokpari ayeke na yâ ti tere ti e. Me dabe ti mo na tënë so Jésus atene, so ayeke na Matthieu 26:39. (Diko ni.)

16. Nyen la a lingbi e gi pëpe ti sara na yâ ti ngoi so angbâ so?

¹⁶ Mbeni zo so ayeke na kite na ndo ti nda ni so ayeke pusu nduru nduru alingbi ti komanse ti wara mbeni bango ndo so ayeke na lege ni pëpe. Lo lingbi ti pensé so a lingbi lo leke aye ti lo wani so lo lingbi ti sara tongana azendo ti Jéhovah aga tâ tënë pëpe. Lo lingbi ti tene: ‘Mbi yeke ku ti bâ wala Jéhovah ayeke sara biani aye so lo mû zendo ni.’ Sioni bango ndo so alingbi ti sara si a ga ngangu na zo tongaso ti kanga bê. Ye so ayeke sara si lo lingbi ti gi ti ga mbeni kota zo na yâ ti dunia so wala ti zia bê ti lo na ndo ti nginza nga ti kaï ti zia Royaume ti Nzapa na kozo ndo. Wala lo lingbi ti mû desizion ti gue na dasendagi ti gi ti wara mbeni nzoni gigi laso. Me mara ti zo tongaso afa biani so lo yeke na mabe pëpe. Girisa ape so Paul awa e ti sara ye tongana abe-ta-zo so, so “na lege ti mabe nga na kangango bê ti ku ye,” awara azendo so Jéhovah amû (aHéb. 6:12). Jéhovah amû desizion awe ti futi sioni dunia so, na lo yeke zia si ngoi ni ahon pëpe (Hab. 2:3). Juska ti si na ngoi ni so, a lingbi e gi pëpe ti sara kusala ti Jéhovah gi kete kete. Me a lingbi e dabe ti e so e yeke na alango ti nda ni na e mû ngangu ti e kue ti sara na kusala ti fango tënë. Ye so ayeke sara si e wara kota ngia même laso.​—Luc 21:36.

AYE TI NZONI WA ZO AYEKE WARA TONGANA LO KANGA BÊ?

17, 18. (a) Lege wa azi na e laso na ngoi so e ngbâ ti kanga bê ti ku? (b) Tongana e kanga bê, e yeke wara aye ti nzoni wa?

¹⁷ Atâa e sara na Jéhovah gi na yâ ti anze kete wala na yâ ti angu mingi, e ye ti sara na lo teti lakue lakue. Kangango bê ayeke mû maboko na e ti gbu ngangu juska e wara salut, atâa ngoi oke la angbâ na dunia so. Laso Jéhovah amû na e lege ti fa so e zia bê ti e kue na adesizion ti lo nga ti duti nduru ti bâ pasi ndali ti iri ti lo, tongana a hunda ti sara ni (1 Pi. 4:13, 14). Nzapa ayeke fa nga ye na e ti mû maboko na e ti kanga bê juska ti tene a sö e.​—1 Pi. 5:10.

¹⁸ Jésus ayeke na komandema kue na yayu nga na sese, nga ye oko alingbi ti kanga lege na lo pëpe ti bata mo tongana mo ngbâ be-ta-zo (Jean 10:28, 29). Mo yeke pëpe na bezoin ti sara mbeto ti gigi ti kekereke wala même ti kuâ. A yeke sö ande azo so akanga bê juska na nda ni. Tongaso, a lingbi e zia lege pëpe na dunia ti handa e wala ti sara si e zia bê ti e pëpe na ndo ti Jéhovah. Me na ngoi so Nzapa angbâ ti kanga bê, a lingbi e ngbâ ti sara si mabe ti e akpengba nga e sara kusala na ngoi ti e na ndara.​—Mat. 24:13; diko 2 Pierre 3:17, 18.

[Foto na lembeti 21]

Kangango bê amû maboko na mo ti zia Royaume ti Nzapa na kozo ndo nga ti wara aye ti nzoni