Fango tënë ahunda kangango bê

1. Na lege wa Jéhovah afa kangango bê na mbage ti azo?

¹ Nzapa akanga bê mingi na mbage ti azo (Ex. 34:6; Ps. 106:41-45; 2 Pi. 3:9). E yeke bâ kangango bê ni so na lege ti kusala ti fango tënë so e yeke sara na ndo ti sese kue. Jéhovah asara kusala na azo asara nduru na angu 2000, na lo ngbâ lakue ti gboto azo so aye tâ tënë ti ga na mbage ti lo (Jean 6:44). Tongana nyen na yâ ti kusala ti e ti fango tënë e lingbi ti fa mara ti kangango bê ti Jéhovah so?

2. E lingbi ti fa kangango bê na ngoi so e yeke fa tënë na yâ ti territoire ti e tongana nyen?

² Fango tënë da na da: E yeke kanga bê tongana ti Jéhovah na ‘ziango pëpe’ ti fa tënë na yâ ti territoire so azo ni ade asara nzara ti tënë ni pëpe (Kus. 5:42). E yeke kanga bê tongana azo ake ti mä e, ala he e, nga ala kanga lege na kusala ti e (Marc 13:12, 13). E yeke fa nga kangango bê tongana e ngbâ ti sara ngangu ti tuku ngu na ndo ti angongoa ti tâ tënë même na ngoi so a yeke ngangu ti wara azo so asara nzara ti tënë ni na yanga-da ti ala.

3. Ngbanga ti nyen ti kiri ti sara avizite na a-étude ahunda kangango bê?

³ Azo so e yeke manda Bible na ala: Ti tene mbeni ye so zo alu akono a hunda kangango bê. E lingbi ti tuku ngu dä, ti zia engrais dä, me e lingbi pëpe ti forcé ni ti tene akono (Jacq. 5:7). Legeoko nga, maïngo na lege ti yingo ayeke ga gi yeke yeke (Marc 4:28). Azo so e yeke manda Bible na ala alingbi ti bâ so a yeke ngangu na ala ti zia lege ti aye ti wataka so ala mä na bê na ni wala angobo so ague nde na Bible. A yeke nzoni e forcé pëpe azo so e yeke manda Bible na ala ti gbian aye na yâ ti fini ti ala. Ti zia ngoi na yingo ti Nzapa ti sara kua na ndo ti bê ti azo ni ahunda kangango bê.​—1 aCor. 3:6, 7.

4. Tongana nyen kangango bê alingbi ti mû maboko na e ti fa tënë nzoni na afami ti e so avoro Jéhovah pëpe?

⁴ Afami ti e so avoro Jéhovah pëpe: Atâa so e ye mingi ti tene afami ti e so avoro Jéhovah pëpe amanda tâ tënë, e yeke kanga bê ti ku ngoi so alingbi si e fa na ala atënë ti mabe ti e, me na fango na ala pëpe agbâ ti atënë ahon ndo ni (Zo-ti. 3:1, 7). Na oko ngoi ni, e zia sarango ye ti e asara tënë na place ti e nga e duti nduru ti sara tënë ti mabe ti e na ngangu pëpe nga na nengo zo (1 Pi. 3:1, 15). Biani, tongana e kanga bê na yâ ti kua ti fango tënë, a yeke sara si fango tënë ti e alë lengo mingi nga ayeke mû ngia na Babâ ti e ti yayu.