Atënë so azo ahunda
Exode 23:19 atene: “A lingbi mo tö molenge ti ngasa na yâ dulait ti mama ti lo pëpe.” Ye wa e lingbi ti manda na lege ti ndia so?
Komandema ti Ndia ti Moïse so asigigi fani ota na yâ ti Bible, na a lingbi ti mû maboko na e ti hinga ye so ayeke na lege ni na lê ti Jéhovah, be-nzoni ti lo nga na ndoye ti lo. A fa nga so lo ke na beoko vorongo anzapa ti wataka.—Exode 34:26; Deutéronome 14:21.
Ti tö mbeni molenge ti ngasa wala mbeni nyama nde na yâ dulait ti mama ti lo ague nde na nzoni tambela ti aye so Jéhovah aleke na ndo sese. Nzapa amû ngu ti me ti tene molenge ni anyon si lo kpengba. Ti lingbi na atënë ti mbeni wagingo nda ti Bible, ti tö molenge ti nyama na yâ dulait ti mama ni afa so “zo amû na nene ni pëpe kamba ti songo so ayeke na popo ti mama na molenge, songo so Nzapa aleke na azia ni nde.”
Nga, ambeni zo atene so ti tö molenge ti nyama na yâ dulait ti mama ti lo ayeke peut-être lani mbeni ngobo ti sarango ye ti apaïen ti sara si ngu-nzapa apika. Tongana a yeke tâ tënë, andâ ndia so ayeke ti bata azo ti Israël yongoro na asioni sarango ye ti anzapa ti amara so angoro lani ala. Ndia ti Moïse akanga lege na azo ti Israël ti mû peko ti asarango ye ti amara so.—Lévitique 20:23.
Na nda ni, na yâ ti ndia so e bâ be-nzoni ti Jéhovah. Biani, a wara na yâ Ndia ni ambeni komandema so ake ti tene zo asara sioni na anyama na so ake akusala so ague nde na nzoni tambela ti aye na ndo sese. Na tapande, Ndia ake ti tene a mû na sandaga mbeni nyama so ade ti sara lango mbasambala na tere ti mama ti lo pëpe, ti fâ mbeni nyama na molenge ni gi na yâ ti lango oko wala ti mû mama ti ndeke na apara ti lo kue.—Lévitique 22:27, 28; Deutéronome 22:6, 7.
A yeke polele so Ndia ti Moïse ayeke lani pëpe gi atënë so akpengba na zo nga so akanga lege na aye mingi. Mbeni nzoni ye ti Ndia ni ayeke so akpengba-ndia ti lo amû maboko na e ti bâ anzoni sarango ye na nene ni mingi na mbeni lege so afa biani apendere sarango ye ti Jéhovah.—Psaume 19:8-12.
[Lingu ti foto na lembeti 31]
© Timothy O’Keefe/Index Stock Imagery