Mo dabe mo na ni?

Dikongo anumero ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:

• Ambeni tënë wa so ndali ni sioni ayeke mingi laso?

Kozo nda ti tënë ni ayeke so a dü zo na bibe ti sarango sioni (Genèse 8:21). Mbeni use ni ayeke so azo mingi ayeke na tâ hingango ye pëpe na ndo ti ye so bê ti Nzapa aye. Nga, a yeke Satan si ayeke na gunda ti aye ti sioni, na lo ngbâ ti yôro tere ti lo na yâ ti aye so azo ayeke sara.​—1/1, lembeti 4-6.

• Ye ti nzoni wa ayeke ga na peko ti mbeni tënë so zo atene ni tâ na ngoi ni? (aProverbe 12:25).

Tënë so zo atene ni tâ na ngoi ni alingbi ti sara si mo zia bê ti mo na zo so mo yeke sara tënë na lo, ayeke sara si zo ni abâ so ala yeke nduru na mba. Nga, tongana e yeke gi alege kue ti gonda amba ti e, a yeke mû maboko na e ti gi ti bâ gi nzoye so ayeke na yâ ti ala.​—1/1, lembeti 16-17.

• Aye wa si ayeke lani na yâ ti Arche ti Mbele?

Na yâ ti Arche ti Mbele ni, a yeke wara lani atableau use ti Ndia nga na ta so manne ayeke na yâ ni. Na peko ti kpengba-li so Koré asara lani, a zia na yâ ti Arche ti Mbele ni keke ti Aaron so aduti tongana Témoin wala gbotongo mê teti azo ni kue so ayeke lani na fini na ngoi so Koré asara lani kpengba-li (aHébreu 9:4). Peut-être a zi keke ti Aaron nga na ta so manne ayeke dä na yâ ti Arche ti Mbele ni kozo na matanga ti zingo yanga ti temple ti Salomon.​—15/1, lembeti 31.

• Ngbanga ti nyen a hunda na aJuif ti ngoi ti Néhémie ti gue lani na akeke ti wâ na temple?

Ndia ti Moïse ahunda lani ti mû akeke ti wâ pëpe. Me lani na ngoi ti Néhémie, a yeke lakue na bezoin ti keke ti wâ ti tene a zö na asandaga na ndo balaga.​—1/2, lembeti 11.

• Kugbe-mbeti ti Muratori ayeke nyen?

Kugbe-mbeti ti Muratori ayeke mbage ti mbeni mbeti so a sû ni na yanga ti Latin. A sû giriri lo kozo tënë ni na yanga ti Grec nduru na ngu 100 ti ga na ngu 200 na peko ti Christ. Na yâ ni, a yeke wara mbeni molongo so aninga ahon atanga ni kue ti iri ti ambeni mbeti ti Bible so a sû ni giriri na yanga ti Grec na so azo ayeda so a sû ni na gbe ti yingo ti Nzapa. A yeke wara na yâ ni nga ambeni mbeti so asara tënë na ndo ti ambeti ti Bible ni nga na ndo ti awasungo ni.​—15/2, lembeti 13-14.

• Ngbanga ti nyen, Vasti, Gbia-wali ti Perse, ake ti ga na gbele gbia ni? (Esther 1:10-12).

Bible afa pëpe ye so apusu lo ti sara tongaso. Ambeni wandara atara ti fa so gbia-wali ni ake yanga ngbanga ti so lo ye pëpe si nengo ti lo akiri na peko na gbele azo so gbia atisa ala, so anyon sämba ahon ndo ni. Wala peut-être gbia-wali ni so ayeke pendere mingi ayeke biani mbeni wali so akpe koli ti lo pëpe; na sarango tongaso lo zia mbeni sioni tapande na awali ti kodoro-togbia ti Perse ni.​—1/3, lembeti 9.

• Sandaga ti Jésus azi e tongana nyen?

Sandaga ti Jésus alingbi ti zi e na gbe ti siokpari so a dü e na ni nga na gbe ti asioni ye so aga na peko ti siokpari ni (aRomain 6:23). Sandaga ni so asara si atâ Chrétien aduti pëpe na mbeni yingo-ti-hinga so ayeke fâ ngbanga na ndo ti ala. Nga, tongana e fa na gigi mabe na yâ sandaga ti Jésus, e yeke na mbeto pëpe na ndo tënë ti dutingo ti e na gbele Nzapa (1 Jean 2:1).​—15/3, lembeti 8.

• E manda nyen na ndo Ndia so ahunda ti tö molenge ti ngasa na yâ ti ngu ti dulait ti mama ti lo pëpe? (Exode 23:19).

Ti tö mbeni molenge ti ngasa wala mbeni nyama nde na yâ ti dulait ti mama ti lo ayeke lani mbeni ngobo ti sarango ye ti apaïen ti zi lege na ngu-nzapa ti pika (Lévitique 20:23). Nzapa amû ngu ti me ti tene molenge ni anyon si lo kpengba. Zo so atö molenge ti ngasa na dulait ti mama ti lo abâ na nene ni pëpe kamba ti songo so ayeke na popo ti mama na molenge, songo so Nzapa si aleke. So Ndia ake sarango tongaso afa kota be-nzoni so Nzapa ayeke na ni.​—1/4, lembeti 31.