Nengo ti zo fade a ga tâ ye teti azo kue

“A lingbi e leke mbeni fini dunia, so ayeke nzoni ahon ti laso, so na yâ ni fade a yekia nengo ti zo lakue.”​—GBIA TI AMERIKA HARRY TRUMAN, NA SAN FRANCISCO, CALIFORNIE, 25 AVRIL 1945.

LEGEOKO tongana azo mingi na peko ti Use Bira so Amû Sese Kue, Gbia Truman apensé so zo alingbi ti manda ye na ndo aye so asi kozo na ti leke “mbeni fini dunia” so na yâ ni a ne azo kue. Mawa ni ayeke so, gigi ti laso ayeke ti lo nde. A ngbâ ti doro “nengo ti zo lakue” ngbanga ti so gunda ti kpale ni ayeke zo pëpe, me ngangu wato ti lo.

Gunda ti kpale ni

Bible afa so wato so ayeke Satan Zabolo, mbeni sioni zo ti yingo so, na tongo nda ti mbaï ti zo, adë kite na droit ti Nzapa ti komande. Ngbene ye so Satan asara tënë na Eve na yaka ti Eden, ye so lo gi ayeke ti pusu azo ti zia ti sara na Wasarango ala (Genèse 3:1-5). Bi bê na aye ti vundu so asi na Adam na Eve tongana ala yeda na tënë ti Zabolo! Fade fade na peko ti so ala ke ndia ti Nzapa na ndo le-keke so a gbanzi na ala, ala ‘honde tere ti ala . . . si L’Eternel Nzapa abâ ala pëpe.’ Ngbanga ti nyen? Adam atene: “Mbeto asara mbi teti tere ti mbi ayeke senge; na mbi honde tere ti mbi.” (Genèse 3:8-10). Songo ti Adam na Babâ ti lo ti yayu na lege so lo yeke bâ na tere ti lo achangé fadeso awe. Kamene asara lo na lo duti nzoni mbeni pëpe na gbele Jéhovah.

Ngbanga ti nyen a yeke nzere fade na Zabolo ti bâ nengo ti Adam akiri na peko? Ngbanga ti so a sara zo na image ti Nzapa, na a nzere na Satan mingi tongana zo asara mbeni ye so abuba gloire ti Nzapa so ayeke na ndo ti lo (Genèse 1:27; aRomain 3:23). Ye so amû maboko ti hinga ngbanga ti nyen mbaï ti azo asi singo na akusala ti ziango kamene na lê ti zo. Teti lo yeke “nzapa ti sese so”, Satan amaï bibe so na angoi kue so “zo akomande mbeni zo, na a sara sioni na lo.” (2 aCorinthien 4:4; Zo-ti-fa-tene 8:9; 1 Jean 5:19). So aye ti tene tâ nengo ti zo agirisa biaku biaku awe?

Jéhovah ane aye so lo sara

E kiri e bi bê na dutingo ti Adam na Eve na yâ yaka ti Eden kozoni si ala sara siokpari. Ala yeke na gbâ ti kobe, nzoni kusala nga na beku ti fini ti lakue lakue na nzoni seni teti ala na amolenge ti ala (Genèse 1:28). Dutingo ti ala kue afa ndoye ti Nzapa na yâ ye so lo leke awe teti azo kue ti sese, ye so ane ala.

Bango ndo ti Jéhovah na ndo nengo ti zo achangé na lâ ni so Adam na Eve asara siokpari? Ên-ën. Lo kanga lê pëpe na ndo kamene so asara ala fadeso teti tere ti ala ayeke senge. Na ndoye, Nzapa asara na ala “kota bongo na poro ti anyama” na place ti kugbe ti keke ti figue so ala fü ayü (Genèse 3:7, 21). Ahon ti zia ala na yâ ye ti kamene so, Nzapa ane ala.

Na pekoni, na ngoi ti mara ti Israël, Jéhovah asara be-nzoni na anyindu, awomua na awande ti kodoro ni, so mingi ni a sara sioni na ala (Psaume 72:13). Na tapande, tongana ala yeke ko ale-kobe, alê ti olive na alê ti vigne, a tene na azo ti Israël ti kiri na yâ yaka ni pëpe ti ro atanga ni so angbâ. Nde na so, ndia so Nzapa alu atene so akobe so angbâ na peko ti ala “ayeke teti wande, na amolenge so babâ ti ala ayeke pëpe, na awomua”. (Deutéronome 24:19-21). Tongana a sara ye alingbi na andia so, ayeke lungula na yâ ti kodoro ni iringo ye, na même ala so nzinga ahon ndo ti ala fade awara mbeni kua so ane zo.

Jésus ane amba ti lo

Na ngoi so Molenge ti Nzapa, Jésus Christ, ayeke na sese, lo fa so lo bi bê na ndo nengo ti azo. Na tapande, tongana lo yeke na sese ti Galilée, mbeni koli so buruma ate lo kue aga nduru na Jésus. Ti tene kobela ni agbu azo pëpe, Ndia ti Moïse ahunda na zo ti buruma ti dekongo: “Sioni! Sioni!” (Lévitique 13:45). Ye oko, tongana lo ga nduru na Jésus koli ni agirisa ti dekongo. Nde na so, lo tï na sese na lê ti lo na lo voro Jésus: “Seigneur, tongana Mo ye, Mo lingbi sara si tere ti mbi aga nzoni.” (Luc 5:12). Jésus asara nyen? Jésus asuku na koli ni pëpe teti lo doro Ndia ni, nga lo sara sanka wala lo kpe lo pëpe. Nde na so, lo ne zo ti buruma ni, lo ndu lo na lo tene: “Mbi yeda; tere ti mo aga nzoni.”—Luc 5:13.

Na ambeni ngoi, Jésus afa ngangu ti lo ti sava zo sân ti ndu lo, ti ambeni lo yeke même yongoro na zo ni. Ye oko, ti koli so, lo soro ti ndu lo (Matthieu 15:21-28; Marc 10:51, 52; Luc 7:1-10). Teti buruma wala “ngiba ate lo kue”, a lingbi ti tene so a sara ngu mingi so zo oko andu lo pëpe. Tongana lo bâ so mbeni zo andu lo a dë bê ti lo mingi! Ye kue so koli ni aku lani ayeke ti tene a sava lo. Me, lege so Jésus asava lo akiri na koli so mbeni ye na ndo ni: nengo ti lo. A yeke tâ na lege ni ti tene mara ti bingo bê tongaso na ndo nengo ti amba ti mo ayeke dä laso? Tongana a yeke tâ tënë, a lingbi ti fa ni tongana nyen?

Kpengba-ndia so ane zo

Jésus atene lani mbeni tënë so azo mingi abâ ni tongana wango ti nzoni ahon kue so amû na ndo dutingo ti azo na popo ti ala: “Tongaso ye kue so i ye azo asara na i, i sara na ala tongaso nga.” (Matthieu 7:12). Kpengba-ndia so apusu zo ti yekia mba ti lo, na lo ku ti tene mba ti lo asara na lo legeoko.

Tongana ti so mbaï afa, mungo peko ti kpengba-ndia so aga gi na bê ti lo pëpe; mingi ni azo ayeke sara ye nde na ni. Mbeni koli so e yeke iri lo Harold atene: “A nzere ândö na mbi mingi ti zia kamene na lê ti zo. Na tënë mingi pëpe, mbi lingbi ti sara si li ti ala aga kirikiri, kamene agbu ala, na ngoi na ngoi ambeni atoto.” Me mbeni ye asi so apusu Harold ti changé lege so lo sara ye na amba ti lo. “Ambeni Témoin ti Jéhovah ato nda ti ga ti bâ mbi. Tongana mbi pensé na ambeni ye so lani mbi tene na mbi sara na ala, kamene agbu mbi mingi. Me ala zia lâ oko pëpe, na kete na kete, atâ tënë ti Bible andu bê ti mbi na apusu mbi ti changé.” Laso, Harold ayeke mbeni ancien na yâ kongregation ti aChrétien.

Tapande ti Harold afa so “Tënë ti Nzapa ayeke na fini, na a yeke na ngangu ti sara ye, a za ahon épée kue ti yanga use, na a kpo si a kangbi âme na yingo, na a kangbi kutu na mafuta ti bio, na a fa nda ti bibe na a fa nda ti ye so bê aye.” (aHébreu 4:12). Tënë ti Nzapa ayeke na ngangu ti ndu bê ti zo na ti changé bibe na sarango ye ti lo. Mbilimbili ye so azi lege ti ne zo ayeke so: bê so ayeke na nzara ti mû maboko ahon ti mû vundu, ti yekia zo ahon ti zia kamene na lê ti lo.—Kusala 20:35; aRomain 12:10.

Kiringo na tâ nengo ti zo

Oko nzara so apusu aTémoin ti Jéhovah ti fa na amba ti ala pendere beku ti Bible (Kusala 5:42). Nzoni lege ti yekia na ti ne mbeni zo ahon ti fa na lo “tene-nzoni ti nzoye” ayeke pëpe (Esaïe 52:7). “Nzoye” so andu yungo “zo-ti-fini” so ayeke lungula biani “nzara ti sara sioni” na bingo kamene na lê ti zo (aColossien 3:5-10). A ndu nga ye so Jéhovah aleke awe ti lungula na yâ ngoi kete asioni ye na asarango ye so laso abuba nengo ti zo, nga na lo so ayeke na gunda ni, Satan Zabolo (Daniel 2:44; Matthieu 6:9, 10; Apocalypse 20:1, 2, 10). A yeke gi na ngoi so, tongana “sese ni asi na ndara ti L’Eternel,” si fade nengo ti zo aga tâ ye teti azo kue.—Esaïe 11:9.

E tisa mo ti manda ye na ndo pendere beku so. Na gango nduru na aTémoin ti Jéhovah, mo yeke ba ande so sarango ye alingbi na akpengba-ndia ti Bible ane amba ti mo. Nga mo lingbi ti manda tongana nyen na yâ ngoi kete Royaume ti Nzapa ayeke ga na ‘mbeni fini dunia so ayeke nzoni ahon ti laso’, mbeni dunia so “fade a yekia nengo ti zo lakue”, na fade zo akiri ti doro ni mbeni pëpe.

[Encadré/Foto na lembeti 6]

Be-biani abata nengo ti ala

Na ngoi ti Use Bira so Amû Sese Kue, a to aTémoin ti Jéhovah ahon 2 000 na akando ti sana ti aNazi ngbanga ti mabe ti ala. Na yâ buku ti lo (My Story), Gemma La Guardia Gluck, so asara kanga lani na Ravensbrück, atene tënë so na ndo be-biani ti aTémoin so lo bâ: “Na mbeni ngoi, Gestapo atene so Wamandango Bible kue so abere mabe ti lo na asû maboko ti lo na gbe ti tënë ni, fade a yeke zi lo na a sara ngangu na lo mbeni pëpe.” Na ndo ala so ake ti sû maboko ti ala na gbe ni, wali so atene: “Ala ye ti ala ti ngbâ ti bâ pasi na ti ku na be-nze-pepe ngoi ti zingo ala.” Ngbanga ti nyen ala mû desizion so? Magdalena, so ngu ti lo ahon laso 80, so a sara tënë ti lo na yâ kozo article ni, atene: “Ti e, ti duti be-ta-zo na Jéhovah ayeke kota ye ahon ti sara ye kue ti ngbâ na fini. Ti bata nengo ti e aye ti tene ti bata be-biani ti e.”a

[Akete tënë na gbe ni]

[Foto na lembeti 5]

Jésus ane ala so lo sava ala

[Foto na lembeti 7]

A-Témoin ti Jéhovah ane amba ti ala na fango na ala “tene-nzoni ti nzoye”