Nengo ti zo mbeni droit so a doro ni mingi

“Ye kue so ayeke tambela lani na yâ kando ni azia kamene na lê ti zo na a kiri na nengo ti lo na gbe ni.​—MAGDALENA KUSSEROW REUTER, SO ASÖ KUÂ NA KANDO TI SANA TI ANAZI.

ATÂA so aye ni ayeke sioni mingi, pasi ti akando ti sana ti aNazi na ngoi ti Use Bira so Amû Sese Kue ayeke pëpe kozo wala ndangba sarango ngangu na ndo nengo ti zo. Tongana e bâ aye so asi giriri wala laso, tënë ni ayeke polele: teti angu mingi a ‘zia kamene na lê ti zo na a kiri na nengo ti lo na gbe ni.’

Ye oko, dorongo nengo ti zo angbâ gi pëpe na ndo aye ti sana so abuba mbaï ti azo. Mingi ni asioni ye so abâ gigi na mayele. Tara ti bâ mbeni molenge so a he lo ngbanga ti mbeni ye ti tere ti lo. Wala wande so ague ti sara kodoro na mbeni ndo na a he lo ndali ti ambeni ngobo ti lo. Wala zo so abâ pasi ngbanga ti tënë ti poro ti tere ti lo wala mara ti lo. Azo so asara ni alingbi ti bâ ni tongana senge ye ti ngia, me vundu na kamene so ala zia na lê ti azo so ala kiri na ala na gbe ni ayeke ye ti ngia oko pëpe.—aProverbe 26:18, 19.

Nengo zo ayeke nyen?

Mbeni bakari atene nengo zo ayeke ‘bango dutingo ti zo na nene ni, yekiango zo, wala kpengo zo.’ Tongaso, ti ne zo andu ye use: lege so e bâ na tere ti e na nga lege so azo asara ye na mbage ti e. Atâa so aye nde nde alingbi ti ndu lege so e bâ na tere ti e, mingi ni a yeke sarango ye ti azo na mbage ti e si afa na e nengo ti e na yâ gigi ti lâ na lâ.

Na yâ ti amara kue, mo yeke wara awanzinga, azo so ngangu ti ala ayeke pëpe na azo so ye ti bata ala ayeke pëpe. Ye oko, dutingo na yâ ti aye tongaso ayeke kiri lakue na nengo ti zo na peko pëpe. A yeke bango ndo na sarango ye ti azo si alingbi ti duti kpale teti nengo ti zo. Mawa ni ayeke so awayere ayeke mingi ni ala so azo adoro wala akiri na nengo ti ala na peko. Fani mingi tongana a sara tene ti sioni so a sara na akangba, awanzinga wala ala so ayeke na kobela ti li wala awazin, e yeke mä atënë tongaso: “Lo yeke ye oko pëpe”, “lo kpa pëpe” wala “lo yeke buba zo.”

Ngbanga ti nyen azo ayeke zia kamene na lê ti amba ti ala? Fade nengo ti zo so ayeke droit ti azo kue ayeke ga tâ ye mbeni lâ? Article ti peko ayeke kiri tënë nzoni na lege ti Bible, Tënë ti Nzapa.