Ndoye amû ngangu na zo ti sara ye na mbeto pëpe

“Nzapa amû na e pëpe yingo ti mbeto, me Lo mû na e yingo ti ngangu, ti ndoye, na ti ndara.”​—2 TIMOTHÉE 1:7.

MBENI koli na wali ti lo so asara mariage gi fini ni ague ti bâ ndo na gbe ti ngu na mbeni kete gbata na tere ti ngu na tö ti kodoro ti Australie. Na ngoi so ala yeke nduru ti sigigi na lê ti ngu ni, mbeni kota susu aga na ndo ti wali ni. Koli ni so abâ susu ni apusu wali ni na susu ni amû lo koli ni. Na ngoi ti lungo kuâ ni, wali ni atene tënë so: “Lo mû fini ti lo ndali ti mbi.”

² Biani, ndoye alingbi ti pusu azo ti sara ye na mbeto oko pëpe. Jésus Christ atene: “Tongana mbeni zo amû fini ti lo teti andeko ti lo, mbeni ndoye ti hon ndoye so ayeke pëpe.” (Jean 15:13). Ade lango oko alingbi pëpe na peko ti so lo tene tënë so, Jésus amû fini ti lo, gi teti zo oko pëpe, me teti azo ti sese kue (Matthieu 20:28). Na ndo ni, Jésus amû fini ti lo pëpe gi ndali ti mbeni ye ti ngangu so asi hio tongaso. Lo hinga kozoni so fade azo ahe lo na asara ye ti sioni na lo, afâ ngbanga kirikiri na li ti lo na afâ lo na ndo keke ti pono. Lo fa même na adisciple ti lo kozoni singo ti ye so, teti lo tene na ala: “Bâ, e yeke gue na Jérusalem, na fade ala zia Molenge Ti Zo na tïtî akota sacrificateur na amaître ti ndia. Fade ala fâ ngbanga ti kui na li ti Lo, na ala zia Lo na tïtî aGentil; fade ala he Lo, ala ku soro na tere ti Lo, ala se Lo, na ala fâ Lo.”​—Marc 10:33, 34.

³ Aye wa amû maboko na Jésus ti sara ye na mbeto pëpe? Mabe na kpengo mbeto ti Nzapa amû maboko dä mingi (aHébreu 5:7; 12:2). Ye oko, ndoye ayeke kota ye so ayeke na gunda ti sarango ye ti Jésus na mbeto pëpe, ndoye teti Nzapa nga teti amba ti lo zo (1 Jean 3:16). Tongana e lë mara ti ndoye so na ndo mabe nga na kpengo mbeto ti Nzapa, fade e nga e yeke wara ngangu ti sara ye na mbeto pëpe tongana Christ (aEphésien 5:2). Tongana nyen e lingbi ti maï mara ti ndoye so? A lingbi e hinga ndo so ndoye ni alondo dä.

“Ndoye ayeke ti Nzapa”

⁴ Jéhovah ayeke ndoye nga lo yeke Gunda ti ndoye. Bazengele Jean asû tënë so: “I so mbi ndoye i mingi, a lingbi e ndoye tere ti e na popo ti e; teti ndoye ayeke ti Nzapa, na zo so ayeke na ndoye, Nzapa adü lo, na lo hinga Nzapa. Zo so ayeke na ndoye pëpe, lo hinga Nzapa pëpe, teti Nzapa ayeke Ndoye.” (1 Jean 4:7, 8). Tongaso, mara ti ndoye tongana ti Nzapa so alingbi ti maï na yâ mbeni zo gi tongana lo ga nduru na Jéhovah na lege ti tâ hingango ye na lo sara ye alingbi na ni na bê ti lo kue.​—aPhilippien 1:9; Jacques 4:8; 1 Jean 5:3.

⁵ Na yâ ndangba sambela ti lo na abazengele be-ta-zo ti lo 11, Jésus afa kamba so ayeke na popo ti hingango Nzapa na konongo na yâ ndoye, lo tene: “Mbi fa na ala iri ti Mo, na fade Mbi kiri Mbi fa na ala iri ti Mo; tongaso ndoye so Mo ndoye Mbi na ni alingbi duti na yâ ala, na Mbi na yâ ala.” (Jean 17:26). Jésus amû maboko na adisciple ti lo ti maï mara ti ndoye so ayeke na popo ti lo na Babâ ti lo; na lege ti tënë ti yanga ti lo nga na tapande ti lo, Jésus afa aye so ayeke na peko ti iri ti Nzapa: apendere sarango ye ti tere ti Nzapa. Ni la, Jésus alingbi lani ti tene: “Zo so abâ mbi, lo bâ Babâ awe.”​—Jean 14:9, 10; 17:8.

⁶ A yeke yingo vulu ti Nzapa si ayeke dü mara ti ndoye ti Christ na yâ zo (aGalate 5:22). Na Pentecôte ti ngu 33 tongana akozo Chrétien awara yingo vulu so a mû zendo ni na ala kozoni, ala dabe ti ala gi pëpe na aye mingi so Jésus afa lani na ala, me nga ala kiri agbu nda ti Mbeti ti Nzapa nzoni. A yeke polele so nzoni gbungo nda ti Mbeti ti Nzapa so akono ndoye ti ala teti Nzapa (Jean 14:26; 15:26). Ye ti pekoni ayeke so wa? A yeke so na mbeto pëpe nga na wâ ala fa nzo tënë atâa so a lingbi ti gue na ala na kuâ.​—Kusala 5:28, 29.

Fango ndoye nga sarango ye na mbeto pëpe

⁷ Bazengele Paul asû tënë so: “Nzapa amû na e pëpe yingo ti mbeto, me Lo mû na e yingo ti ngangu, ti ndoye, na ti ndara.” (2 Timothée 1:7). Paul ayeke sara tënë ti aye so asi na lo. Bi bê na ye so lo na Barnabas ahon na yâ ni na ndembe so ala yeke sara tambela ti ala ti missionnaire. Ala fa tënë na akodoro mingi, tongana Antioche, Iconium na Lystre. Na yâ ti akodoro oko oko so, ambeni zo ni amä na bê, me ambeni akanga lege ngangu na ala (Kusala 13:2, 14, 45, 50; 14:1, 5). Na Lystre, azo mingi mingi so ngonzo asara ala abo Paul na tënê, ala pensé ti ala so lo kui awe. “Me tongana adisciple aga, na ala ngoro tere ti lo, lo londo, na lo lï na kodoro. Tongana nda adë awe, lo na Barnabas alondo ti gue na Derbe.”​—Kusala 14:6, 19, 20.

⁸ So azo agi ti fâ Paul asara si mbeto asara lo na Barnabas na ala zia fango tënë? Oko pëpe! Na peko ti so “azo mingi aga adisciple” na Derbe, Paul na Barnabas ‘akiri na Lystre, na Iconium, na Antioche’. Ngbanga ti nyen? Ti wa afini disciple so ti ngbâ ngangu na yâ mabe. Paul na Barnabas atene na ala: “A lingbi e lï na yâ royaume ti Nzapa na lege ti ye ti vundu mingi.” A yeke polele so kota ndoye so ala yeke na ni teti “amolenge ti ngasangbaga” ti Christ si apusu ala ti sara ye na mbeto pëpe (Kusala 14:21-23; Jean 21:15-17). Na peko ti so ala zia a-ancien na yâ ti afini kongregation so, Paul na Barnabas asambela na “ala zia ala na tïtî Seigneur, Lo so ala mä na bê na Lo.”

⁹ Paul asara ye na ndoye nga na mbeto pëpe na ye so asara si mingi ti akozo Chrétien andoye lo mingi. Dabe mo na ye so asi na ngoi ti bungbi so Paul asara na a-ancien ti Ephèse, ndo so lo sara ngu ota dä na lo wara aye ti ngangu mingi (Kusala 20:17-31). Na peko ti so lo wa ala ti bata kundu ti Nzapa so a zia na gbe ti ala, Paul na ala kue akuku ti sambela. Na peko ti sambela ni, “ala kue atoto na vundu mingi, ala tï na ndogo ti Paul, ala hunu yanga ti lo. Ala yeke na vundu mingi teti tënë so lo tene, fade ala bâ lê ti lo mbeni pëpe.” Bâ ndoye so aita so ayeke na ni teti Paul! Biani, tongana ngoi ti guengo ti Paul na amba ti lo ti lege alingbi awe, a duti lani ngangu na a-ancien ti “zia ala” ti gue.​—Kusala 20:36–21:1.

¹⁰ Laso, ndali ti so asurveillant so ague na ndo nde nde, a-ancien na ambeni ita mingi asara ye na mbeto pëpe na mbage ti angasangbaga ti Jéhovah, aita andoye ala mingi. Na tapande, na yâ ti akodoro so bira ayeke dä wala so a kanga lege na fango tënë, asurveillant so ague na ndo nde nde na awali ti ala ayeke nduru ti kui na ti sara kanga ti tene ala gue abâ aita na yâ akongregation. Legeoko nga, aTémoin ti Jéhovah mingi abâ pasi na tïtî akota zo ti kodoro so aye ala pëpe nga na azo so amû peko ti ala ndali ti so ala ye pëpe ti kä amba ti ala Témoin wala ti fa ndo so ala yeke wara kobe ti yingo dä. A sara ngangu na aTémoin saki mingi, a sara sana na ala, na même a fâ ala ngbanga ti so ala zia pëpe ti fa nzo tënë wala ti sara bungbi na amba ti ala (Kusala 5:28, 29; aHébreu 10:24, 25). Zia e mû tapande ti mabe na ndoye ti aita-koli na aita-wali so asara ye na mbeto pëpe!​—1 aThessalonicien 1:6.

Zia ndoye ti mo adë pëpe

¹¹ Na ngoi so a bi Satan na sese, lo zia na bê ti lo ti tuku ngonzo ti lo na ndo awakua ti Jéhovah ngbanga ti so ala ‘bata komandema ti Nzapa, na ala [fa] tënë ti témoin ti Jésus.’ (Apocalypse 12:9, 17). Mbeni kode ti Zabolo ni ayeke sarango ngangu na zo. Me mingi ni, kode so atï na ngu ngbanga ti so a yeke pusu azo ti Nzapa ti kpengba ndoye na popo ti ala nga a yeke pusu mingi ti ala ti fa tënë na wâ ahon ti kozo. Mbeni kode ti Satan ayeke ti zingo asioni nzara ti mitele. Ti ke kode ti Satan so ahunda ti sara ye na mbeto pëpe na mbeni lege nde ngbanga ti so bira ni ayeke na yâ tere ti e, bira ti tomba asioni nzara ti bê ti e so ayeke ‘na handa na ayeke sioni mingi’.​—Jérémie 17:9; Jacques 1:14, 15.

¹² Na yâ aye ti bira ti Satan, mbeni ngangu ye ayeke dä: “yingo ti sese so”, so ti tene bibe wala ye so ayeke pusu azo, so ayeke tâ nde mingi na yingo vulu ti Nzapa (1 aCorinthien 2:12). Yingo ti sese ni adü na yâ ti zo kota bê na nzara ti nginza na akungba, so ayeke “nzara ti lê”. (1 Jean 2:16; 1 Timothée 6:9, 10). Ti duti na akungba nga na nginza ayeke sioni pëpe, me tongana e ye aye so mingi ahon Nzapa, andâ Satan ahon e na ngangu awe. Ye so asara si yingo ti sese so ayeke na ‘ngangu’ ayeke so a zingo nzara ti mitele, a ga na mbeni lege so zo ahinga pëpe, a zia ti sara ngangu na ndo ti zo pëpe na a yeke legeoko tongana pupu so amû ndo kue. Zia si yingo ti sese so abuba bê ti mo pëpe!​—aEphésien 2:2, 3; aProverbe 4:23.

¹³ Ye oko, ti ke sioni yingo ti sese so, a hunda ti sara ye so Nzapa ahunda na mbeto pëpe. Na tapande, tongana mbeni sioni limon ayeke tambela, a hunda ti sara mbeto pëpe ti londo ti sigigi na yâ da ti cinéma, na a hunda ti wara ngangu ti kanga ordinateur wala télé. A hunda ti sara ye na mbeto pëpe ti ke asioni ye so amba ti e ayeke pusu e ti sara na ti ke asioni kamarade. Legeoko nga, a hunda ti sara ye na mbeto pëpe ti sara ye alingbi na andia nga na akpengba-ndia ti Nzapa na gbele azo so ahe e, atâa a yeke akamarade ti ekole, ti place ti kua, avoizin wala afami.​—1 aCorinthien 15:33; 1 Jean 5:19.

¹⁴ Tongaso, a yeke kota ye mingi ti tene e kpengba ndoye ti e teti Nzapa nga teti aita ti e ti yingo. Mû ngoi ti bâ aye so mo zia na gbele mo nga na tambela ti mo ti bâ wala yingo ti sese so asara sioni na mo na mbeni lege wala pëpe. Tongana a sara sioni na mo, même gi kete, sambela Jéhovah ti wara ngangu ti zi ni na yâ bê ti mo biani biani. Asambela tongaso, so a tene na bê kue, Jéhovah ayeke mä ni (Psaume 51:19). Na ndo ni, yingo ti Nzapa ayeke ngangu mingi ahon yingo ti sese so.​—1 Jean 4:4.

Lutingo na gbele akpale na mbeto pëpe

¹⁵ Ambeni kpale so awakua ti Jéhovah ayeke tiri na ni ayeke aye so siokpari na gango mbakoro aga na ni, so mingi ni ayeke kobela, tere so azin, bê so anze na ambeni nde (aRomain 8:22). Dutingo na ndoye tongana ti Christ alingbi ti mû maboko na e ti hon ndo ti akpale so. Bâ tapande ti ita-wali Namangolwa, so a bata lo na yâ sewa ti aChrétien na kodoro ti Zambie. Tongana lo yeke lani na ngu use, Namangolwa aga wazin. Lo tene: “Kamene asara mbi mingi, teti mbi tene so tongana azo abâ mbi, a yeke sara ala nzoni pëpe. Me aita ti bungbi amû maboko na mbi ti changé bango ndo ti mbi. Ni la, mbi wara lege ti hon ndo ti kamene ti mbi, na pekoni mbi wara batême.”

¹⁶ Atâa so Namangolwa ayeke na puse ti lo, fani mingi a lingbi lo hara tongana lege ni ayeke mbutu. Ye oko, lo yeke mû kua ti pionnier auxiliaire nze use tongaso ngu oko oko. Mbeni wali so Namangolwa awara lo na fango tënë atoto tongana lo fa tënë na lo. Ngbanga ti nyen? Ngbanga ti so mabe na sarango ye na mbeto pëpe ti ita ti e ni agbu bê ti lo mingi. Azo oku so Namangolwa amanda Bible na ala awara batême, na oko ayeke fadeso ancien. Ye so afa tongana nyen Jéhovah airi deba nzoni na ndo ti lo. Lo tene: “Gere ti mbi ayeke so ka mbi mingi, me mbi zia si a kanga lege na mbi pëpe.” Ita-wali so ayeke na popo ti aTémoin mingi so, na ndo sese kue, ayeke na ngangu mingi pëpe, me ala yeke fa tënë na wâ ngbanga ti so ala ndoye Nzapa nga na amba ti ala. Ala yeke tâ aye ti nzoni mingi na lê ti Jéhovah!​—Aggée 2:7.

¹⁷ Mbeni kobela so aninga alingbi ti sara si bê ti zo anze, même a sara si lo yeke na vundu. Mbeni ancien atene: “Na groupe ti mandango buku so mbi yeke dä, mbeni ita-wali ayeke na diabète nga arein ti lo ayeke so lo, mbeni ayeke ti lo na cancer, use ayeke na kobela ti abio, na oko ayeke na angangu kobela use so asara si yâ ti tere ti lo kue aso. Ngoi na ngoi, bê ti ala ayeke nze. Ye oko, ala yeke manke bungbi gi tongana tere ti ala aso mingi wala a gbanzi ala na hôpital. Ala kue ayeke sigigi na fango tënë lakue. Dutingo ti ala adabe mbi na dutingo ti Paul, so atene lani: ‘Tongana mbi yeke na ngangu pëpe, ka mbi yeke na ngangu.’ A nzere na mbi ti bâ ndoye ti ala nga lege so ala wara ngangu ti tiri na akpale ti ala. Peut-être dutingo ti ala amû maboko na ala ti bâ ye so ayeke kota ye biani.”​—2 aCorinthien 12:10.

¹⁸ Tongana mo yeke tiri na tere so azen, kobela wala ambeni kpale, “zia ti sambela pëpe” si mo wara mungo maboko ti tï pëpe na yâ bê so anze (1 aThessalonicien 5:14, 17). Biani, a lingbi ti si so na mbeni ngoi mo yeke nzoni na mbeni ngoi tere ti mo anzere pëpe, me tara ti bâ anzoni ye so ayeke dä, aye ti yingo, mbilimbili pendere beku ti e ti Royaume. Mbeni ita-wali atene: “Ti mbi, fango tënë ayeke tongana yorö.” Mungo mbage na fango nzo tënë na amba ti lo amû maboko na lo ti duti na nzoni bango ndo.

Ndoye amû maboko na awasiokpari ti kiri na Jéhovah

¹⁹ Mingi ti ala so awoko na lege ti yingo wala so atï na yâ siokpari abâ so a yeke ngangu na ala ti kiri na Jéhovah. Me azo tongaso ayeke wara ngangu ti sara ni gi tongana ala gbian bê ti ala biani na ala kiri andoye Nzapa. Bâ tapande ti Mario,a so ayeke na kodoro ti Amerika. Mario azia lani bungbi, lo ga ngbâa ti sämba na ti mbangi, na ngu 20 na pekoni, a bi lo na da ti kanga. Lo tene: “Mbi to nda ti gbu li mingi na ndo gigi ti mbi ti kekereke na mbi kiri mbi komanse ti diko Bible. Na pekoni, mbi bâ na nene ni asarango ye ti Jéhovah, mbilimbili be-nzoni ti lo, so mbi sambela ndali ni fani mingi. Na peko ti so a zi mbi na kanga, mbi zia lege ti angbene kamarade ti mbi, mbi gue na abungbi, na nda ni a kiri na mbi na bungbi. Ndali ti sioni tambela ti mbi lani, laso seni ti mbi ayeke nzoni pëpe, me kamême mbi yeke na mbeni pendere beku. Mbi kiri merci mingi na Jéhovah teti be-nzoni ti lo na pardon ti lo.”​—Psaume 103:9-13; 130:3, 4; aGalate 6:7, 8.

²⁰ Biani, azo so tambela ti ala ayeke tongana ti Mario, a lingbi ala sara ngangu ti kiri na Jéhovah. Ndoye ti ala, so ala kiri awara ni na lege ti mandango Bible, sambela nga na gbungo li, ayeke mû na ala ngangu so ahunda ti kiri na Jéhovah na ti ke sioni ti ala biani biani. Ye so amû nga ngangu na Mario ayeke beku ti Royaume. Biani, na tere ti ndoye, mabe nga na kpengo mbeto ti Nzapa, beku alingbi nga ti duti mbeni kota ngangu so alingbi ti sara nzoni na yâ fini ti e. Na yâ article ti peko, fade e yeke mû ngoi ti bâ kpengba matabisi ti yingo so.

[Kete tënë na gbe ni]

Mo lingbi ti kiri tënë?

• Tongana nyen ndoye amû maboko na Jésus ti sara ye na mbeto pëpe?

• Tongana nyen ndoye ti Paul na Barnabas teti aita apusu ala ti sara ye na mbeto oko pëpe?

• Na alege wa Satan ayeke gi ti buba ndoye ti aChrétien?

• Ndoye teti Jéhovah alingbi ti mû na e ngangu ti kanga bê na gbe ti akpale wa?

[Ahundango tënë ti manda na ye]

1, 2. (a) Ndoye alingbi ti pusu zo ti sara nyen? (b) Ngbanga ti nyen lege so Jésus asara ye na mbeto pëpe ayeke nde mingi?

3. Aye wa amû maboko na Jésus ti sara ye na mbeto pëpe?

4. Ngbanga ti nyen e lingbi ti tene so Jéhovah ayeke Gunda ti ndoye?

5, 6. Ye wa amû maboko na akozo disciple ti Jésus ti maï mara ti ndoye so lo yeke na ni?

7. Aye wa asi na Paul na Barnabas na ngoi so ala yeke na tambela ti ala ti missionnaire?

8. Tongana nyen sarango ye ti Paul na Barnabas na mbeto pëpe afa kota ndoye ti ala teti azo?

9. A-ancien ti Ephèse asara nyen na Paul tongana ala bâ ndoye ti lo na mbage ti ala?

10. Na lege wa aTémoin ti Jéhovah laso afa ndoye so mbeto ayeke dä pëpe na popo ti ala?

11. Tongana nyen Satan ayeke sara bira ti yingo na awakua ti Jéhovah? A hunda na ala ti sara nyen?

12. Tongana nyen Satan asara kusala na “yingo ti sese so” ti gi ti woko ndoye ti e teti Nzapa?

13. Aye wa alingbi ti sara si a duti ngangu na e ti sara ye so Nzapa ahunda?

14. Nyen la a yeke nzoni ti sara tongana yingo ti sese so asara sioni na e?

15, 16. Tongana nyen ndoye tongana ti Christ alingbi ti mû maboko na e ti hon ndo ti akpale? Mû mbeni tapande.

17, 18. Ye wa amû maboko na azo mingi ti kanga bê na yâ kobela nga na ambeni kpale? Fa ambeni tapande ti aita ti ndo so mo yeke dä.

19, 20. (a) Ye wa alingbi ti mû maboko na ala so atï na yâ siokpari ti wara ngangu ti kiri na Jéhovah? (b) E yeke bâ ande nyen na yâ article ti peko?

[Foto na lembeti 25]

Ndoye ti Paul teti azo asara si lo ngbâ ti fa tënë na mbeto pëpe

[Foto na lembeti 26]

A hunda ti sara ye na mbeto pëpe ti sara ye so Nzapa ahunda

[Foto na lembeti 26]

Namangolwa Sututu