Yingo vulu ayeke nyen?

MBENI lâ, Jésus ahunda adisciple ti lo: “Babâ wa tongana molenge ti lo ahunda susu, lo yeke mû na lo ngbo ahon ti mû na lo susu? Wala tongana molenge ni ahunda nga para ti kondo, fade lo yeke mû na lo kpalakongo?” (Luc 11:11, 12). Na Galilée, amolenge aye mingi ti te para na susu, ni la, ala yeke hunda gi ni na ababâ ti ala.

Jésus atene so a lingbi e ngbâ ti hunda Nzapa ti wara yingo vulu, tongana ti so molenge so nzara asara lo ayeke hunda kobe (Luc 11:9, 13). Tongana e hinga tënë mbilimbili na ndo ti yingo vulu, a yeke mû lege na e ti gbu nda ti kota kusala so yingo vulu alingbi ti sara na yâ ti fini ti e. Tongaso, zia e bâ kozoni ye so Bible afa na e na ndo ti yingo vulu.

“Ngangu ti Lo so ayeke na nduzu na ndo ti aye kue”

Mbeti ti Nzapa afa polele so yingo vulu ayeke ngangu so Nzapa ayeke sara na kusala ti sara ye so bê ti lo aye. Na ngoi so ange Gabriel afa na Marie so ade masia so fade lo yeke dü mbeni molenge-koli, ange ni atene na lo: “Yingo vulu ayeke ga ande na ndo ti mo, na ngangu ti Lo so ayeke na nduzu na ndo ti aye kue ayeke zu ti duti na ndo ti mo. Ndani la si molenge so mo yeke dü lo, lo yeke duti ande nzoni-kue, na a yeke iri lo Molenge ti Nzapa.” (Luc 1:35). Na lege ti atënë ti Gabriel, mbeni kamba ayeke na popo ti yingo vulu na “ngangu ti Lo so ayeke na nduzu na ndo ti aye kue”.

Mara ti tënë so asigigi nga na ambeni ndo na yâ ti Bible. Prophète Michée atene: “Mbi si na ngangu na Yingo ti L’Éternel.” (Michée 3:8). Jésus amû zendo na adisciple ti lo, lo tene: “Fade ala yeke wara ngangu tongana yingo vulu aga na ndo ti ala.” (Kusala 1:8). Bazengele Paul nga asara tënë ti “ngangu ti yingo vulu.”​—aRomain 15:13, 19.

Tongaso, e lingbi ti tene nyen na ndo ti atënë so e bâ ti si na ni ge? E lingbi ti tene so kamba ayeke na popo ti yingo vulu na ngangu ti Nzapa. A yeke na lege ti yingo vulu si Jéhovah ayeke fa ngangu ti lo. Na nduru tënë, yingo vulu ayeke ngangu ti Nzapa so lo yeke sara na kusala. So ngangu! Ngangu so Nzapa amû ti sara na dunia kue ahon gbungo li ti e. Na lege ti prophète Ésaïe, Jéhovah ahunda na e ti gbu li na ndo ti tënë so: “I yä lê ti i na nduzu, i bâ Lo so acréé ye so, Lo so asara ye kue ti nduzu ti sigigi na lege ti wungo ti ala; Lo di iri ti ala oko oko kue na lege ti iri ti ala; na lege ti kota ngangu ti Lo, na teti Lo yeke na ngangu mingi, oko ti ala amanke pëpe.”​—Ésaïe 40:26.

Tongaso, Bible afa so dunia kue na nzoni tambelango ti aye kue so ayeke na yâ ni abâ gigi na lege ti “kota ngangu” ti Nzapa Ti Ngangu Ahon Kue. A yeke polele so ngangu ti Nzapa ayeke kota mingi, na e yeke na bezoin ni ti ngbâ na fini.​—Bâ encadré “Akua so yingo vulu asara.”

Jéhovah alingbi ti sara kusala na yingo vulu na mbeni lege so ayeke kota, tongana ti so lo sara na dunia kue. Me lo lingbi nga ti sara kusala na ni ndali ti nzoni ti azo so lo sara ala. Atënë asi singo na yâ ti Bible so afa tongana nyen yingo ti Nzapa amû ngangu na awakua ti lo.

“Yingo ti Jéhovah ayeke na ndo ti mbi”

Kusala so Jésus asara afa na e na mbeni lege so apika bê tongana nyen yingo vulu ti Nzapa alingbi ti mû ngangu na awakua ti lo. Jésus atene na azo ti Nazareth: “Yingo ti Jéhovah ayeke na ndo ti mbi.” (Luc 4:18). So Jésus “asi singo na yingo” amû lege na lo ti sara nyen (Luc 4:14)? Lo sava akobela nde nde, lo kaï amapo ti ngu-ingo, lo mû kobe na azo saki mingi na lege ti mapa na susu, na lo zingo nga akuâ. Bazengele Pierre afa Jésus tongana mbeni “koli so Nzapa afa lo na gigi na ala na lege ti akusala ti ngangu, aye ti dongo bê nga na afä so Nzapa asara na lege ti lo”.​—Kusala 2:22.

Laso, yingo vulu ayeke sara mara ti aye ti kpene tongaso mbeni pëpe. Me, yingo vulu alingbi ti sara ambeni kpengba ye teti e. Tongana ti so Jésus atene na adisciple ti lo, Jéhovah ayeke nduru ti mû yingo vulu ti lo na azo so avoro lo (Luc 11:13). Ndani la bazengele Paul atene: “Mbi wara ngangu ti sara aye kue ndali ti lo so lo mû ngangu ni na mbi.” (aPhilippien 4:13). Yingo vulu alingbi ti sara mara ti kusala tongaso na yâ ti fini ti e? Article ti peko ayeke sara tënë na ndo ni.

[Encadré/​Foto na lembeti 5]

Ngbanga ti nyen yingo vulu ayeke mbeni zo pëpe?

Bible ahaka yingo vulu na ngu. Tongana lo yeke mû zendo na azo ti lo na ndo ti anzoni ye so ayeke ku ala, Nzapa atene: “Fade Mbi sa ngu na ndo sese so ayeke na nzara ti ngu, na fade Mbi sara si ngu asua na ndo kuru sese; fade Mbi sa Yingo ti Mbi na ndo ahale ti mo, na Mbi iri tënë nzoni na ndo amolenge ti mo.”​—Ésaïe 44:3.

Na ngoi so Nzapa atuku yingo ti lo na ndo ti awakua ti lo, ala “si singo na yingo vulu”. A tene Jésus, Jean Baptiste, Pierre, Paul, Barnabas na adisciple so abungbi na lango ti Pentecôte ti ngu 33 asi singo na yingo vulu.​—Luc 1:15; 4:1; Kusala 4:8; 9:17; 11:22, 24; 13:9.

Bâ tënë so si: A lingbi ti tuku zo oko na ndo ti gbâ ti azo? Zo oko alingbi ti ‘si’ yâ ti tere ti gbâ ti azo? A yeke na lege ni pëpe. Bible asara tënë ti azo so asi na ndara, asi na gbungo nda ti ye, asi na asarango ye so agbu bê ti zo, wala même so asi na hingango ye; me lâ oko Bible atene mbeni zo asi mba ti lo zo pëpe.​—Exode 28:3; 1 aGbia 7:14; Kusala 6:8; aColossien 1:9.

Mbupa ti Grec so a kiri pekoni na “yingo” ayeke pneuma, so aye nga ti sara tënë ti mbeni ngangu so lê ti zo abâ pëpe. Mbeni bakari (Expository Dictionary of New Testament Words ) atene so nda ti pneuma “ayeke kozoni kue pupu . . . nga mbô; na pekoni, a ye nga mbilimbili ti tene yingo, so tongana pupu, lê ti zo abâ pëpe, zo alingbi ti ndu ni pëpe na a yeke ngangu mingi.”

Tongaso, a yeke polele so yingo vulu ayeke zo pëpe.a

[Kete tënë na gbe ni]

[Lingu ti foto na lembeti 5]

Photodisc/SuperStock