Ala kue so ayeke na nzara ti hinga Nzapa ayeke yeda na nzo tënë
“Ala kue so [ayeke na nzara ti hinga Nzapa, MN ] ti wara fini ti lakue lakue, ala mä na bê.”—KUSALA 13:48.
1, 2. Na lege wa akozo Chrétien asara ye alingbi na prophétie ti Jésus so lo tene fade a yeke fa nzo tënë na ndo ti sese kue?
NA YÂ ti mbeti ti Kusala, a yeke wara apendere tënë na ndo ti lege so akozo Chrétien asara ye alingbi na prophétie ti Jésus so lo tene fade a yeke fa nzo tënë na ndo ti sese kue (Matthieu 24:14). Akozo Chrétien so, so ayeke fa tënë lani mingi, azia mbeni nzoni tapande na aChrétien so ayeke ga na peko ti ala. Fango tënë ti adisciple ti Jésus na Jérusalem asara si azo saki mingi mingi, so na popo ni a yeke wara “asacrificateur mingi”, aga gbani gbani na yâ ti kongregation ti aChrétien.—Kusala 2:41; 4:4; 6:7.
2 Akozo missionnaire amû maboko na azo mingi ti ga aChrétien. Na tapande, Philippe ague na kodoro ti Samarie, na azo mingi mingi amä lo kâ (Kusala 8:5-8). Paul na akamarade ti lo nde nde ague na akodoro mingi mingi, ala fa nzo tënë na kodoro ti Chypre, na yâ ti ambeni kodoro ti Asie Mineure, na Macédoine, na Grèce nga na Italie. A-Juif mingi nga na aGrec mingi aga aChrétien na yâ ti akodoro so lo fa tënë dä (Kusala 14:1; 16:5; 17:4). Tite asara kusala lani na zoa ti Crète (Tite 1:5). Pierre ayeke sara kusala lani mingi na kodoro ti Babylone, nga ti si na ngoi so lo tokua kozo lettre ti lo na ngu 62-64 tongaso, na yâ ti kodoro ti Pont, ti Galatie, ti Cappadoce, ti Asie nga na ti Bithynie, azo ahinga nzoni mingi kusala so aChrétien ayeke sara (1 Pierre 1:1; 5:13). Aye so ayeke si na ngoi so amû ngia mingi na aChrétien! Ndali ti so akozo Chrétien so ayeke fa tënë mingi, ye so asara si awato ti ala atene so ala ‘yengi sese’ kue.—Kusala 17:6; 28:22.
3. Aye ti nzoni wa awafango tënë ti Royaume awara na yâ ti kusala ti ala? A sara nyen na ndo ti mo?
3 Na ngoi ti e laso nga, ye ayeke gue na li ni mingi na yâ ti kongregation ti aChrétien. Tongana mo diko tënë na ndo ti aye so aTémoin ti Jéhovah asara nga mo bâ ye ti nzoni so a wara na ndo ti sese kue, biani bê ti mo anzere mingi. Biani, bê ti mo anzere mingi ti hinga so awafango tënë ti Royaume amanda Bible na azo ahon kutu omene na yâ ti ngu ti kusala 2007. Na ndo ni, na ngu so ahon, azo kutu bale-oko tongaso, so ayeke aTémoin ti Jéhovah pëpe aga na Matanga ti Dango Bê na kuâ ti Jésus Christ. Gango ti ala na kota matanga so afa so ala yeke kamême na nzara ti nzo tënë. Ye so afa so kusala angbâ mingi ti tene a sara ni.
4. Azo wa la ayeke yeda na fango tënë ti Royaume?
4 Laso nga, legeoko tongana ti so a si na ngoi ti akozo Chrétien, “ala kue so [ayeke na nzara ti hinga Nzapa, MN ] ti wara fini ti lakue lakue” ayeke yeda na tâ tënë (Kusala 13:48). Jéhovah ayeke sara si mara ti azo tongaso aga na yâ ti bungbi ti lo. (Diko Aggée 2:7.) Na yâ ti kusala so ayeke ti bungbi azo, bango ndo wa a lingbi e duti na ni na ndo ti fango tënë si e sara kusala maboko na maboko na amba ti e?
Fa tënë na azo kue
5. Mara ti azo wa la Jéhovah ayeda na ala?
5 Akozo Chrétien ahinga so “Nzapa ayekia mbeni zo teti lê ti lo pëpe; me na yâ amara kue, zo so akpe mbeto ti Nzapa, na lo sara ye ti mbilimbili, lo lingbi na lê ti Lo.” (Kusala 10:34, 35). Zo so aye ti duti na nzoni songo na Jéhovah ayeke fa so lo mä na bê so Jésus amû fini ti lo na sandaga ti zi e (Jean 3:16, 36). Nga, Jéhovah aye ti tene “azo kue awara salut, na ahinga tene-biani mbilimbili.”—1 Timothée 2:3, 4.
6. A yeke nzoni awafango tënë ti Royaume ake ti duti na mara ti bibe wa? Ngbanga ti nyen?
6 A yeke na lege ni pëpe ti tene awafango nzo tënë aduti na sioni bibe na ndo ti azo ndali ti mara ti ala, dutingo ti ala na yâ ti kodoro, lege so azo ni aleke na tere ti ala, bungbi ti nzapa so ala yeke dä wala ndali ti ambeni sarango ye ti ala so ayeke nde na ti azo mingi. Gbu li na ndo ti tënë so: A nzere na mo pëpe so zo so afa tâ tënë ti Bible na mo kozo aduti na nzoni bibe na ndo ti mo? Tongaso, ke pëpe ti fa tënë so ayeke sö fini ti zo na azo kue so alingbi ti mä ni.—Diko Matthieu 7:12.
7. Ngbanga ti nyen a lingbi e kpe ti fâ ngbanga na ndo ti azo so e yeke fa tënë na ala?
7 Jéhovah azia Jésus tongana juge; tongaso, e yeke na droit pëpe ti fâ ngbanga na ndo ti mbeni zo. A yeke na lege ni so a zia Jésus juge ndali ti so, nde na lo, e yeke fâ ngbanga alingbi gi na “ye so lê ti [e] abâ” wala na “tënë so mê ti [e] amä”. Me ti Jésus, lo hinga tâ ye so ayeke na yâ ti bê ti zo nga na atënë so lo yeke tene na bê ti lo.—Esaïe 11:1-5; 2 Timothée 4:1.
8, 9. (a) Kozo ti tene Saul aga Chrétien, sarango ye ti lo ayeke lani tongana nyen? (b) A yeke nzoni ye so asi na bazengele Paul afa nyen na e?
8 Mara ti azo nde nde kue aga awakua ti Jéhovah. Mbeni kota tapande ni ayeke ti Saul ti Tarse, so na pekoni a hinga lo tongana bazengele Paul. Saul so ayeke lani mbeni Farizien ayeke kanga lege ngangu mingi na kusala ti aChrétien. Teti so lo pensé ti lo so aChrétien ayeke atâ wakua ti Jéhovah pëpe, a pusu lo ti sara ye ti ngangu na kongregation ti aChrétien (aGalate 1:13). Na bango ndo ti zo, Paul akpa lani kete pëpe ti ga Chrétien. Ye oko, Jésus abâ mbeni ye ti nzoni na yâ ti bê ti Paul na lo soro lo ti sara mbeni kusala so ayeke nde. Ye ti pekoni ayeke so Paul aga oko ti akozo Chrétien so ayeke sara lani kusala mingi.
9 Ye so asi na bazengele Paul afa nyen na e? Na yâ ti territoire so e yeke dä, peut-être a yeke wara ambeni bungbi ti azo so mo bâ mo tene ala ye pëpe ti mä tënë so e yeke fa. Atâa so na bango ni, zo oko na popo ti ala akpa pëpe ti ga Chrétien, e yeke ngbâ lakue ti tara ti sara lisoro na ala. Ngoi na ngoi, même azo so e pensé so ala sara nzara ti tënë ti e kete pëpe alingbi ti yeda na ni. Kusala so a mû na e ayeke ti ngbâ ti fa tënë na azo kue na ti “zia pëpe” ti sara ni.—Diko Kusala 5:42.
Aye ti nzoni ayeke ku azo so ‘azia pëpe’ ti fa tënë
10. Ngbanga ti nyen a yeke nzoni e ke pëpe ti fa tënë na azo so a bâ ala tongana azo ti ziango mbeto na bê ti zo? Fa aye so asi na ndo so mo yeke dä.
10 Gi na bango mbeni zo alingbi ti sara si e tene tënë so ayeke na lege ni pëpe na ndo ti lo. Na tapande, aTémoin ti Jéhovah ato nda ni ti manda Bible na Ignacioa na ngoi so lo yeke lani na da ti kanga na yâ ti mbeni kodoro ti Amerika ti Mbongo. Azo ayeke sara mbeto ti lo ndali ti so lo ye sarango ye ti ngangu mingi. Ni la, amba ti Ignacio azo ti kanga, so ayeke sara ambeni ye na ala yeke kä ni na amba ti ala, ayeke hunda na lo ti zia mbeto na bê ti azo ti bon ti ala ti futa ni. Ye oko, na ngoi so Ignacio ague na li ni na lege ti yingo nga lo sara ye alingbi na ye so lo yeke manda, Ignacio so aye sarango ngangu mingi aga mbeni zo ti nzoni bê. Amba ti lo ni ahunda na lo mbeni pëpe ti zia mbeto na bê ti azo ti bon ti ala; na Ignacio ayeke na ngia so atâ tënë so ayeke na yâ ti Bible nga yingo ti Nzapa amû maboko na lo ti changé asarango ye ti lo. Lo yeke nga na ngia ndali ti so awafango tënë so asara ngangu ti manda Bible na lo ayeke na sioni bibe pëpe na ndo ti lo.
11. Ngbanga ti nyen e yeke kiri lakue ti bâ azo?
11 Mbeni nda ti tënë so apusu e ti kiri lakue ti bâ azo so e fa nzo tënë kozo na ala awe ayeke so dutingo ti azo nga na bango ndo ti ala alingbi ti changé. Na mara ti aye tongaso asi awe. Peut-être na peko ti ndangba vizite so e sara na ala, ala wara mbeni ngangu kobela, a zi ala na kua ti nginza wala mbeni zo so ala ye lo akui. (Diko Zo-ti-fa-tene 9:11.) Aye so ayeke si na ndo ti sese alingbi ti pusu azo ti gbu li ti ala mingi na ndo ti gigi ti ala ti kekereke. Mara ti aye tongaso alingbi ti sara si mbeni zo so ândö asara nzara ti tënë ni pëpe, wala a gi même ti kanga lege na kusala ti e, ayeda na tâ tënë. Tongaso, a yeke nzoni e ke pëpe ti fa nzo tënë na azo na ngoi kue so lege azi na e ti sara ni.
12. A yeke nzoni e bâ azo so e yeke fa tënë na ala tongana nyen? Ngbanga ti nyen?
12 Azo aye ka mingi ti tene so sarango ye ti azo ti mbeni mara kue ayeke gi oko na ti fâ ngbanga na ndo ti ala. Ye oko, Jéhovah ayeke bâ sarango ye ti zo oko oko. Lo yeke bâ ye ti nzoni so ayeke na yâ ti zo oko oko. (Diko 1 Samuel 16:7.) A yeke nzoni e sara nga tongaso na ngoi so e yeke fa tënë. Aye mingi so asi afa so ti duti na nzoni bibe na ndo ti azo kue so e yeke fa tënë na ala ayeke ga na aye ti nzoni mingi.
13, 14. (a) Ngbanga ti nyen mbeni pionnier awara sioni bibe na ndo ti mbeni wali so lo fa tënë na lo? (b) Ye so asi afa nyen na e?
13 Sandra, mbeni ita-wali so ayeke pionnier, ayeke fa tënë da na da na yâ ti mbeni zoa ti Caraïbe na ngoi so lo tingbi na Ruth, so abi tere ti lo lani mingi na yâ ti amatanga ti kodoro. Fani use, a soro Ruth na popo ti tanga ti awali ti kodoro ni ti duti gbia-wali ti matanga ni. Fango tënë ti Sandra anzere na Ruth mingi, tongaso ala leke ti manda Bible. Sandra adabe ti lo, lo tene: “Na ngoi so mbi lï na yâ ti da ti Ruth, mbi bâ kota foto ti Ruth so na lê ni lo yü pendere bongo ti matanga, na mbi bâ nga akangu ti wen ti matanga so lo wara. Mbi tene na bê ti mbi so mbeni zo so azo ahinga lo mingi tongaso na so abi tere ti lo mingi na yâ ti amatanga ti kodoro alingbi pëpe ti sara nzara ti tâ tënë. Tongaso, mbi zia lege ti sarango étude na lo.”
14 Mbeni lâ, Ruth asi na Da ti Royaume; na ngoi so bungbi ni ahunzi awe, lo hunda Sandra lo tene: “Nyen la asara si mo ga ti sara étude ti mbi pëpe so?” Sandra ahunda pardon na Ruth na lo leke ti tene lo kiri lo sara étude ni. Ruth ague na li ni hio mingi, lo zi afoto ti matanga so ayeke na yâ ti da ti lo, lo gue na abungbi kue, lo to nda ti fa tënë nga lo mû tere ti lo na Jéhovah. Biani, Sandra ahinga fadeso awe so bibe so lo yeke lani na ni na ndo ti Ruth ayeke na lege ni pëpe.
15, 16. (a) Ye wa asi na pekoni so mbeni Témoin afa tënë na mbeni fami ti lo? (b) Atâa aye so mbeni fami ti e ayeke sara, ngbanga ti nyen a yeke kanga lege na e pëpe ti fa tënë na lo?
15 Ambeni ita so afa tënë na afami ti ala so ayeke aTémoin ti Jéhovah pëpe awara aye ti nzoni mingi na pekoni. Na ala yeke wara aye ti nzoni na fango tënë même na afami ti ala so ala bâ atene ala yeke yeda na ni pëpe. Na tapande, bâ ye so asi na Joyce, mbeni ita-wali so ayeke na kodoro ti Amerika. Ngbene ye na ngoi so koli ti ngambe ti lo ti wali angbâ maseka mingi, fani mingi a yeke bi lo na da ti kanga. Joyce atene: “Azo atene so lo sara nzoni ye na yâ ti gigi ti lo pëpe ndali ti so lo yeke zo ti nyongo mbangi, lo yeke zo ti nzi nga lo yeke sara aye ti sioni mingi. Atâa aye so kue lo yeke sara, mbi ngbâ lakue ti fa na lo ye so Bible atene, na mbi sara ni teti angu 37.” Angu mingi so lo mû ti fa tënë na koli ti ngambe ti lo so angbâ senge pëpe ndali ti so na ngoi so aTémoin ti Jéhovah amanda Bible na koli ti ngambe ti lo so, lo changé aye mingi na yâ ti fini ti lo. A ninga mingi pëpe, na ngoi so lo yeke na ngu 50, lo wara batême na kota bungbi ti district so a sara na Californie so ayeke na kodoro ti Amerika. Na ndo ti tënë ti batême ti koli so, Joyce atene: “Kota ngia so mbi yeke na ni asara si mbi toto na ngu ti lê. Mbi yeke na ngia mingi so mbi zia lâ oko pëpe ti mû maboko na lo.”
16 Mo ye ti fa tënë na ambeni fami ti mo me mo lingbi ti gi bê ti mo ndali ti aye so ala yeke sara. Ye oko, mara ti bibe tongaso akanga lege pëpe na Joyce ti fa tënë na koli ti ngambe ti lo. Biani, zo alingbi pëpe ti hinga ye so ayeke na bê ti mba ti lo. Peut-être zo ni ayeke tâ na nzara ti sara na Nzapa na lege ni. Ni la, ke pëpe ti fa tënë na zo ni tongana lege azi na mo ti sara ni.—Diko aProverbe 3:27.
Mbeni nzoni buku ti mandango na Bible
17, 18. (a) Aye so asi na ndo ti sese kue afa nyen na ndo ti nene ti buku Bible afa nyen biani? (b) Aye ti nzoni wa mo wara na pekoni so mo sara kusala na buku so?
17 Aye so asi na ndo ti sese kue afa so azo mingi so ayeke na nzara ti hinga Nzapa ayeke yeda ti manda Bible na lege ti buku Bible afa nyen biani? Penni, mbeni ita-wali so ayeke pionnier na kodoro ti Amerika ato nda ti gbâ ti a-étude na azo na yâ ti buku so. Use na popo ti azo so lo manda Bible na ala ayeke ambakoro na ala bi tere ti ala mingi na yâ ti kusala ti bungbi ti nzapa ti ala. Penni ahinga mbilimbili pëpe lege so ala yeke sara ande ye tongana lo fa tâ tënë ti Bible so ayeke na yâ ti buku Bible afa na ala. Ye oko, lo tene: “Teti so atënë ti yâ ti buku so ayeke polele, ayeke na lege ni nga afa gi angbongboro tënë ni na nduru tënë, azo ni ayeda hio so ye so a yeke fa na ala ayeke tâ tënë. Ala yeke sara ni sân ti dë kite na atënë ni wala ti gi bê ti ala mingi.”
18 Pat so ayeke mbeni wafango tënë na kodoro ti Grande Bretagne ato nda ti manda Bible na mbeni wali réfugié ti mbeni kodoro ti Asie. Wali so akpe kodoro ti lo na pekoni so aturugu-kpale amû koli ti lo nga na amolenge ti lo ti koli ahon na ni, na lo kiri lo bâ asewa ti lo so mbeni pëpe. A gi ti sara sioni na lo, a gbi da ti lo nga akoli mingi abungbi na lo na peko ti tere ngangu. Aye so kue asara si lo bâ so gigi ti lo ayeke ye oko pëpe, na tongaso lo pensé fani mingi ti fâ tere ti lo. Ye oko, mandango Bible asara si lo wara beku. Pat atene: “Atënë nga na atapande so ayeke na yâ ti buku Bible afa akpengba pëpe, na a ndu bê ti wali so mingi.” Wali so ague na li ni hio mingi, lo to nda ti sigigi na fango tënë tongana mbeni zo so ade ti wara batême pëpe nga lo fa so lo yeke na nzara ti wara batême na ngoi ti kota bungbi so ayeke ga. So tâ ngia ti mû maboko na azo so ayeke na nzara ti voro Nzapa ti hinga ye na ndo ti beku so ayeke na yâ ti Bible na ti bâ ni na nene ni!
“A lingbi bê ti e anze pëpe na sarango kusala ti nzoni”
19. Ngbanga ti nyen a hunda ti kiri ti fa tënë mingi ahon ti kozo?
19 Tongana lango oko oko ayeke hon, a hunda na e ti kiri ti sara kusala ti fango tënë nga na ti sarango adisciple mingi ahon ti kozo. Ngu oko oko, azo saki mingi mingi so ayeke na nzara ti manda ye na ndo ti Nzapa ayeke yeda na tënë so e yeke fa na ala. Biani, “kota lâ ti L’Eternel aga nduru,” na ye so aye ti fa so tanga ti azo so ahinga ye pëpe na ndo ti Nzapa nga na aye so lo leke na bê ti lo ti sara ayeke “gue ti wara kui.”—Sophonie 1:14; aProverbe 24:11.
20. A yeke nzoni e oko oko kue e leke na bê ti e ti sara nyen?
20 Ngoi angbâ ti tene e mû maboko na mara ti azo tongaso. Me ti tene e sara ni, a yeke kota ye mingi ti tene e mû tapande ti akozo Chrétien so ‘azia pëpe ti fa nda ti tënë, na ti fa Tene-nzoni ti Jésus, Lo so ayeke Christ.’ (Kusala 5:42). Zia e mû tapande ti ala na lege so e yeke ngbâ lakue ti fa tënë atâa a gi ti kanga lege na e, na lege so e yeke bi bê na “kode ti fango ye” ti e nga na lege so e yeke fa tënë na azo kue! “A lingbi bê ti e anze pëpe na sarango kusala ti nzoni” ndali ti so tongana e ngbâ lakue ti sara ni, Nzapa ayeke iri tënë nzoni ande mingi mingi na ndo ti e.—2 Timothée 4:2, MN; diko aGalate 6:9.
[Kete tënë na gbe ni]
a A changé ambeni iri ni awe.
Mo yeke kiri tënë tongana nyen?
• Azo wa la ayeke yeda na nzo tënë?
• Ngbanga ti nyen a lingbi e kpe ti duti na asioni bibe na ndo ti azo so e yeke fa tënë na ala?
• Aye ti nzoni wa e yeke wara na lege ti buku Bible afa nyen biani?
[Foto na lembeti 17]
Azo saki mingi mingi so ayeke na nzara ti hinga Nzapa ayeke yeda na nzo tënë