A bâ ala lingbi ti tene a gue na ala na lingu ti ngu so amû fini
“Fade Molenge Ti Ngasangbaga so ayeke . . . Berger ti ala, Lo fa lege na ala ti si na li-ngu ti ngu so amû fini.”—APOCALYPSE 7:17.
1. Mbeti ti Nzapa afa aChrétien so a sa yingo na ndo ti ala tongana nyen? Kusala wa Jésus amû ni lani na ala?
MBETI TI NZAPA afa aChrétien so a sa yingo na ndo ti ala, so ayeke bâ lege ti aye ti Christ na sese tongana “boi ti nzoni [wala, “ngbâa be-ta-zo,” MN ] na ti ndara”. Na ngoi so Christ aga lani ti bâ ‘ngbâa’ so na ngu 1918, lo bâ so aChrétien so a sa yingo na ndo ti ala na ndo ti sese angbâ lakue ti sigigi na “kobe” ti yingo ‘na l’heure so alingbi.’ Ni la, na pekoni, Jésus, Maître ti ngbâa so azia ngbâa ni “na ndo ye ti lo kue.” (Diko Matthieu 24:45-47.) Na lege so, kozo ti tene aChrétien so a sa yingo na ndo ti ala ague na yayu, ala yeke sara kusala ndali ti azo so ayeke voro Jéhovah na sese ge.
2. Aye ti Jésus ayeke nyen?
2 Mbeni maître ayeke na droit na ndo ti aye ti lo, na lo lingbi ti sara kusala na aye ti lo tongana ti so lo ye. Aye ti Jésus Christ, so Jéhovah azia lo gbia, andu aye kue so andu Royaume na sese. Na popo ti aye so a yeke wara “azo mingi so asi singo,” so bazengele Jean abâ ala na yâ ti ye so lo bâ tongana suma. Jean asara tënë ti azo mingi mingi so tongaso: “Mbi bâ ndo, na mbi bâ azo mingi so asi singo, so zo alingbi diko ala pëpe, ala yeke ti amara kue, ti akete mara kue, ti azo nde nde kue, na ti yanga nde nde kue, ala yeke luti na gbele trône, na gbele Molenge Ti Ngasangbaga, ala yü vuru bongo, na tikeke ti mburu ayeke na maboko ti ala.”—Apocalypse 7:9.
3, 4. Na lege wa a ne mingi azo mingi so asi singo?
3 Azo mingi so asi singo ayeke na popo ti azo so Jésus asara tënë ti ala tongana “ambeni ngasangbaga” ti lo (Jean 10:16). Ala yeke na beku ti wara fini ti lakue lakue na yâ ti paradis na ndo ti sese. Ala hinga na bê ti ala kue so fade Jésus ayeke “fa lege na ala ti si na li-ngu ti ngu so amû fini” na so “fade Nzapa ambô ngule kue na lê ti ala.” Teti so ala yeke na beku so, ala “sukula bongo ti ala awe, na ala sara si bongo ti ala avuru na lege ti mênë ti Molenge Ti Ngasangbaga.” (Apocalypse 7:14, 17). Ala fa so ala yeke na mabe na yâ ti fini ti Jésus so lo mû na sandaga, na tongaso na lê ti Nzapa, “bongo ti ala avuru” awe. Nzapa adiko ala akamarade ti lo so ayeke mbilimbili, tongana ti Abraham.
4 Na ndo ni, wungo ti azo mingi so asi singo angbâ lakue ti gue na li ni. Teti so Nzapa abâ ala tongana azo ti mbilimbili, ala yeke na beku ti sö kuâ ande na ngoi ti kota ye ti vundu na ngoi so Nzapa ayeke futi aye ti ngoi ti e laso (Jacques 2:23-26). Ala lingbi ti ga nduru na Jéhovah, nga tongana mbeni bungbi, ala yeke na pendere beku ti sö ande kuâ na ngoi ti Harmaguédon (Jacques 4:8; Apocalypse 7:15). Ala yeke sara gi ye ti li ti ala pëpe me ala yeke yeda na fango lege ti Gbia so ayeke komande na yayu nga na ti aita ti lo so a sa yingo na ndo ti ala na sese ge.
5. Na lege wa azo mingi so asi singo ayeke mû maboko na aita ti Christ so a sa yingo na ndo ti ala?
5 Azo so ayeke na gbe ti ngangu ti Satan ayeke gi ti kanga lege ngangu na aChrétien so a sa yingo na ndo ti ala, na ala yeke ngbâ ande lakue ti gi ti sara ni. Ye oko, aChrétien so ahinga na bê ti ala kue so azo mingi so asi singo ayeke mû maboko na ala. Atâa so wungo ti aChrétien so a sa yingo na ndo ti ala ayeke fadeso mingi pëpe, ngu oko oko, wungo ti azo mingi so asi singo ayeke gue gi guengo na li ni. A-Chrétien so a sa yingo na ndo ti ala alingbi pëpe ti bâ lege ti akongregation ti aChrétien so wungo ni ayeke 100 000 tongaso na ndo ti sese kue. Tongaso, mbeni lege so ambeni ngasangbaga ayeke mû maboko na aChrétien so a sa yingo na ndo ti ala ayeke so ambeni koli so alingbi na popo ti ala ayeke sara kusala tongana a-ancien na yâ ti akongregation. Ala yeke mû maboko na aChrétien so a sa yingo na ndo ti ala ti bâ lege ti aChrétien kutu mingi so a zia ala na maboko ti ‘ngbâa be-ta-zo na ti ndara’.
6. Na lege wa a fa kozoni awe so fade ambeni ngasangbaga ayeke mû maboko na aChrétien so a sa yingo na ndo ti ala?
6 Prophète Esaïe afa kozoni awe so fade ambeni ngasangbaga ayeke mû maboko na aChrétien so a sa yingo na ndo ti ala. Lo tene: “L’Eternel atene tongaso, Fade [asenge zo ti kua ti Egypte so a futa ala pëpe na awadengo buze, MN ] ti Ethiopie aga ti mo; na azo ti Saba, ala so tere ti ala ayo, fade ala ga na mo, na ala ga ye ti mo; fade ala gue na peko ti mo.” (Esaïe 45:14). A lingbi ti tene so aChrétien so ayeke na beku ti duti na fini ti lakue lakue na sese ge ayeke tambela laso na peko ti ngbâa so a sa yingo na ndo ti lo nga na Wabatango Bungbi ti lo na lege so ala yeke sara ye alingbi na fango lege ti ala. Teti so ala yeke tongana ‘asenge zo ti kua so a futa ala pëpe’, ambeni ngasangbaga ayeda na bê ti ala kue ti mû ngangu ti ala nga na aye so ala yeke na ni ti mû maboko na kusala ti fango tënë so Christ amû na aChrétien so a sa yingo na ndo ti ala na sese.—Kusala 1:8; Apocalypse 12:17.
7. Akusala wa a yeke fa na azo mingi so asi singo ti tene ala sara ande ni?
7 Na ngoi so azo mingi so asi singo ayeke mû maboko na aita ti Christ so a sa yingo na ndo ti ala, aita ti Christ so ayeke fa na ala mbeni kua so ayeke mû lege na ala ti mû ande li ni nzoni na yâ ti fini sese so ayeke bâ gigi na peko ti Harmaguédon. A lingbi ala manda ye so a yeke fa na ala nzoni, nga a lingbi azo oko oko kue so aita ti Christ afa ye na ala aduti nduru ti sara ye ague oko na ye so Maître ni afa. Lege azi na Chrétien oko oko kue ti fa so lo lingbi ti sara akusala kue so Jésus Christ so ayeke Gbia amû na lo. Tongana na ndembe so lo fa so lo yeke na mabe nga lo duti be-ta-zo laso, lo yeke fa so lo yeke duti ande nduru ti sara ye alingbi na fango lege ti Gbia ni na yâ ti fini sese.
Azo mingi so asi singo afa so ala yeke na mabe
8, 9. Na lege wa azo mingi so asi singo afa so ala yeke na mabe?
8 Ambeni ngasangbaga so ayeke mû maboko na aChrétien so a sa yingo na ndo ti ala afa na alege nde nde so ala yeke na mabe. Kozoni, ala yeke mû maboko na aChrétien so a sa yingo na ndo ti ala ti fa nzo tënë ti Royaume ti Nzapa (Matthieu 24:14; 28:19, 20). Use ni, ala yeke yeda na bê ti ala kue ti tene Wabatango Bungbi afa lege na ala.—aHébreu 13:17; diko Zacharie 8:23.
9 Ota ni, azo mingi so asi singo ayeke mû maboko na aita ti Christ so a sa yingo na ndo ti ala na lege so ala yeke sara ye ague oko na akpengba-ndia ti Jéhovah so ayeke mbilimbili. Ala yeke sara ngangu ti duti na asarango ye tongana “ndoye, tâ ngia, siriri, be-nze-pepe, nzobe, bê ti sara nzoye, be-biani, tâ be-ti-molenge, na ngangu ti kanga nzara ti tere”. (aGalate 5:22, 23). Laso, azo mingi ayeke pëpe na asarango ye so. Ahon ti duti na asarango ye so, ala yeke fa na gigi “kusala ti mitele”. Ye oko, azo mingi so asi singo aleke na bê ti ala ti kpe “lango-sioni, sioye, ye ti pitan, sambelango ayanda, tënë ti yorö, kengo tere, gingo tënë, sarango mbanda, ngonzo, papa, tënë ti kangbi, tënë ti secte nde nde, bê, nyongo sämba [“ahon ndo ni,” MN ], pumba kirikiri, na mbeni ye tongaso.”—aGalate 5:19-21.
10. Ye wa azo mingi so asi singo aleke na bê ti ala ti sara?
10 Teti so e yeke mbilimbili-kue pëpe, a lingbi ti duti ngangu na e ti lë lengo ti yingo, ti kpe akusala ti mitele nga ti ke ngangu so azo ti sese ti Satan ayeke sara na ndo ti e. Vundu alingbi ti sara e ndali ti awokongo ti e, ndali ti akpale so e wara na ngoi so e yeke sara ngangu ti sara ye tongana ti Jésus nga ndali ti seni ti e. Ye oko, e leke na bê ti e ti zia pëpe si vundu so asara si mabe ti e awoko wala asara si ndoye ti e na mbage ti Jéhovah akiri na peko. E hinga so Jéhovah ayeke sara ye tongana ti so lo mû zendo ni, so ti tene lo yeke bata ande azo mingi so asi singo na yâ ti kota ye ti vundu.
11. Akode wa Satan asara kusala na ni ti sara si mabe ti aChrétien awoko?
11 Ye oko, e yeke ngbâ lakue ti sara ye na hange ndali ti so e hinga so tâ wato ti e ayeke Zabolo, na lo yeke zia lege ti e hio pëpe. (Diko 1 Pierre 5:8.) Lo tara ti sara kusala na a-apostat nga na ambeni zo nde ti sara si e bâ so aye so Jéhovah ayeke fa na e ayeke na lege ni pëpe. Me fani mingi, aye so lo leke ti sara atï na ngu. Legeoko nga, atâa so na ambeni ngoi sarango ye ti ngangu na aChrétien alingbi ti sara si fango tënë ague na li ni mingi pëpe, fani mingi, ye so ayeke sara si mabe ti aChrétien so a sara ye ti ngangu na ala akpengba. Tongaso, Satan ayeke gi mingi ahon ti sara kusala na mbeni kode so peut-être lo bâ ayeke mû lege na lo biani ti sara si mabe ti e awoko. Tongana bê ti e awoko, lo yeke gi ti wara go dä. A wa akozo Chrétien na ndo kpale so ala lingbi ti wara, a tene: “I bi bê ti i na [Christ] so agbu ngangu na yâ kengo-tene ti awasiokpari so ala ke Lo.” Nda ni ayeke nyen? A yeke ti sara “si ngangu ti i awe pëpe, na bê ti i anze pëpe.”—aHébreu 12:3.
12. Na lege wa wango ti Bible ayeke kpengba azo so mbeni ye asara si ala yeke na ngia pëpe?
12 A si so na mbeni ngoi, mo bâ so mo lingbi pëpe ti ngbâ ti sara na Jéhovah wala mo bâ so mo yeke ye oko pëpe? Tongana a yeke tongaso, zia pëpe si Satan asara kusala na abibe so ti kanga lege na mo ti sara na Jéhovah. Ti manda Bible nzoni, ti sambela na bê kue, ti ga lakue na abungbi nga ti duti nduru na tere ti amba ti mo aChrétien ayeke sara si mabe ti mo akpengba. A yeke sara nga si ‘bê ti mo anze pëpe.’ Jéhovah amû zendo ti mû maboko na azo so ayeke sara na lo si ala kiri awara ngangu, na e lingbi ti zia bê ti e kue na azendo ti lo. (Diko Esaïe 40:30, 31.) Ngbâ ti zia bê ti mo gi na ndo ti akusala so a mû na aChrétien ti sara. Kpe aye so ayeke mû ngoi ti zo kue, na mû ngoi ti mo ti mû maboko na azo. Na nda ni, mo yeke wara ngangu ti gbu ngangu atâa so ambeni ye asara si mo yeke na ngia pëpe.—aGalate 6:1, 2.
A zi e na yâ ti kota ye ti vundu ti duti na fini sese
13. Kusala wa ayeke ku azo so ayeke sö ande kuâ na ngoi ti Harmaguédon?
13 Na peko ti Harmaguédon, a yeke hunda ande ti fa ye na ndo ti Jéhovah na azo mingi so a yeke zingo ande ala, ala so ayeke kozoni awakua ti Jéhovah pëpe (Kusala 24:15). A yeke hunda ti tene ala manda ye na ndo ti fini ti Jésus so lo mû na sandaga ti zi e; na ndo ni, a lingbi a fa ande na ala ti duti na mabe na yâ ti sandaga so ti mû lege na ala ti wara aye ti nzoni dä. A yeke hunda ande na ala ti ke atënë ti wataka so a fa lani na ala na ndo vorongo Nzapa nga ti zia lege ti akozo sarango ye ti ala. A lingbi ala manda ti yü fini zo so ayeke sara si a hinga ala tongana atâ Chrétien (aEphésien 4:22-24; aColossien 3:9, 10). Azo ti ambeni ngasangbaga so ayeke sö ande kuâ na ngoi ni so ayeke duti ande na gbâ ti akua ti sarango ni. So tâ kota ngia si e yeke duti ande na ni ti sara kusala so na Jéhovah, sân ti tene aye ti sioni sese ti laso asara ngangu na ndo ti e na agboto lê ti e yongoro!
14, 15. Fa lisoro so azo so asö kuâ na ngoi ti kota ye ti vundu na azo ti mbilimbili so a zingo ala ayeke sara ande na popo ti ala.
14 Awakua ti Jéhovah so ayeke be-ta-zo na so akui kozo ti tene Jésus asara kusala ti lo na sese ayeke duti ande nga na aye mingi ti manda na ngoi ni so. Ala yeke hinga ande zo so ayeke Messie ti zendo ni, so ala ku lani kungo ti bâ lo me ala ku gbä. Na ngoi so ala yeke ândö na fini, ala fa kozoni awe so ala yeke nduru ti tene Jéhovah afa ye na ala. Tara ti bâ ngia so e yeke duti ande na ni ti mû maboko na ala: na tapande, ti fa ye na Daniel na ndo ti gango tâ tënë ti aprophétie so lo sû na mbeti sân ti gbu nda ni!—Daniel 12:8, 9.
15 Biani, atâa so azo so a yeke zingo ande ala ayeke manda ye mingi na mbage ti e, e yeke na atënë mingi ti hunda ni na ala. Ala lingbi ti fa ande na e anzene nzene ye na ndo ti aye so a sara tënë ni na yâ ti Bible me so a fa anzene nzene ye na ndo ni pëpe. Tara ti bâ ngia so e yeke duti ande na ni ti mä anzene nzene ye so Jean-Baptiste, so mama ti lo na mama ti Jésus ayeke aita, ayeke fa na ndo ti Jésus! Kite ayeke dä pëpe so aye so e yeke manda ande na mbage ti awakua be-ta-zo so ayeke ândö na fini, na so abâ ye ni tâ na lê ti ala ayeke sara si e gbu nda ti Mbeti ti Nzapa mingi ahon ti laso. Bible asara tënë ti “londongo ti awakinda ti nzoni ahon”, na awakua be-ta-zo ti Jéhovah so akui ayeke wara ande ni. Na popo ti azo so a yeke zingo ande ala, mo yeke wara ambeni ti azo mingi so asi singo so akui na ngoi ti nda ni so. Ala to nda ti sara na Jéhovah na yâ ti mbeni sese so Satan akomande lani na ndo ni. So tâ kota ngia si ala yeke duti ande na ni ti ngbâ ti sara kusala ti ala na yâ ti mbeni dutingo so ayeke nzoni mingi na yâ ti fini sese!—aHébreu 11:35; 1 Jean 5:19.
16. Ti gue oko na prophétie, a yeke sara ye na lango ti fango ngbanga tongana nyen?
16 A si ande na mbeni ngoi na lango ti fango ngbanga, a yeke zi lê ti ambeti. A yeke fâ ande ngbanga na ndo ti azo kue so ayeke na fini alingbi na atënë ti yâ ti ambeti so nga na ti Bible ti bâ wala ala lingbi ti wara fini ti lakue lakue. (Diko Apocalypse 20:12, 13.) Na ngoi so lango ti fango ngbanga ako nda ni, zo oko oko kue ayeke wara lege ti fa zo so lo bâ lo yeke na droit ti komande dunia kue. Ahundango tënë ni ayeke so: Zo ni ayeke yeda ande na komandema ti Royaume ti Nzapa nga lo yeke zia lege na Molenge ti Ngasangbaga ti gue na lo na “li-ngu ti ngu so amû fini”? Wala lo yeke dö sese na lo nga lo yeke ke komandema ti Royaume ti Nzapa? (Apocalypse 7:17; Esaï 65:20). Na ngoi ni so, lege ayeke zi ande na azo oko oko kue ti sese ti mû desizion ti ala wani, sân ti tene siokpari so a dü ala na ni wala aye ti sioni sese ti laso akanga lege na ala. Zo kue ayeke yeda ande so ngbanga so Jéhovah afâ na nda ni ayeke tâ na lege ni. A yeke futi ande gi azo ti sioni biani biani.—Apocalypse 20:14, 15.
17, 18. Ye wa aChrétien so a sa yingo na ndo ti ala nga na ambeni ngasangbaga ayeke ku na ngia ti sara na lango ti fango ngbanga?
17 A-Chrétien so a sa yingo na ndo ti ala laso, so a bâ ala lingbi ti wara Royaume ti Nzapa, ayeke ku kungo ngoi so ala yeke komande na lango ti fango ngbanga. So tâ pendere kusala si ala yeke sara ande ni! Ti gbu li na ndo ti pendere kusala so ayeke ku ala apusu ala ti sara ye alingbi na wango so Pierre amû na aita ti ala ti ngoi ti akozo Chrétien, lo tene: “I sara na bê ti i kue ti hinga iringo ti i biani, na ti hinga biani lege so Nzapa airi i na gigi. Teti tongana i sara ye so, fade i pika gere ti i lâ oko pëpe. Tongaso, fade A lungula lege kota na i ti lï na yâ royaume ti lakue lakue ti Seigneur na Sauveur ti e Jésus-Christ.”—2 Pierre 1:10, 11.
18 Ambeni ngasangbaga ayeke na ngia ndali ti ye so ayeke ku aChrétien so a sa yingo na ndo ti ala. Ala leke na bê ti ala ti mû maboko na ala. Teti so ala yeke akamarade ti Nzapa laso, bê ti ala apusu ala ti sara ye kue so ala lingbi ti sara na yâ ti kusala ti Nzapa. Na lango ti fango ngbanga, ala yeke duti ande na ngia mingi ti mû maboko na bê kue na aye so Nzapa aleke na ngoi so Jésus ayeke gue na ala na lingu ti ngu so amû fini. Na nda ni, a yeke diko ala tongana azo so alingbi ti duti awakua ti Jéhovah na ndo ti sese teti lakue lakue.—aRomain 8:20, 21; Apocalypse 21:1-7.
Mo dabe ti mo na ni?
• Aye ti Jésus andu nyen?
• Na lege wa azo mingi so asi singo ayeke mû maboko na aChrétien so a sa yingo na ndo ti ala?
• Apendere kusala wa nga na ye wa ayeke ku azo mingi so asi singo?
• Mo bâ lango ti fango ngbanga tongana nyen?
[Foto na lembeti 29]
Azo mingi so asi singo asukula bongo ti ala awe, na ala sara si a vuru na yâ ti mênë ti Molenge ti Ngasangbaga
[Foto na lembeti 31]
Ye wa mo ye ti manda na mbage ti awakua be-ta-zo so a yeke zingo ande ala?