Soro ti sara na Jéhovah na ngoi so mo de maseka

“Mo ngbâ na lege ti ye so mo manda awe, na ye so mo hinga na bê ti mo.”​—2 TIM. 3:14.

1. Jéhovah abâ kusala so aTémoin ti lo so ade maseka ayeke sara na lo tongana nyen?

KUSALA so amaseka ayeke sara na Jéhovah ayeke kota ye mingi na lê ti lo. Ni la lo pusu mbeni zo ti sungo psaume ti tene prophétie na ndo ti ala, lo tene: “Azo ti Mo amû ala mveni na nzobe, na lâ ti bira ti Mo, ala yü ye ti pendere ti nzoni-kue; apendere ti Mo ayeke tongana mamio ti ndapre.” (Ps. 110:3). Biani, Jéhovah abâ na nene ni mingi amaseka so ayeda na bê ti ala kue ti sara na lo.

2. Na ndo ti tënë ti ye so amaseka ayeke soro ti sara, azo wa ayeke sara ngangu na ndo ti ala?

² Ala amaseka so ayeke na yâ ti kongregation, ala mû tere ti ala na Jéhovah awe? Ambeni maseka mingi alingbi ti bâ so ti soro ti sara na tâ Nzapa ayeke kete ye pëpe. Akota zo ti dengo buze, awafango mbeti, nga ngoi na ngoi, azo ti yâ ti sewa ti amaseka nga na akamarade ti ala alingbi ti wa ala ti gi peko ti aye ti mitele. Fani mingi, azo so ahinga Jéhovah pëpe ayeke he amaseka so asoro ti sara na lo. Me ala amaseka, a lingbi ala hinga so ti sara na tâ Nzapa ayeke tâ nzoni ye so ala lingbi ti gi ti sara (Ps. 27:4). Na ndo ti tënë so, ala bâ ahundango tënë ota so: Ngbanga ti nyen a yeke nzoni ala sara na Nzapa? Nyen la ayeke mû maboko na ala ti sara ye ague oko na mungo tere ti ala na Nzapa atâa ye so ambeni zo ayeke tene wala ayeke sara? Apendere lege wa alingbi ti zi na ala ti sara kua ti Nzapa?

A yeke na lege ni ti sara na Jéhovah

3. A yeke nzoni aye so Jéhovah acréé asara nyen na ndo ti e?

³ Ala amaseka, ngbanga ti nyen a yeke nzoni ala sara na tâ Nzapa so ayeke na fini? Apocalypse 4:11 afa kozo raison so a yeke nzoni ala sara ni, atene: “Seigneur na Nzapa ti e, Mo lingbi ti wara gloire, na yango-iri, na ngangu, teti Mo sara ye kue giriri, na ala yeke, na A créé ala, teti bê ti Mo aye tongaso.” Jéhovah ayeke Kota Wasarango aye kue so e yeke bâ na yâ ti dunia so. Sese ayeke tâ pendere mingi! Akeke, afleur, anyama, akota ngu ti ingo, ahoto nga na achute ti ngu, aye so kue ayeke aye ti maboko ti Jéhovah. Psaume 104:24 atene so “sese so asi singo na mosoro ti [Nzapa].” E kiri singila mingi ndali ti so na ndoye Jéhovah amû na e mbeni tere nga mbeni mongoli so amû lege na e ti wara ngia na yâ ti anzoni ye so angoro e na ndo ti sese. A yeke nzoni singila ti bê ti e ndali ti apendere ye so Nzapa acréé asara si e yeda ti sara na lo.

4, 5. Aye wa so Jéhovah asara apusu Josué ti ga nduru na lo?

⁴ Mbeni raison ti sara na Jéhovah ayeke so e wara na yâ ti atënë ti Josué so ayeke mbeni mokonzi ti azo ti Israël. Na ngoi so Josué aga nduru ti kui, lo tene na azo ti Israël, lo tene: “I hinga na bê ti i kue na âme ti i kue, ye oko atï pëpe ti nzoye kue so L’Eternel Nzapa ti i azê na i; ye ni kue aga tâ tënë awe.” Nyen la amû lege na Josué ti tene tongaso?​—Jos. 23:14.

⁵ Kite ayeke dä pëpe so Josué so akono lani na sese ti Egypte ahinga tënë ti zendo so Jéhovah amû na azo ti Israël ti mû na ala mbeni sese so ayeke ga ti ala wani (Gen. 12:7; 50:24, 25; Ex. 3:8). Na pekoni, Josué abâ tongana nyen Jéhovah ato nda ti sara ye alingbi na zendo so: Jéhovah aga na aye ti ngangu bale-oko na ndo ti azo ti Egypte nga lo pusu Pharaon so li ti lo akpengba mingi ti zia lege na azo ti Israël ti gue. Josué ayeke na popo ti azo so ahon lani na yâ ti Ngu Bengba nga na pekoni lo bâ tongana nyen ngu so amene Pharaon na aturugu ti lo. Na ngoi ti yongoro tambela so ala yeke sara na yâ ti “kota yando [ti Sinaï] so amû mbeto mingi,” Josué abâ tongana nyen Jéhovah amû na azo ti Israël aye kue so ala yeke na bezoin ni. Mbeni oko ti ala akui pëpe na nzara ti ngu wala ti kobe (Deut. 8:3-5, 14-16; Jos. 24:5-7). Tongana ngoi asi awe ti tene azo ti Israël ague ti mû Sese ti Zendo ni na tïtî azo ti Canaan so ayeke ngangu mingi, Josué abâ tongana nyen Nzapa so lo na azo ti Israël ayeke voro lo amû maboko na ala na yâ ti bira so.​—Jos. 10:14, 42.

6. Nyen la ayeke mû ande maboko na mo ti duti na nzara ti sara na Nzapa?

⁶ Josué ahinga lani so Jéhovah asara ye alingbi na azendo so lo mû. Ni la, Josué atene: “Mbi na azo ti da ti mbi, fade e sara na L’Eternel.” (Jos. 24:15). Ka ti mo, a yeke tongana nyen? Na ngoi so mo yeke gbu li na ndo ti azendo ti tâ Nzapa so aga tâ tënë awe nga na ati so ade ti ga tâ tënë pëpe, mo yeke na nzara ti sara na Jéhovah tongana ti Josué?

7. Ngbanga ti nyen batême ti ngu ayeke mbeni kpengba ye ti tene zo asara?

⁷ Ala amaseka, ala bâ aye so Jéhovah acréé nga ala gbu li na ndo ti apendere zendo ti lo so zo alingbi biani ti zia bê ti lo na ndo ni. A yeke nzoni sarango aye so apusu ala ti mû tere ti ala na Jéhovah nga ti fa ni na lege ti batême ti ngu. Batême ayeke mbeni kpengba ye so zo ayeke sara ti fa so lo ye ti sara na Nzapa. Jésus, so ayeke tapande ti e afa ni nzoni mingi. Kete kozo ti tene Jésus ato nda ti kusala ti lo tongana Messie, lo gue lo bâ Jean-Baptiste na lo wara batême. Ngbanga ti nyen Jésus awara batême? Ngbanga ti so mbeni lâ, lo tene: “Mbi londo na yayu Mbi zu ti sara ye so Mbi ye pëpe, me ti sara ye so Lo so ato Mbi aye.” (Jean 6:38). Ti fa so Jésus aga ti sara ye so bê ti Babâ ti lo aye, lo wara batême.​—Mat. 3:13-17.

8. Ngbanga ti nyen Timothée asoro ti voro Nzapa? Amaseka, ala yeke peut-être na bezoin ti sara nyen?

⁸ Ala amaseka, ala bâ nga tapande ti Timothée, mbeni maseka so ayeke Chrétien, so na pekoni Jéhovah amû na lo gbâ ti akpengba kua ti sarango ni. Aye wa apusu Timothée ti mû desizion ti sara na tâ Nzapa? Bible afa na e so a yeke aye so ‘lo manda awe, na ye so lo hinga na bê ti lo’. (2 Tim. 3:14). Tongana mo manda Mbeti ti Nzapa awe nga mo yeda so aye so a fa na mo ayeke tâ tënë, dutingo ti mo aye ti gue oko na ti Timothée. Fadeso, a hunda ti tene mo mû desizion. Amaseka, ala fa na ababâ na amama ti ala ye so ala ye ti sara. Ababâ na amama ti ala nga na a-ancien ti kongregation alingbi ti mû maboko na ala ti hinga aye so Bible ahunda na zo ti sara si lo wara batême.​—Diko Kusala 8:12.

9. Desizion so ala amaseka ayeke mû ti wara batême alingbi ti sara nyen na ndo ti azo?

⁹ Tongana ala wara batême, a yeke kozo kpengba ye so ayeke mû lege na ala ti to nda ti sara na tâ Nzapa. Na sarango tongaso, a yeke tongana ti so ala lï na yâ ti mbeni mandako ti mungo loro so ayeke gue na ala ngbii ti wara fini ti lakue lakue. Na ndo ni, a yeke mû lege na ala ti wara ngia so zo ayeke wara laso na peko ti sarango ye so bê ti Nzapa aye (aHéb. 12:2, 3). Ye so ayeke sara nga si ala mû ngia na bê ti asewa ti ala nga na akamarade ti ala ti yâ ti kongregation so alï kozo ti ala awe na yâ ti molongo ti kpengo loro so. Kota ye so ahon atanga ni kue ayeke so ala yeke zia ande ngia na bê ti Jéhovah. (Diko aProverbe 23:15.) Peut-être azo agi li ti ala gbä na raison so apusu ala amaseka ti soro ti sara na Jéhovah, na ala lingbi ti dë kite na ndo ti desizion so ala amaseka amû. Ala lingbi même ti gi ti kanga lege na ala. Me ala amaseka, ala lingbi biani ti hon ndo ti akpale so.

Tongana azo ahunda tënë na ala wala agi ti kanga lege na ala

10, 11. (a) Atënë wa azo alingbi ti hunda na ala na ndo ti desizion so ala mû ti sara na Nzapa? (b) Lege so Jésus akiri na atënë so andu tâ vorongo afa nyen na ala?

¹⁰ Desizion so ala amaseka amû ti sara na Jéhovah alingbi ti sara si akamarade ti ala, avoizin ti ala nga na afami ti ala ayeke hunda tere ti ala. Azo so alingbi ti hunda ala ti hinga ngbanga ti nyen ala soro ti sara na Jéhovah nga aye wa ala mä na bê dä. A yeke nzoni ala kiri tënë tongana nyen? Biani, a lingbi ala gi ti bâ aye so ala yeke pensé dä nga na atënë ti bê ti ala ti mû lege na ala ti fa araison so apusu ala ti soro ti sara na Jéhovah. Nga, na ngoi so ala yeke kiri tënë na azo na ndo ti aye so ala mä na bê dä, tapande ti Jésus ayeke tâ nzoni tapande so ala lingbi ti mû pekoni.

¹¹ Na ngoi so amokonzi-nzapa ti aJuif ahunda Jésus na ndo ti zingongo ti akuâ, lo gboto lê ti ala na ndo ti mbeni mbage ti Mbeti ti Nzapa so ala bi bê na ndo ni pëpe (Ex. 3:6; Mat. 22:23, 31-33). Na ngoi so mbeni scribe ahunda Jésus ti hinga komandema wa ayeke kota ahon atanga ni kue, Jésus akiri na ndo ti atënë ti aversê ti Bible so abâ tënë ni. Kiringo tënë ti Jésus azia ngia na bê ti koli so (Lév. 19:18; Deut. 6:5; Marc 12:28-34). Lege so Jésus ayeke sara kua na Mbeti ti Nzapa nga na lege so lo yeke sara na tënë asara si “kangbi alondo na popo ti azo mingi so” na ndo ti Jésus na tongaso azo so agi ti kanga lege na Jésus alingbi pëpe ti sara sioni na lo (Jean 7:32-46). Na ngoi so mo yeke kiri tënë na ndo ti aye so mo mä na bê dä, sara kua na Bible nga kiri tënë “na tâ be-ti-molenge na mbeto”, wala na nengo zo (1 Pi. 3:15). Tongana mo hinga kiringo tënë ni pëpe, tene so mo hinga ni pëpe nga mo yeke gue ti gi nda ti tënë na ndo ni. Na pekoni, sara kua na Index des publications de la Société Watch Tower wala Watchtower Library so a zia na ndo ti CD-ROM ti gi ambeni tënë na ndo ni. Tongana mo leke tere ti mo nzoni, mo yeke “hinga lege ti kiri tënë”.​—aCol. 4:6.

12. Ngbanga ti nyen a yeke nzoni ala zia lege pëpe si aye ti ngangu so a yeke sara na ala awoko ala?

¹² Atâa so azo ayeke hunda tënë na ala amaseka na ndo ti desizion so ala mû ti sara na Nzapa nga na ndo ti aye so ala mä na bê dä, ala lingbi nga ti tingbi na mbeni ye nde. Ala girisa pëpe so sese so kue ayeke na gbe ti ngangu ti Satan Zabolo so ayeke wato ti Nzapa. (Diko 1 Jean 5:19.) A yeke na lege ti ndara pëpe ti ku ti tene azo kue agonda ala wala ayeda na ala. Na ndo ni, azo alingbi ti gi ti kanga lege na ala. Ambeni zo alingbi ti ‘zonga ala’, na azo ni alingbi ti ngbâ ti sara ni (1 Pi. 4:4). Me ala amaseka, zia ala hinga so a yeke gi ala oko la ye so ayeke si na ala pëpe. Jésus Christ nga kue, azo asara lani ye ti ngangu na lo. Azo asara nga ye ti ngangu na bazengele Pierre, ni la lo tene: “I so mbi ndoye i mingi, bê ti i adö pëpe tënë ti ye [ti pasi] so aga na popo ti i ti tara i tongana wâ, na i bâ ye so pëpe tongana mbeni ye ti kpene so asara i; me tongana i yeke afon Christ na pono ti Lo, i duti na ngia.”​—1 Pi. 4:12, 13.

13. Ngbanga ti nyen aChrétien alingbi ti duti na ngia na ngoi so a yeke sara ye ti ngangu na ala?

¹³ Tongana a sara ye ti ngangu na ala wala a gi ti kanga lege na ala ndali ti so ala yeke aChrétien, ye so ayeke mbeni raison ti tene ala duti na ngia. Ndali ti nyen? Ndali ti so tongana mingi ti azo ayeda na ala, ye so ayeke fa so ala yeke sara ye so Satan aye, me pëpe ye so Nzapa aye. Jésus amû wango, lo tene: “Vundu aga na i, tongana azo kue asara tënë ti i nzoni! teti akotara ti ala asara tongaso na aprophète ti wataka giriri.” (Luc 6:26). Tongana a sara ye ti ngangu na ala, ye so afa so bê ti Satan nga na azo so ayeke na gbe ti ngangu ti lo aso na tere ti ala ndali ti so ala yeke sara na Jéhovah. (Diko Matthieu 5:11, 12.) Na ndo ni, tongana a “sara tënë ngangu na li ti [ala] teti iri ti Christ,” a yeke mbeni raison ti tene ala duti na ngia.​—1 Pi. 4:14.

14. Tongana mbeni zo angbâ be-ta-zo na Jéhovah atâa so a sara aye ti ngangu na lo, aye ti nzoni wa ayeke ga na pekoni?

¹⁴ Tongana ala ngbâ be-ta-zo na Jéhovah atâa so a gi ti kanga lege na ala, aye ti nzoni osio ayeke ga na pekoni. Ala yeke fa na azo aye na ndo ti Nzapa nga na Molenge ti lo. Gbungo ngangu ti ala ayeke kpengba amba ti ala aChrétien. A lingbi ti pusu ambeni zo so abâ aye so asi na ala ti gi ti hinga Jéhovah. (Diko aPhilippien 1:12-14.) Na ndo ni, ti bâ tongana nyen Jéhovah akpengba ala ti gbu ngangu ayeke sara si ala ye lo mingi ahon ti kozo.

“Kota lege” azi na ala

15. “Kota lege” wa azi lani na bazengele Paul?

¹⁵ Bazengele Paul atene na ndo ti kua so lo yeke sara na gbata ti Ephèse, lo tene: “A lungula kota lege na mbi ti sara kusala.” (1 aCor. 16:8, 9). Lege azi na Paul ti fa nzoni tënë mingi nga ti sara si azo mingi ti gbata so aga adisciple. Teti so Paul ayeda ti sara kota kua so, lo mû maboko na azo mingi ti hinga Jéhovah na ti voro lo.

16. Na lege wa tanga ti aChrétien so a sa yingo na ndo ti ala amû “kota lege” so azi na ala na ngu 1919?

¹⁶ Na ngu 1919, Jésus Christ so ayeke komande ‘alungula kota lege’ na gbele tanga ti aChrétien so a sa yingo na ndo ti ala (Apoc. 3:8). A-Chrétien so amû lege so nga na bê ti ala kue, ala to nda ti fa nzoni tënë na azo, ala fa atâ tënë so ayeke na yâ ti Bible na azo. Ye ti peko ti kua so ala sara na bê ti ala kue ayeke so wa? Ye ti pekoni ayeke so laso a yeke fa nzoni tënë na ndo ti sese kue nga azo nduru na kutu mbasambala ayeke na beku ti wara ande fini ti lakue lakue na yâ ti fini sese ti Nzapa.

17. Na lege wa ala amaseka alingbi ti mû “kota lege” so azi na azo ti “sara kusala”?

¹⁷ “Kota lege” so azi na azo ti “sara kusala” angbâ lakue ti zi kota na awakua ti Jéhovah. Azo so amû lege ni so ayeke na ngia na ngoi so ala yeke fa nzoni tënë mingi na azo ahon ti kozo. Ala awakua ti Jéhovah so ade maseka, ala yeke bâ na nene ni mingi kota pasa so ala yeke na ni ti mû maboko na azo ti ‘mä na bê na Tene-nzoni’? (Marc 1:14, 15). Ala yeke gbu li ti ala na ndo ti mungo kua ti pionnier permanent wala ti pionnier auxiliaire? Lege alingbi ti zi na amaseka mingi ti mû mbage na lekengo aDa ti Royaume, ti sara kua na Béthel wala ti ga pionnier spécial. Teti so ngoi ti komandema ti Satan aga nduru ti hunzi awe, lâ oko oko, a yeke na bezoin mingi ahon ti kozo ti wara azo ti sara mara ti akua so a fa ni ge. Ala yeke yeda ande ti mû “kota lege” so kozo si lege ti sara ni ayeke dä mbeni pëpe?

“Tara L’Eternel, na fade mo bâ Lo yeke nzoni”

18, 19. (a) Nyen la amû maboko na David ti duti na kota nzara ti sara na Jéhovah? (b) Nyen la afa so David abâ lakue so desizion so lo mû ti sara na Nzapa ayeke tâ nzoni mingi?

¹⁸ Yingo ti Nzapa apusu zo ti sungo psaume ti tisa azo ti ‘tara L’Eternel, na ti bâ so Lo yeke nzoni’. (Ps. 34:9). Na ngoi so Gbia David ti Israël ti giriri ade lani maseka na lo yeke zo ti batango anyama, Jéhovah abata lo si asioni nyama ti ngonda asara sioni na lo pëpe. Nzapa amû maboko na lo na ngoi so lo yeke tiri na Goliath nga Nzapa asö lo na yâ ti gbâ ti aye ti ngangu (1 Sam. 17:32-51; Ps. 18:1). Ndali ti so Nzapa afa kota nzobe ti lo na David, ye so apusu lo ti tene: “O L’Eternel Nzapa ti mbi, kusala ti kpene ti Mo, na bibe ti Mo teti e awu mingi; zo oko ti lingbi na Mo ayeke pëpe.”​—Ps. 40:6.

¹⁹ David aye Jéhovah mingi nga lo ye ti gonda lo na bê ti lo kue nga na bibe ti lo kue. (Diko Psaume 40:9-11.) Na ngoi so angu ayeke hon, David abâ so desizion so lo mû ti voro tâ Nzapa ayeke tâ nzoni mingi. Ti sara kua ti Nzapa ayeke tâ kota ye mingi na lê ti lo, mbeni ye so amû na lo ngia ahon tanga ti aye kue. Na ngoi so David aga mbakoro awe, lo tene: “O Seigneur L’Eternel, Mo yeke Lo so mbi zia bê ti mbi na Mo! Bê ti mbi ayeke na Mo, a komanse na lâ ni so mbi de molenge. Tongana mbi ga mbakoro na kuali ti mbi avuru, O Nzapa, Mo zia mbi pëpe.” (Ps. 71:5, 18). David azia bê ti lo kue na Jéhovah, nga songo ti lo na Nzapa akpengba mingi, atâa so David ayeke na ngangu tongana ti kozo pëpe.

20. Ngbanga ti nyen ti sara na Nzapa ayeke tâ nzoni ye ti sarango ni na yâ ti gigi ti mo?

²⁰ Fini ti Josué, ti David nga na ti Timothée afa polele so ti sara na Jéhovah ayeke tâ nzoni ye so ala amaseka alingbi ti sara na yâ ti gigi ti ala. Zo alingbi pëpe ti haka aye ti mitele so zo ayeke wara gi teti kete ngoi na peko ti mbeni kua ti nginza na aye ti nzoni so zo ayeke wara teti lakue lakue ndali ti so lo “sara na [Jéhovah] na bê ti [lo] kue na âme ti [lo] kue.” (Jos. 22:5). Tongana ade mo mû tere ti mo na Jéhovah na yâ ti sambela pëpe, hunda tere ti mo na tënë so: ‘Nyen la ayeke kanga lege na mbi ti ga Témoin ti Jéhovah?’ Tongana mo wara batême awe, mo ye ti wara ngia mingi na yâ ti gigi ti mo? Tongana a yeke tongaso, gi ti kono yâ ti kusala ti mo nga ngbâ ti gue na li ni na lege ti yingo. Article ti peko ayeke fa ande tongana nyen mungo tapande ti bazengele Paul ayeke sara si ala amaseka ague na li ni na lege ti yingo.

Mo yeke kiri tënë tongana nyen?

• Fa araison use so a yeke nzoni e sara na Nzapa.

• Nyen la amû maboko na Timothée ti mû desizion ti sara na Nzapa?

• Ngbanga ti nyen a lingbi mo gbu ngangu na ngoi so a yeke sara aye ti ngangu na mo?

• Lege alingbi ti zi na ala amaseka ti sara akusala wa na Nzapa?

[Foto na lembeti 22]

Sarango na Jéhovah ayeke tâ nzoni ye so zo alingbi ti sara

[Foto na lembeti 23]

Mo lingbi ti kiri tënë na azo na ndo ti aye so mo mä na bê dä?