Ye so e manda na ndo ti Jésus

Na ndo ti lege ti sara ye na azo

Ngbanga ti nyen ti sara ye na nzoni bê?

Mo yeke sara ye na nzoni bê même tongana azo asara ni pëpe na mo? Tongana e ye ti mû tapande ti Jésus, a lingbi e sara ye na nzoni bê même na azo so ake e. Jésus atene: “Tongana i ndoye ala so andoye i, i wara merci ti nyen dä? Teti même awasiokpari andoye azo so andoye ala. . . . Me i ndoye awato ti i, . . . na fade i yeke amolenge ti Lo Ti Nduzu Ahon Kue; teti Lo sara be-nzoni na azo so amû merci pëpe, na azo ti sioni.”​—Luc 6:32-36; 10:25-37.

Ngbanga ti nyen ti mû pardon?

Tongana e sara afaute, e ye ti tene Nzapa apardone e. Jésus afa na e so a yeke na lege ni ti tene e sambela Nzapa ti pardone e (Matthieu 6:12). Ye oko, Jésus atene nga so Nzapa ayeke pardone ande e gi tongana e pardone azo. Lo tene: “Tongana i pardone siokpari ti azo, fade Babâ ti i na yayu apardone i nga; me tongana i pardone siokpari ti azo pëpe, fade Babâ ti i apardone siokpari ti i nga pëpe.”​—Matthieu 6:14, 15.

Tongana nyen asewa alingbi ti duti na ngia?

Atâa so Jésus asara mariage lâ oko pëpe, e lingbi ti manda ye mingi na mbage ti lo na ndo ti lege ti sara si mbeni sewa aduti na ngia. Na lege ti atënë ti lo nga na aye so lo sara, lo zia na e mbeni tapande ti tene e mû pekoni. Zia e bâ atënë ota so ayeke na gbe ni ge:

1. A lingbi koli aye wali ti lo tongana tere ti lo wani. Jésus azia tapande na akoli so asara mariage awe. Lo tene na adisciple ti lo, lo tene: “Mbi mû na i fini komandema, i ndoye tere ti i na popo ti i.” Tongana nyen? Lo tene: “Legeoko tongana Mbi ndoye i.” (Jean 13:34). Ti fa so kpengba-ndia so andu akoli so asara mariage awe, Bible atene: “Akoli, i ndoye awali ti i, legeoko tongana Christ andoye Eglize, na Lo mû Lo mveni teti Eglize; Tongaso a lingbi akoli andoye awali ti ala legeoko tongana tere ti ala mveni. Zo so andoye wali ti lo, lo ndoye tere ti lo mveni; teti zo ake tere ti lo lâ oko pëpe, me lo mû kobe na ni, lo bata ni legeoko tongana Christ abata Eglize.”​—aÉphésien 5:25, 28, 29.

2. A lingbi koli na wali ti lo aduti be-ta-zo na mba. Tongana zo agi koli wala wali na gigi ti mariage, andâ lo sara siokpari na tere ti Nzapa awe na ye so ayeke buba yâ ti asewa. Jésus atene: “I diko na Mbeti pëpe? . . . Teti tënë so, fade zo azia babâ na mama ti lo, na lo duti na wali ti lo; fade ala use aga mitele oko. Tongaso ala yeke use mbeni pëpe, me ala yeke mitele oko. Tongaso ye so Nzapa abungbi awe, zia zo akangbi pëpe. . . . Mbi tene na i, zo so azia wali ti lo, tongana a yeke tënë ti ye ti pitan pëpe, na lo kamata mbeni wali, lo sara lango-sioni.”​—Matthieu 19:4-9.

3. A lingbi amolenge amä yanga ti ababâ na amama ti ala. Jésus ayeke mbilimbili-kue me babâ na mama ti lo ayeke mbilimbili-kue pëpe. Atâa so kue, lo mä yanga ti ala na kete ti lo. Bible atene na ndo ti Jésus na ngoi so lo yeke na ngu 12, atene: “Lo gue na [babâ na mama ti lo], Lo si na Nazareth, na Lo mä yanga ti ala.”​—Luc 2:51; aÉphésien 6:1-3.

Ngbanga ti nyen ti sara ye alingbi na akpengba-ndia so?

Jésus atene lani na ndo ti ye so lo fa na adisciple ti lo, lo tene: “Tongana i hinga ye so, ngia ayeke na i tongana i sara ye so.” (Jean 13:17). Ti duti atâ Chrétien, a lingbi e sara ye alingbi na awango so Jésus amû, so andu tongana nyen ti sara ye na mbage ti azo. Lo tene: “Na lege so, fade azo kue ahinga i yeke adisciple ti Mbi, tongana i ndoye tere ti i na popo ti i.”​—Jean 13:35.

Ti hinga ambeni tënë na ndo ni, bâ chapitre 14 ti buku Bible afa nyen biani?a

[Kete tënë na gbe ni]

[Foto na lembeti 18]

Toli ti Jésus na ndo ti molenge-koli so abuba aye ti lo kue afa nene ti sara ye na nzoni bê nga ti pardone azo.​—Luc 15:11-32

[Foto na lembeti 19]

A lingbi koli na wali ti lo aduti be-ta-zo na mba