Ye so e manda na lege ti Jésus

Na ndo ti dutingo ti sewa

Ti tene ngia aduti na yâ ti sewa, a lingbi a bâ mariage tongana nyen?

Mariage ayeke nzoni-kue na lê ti Nzapa. Na ngoi so a hunda Jésus ti bâ wala zo alingbi ti sara divorce, Jésus atene: “Ala diko na yâ ti Mbeti ti Nzapa pëpe? Na tongo nda ni, lo so asara ala, lo sara ala koli na wali, na lo tene: ‘Ndani la, koli ayeke zia ande babâ na mama ti lo, na lo gue ande ti duti na wali ti lo na ala use ayeke ga mitele oko.’ Tongaso ala yeke use mbeni pëpe, me mitele oko. Ni la, ye so Nzapa abungbi ni na gbe ti joug oko, zia mbeni zo akangbi yâ ni pëpe. . . . Tongana a yeke ndali ti lango-sioni pëpe, si mbeni zo asara divorce na wali ti lo na lo sara mariage na mbeni wali nde, lo gi mbeni wali nde la.” (Matthieu 19:4-6, 9). Tongana koli na wali so asara mariage awe asara ye alingbi na wango ti Jésus nga ala duti be-ta-zo na mba, sewa ni kue ayeke duti nzoni nga na ngia.

Ngbanga ti nyen ndoyengo Nzapa ayeke sara si asewa aduti na ngia?

Jésus atene: “ ‘Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.’ So ayeke commandement so ayeke kota ahon atanga ni kue na a yeke kozoni la.” Use commandement so ayeke nga kota mingi ayeke so wa? Jésus afa ni, lo tene: “Mo ndoye mba ti mo [so abâ nga azo so ayeke nduru mingi na mo, so ti tene azo ti sewa ti mo] tongana mo wani.” (Matthieu 22:37-39). Tongaso, dutingo na nzoni songo na Nzapa ayeke kota ye so ayeke sara si sewa aduti na ngia ndali ti so ndoyengo Nzapa ayeke pusu e ti ndoye amba ti e. 

Akoli na awali ti ala alingbi ti sara tongana nyen ti zia ngia na bê ti mba?

Akoli ayeke zia ngia na bê ti awali ti ala tongana ala mû tapande ti Jésus. Na bê ti lo kue, lo zia na kozo ndo aye so agbu bê ti congrégation, so a haka ni na wali ti lo (aÉphésien 5:25). Jésus atene: “Molenge ti zo . . . aga ti tene azo asara kua na lo pëpe, me lo ga ti sara kua na azo.” (Matthieu 20:28). Jésus akomande na ngangu pëpe nga lo sara ye na ngangu pëpe na mbage ti azo so lo yeke bâ lege ti ala; me lo dë bê ti ala (Matthieu 11:28). Tongaso, a yeke nzoni akoli asara kusala na komandema ti ala na mbeni lege so ayeke ga na ye ti nzoni na azo ti sewa ni kue.

Tapande ti Jésus alingbi nga ti mû maboko na awali. Bible atene: “Mokonzi ti Christ ayeke Nzapa.” Bible atene nga so “mokonzi ti wali ayeke koli”. (1 aCorinthien 11:3). Jésus abâ lâ oko pëpe so dutingo na gbe ti Nzapa ayeke kiri na nengo ti lo na peko. Lo ne Babâ ti lo mingi. Jésus atene: “Mbi yeke sara lakue aye so anzere na bê ti lo.” (Jean 8:29). Tongana mbeni wali andoye Nzapa nga lo ne lo, aye so ayeke pusu lo ti woko tere na gbe ti koli ti lo; ye so ayeke sara si sewa ti lo aduti na ngia mingi.

Bango ndo ti Jésus na mbage ti amolenge afa nyen na ababâ na amama?

Jésus amû ngoi ti duti ndo oko na amolenge nga lo bi bê na aye so agbu bê ti ala. Bible atene: “Jésus ahunda ti tene a ga na lo aforoto . . . lo tene: ‘Ala zia akete molenge ni aga na mbi.’ ” (Luc 18:15, 16). Mbeni lâ, azo akasa ambeni molenge-koli so asara tënë ti fa so ala yeke na mabe na Jésus. Me Jésus agonda amolenge so, na lo tene na azo so akasa ala: “Ala diko tënë so lâ oko pëpe? tënë so atene: ‘Mo zia tënë ti sepela na yanga ti akete molenge nga na yanga ti ala so angbâ ti nyon me.’ ”​—Matthieu 21:15, 16.

Tapande ti Jésus afa nyen na amolenge?

Jésus azia nzoni tapande na amolenge na ndo ti dutingo na nzara ti aye ti yingo. Na ngoi so lo yeke na ngu 12, a wara lo “na yâ ti temple, lo yeke duti na popo ti awafango ye, lo yeke mä ala nga lo yeke hunda tënë na ala.” Ye ti pekoni ayeke so wa? “Ala kue so ayeke mä lo, bê ti ala ayeke pika lakue ndali ti aye so lo hinga nga ndali ti atënë so lo yeke kiri na ni.” (Luc 2:42, 46, 47). Ti tâ tënë ni, ndara ti Jésus apusu lo pëpe ti sara baba. Me, a sara si lo ne babâ na mama ti lo. Bible atene: “Lo ngbâ ti woko tere na gbe ti ala.”​—Luc 2:51.

Ti hinga ambeni sango mingi na ndo ni, bâ chapitre 14 ti buku Bible afa nyen biani?a

[Kete tënë na gbe ni]