Ngbâ be-ta-zo na Nzapa na bê ti mo kue

“Fade mbi tambela na lege ti tene-biani ti Mo. Sara si mbi duti na bê oko ti kpe mbeto ti iri ti Mo.”​—PS. 86:11.

1, 2. (a) Ti gue oko na Psaume 86:2, 11, nyen la ayeke mû maboko ande na e ti ngbâ be-ta-zo na Jéhovah na gbe ti atara? (b) Na ngoi wa a yeke nzoni ti gi ti duti be-ta-zo na Nzapa na bê ti e kue?

AMBENI Chrétien angbâ be-ta-zo na Nzapa teti angu mingi atâa so a bi ala na da ti kanga wala a sara ye ti ngangu na ala. Me na pekoni, ala tï ndali ti gingo mosoro. Ngbanga ti nyen tongaso? Ngbanga ti so tënë ni andu ye so ayeke na yâ ti bê ti zo. Psaume 86 afa so zo so ayeke be-ta-zo ayeke sara ye na bê ti lo kue, so ti tene lo yeke sara ye na bê oko, me na bê use pëpe. David, zo ti sungo Psaume asambela, lo tene: “Bata âme ti mbi, teti mbi yeke [be-ta-zo, MN ]; O Nzapa ti mbi, Mo sö boi ti Mo so azia bê ti lo na Mo.” David akiri asambela, lo tene: “O L’Eternel, Mo fa na mbi lege ti Mo, na fade mbi tambela na lege ti tene-biani ti Mo. Sara si mbi duti na bê oko ti kpe mbeto ti iri ti Mo.”​—Ps. 86:2, 11.

² Tongana e zia bê ti e kue na Jéhovah pëpe, ambeni ye so agbu bê ti e nga asongo so atingbi e na ambeni zo alingbi ti sara si e duti be-ta-zo na tâ Nzapa na yâ ti ye kue pëpe. A lingbi ti haka nzara ti sara aye so bê ti e aye na alê ti ngombe so a honde ni na gbe ti sese na so tongana zo atambela na ndo ni, a lingbi ti sungba na tere ti lo. Atâa so e ngbâ lani be-ta-zo na Jéhovah na ngoi so e wara angangu kpale, e lingbi ti tï na yâ ti agbanda ti Satan. A yeke kota ye mingi ti tene e gi ti duti be-ta-zo na Jéhovah na bê ti e kue laso, kozoni si e wara atara. Bible atene: “Bata bê ti mo ahon mbeni ye ti mo kue so mo bata.” (aProv. 4:23). E lingbi ti manda akpengba ye mingi na lege ti ye so asi na prophète so alondo na Juda na so Jéhovah atokua lo na Gbia Jéroboam ti Israël.

“Fade mbi mû na mo matabisi”

3. Nyen la Jéroboam asara na ngoi so prophète ti Nzapa afa tënë ti ngbanga ti Nzapa na lo?

³ Tara ti bâ tongana nyen ye ni asi lani: Zo ti Nzapa afa mbeni kpengba tënë na Gbia Jéroboam so azia amolenge ti bagara ti lor use na royaume ti akete mara bale-oko na banga ti Israël ti tene azo avoro ni. Bê ti gbia ni aso mingi. Lo mû yanga na azo ti lo ti gbu zo so Nzapa atokua lo. Me Jéhovah ayeke na wakua ti lo. Hio tongaso, maboko ti gbia so lo yôro ni na ngonzo ahule na lege ti miracle, nga yâ ti balaga so a mû asandaga na ndo ni na anzapa ti wataka afâ. Ge, sarango ye ti Jéroboam achangé. Lo voro yanga na zo ti Nzapa, lo tene: “Mo hunda be-nzoni na tïtî L’Eternel Nzapa ti mo, na mo sambela teti mbi si maboko ti mbi alingbi ga nzoni.” Zo ti Nzapa asambela, na maboko ti gbia ni akiri aga nzoni.​—1 aGbia 13:1-6.

4. (a) Ngbanga ti nyen tisango ndo ti gbia ni ayeke biani mbeni tara ti bâ wala prophète ni ayeke duti be-ta-zo? (b) Nyen la prophète ni atene na lo?

⁴ Na pekoni, Jéroboam atene na zo ti Nzapa, lo tene: “Mo ga na mbi na da ti mbi na mo wu tere ti mo, na fade mbi mû na mo matabisi.” (1 aGbia 13:7). Nyen la prophète ni ayeke sara na ndembe ni so? A yeke nzoni lo yeda na tisango ndo ti gbia na pekoni so lo fa atënë ti ngbanga na lo? (Ps. 119:113). Wala a yeke nzoni lo ke tisango ndo ni, atâa so lo bâ so gbia ni ayeke na vundu ndali ti ye so lo sara? Jéroboam alingbi biani ti mû na akamarade ti lo amatabisi ti nginza mingi. Tongana fade prophète ti Nzapa ayeke na nzara ti wara aye ti mitele, ka bê ti lo alingbi ti pusu lo ngangu mingi ti yeda na tisango ndo ti gbia ni. Ye oko, Jéhovah amû yanga na prophète ti lo, lo tene: “Fade mo te kobe wala [mo] nyon ngu pëpe, wala mo kiri pëpe na lege so mo gue dä.” Ni la, prophète ni ake na kuru go, lo tene: “Tongana mo mû na mbi moitié ti da ti mo, fade mbi gue na mo pëpe, na mbi lingbi te kobe wala nyon ngu na ndo so pëpe.” Prophète ni amû mbeni lege nde ti sigigi na gbata ti Béthel (1 aGbia 13:8-10). Desizion so prophète ni amû afa na e nyen na ndo ti dutingo be-ta-zo na bê kue?​—aRom. 15:4.

Duti na ngia na aye so mo yeke na ni

5. Na lege wa gingo mosoro andu tënë ti dutingo be-ta-zo?

⁵ Peut-être azo abâ so gingo mosoro andu tënë ti dutingo be-ta-zo pëpe, me a ndu ni biani. E zia bê ti e na zendo ti Jéhovah ti mû na e aye so e yeke tâ na bezoin ni? (Mat. 6:33; aHéb. 13:5). Ahon ti sara kue ti wara aye so ayeke sara si zo aduti nzoni ahon ti kozo, aye so na ndembe so e lingbi ti vo ni pëpe, e lingbi ti duti sân ti wara ni? (Diko aPhilippien 4:11-13.) Bê ti e aye ti pusu e ti ke ti sara akua so lege azi na e ti sara na yâ ti kongregation wala na yâ ti kusala ti Nzapa? Dutingo be-ta-zo na yâ ti kusala ti Nzapa ayeke kota ye mingi na yâ ti fini ti e? Mingi ni, akiringo tënë ti e na ahundango tënë so amû lege ti bâ wala e yeke sara kusala ti Nzapa na bê ti e kue wala pëpe. Bazengele Paul atene: “Batango tënë ti Nzapa na bê so ayeke na ngia ayeke lege ti wara ye biani, teti e ga na ye oko pëpe na sese so, na e lingbi yô ye oko pëpe tongana e gue; me, tongana e yeke na kobe na bongo, ye so alingbi na e.”​—1 Tim. 6:6-8.

6. ‘Amatabisi’ wa a lingbi ti mû na e? Nyen la ayeke mû maboko na e ti bâ wala e lingbi ti yeda na amatabisi so wala ti ke ni?

⁶ Na tapande, peut-être patron ti e aye ti mû na e mbeni kua so a yeke futa e dä nzoni mingi ahon ti kozo wala so e lingbi ti wara aye ti nzoni mingi na pekoni. Wala peut-être e bâ so e lingbi ti wara nginza mingi tongana e gue na mbeni kodoro nde wala na mbeni ndo so e lingbi ti wara kua ti nginza dä. Gi na bango ni, e lingbi ti tene so Jéhovah la asara si e wara aye so. Me kozo ti tene e mû desizion na ndo ti aye so, a yeke nzoni e bâ bibe so apusu e ti sara ni. Kota hundango tënë ni ayeke so: “Desizion so mbi mû ni ayeke sara ande nyen na ndo ti songo ti mbi na Jéhovah?”

7. Ngbanga ti nyen a yeke kota ye ti zi na yâ ti bê ti e nzara ti warango mosoro?

⁷ Satan ayeke pusu azo ti sigigi lakue na aye so ayeke sara si azo aduti na nzara ti wara gbâ ti mosoro. (Diko 1 Jean 2:15, 16.) Ye so Zabolo ayeke gi ayeke ti buba bê ti e. Ni la a yeke nzoni lê ti e akpengba si e hinga aye so ayeke dü nzara ti mosoro na bê ti e na e gi ti zi ni (Apoc. 3:15-17). A yeke ngangu na Jésus pëpe ti ke aroyaume ti sese so Satan aye ti mû na lo (Mat. 4:8-10). Lo mû wango, lo tene: “I bata nzoni si tënë ti bê asara i pëpe, teti fini ti zo ayeke pëpe na ye mingi mingi so ayeke na lo.” (Luc 12:15). Tongana e duti be-ta-zo na Jéhovah, e yeke zia bê ti e kue na lo me na e wani pëpe.

Mbeni mbakoro prophète ‘atene mvene’ na lo

8. Na lege wa a tara prophète ti Nzapa na ndo ti tënë ti dutingo be-ta-zo?

⁸ Prophète ti Nzapa ayeke wara lani kpale pëpe tongana lo kiri droit na ndo ti lo. Ye oko, gi hio tongaso lo wara mbeni tara. Bible atene: “Mbeni mbakoro prophète aduti na Béthel, na amolenge ti lo ti koli aga, na ala fa na lo” ye kue so asi kozoni na yâ ti lango ni so. Na ngoi so mbakoro prophète ni amä tënë so, lo hunda na amolenge ti lo ti leke lele ti lo si lo lingbi ti tomba peko ti prophète ti Nzapa. Ngoi kete na pekoni, lo wara prophète ni na ngoi so lo yeke wu tere ti lo na gbe ti mbeni kota keke. Mbakoro prophète ni atene na lo: “Mo ga na da ti mbi, mo te kobe.” Tongana zo ti tâ Nzapa ake tisango ndo ti lo, mbakoro koli ni atene na lo: “Mbi yeke prophète tongana mo nga, na mbeni ange asara tënë na mbi na lege ti tënë ti L’Eternel, lo tene, Mo ga na lo na da ti mo, si lo lingbi te kobe na nyon ngu.” Me Bible atene: “Lo sara tënë ti mvene na lo.”​—1 aGbia 13:11-18.

9. Bible atene nyen na ndo ti azo ti handa? Ye so ala yeke sara asara ye ti sioni na azo wa?

⁹ Atâa bibe wa apusu mbakoro prophète so ti sara ye, lo tene mvene. Peut-être mbakoro so ayeke kozoni lani mbeni prophète so ayeke be-ta-zo na Jéhovah. Me na ngoi ni so, lo sara ye na handa. Bible ake na kuru go mara ti sarango ye tongaso. (Diko Psaume 5:7.) Azo ti handango zo ayeke buba songo ti ala na Jéhovah nga ala yeke buba songo ti ambeni zo na Jéhovah.

“Lo kiri legeoko na” mbakoro koli ni

10. Nyen la prophète ti Nzapa asara na ngoi so mbakoro koli so atisa lo na ndo ti lo? Ye ti pekoni ayeke so wa?

¹⁰ A lingbi lani ti duti ngangu pëpe na prophète so alondo na Juda ti bâ so mbakoro prophète so asara ye na handa. Lo lingbi fade ti hunda tere ti lo: ‘Ngbanga ti nyen Jéhovah atokua mbeni ange na mbeni zo nde ti fa na mbi ambeni fini ye ti sarango ni?’ Prophète so alingbi fade ti hunda Jéhovah ti fa ye na lo polele, me Bible atene pëpe so lo sara tongaso. Ahon ti sara tongaso, “lo kiri legeoko na [mbakoro koli] so, na lo te kobe na lo nyon ngu”. Ye so lo sara anzere na Jéhovah pëpe. Na ngoi so prophète ti Nzapa, so a handa lo, amû lege ti kiri na Juda, mbeni bamara awara lo na afâ lo. So ye ti mawa ti nyen si asi na prophète so!​—1 aGbia 13:19-25.a

11. Ahija azia na e nzoni tapande wa?

¹¹ Nde na prophète ti Nzapa so, prophète Ahija, so Jéhovah atokua lo lani ti sa mafuta na li ti Jéroboam si lo ga gbia, aduti be-ta-zo na Jéhovah juska na lâ ti mbakoro ti lo. Na ngoi so Ahija aga mbakoro na lo bâ ndo mbeni pëpe, Jéroboam atokua wali ti lo na lo ti hunda tënë na ndo ti seni ti molenge ti ala so tere ti lo aso. Na mbeto pëpe, Ahija atene lani so fade molenge ni ayeke kui (1 aGbia 14:1-18). Ahija awara aye ti nzoni mingi. Mbeni oko ni ayeke so a sara kusala na asango so lo sû na mbeti ti sû na Mbeti ti Nzapa. Na lege wa? Na lege so Esdras so ayeke mbeni sacrificateur asara kusala na atënë so Ahija asû na mbeti na ngoi so lo yeke sû lani ambeti ti lo.​—2 Chron. 9:29.

12-14. (a) Ye so asi na prophète ti Nzapa afa na e nyen? (b) Mû atapande ti fa so a yeke kota ye ti sambela na ti gbu li na ndo ti awango ti Bible so a-ancien amû.

¹² Bible afa pëpe ndani so prophète ti Nzapa asambela Jéhovah pëpe kozoni ti mû desizion ti kiri, ti te kobe na ti nyon ngu na da ti mbakoro koli so. A yeke peut-être ngbanga ti so mbakoro koli so atene na lo ye so lo ye ti mä? Nyen la e lingbi ti manda dä? A lingbi e yeda na bê ti e kue so aye so Jéhovah ahunda na e ti sara ayeke tâ na lege ni. Nga, a lingbi e leke na bê ti e ti sara ye alingbi na ni, atâa ye wa alingbi ti si.

¹³ Na ndo ti tënë ti wango, ambeni zo ayeke mä gi ye so anzere na ala ti mä. Na tapande, peut-être a lingbi ti mû na mbeni wafango tënë mbeni kua so alingbi ti sara si lo yeke na ngoi mingi pëpe ti duti na sewa ti lo nga ti sara kusala ti Jéhovah. Lo lingbi ti hunda mbeni ancien ti mû na lo wango. Ancien ni alingbi ti tene na lo kozoni so a yeke na lo ancien ni pëpe ti fa na ita-koli ni ye so a lingbi lo sara ti mû maboko na sewa ti lo. Na pekoni, ancien ni alingbi ti bâ na ita-koli ni akpale so lo lingbi ti wara na lege ti yingo tongana lo yeda ti sara kua so a mû na lo. Ita-koli ni ayeke dabe ti lo gi na kozo tënë so ancien ni atene na lo? Wala lo yeke gbu li nzoni na ndo ti wango so a mû na lo na ndo ti akpale so lo lingbi ti wara na lege ti yingo? A yeke kota ye ti tene ita-koli ni agi ti bâ ye so ayeke sara si lo ngbâ ti kpengba na lege ti yingo.

¹⁴ Zia e bâ mbeni ye nde so alingbi ti si. Mbeni ita-wali alingbi ti hunda mbeni ancien ti bâ wala a yeke nzoni lo kangbi na koli ti lo so ayeke Témoin ti Jéhovah pëpe. Kite ayeke dä pëpe so ancien ni ayeke fa na ita-wali ni so a yeke na lo ancien ni pëpe ti tene na lo wala a lingbi lo kangbi na koli ti lo wala pëpe. Na pekoni, lo lingbi ti fa ambeni wango so Bible amû na ndo ni (1 aCor. 7:10-16). Ita-wali ni ayeke gbu li nzoni na ndo ti wango so ancien ni amû na lo? Wala lo leke na bê ti lo kozoni awe ti kangbi na koli ti lo? Na ngoi so lo yeke mû desizion ni, a yeke na lege ti ndara ti tene lo sambela nga lo gbu li na ndo ti awango ti Bible so a mû na lo.

E zia bê ti e na ngangu ti e wani pëpe

15. Faute so prophète ti Nzapa asara afa na e nyen?

¹⁵ Mbeni ye nde wa e lingbi ti manda na lege ti faute so prophète ti Juda asara? A-Proverbe 3:5 atene: “Zia bê ti mo kue na L’Eternel, na zia bê ti mo na hingango ye ti mo mveni pëpe.” Ahon ti zia bê ti lo kue na Jéhovah tongana ti so lo sara kozoni, na ngoi ni so prophète ni azia bê ti lo na hingango ye ti lo wani. Faute so lo sara so asara si lo wara kuâ nga Nzapa abâ lo na nzoni lê mbeni pëpe. Ye so asi na lo afa nzoni mingi so a yeke kota ye ti zia bê ti e na ngangu ti e wani pëpe na ti duti be-ta-zo na yâ ti kusala so e yeke sara na Jéhovah.

16, 17. Nyen la ayeke mû maboko na e ti duti be-ta-zo na Jéhovah?

¹⁶ A yeke ngangu pëpe ti tene bê ti e ague na e yongoro. “Bê ti zo ayeke na handa ahon mbeni ye kue na ayeke sioni mingi”. (Jér. 17:9). Ti ngbâ be-ta-zo na Jéhovah, a lingbi e ngbâ lakue ti sara ngangu ti ke angbene sarango ye ti e so ayeke nduru ti pusu e ti sara ye na baba nga ti zia bê ti e na ndo ti ngangu ti e wani. Nga, a lingbi e yü zo ti fini “so A créé lo na lege ti” ye so bê ti Nzapa aye “na yâ mbilimbili na nzoni-kue ti tene-biani”, wala na dutingo be-ta-zo.​—Diko aÉphésien 4:22-24.

¹⁷ A-Proverbe 11:2 atene: “Ndara ayeke na azo so ayeke na tâ be-ti-molenge.” Tongana na tâ be-ti-molenge e zia bê ti e kue na ndo ti Jéhovah, a yeke mû maboko na e si e sara akota faute pëpe. Na tapande, tongana bê ti e awoko ndali ti akpale, a lingbi ti sara si e mû anzoni desizion pëpe (aProv. 24:10). Peut-être tere ti e ane ti sara ambeni kusala so Jéhovah amû na e, na e to nda ti bâ so kua so e sara na Jéhovah na yâ ti angu mingi alingbi awe na peut-être a yeke ngoi ti tene ambeni zo nde asara ni. Wala peut-être e ye ti gi ti “sara gigi” ti e tongana ti tanga ti azo kue. Ye oko, tongana e “gi lege ngangu” nga e “wu na kusala ti Seigneur lakue,” aye so ayeke bata bê ti e.​—Luc 13:24; 1 aCor. 15:58.

18. Nyen la e lingbi ti sara tongana e hinga pëpe desizion so a lingbi e mû ni?

¹⁸ Na ambeni ngoi, a hunda peut-être ti tene e mû akpengba desizion, na peut-être e hinga hio pëpe ye so ayeke na lege ni ti sara ni. Bê ti e ayeke pusu ande e ti gi ti leke kpale ni e wani? Tongana mara ti aye tongaso asi na e, a yeke na lege ti ndara ti hunda Jéhovah ti mû maboko na e. Jacques 1:5 atene: “Tongana mbeni zo na popo ti i amanke ndara, a lingbi lo hunda Nzapa, Lo so amû ye na azo kue senge senge.” Babâ ti e so ayeke na yayu ayeke mû ande na e yingo vulu ti lo ti mû maboko na e ti mû anzoni desizion.​—Diko Luc 11:9, 13.

Leke na bê ti mo ti ngbâ lakue be-ta-zo

19, 20. A lingbi e leke na bê ti e ti sara nyen?

¹⁹ Ngoi ti ye ti ngangu so aga na pekoni so Salomon ake tâ vorongo asara si a yeke ngangu mingi lani na awakua ti Jéhovah ti duti be-ta-zo. A yeke tâ tënë so na alege nde nde awakua ti Jéhovah mingi aduti be-ta-zo pëpe. Ye oko, ambeni angbâ lani be-ta-zo na Jéhovah.

²⁰ Na yâ ti alango oko oko, a hunda ti tene e mû adesizion na ndo ti aye nde nde so amû lege ti bâ wala e yeke duti be-ta-zo na Nzapa wala pëpe. E nga kue e lingbi ti fa so e yeke be-ta-zo. Zia e duti be-ta-zo na Jéhovah lakue na ngoi so e yeke sara na lo na bê ti e kue, na e hinga na bê ti e kue so lo yeke ngbâ ande ti iri tënë nzoni na ndo ti ‘azo ti nzobe’, wala azo so aduti be-ta-zo na lo.​—2 Sam. 22:26.

[Kete tënë na gbe ni]

Mo yeke kiri tënë tongana nyen?

• Ngbanga ti nyen a yeke nzoni e sara ngangu ti zi na yâ ti bê ti e nzara ti warango mosoro?

• Nyen la ayeke mû maboko na e ti duti be-ta-zo na Jéhovah?

• Na lege wa sarango ye ahon ngangu ti e pëpe alingbi ti mû maboko na e ti duti be-ta-zo na Nzapa?

[Afoto na lembeti 15]

Mo bâ so a yeke ngangu na mo ti gbu ngangu na gbe ti atara?

[Afoto na lembeti 16]

Mo yeke gbu li na ndo ti awango ti Bible so a mû na mo nga mo yeke sambela ndali ni?