Mû maboko na ala so ahon yongoro na kundu ni

“E sara ngia, teti mbi wara ngasangbaga ti mbi so agirisa awe.”​—LUC 15:6.

1. Na lege wa Jésus afa so lo yeke mbeni berger so ayeke na ndoye?

A IRI Jésus Christ, oko Molenge ti Jéhovah, “Kota Berger ti angasangbaga”. (aHéb. 13:20). Bible asara tënë ti gango ti lo kozoni awe na afa so lo yeke oko Berger so agi lani ti wara “angasangbaga ti da ti Israël so agirisa awe.” (Mat. 2:1-6; 15:24). Na ndo ni, tongana ti so mbeni berger alingbi ti zia fini ti lo na lê ti kuâ ti bata angasangbaga ti lo, Jésus akui na lo mû fini ti lo tongana sandaga ndali ti azo so ayeke tongana angasangbaga so ayeke bâ ande nzoni na lege ti ye so.​—Jean 10:11, 15; 1 Jean 2:1, 2.

2. Aye wa alingbi ti sara si ambeni Chrétien adë kue?

² Mawa ni ayeke so ambeni zo so peut-être abâ lani sandaga ti Jésus na nene ni nga ala mû tere ti ala na Nzapa azia lege ti bungbi oko na kongregation ti aChrétien. Bê so anze, akpale ti seni wala ambeni ye nde alingbi ti sara si ala woko na ala dë kue. Ye oko, a yeke gi na yâ ti kundu ti Nzapa si ala lingbi ti wara siriri nga na ngia so David asara tënë ni na Psaume 23. Na tapande, lo tene: “L’Eternel ayeke Berger ti mbi; ye alingbi manke mbi pëpe.” (Ps. 23:1). Azo so ayeke na yâ ti kundu ti Nzapa ayeke wara ye kue so ala yeke na bezoin ni ti kpengba songo ti ala na lo, me ti ala so ahon yongoro na ni, a yeke tongaso pëpe. Zo wa la alingbi ti mû maboko na ala? A lingbi ti sara ni tongana nyen? A hunda ti sara aye wa ti mû maboko na ala ti kiri na yâ ti kundu ni?

Zo wa la alingbi ti mû maboko na ala?

3. Na lege wa Jésus afa ye so a lingbi a sara ti mû maboko na angasangbaga ti kundu ti Nzapa so agirisa?

³ A hunda ti sara ye na bê kue ti mû maboko na angasangbaga ti kundu ti Nzapa so agirisa (Ps. 100:3). A yeke ye so Jésus aye lani ti fa ni tongana lo tene: “Tongana mbeni zo ayeke na angasangbaga ngbangbo oko, na mbeni oko ti ala agirisa lege ti lo, bê ti i atene nyen? Fade lo zia ambeni bale-gumbaya na ndo ni gumbaya pëpe? si lo gue na hoto ti gi mbeni oko so agirisa lege ti lo. Na tongana lo wara lo, biani, Mbi tene na i, ngia ti lo teti oko so ahon ngia ti lo teti ala bale-gumbaya na ndo ni gumbaya so agirisa lege ti ala pëpe. Tongaso, Babâ ti i so ayeke na yayu aye oko ti akete molenge so ti kui pëpe.” (Mat. 18:12-14). Zo wa la alingbi ti mû maboko na azo so ayeke tongana angasangbaga so, so ahon yongoro na kundu ni so?

4, 5. A lingbi a-ancien aduti na bango ndo wa na ndo ti kundu ti Nzapa?

⁴ Tongana a-ancien aye ti mû maboko na angasangbaga so agirisa lege, a lingbi ala dabe ti ala so kundu ti Nzapa ayeke kongregation ti aChrétien so amû tere ti ala na lo awe; ala yeke biani ‘angasangbaga ti benyama ti lo’. (Ps. 79:13). A lingbi a bâ lege ti angasangbaga so na nzobe, so ti tene a lingbi na ndoye, aberger so abi bê na ndo ti ala oko oko kue. Tongana a-ancien ague abâ aita so na ndo ti ala ti sara lisoro na ala, ye so alingbi ti ga na aye ti nzoni. Awango so mbeni ancien amû na ala na ndoye alingbi ti kpengba ala na lege ti yingo nga asara si ala duti na kota nzara ti kiri na yâ ti kundu ni.​—1 aCor. 8:1.

⁵ Aberger ti kundu ti Nzapa ayeke na kota kua ti gi angasangbaga so agirisa lege na ti tara ti mû maboko na ala. Bazengele Paul adabe ti a-ancien ti ngbene gbata ti Éphèse na ndo ti kua so a mû na ala ti fa lege na kundu ti Nzapa, lo tene: “I bata tere ti i mveni, na i bata kundu so kue so Yingo Vulu asara si i ga [aberger, MN ] na popo ni, na i mû kobe na eglize ti Seigneur so Lo vo na mênë ti [Molenge ti lo, MN ] mveni.” (Kus. 20:28). Legeoko nga, bazengele Pierre awa a-ancien so a sa yingo na ndo ti ala, lo tene: “I bata kundu ti Nzapa so ayeke na popo ti i, zo aforcé i ti sara pëpe, me i sara teti bê ti i aye na lege so Nzapa aye; i sara teti faïda sioni pëpe, me i sara na bê so aye fade fade. I sara tongana mokonzi na popo ti ala pëpe, ala so a zia ala na tïtî i, me i ga tapande ti kundu ni.”​—1 Pi. 5:1-3.

6. Ngbanga ti nyen angasangbaga ti Nzapa ayeke tâ na bezoin ti tene a bâ lege ti ala laso nzoni?

⁶ A lingbi a-ancien amû tapande ti “Nzo Berger”, Jésus (Jean 10:11). Lo yeke bi bê ti lo lani mingi na ndo ti angasangbaga ti Nzapa; nga so lo hunda na Simon Pierre ti ‘bata angasangbaga ti lo’ afa so a yeke kota ye mingi ti tene a bâ lege ti ala. (Diko Jean 21:15-17.) Laso angasangbaga ti Nzapa ayeke tâ na bezoin ti tene a bâ lege ti ala, ndali ti so Zabolo ayeke sara ngangu mingi ahon ti kozo ti sara si azo so amû tere ti ala na Nzapa awe aduti be-ta-zo mbeni pëpe. Satan ayeke gi ti sara kua na awokongo so angasangbaga ti Jéhovah ayeke na ni nga lo yeke mû aye ti sese ti laso ti pusu ala ti sara aye ti sioni (1 Jean 2:15-17; 5:19). A yeke ngangu pëpe ti tene aChrétien so adë awe awara sioni. Ni la, a lingbi a mû maboko na ala ti sara ye alingbi na wango so ahunda ti “tambela na lege ti Yingo”. (aGal. 5:16-21, 25). Tongana mbeni zo aye ti mû maboko na angasangbaga tongaso, a lingbi lo sambela Nzapa nga lo zia bê ti lo kue na ndo ti lo, lo sara ye alingbi na fango lege ti yingo ti lo nga lo sara kua nzoni na Bible.​—aProv. 3:5, 6; Luc 11:13; aHéb. 4:12.

7. Nyen la afa so a yeke kota ye mingi ti tene a-ancien afa lege na angasangbaga so ala yeke bâ ndo na ndo ti ala?

⁷ Na Israël ti giriri, aberger ayeke sara kua na mbeni yongoro keke so li ni aba bango ti fa lege na kundu ti anyama. Na ngoi so angasangbaga ni ayeke lï na yâ ti yangbo ni wala ala yeke sigigi, ala yeke ‘hon na gbe ti keke’ so na tongaso berger ni alingbi ti diko ala (Lév. 27:32; Mi. 2:12; 7:14). Legeoko nga, a lingbi mbeni ancien ahinga angasangbaga so lo yeke bâ ndo na ndo ti ala nga lo hinga dutingo ti ala oko oko kue. (Bâ aProverbe 27:23.) Tongaso, tënë ti fango lege na angasangbaga ayeke mbeni oko ti akpengba tënë so bungbi ti a-ancien ayeke sara lisoro na ndo ni. Ye so andu lekengo ti mungo maboko na angasangbaga so agirisa lege. Jéhovah lo wani atene so fade ni yeke gi angasangbaga ti ni so agirisa lege nga ni yeke bâ lege ti ala alingbi na bezoin ti ala (Ezéch. 34:11). Ni la, Nzapa ayeke na ngia tongana a-ancien nga asara ngangu ti mû maboko na angasangbaga so agirisa lege ti kiri na yâ ti kundu ni.

8. Alege so a-ancien alingbi ti mû maboko na mbeni ngasangbaga ayeke so wa?

⁸ Tongana tere ti mbeni Chrétien aso si mbeni berger ti kundu ti Nzapa ague abâ lo, ye so alingbi ti sara si ita ni awara ngia nga akpengba lo. A yeke oko ye so alingbi ti si tongana a mû maboko na mbeni zo so ayeke na kobela na lege ti yingo. A-ancien alingbi ti diko na Chrétien so ambeni versê ti Bible, ti kiri ti bâ mbeni article na lo, ti fa na lo ambeni ngbongboro tënë so a fa na ngoi ti abungbi, ti sambela na lo wala ti sara ambeni ye nde. Ala lingbi ti fa na lo so tongana lo kiri lo ga na abungbi, aita ti kongregation ayeke duti ande na ngia mingi ti bâ lo (2 aCor. 1:3-7; Jacq. 5:13-15). Ti gue ti bâ zo ni, ti pika singa na lo wala ti tokua lettre na lo alingbi ti mû maboko mingi na lo. Tongana a-ancien amû maboko na nzobe na mbeni ngasangbaga so agirisa si lo kiri na yâ ti kundu ni, ala yeke wara ngia mingi ahon ti kozo.

E kue e lingbi ti mû maboko na ala

9, 10. Ngbanga ti nyen mo tene so bingo bê na angasangbaga so azia kundu ni abâ gi a-ancien pëpe?

⁹ Aye ti sarango ni ayeke mingi laso nga ngoi ti e ayeke ngangu mingi. Ni la, a lingbi ti si so e hinga pëpe so mbeni mba ti e ayeke hon yongoro na kongregation (aHéb. 2:1). Ye oko, angasangbaga ti Jéhovah ayeke kota ye mingi na lê ti lo. Ala oko oko kue ayeke na ngere ngangu, tongana ti amembre oko oko ti tere ti zo. Tongaso, a yeke nzoni e kue e bi bê ti e na aita ti e nga e fa biani so e yeke bâ lege ti mba (1 aCor. 12:25). Mo yeke na mara ti bango ndo tongaso?

¹⁰ Atâa so a-ancien ayeke mû li ni ti gi angasangbaga so agirisa lege nga ti mû maboko na ala, kua ti bingo bê na aita so ague yongoro na kongregation abâ gi a-ancien pëpe. Tanga ti aita alingbi ti sara kua maboko na maboko na a-ancien. E lingbi ti kpengba aita ti e so ayeke na bezoin ti tene a mû maboko na ala ti kiri na yâ ti kundu ni nga a yeke nzoni e sara ni. E lingbi ti sara ni tongana nyen?

11, 12. Pendere kusala wa a lingbi ti hunda na mo ti sara ti mû maboko na mbeni Chrétien so awoko?

¹¹ A lingbi ti si so a-ancien aleke ti tene mbeni wafango tënë so akpengba na lege ti yingo amanda Bible na Chrétien so awoko na lege ti yingo na so ayeke na nzara ti tene a mû maboko na lo. Nda ti sarango angangu so kue ayeke ti mû maboko na aChrétien so awoko ti kiri ti wara “kozo ndoye ti [ala].” (Apoc. 2:1, 4). Tongana awafango tënë so akpengba na lege ti yingo afa na aChrétien so awoko aye so a fa na bungbi na ngoi so ala yeke dä lani pëpe, a yeke sara si mabe ti ala akpengba.

¹² Tongana a-ancien ahunda na mo ti manda Bible na mbeni ita so ayeke na bezoin ti tene a mû maboko na lo na lege ti yingo, sambela Jéhovah ti fa lege na mo nga ti iri tënë nzoni na ndo ti angangu so mo yeke sara. “Zia kusala ti mo na tïtî L’Eternel, na fade ye so mo ye ti sara aga nzoni.” (aProv. 16:3). Na ngoi so mo yeke leke tere ti mo ti manda Bible na mbeni zo so ayeke na bezoin ti tene a mû maboko na lo na lege ti yingo, gbu li na ndo ti aversê ti Bible nga na atënë so mo lingbi ti sara kua na ni ti kpengba mabe ti lo. Gbu li na ndo ti pendere tapande ti bazengele Paul. (Diko aRomain 1:11, 12.) Paul ayeke lani na kota nzara ti bâ aChrétien ti Rome si lo lingbi ti mû na ala mbeni matabisi ti yingo ti sara si ala kpengba. Lo yeke ku nga ngoi so lo na ala alingbi ti kpengba tere. A yeke nzoni e duti na mara ti bango ndo tongaso tongana e yeke gi ti mû maboko na angasangbaga ti Nzapa so ahon yongoro na kundu ni.

13. Atënë wa mo lingbi ti sara lisoro na ndo ni na mbeni ita so awoko na lege ti yingo?

¹³ Na ngoi ti mandango ye ni, mo lingbi ti hunda lo, mo tene: “Mo hinga tâ tënë tongana nyen?” Tongana mo dabe ti Chrétien so awoko na ngia so lo wara ândö, a lingbi ti mû maboko na lo ti sara tënë na mo na ndo ti apendere ye so asi na lo lani na ngoi ti abungbi, na fango tënë nga na akota bungbi. Sara tënë na ndo ti angia so peut-être mo na lo awara lani na yâ ti kua ti Jéhovah. Tene na lo tënë ti ngia so mo yeke na ni ti ga nduru na Jéhovah (Jacq. 4:8). Fa so mo kiri singila mingi ndali ti aye so Nzapa ayeke sara ti bâ lege ti e so e yeke azo ti lo, mbilimbili na lege so lo yeke dë bê ti e nga lo yeke sara si e duti na beku na yâ ti aye ti vundu so asi na e.​—aRom. 15:4; 2 aCor. 1:3, 4.

14, 15. A lingbi ti mû maboko na aChrétien so awoko na lege ti yingo ti dabe ti ala na aye ti nzoni wa so ala wara ândö?

¹⁴ Tongana mo dabe ti mbeni ita so awoko na lege ti yingo na ndo ti ambeni ye ti nzoni so lo wara ândö ndali ti so lo yeke mû mbage mingi na yâ ti akua so andu kongregation, ye so ayeke ga biani na aye ti nzoni. Na tapande, mbeni ye ni ayeke hingango ye ti lo so ague lani na li ni mingi na ndo ti Bible nga na aye so Nzapa aleke na bê ti lo ti sara (aProv. 4:18). Tongana lo “tambela [lani] na lege ti Yingo”, a yeke lani ngangu na lo ti tï na yâ ti handa ti siokpari (aGal. 5:22-26). Na mbage, nzoni yingo-ti-hinga amû maboko lani na lo ti sambela Jéhovah, na a sara si lo wara ‘siriri ti Nzapa so ahon bibe kue na so ayeke bata bê ti e na abata bibe ti e’. (aPhil. 4:6, 7). Bata atënë so na li ti mo, fa so mo yeke bi bê ti mo biani na zo; na ndoye, sara kue ti kpengba ita ti mo na lege ti yingo si lo kiri na yâ ti kundu ni.​—Diko aPhilippien 2:4.

¹⁵ Bâ so mo yeke mbeni ancien so ague ti sara vizite na aita. Mo lingbi ti wa mbeni koli na wali ti lo so awoko na lege ti yingo ti gbu li ti ala na ndo ti kozo ngoi so lani ala hinga na tâ tënë ti Bible. Ala bâ biani so atâ tënë so ayeke nzoni mingi, atënë ni ayeke na lege ni, a nzere na bê nga a sara si lê ti zo azi (Jean 8:32). Ala kiri singila mingi ndali ti aye so ala manda lani na ndo ti Jéhovah, na ndo ti ndoye ti lo nga na ndo ti apendere ye so lo leke ti sara ande. (Bâ Luc 24:32.) Dabe ti ala na ndo ti kpengba songo so aChrétien so amû tere ti ala na Jéhovah ayeke na ni na lo, nga nzoni lege so azi na ala ti sambela lo. Na bê ti mo kue, wa aChrétien so awoko na lege ti yingo ti kiri ti yeda na “Tene-nzoni ti gloire ti Nzapa” so ayeke na ngia, Jéhovah.​—1 Tim. 1:11.

Ngbâ ti fa so mo ye ala

16. Fa mbeni tapande so afa so angangu so zo ayeke sara ti mû maboko na aChrétien so awoko ayeke ga biani na aye ti nzoni.

¹⁶ Awango so e londo ti mä ayeke ga biani na aye ti nzoni? En, a yeke ga biani na ni. Na tapande, mbeni maseka-koli so aga lani wafango tënë ti Royaume na ngu 12 awoko na lege ti yingo na ngoi so lo yeke na ngu 15. Ye oko, na pekoni lo kiri lo to nda ti fa tënë, ti gue na abungbi nga lo sara kua ti ngoi kue ahon ngu 30. Ye so asara si lo kiri lo mû mbage na yâ ti akua so andu kongregation ayeke so mbeni ancien amû maboko na lo. Lo kiri singila mingi ndali ti maboko so ancien so amû na lo.

17, 18. Asarango ye wa ayeke sara si mo mû maboko na mbeni ita so ague yongoro na kundu ti Nzapa?

¹⁷ A yeke ndoye la apusu aChrétien ti mû maboko na amba ti ala so awoko ti tene ala kiri na yâ ti kongregation. Jésus atene na ndo ti adisciple ti lo, lo tene: “Mbi mû na i fini komandema, i ndoye tere ti i na popo ti i; legeoko tongana Mbi ndoye i, a lingbi i ndoye tere ti i na popo ti i nga. Na lege so, fade azo kue ahinga i yeke adisciple ti Mbi, tongana i ndoye tere ti i na popo ti i.” (Jean 13:34, 35). Biani, ndoye ayeke mbeni sarango ye so a hinga na atâ Chrétien. A yeke na lege ni ti ye mbeni Chrétien so awara batême awe na so awoko na lege ti yingo? A yeke tâ na lege ni ti ye lo. Me ti tene e mû maboko na mbeni ita so ayeke na bezoin ni, a lingbi e duti na asarango ye nde nde so a hunda na aChrétien ti duti na ni.

¹⁸ Tongana mo ye ti mû maboko na mbeni zo so ague yongoro na kundu ti Nzapa, a yeke nzoni mo duti na asarango ye wa? Na ndo ti dutingo na ndoye, a lingbi ti hunda ti tene mo duti zo so ayeke bâ mawa ti zo, ayeke sara nzobe, ayeke sara ye na ngangu pëpe nga ahinga ti kanga bê. Na yâ ti ambeni ye, a hunda nga ti tene mo mû pardon. Paul atene: “I yü be-ti-ndoye, nzobe, be-kota-pepe, tâ be-ti-molenge, be-nze-pepe, i zingo na ambeni zo na popo ti i fade pëpe, na tongana mbeni zo ayeke na tënë na popo ti lo na ita ti lo, i pardone ye na popo ti i. I pardone azo legeoko tongana Seigneur apardone i. Na ahon ye so kue, i yü ndoye, so ayeke kamba so alingbi kue, so atingbi i.”​—aCol. 3:12-14.

19. Ngbanga ti nyen angangu kue so mo sara ti mû maboko na aChrétien so agirisa lege ti kiri na yâ ti kundu ni ayeke senge pëpe?

¹⁹ Article ti peko ayeke fa ande ndani so ambeni ita ayeke gue yongoro na kundu ti Nzapa. A yeke fa nga ande aye so tanga ti aita ti kongregation alingbi ti sara ti yamba aita so akiri na yâ ti kundu ni. Na ngoi so mo yeke manda ande article ti peko nga mo yeke gbu li ti mo na ndo ti article so mo yeke manda ni na ndembe so, hinga na bê ti mo kue so ngangu so mo yeke sara ti mû maboko na azo so ayeke tongana angasangbaga ti kiri na yâ ti kongregation ayeke senge pëpe. Na yâ ti dunia ti laso, azo mingi ayeke mû fini ti ala kue ti tara ti wara gbâ ti mosoro, me gi fini ti zo oko si ayeke na kota ngere mingi ahon mosoro kue so ayeke na ndo ti sese so. Jésus agboto lê na ndo ni na yâ ti tapande so lo mû na ndo ti mbeni ngasangbaga so agirisa (Mat. 18:12-14). Bata tënë so lakue na li ti mo na ngoi so na bê ti mo kue mo yeke sara ngangu ti mû maboko na angasangbaga ti Jéhovah so lo ye ala mingi, so agirisa lege, si ala kiri na yâ ti kundu ni.

Mo yeke kiri tënë tongana nyen?

• Kua wa a-ancien ayeke sara ndali ti angasangbaga so ague yongoro na kundu ni?

• Mo yeke sara tongana nyen ti mû maboko na aita so fadeso ague yongoro na kongregation?

• Asarango ye wa mo yeke na bezoin ti duti na ni ti mû maboko na aita so ague yongoro na kundu ni?

[Foto na lembeti 17]

Na ndoye, a-ancien ayeke gi ti mû maboko na aita so ague yongoro na kundu ti Nzapa