A-ancien, ala mû tapande ti akota berger

1, 2. (a) Nyen la ayeke si tongana a bâ lege ti angasangbaga nzoni ape? (b) Ngbanga ti nyen na ngoi ti Jésus azo mingi ayeke tongana angasangbaga so ayeke na berger ape?

TONGANA mbeni berger abâ lege ti angasangbaga ti lo nzoni, ala yeke duti nzoni. Mbeni buku so asara tënë na ndo ti batango angasangbaga atene so tongana mbeni berger azia gi angasangbaga ti lo na ndo ti tengo pere na lo bâ pëpe lege ti ambeni ye so ala yeke na bezoin ni, a yeke ninga ape ala yeke woko nga ala yeke tï kobela. Me tongana berger ni abâ lege ti angasangbaga ni oko oko kue nzoni, angasangbaga ti kundu ni kue ayeke duti na ngangu nga na nzoni seni.

² A yeke nga legeoko tongaso na yâ ti congrégation. Tongana aChrétien so ayeke aberger abâ lege ti angasangbaga oko oko kue nga abi bê na ala oko oko kue, a yeke ga na ye ti nzoni na congrégation ni kue. Peut-être mo dabe ti mo so mawa ti gbâ ti azo asara lani Jésus ngbanga ti so “ala akangbi kirikiri tongana angasangbaga so ayeke na berger pëpe.” (Mat. 9:36). Ngbanga ti nyen ala yeke lani tongana angasangbaga so ayeke na berger ape? Ngbanga ti so azo so a mû na ala kua ti tene ala fa Ndia ti Nzapa na azo asara ye na nzoni bê ape, aye so ala hunda na azo ti sara ahon ndo ni nga ala sara ye pëpe alingbi na aye so ala fa na azo ti sara. Azo so a mû ala ti fa ye na amembre ti kundu ni, a mû maboko na ala ape nga ala bâ lege ti ala ape, me ala zia “anengo kungba” na ndo ti go ti ala.​—Mat. 23:4.

3. Nyen la ayeke nzoni a-ancien agirisa ape na ngoi so ala yeke bâ lege ti angasangbaga?

³ Laso a-ancien ayeke na mbeni kota kua. Angasangbaga so ala yeke bâ lege ti ala ayeke ti Jéhovah nga na Jésus, “berger so ayeke nzoni mingi.” (Jean 10:11). Jésus ‘avo angasangbaga ni na mbeni ngere’ so lo futa ni na ‘mênë ti lo so ngere ni ayeke kota mingi’. (1 aCor. 6:20; 1 Pi. 1:18, 19). Lo ye angasangbaga ni mingi ni la lo mû fini ti lo na sandaga ndali ti ala. A yeke nzoni a-ancien agirisa ape so surveillant ti ala ayeke Jésus Christ, “kota berger ti angasangbaga ni”. Tongaso, ala yeke kiri ande tënë na Jésus alingbi na lege so ala sara na ye na kundu ni.​—aHéb. 13:20.

4. Nyen la article so ayeke sara tënë na ndo ni?

⁴ A lingbi a-ancien asara ye na angasangbaga tongana nyen? A wa aita kue ti congrégation ti “mä yanga ti ala so ayeke mû li ni” na popo ti ala. A wa nga a-ancien ti ‘sara mokonzi pëpe na ndo ti ala so ayeke aye ti Nzapa’. (aHéb. 13:17; diko 1 Pierre 5:2, 3.) Tongaso, tongana nyen la a-ancien alingbi ti mû li ni sân ti sara mokonzi na ndo ti kundu ni? So ti tene, tongana nyen la a-ancien alingbi ti bâ lege ti angasangbaga sân ti hon ndo ti komandema so Nzapa amû na ala?

“LO YÔ ALA NA LIBE TI LO”

5. Ésaïe 40:11 afa na e nyen na ndo ti Jéhovah?

⁵ Prophète Ésaïe asara tënë na ndo ti Jéhovah atene: “Fade Lo fa ndo ti tengo pere na kundu ti Lo tongana berger, Lo kamata amolenge ti ngasangbaga na tïtî Lo, Lo yô ala na libe ti Lo, na lo fa lege doucement na ala so ayeke na amolenge.” (És. 40:11). Versê so afa tongana nyen la Jéhovah ayeke bâ lege ti abezoin ti aChrétien so awoko wala so ayeke na bezoin ti tene a bata ala. Legeoko tongana mbeni berger so ahinga ambilimbili ye so angasangbaga ti lo oko oko kue ayeke na bezoin ni, Jéhovah ahinga abezoin ti azo oko oko kue so ayeke na yâ ti congrégation nga lo yeke na ngia ti mû maboko na ala. Legeoko tongana ti so ngoi na ngoi berger ayeke yô molenge ti ngasangbaga na kate ti lo, Jéhovah ayeke kpengba e nga lo yeke bâ lege ti e nzoni mingi na ngoi so e yeke na yâ ti kota tara wala na angoi ti ngangu. Jéhovah ayeke “Babâ so ayeke sara nzoni bê mingi na zo”.​—2 aCor. 1:3, 4.

6. Tongana nyen la mbeni ancien alingbi ti mû tapande ti Jéhovah?

⁶ So ayeke mbeni nzoni ye so mbeni ancien alingbi ti manda na mbage ti Babâ ti e ti yayu. Legeoko tongana Jéhovah, a lingbi lo hinga bezoin ti angasangbaga. Tongana mbeni ancien ahinga akpale ti angasangbaga, lo yeke hinga ngoi so lo lingbi ti mû wango na ala nga ti mû maboko na ala alingbi na bezoin ti ala nga lo yeke hinga tongana nyen ti sara ni (aProv. 27:23). So aye ti tene so a lingbi mbeni ancien asara lisoro nzoni na aita. Atâa so lo yeke gi ti yôro tere ti lo pëpe na yâ ti aye so abâ gi aita ni, lo yeke bi bê na aye so lo yeke bâ nga so lo yeke mä na yâ ti congrégation nga na nzoni bê lo yeke mû ngoi ti “mû maboko na ala so awoko”.​—Kus. 20:35; 1 aThes. 4:11.

7. (a) A sara ye lani tongana nyen na angasangbaga ti Nzapa na ngoi ti Ézéchiel nga na ti Jérémie? (b) So Jéhovah ake lani aberger so ayeke be-ta-zo ape so, a fa nyen na a-ancien?

⁷ Gbu li na ndo ti sarango ye ti aberger so Nzapa afâ ngbanga lani na ndo ti ala. Na ngoi ti Ézéchiel nga na ti Jérémie, Jéhovah ake ala so a mû na ala kua ti bâ lege ti angasangbaga me ala sara ni ape. Na ngoi so mbeni zo ti bâ ndo na ndo ti ala ayeke dä ape, a sara ye ti sioni na angasangbaga ni nga ala kangbi kirikiri. Aberger ni amû kobe na angasangbaga ni pëpe me ala wara go na ndo ti angasangbaga ni nga ala ‘mû kobe gi na ala mveni’. (Ézéch. 34:7-10; Jér. 23:1). A yeke ndali ti amara raison tongaso la Nzapa ake akota zo ti bungbi ti vorongo nzapa so atene ala yeke aChrétien. So Jéhovah ake lani aberger so ayeke be-ta-zo ape so, a fa nyen na a-ancien? A fa na a-ancien so, a lingbi ala bâ lege ti kundu ti Jéhovah nzoni nga na nzoni bê.

“MBI ZIA TAPANDE NI NA ALA”

8. Tongana nyen la a-ancien alingbi ti mû nzoni tapande ti Jésus na ngoi so ala yeke mû wango na aita?

⁸ Siokpari so ayeke na tere ti e alingbi ti sara si ambeni ita ahinga mbilimbili pëpe ye so Jéhovah ahunda na ala ti sara. Ala lingbi ti sara ye ague nde na awango ti Bible wala sarango ye ti ala alingbi ti fa so ade ala kpengba ape na lege ti yingo. A lingbi a-ancien asara nyen? A lingbi ala mû tapande ti Jésus so akanga bê na adisciple ti lo. Adisciple apapa mingi na popo ti ala ti hinga zo wa na popo ti ala ayeke duti kota na yâ ti Royaume ti Nzapa, me bê ti Jésus ason na tere ti ala ape. Jésus angbâ ti fa ye na ala nga ti mû na ala wango na nzoni bê ti fa na ala tongana nyen ti sara tere ti ala kete (Luc 9:46-48; 22:24-27). Lo sukula même gere ti ala ti fa na ala ye so aye ti tene ti sara tere kete. Laso, a lingbi a-ancien nga kue afa so ala sara tere ti ala kete.​—Diko Jean 13:12-15; 1 Pi. 2:21.

9. Bango ndo wa Jésus awa lani adisciple ti lo ti duti na ni?

⁹ Bango ndo so Jésus ayeke na ni na ndo ti kua ti mbeni berger ayeke nde na ti so Jacques na Jean ayeke na ni. Abazengele so agi ti duti na kota ndo na yâ ti Royaume ti Nzapa. Me Jésus afa so bango ndo ti ala ni ayeke na lege ni ape tongana lo tene: “Ala hinga so agbia ti kodoro ayeke sara komandema na ndo ti azo ti kodoro ni. Akota zo ayeke na ngangu na ndo ti azo ti kodoro ti ala. Ti ala, azo ti mbi, ayeke nzoni ye ni aduti tongaso na popo ti ala pëpe. Me tongana mbeni zo aye ti ga kota zo na popo ti ala, ayeke nzoni lo ga zo ti sarango kua na ala.” (Mat. 20:25, 26, Fini Mbuki, 2001). A lingbi abazengele asara lani hange si ala “sara mokonzi”, wala ala “sara komandema” pëpe na ndo ti aita ti ala.

10. (a) Jésus aye ti tene a-ancien asara ye na angasangbaga tongana nyen? (b) Tongana nyen la Paul azia nzoni tapande na ndo ti tënë so?

¹⁰ Jésus aye ti tene a-ancien asara ye na angasangbaga tongana ti so lo sara ye na ala. A lingbi ala sara kua na aita ti ala me ala komande na ndo ti ala pëpe. Bazengele Paul asara lani ye tongaso ndali ti so lo tene na a-ancien ti congrégation ti Éphèse, lo tene: “Ala hinga nzoni mingi so a to nda ni na kozo lango so mbi zia gere ti mbi na yâ ti kodoro-komanda ti Asie, mbi yeke na tere ti ala lakue, mbi sara kua na Seigneur tongana ngbâa na tâ be-ti-molenge kue.” Paul aye lani ti tene a-ancien ni asara tere ti ala kete nga ala sara kua ngangu teti aita ti ala. Lo tene: “Na yâ ti aye kue, mbi fa na ala so a yeke na sarango kua ngangu tongaso si a lingbi ala mû maboko na ala so awoko.” (Kus. 20:18, 19, 35). Paul atene na aita ti Corinthe so lo komande pëpe na ndo ti mabe ti ala. Me lo yeke senge mba ti ala wakua ndali ti ngia ti ala (2 aCor. 1:24). Paul azia nzoni tapande na a-ancien laso ti sara tere ti ala kete nga ti sara kua ngangu.

‘NGBÂ GI NA NDO TI TËNË SO AYEKE TÂ TËNË’

11, 12. Tongana nyen la mbeni ancien alingbi ti mû maboko na mbeni ita ti mû desizion?

¹¹ “Tongana a ndu tënë ti kode ti fango ye”, a lingbi mbeni ancien “angbâ gi na ndo ti tënë so ayeke tâ tënë”. (Tite 1:9). Me lo yeke sara ni “na ngangu pëpe.” (aGal. 6:1). Nzoni berger ayeke gi ti gbu aita na ngangu pëpe ti sara mbeni ye, me lo yeke gi ti mû maboko na ala ti tene ndoye so ala yeke na ni na mbage ti Jéhovah nga na Bible la apusu ala ti mû adesizion. Na tapande, mbeni ancien alingbi ti sara lisoro na mbeni ita na ndo ti afango ye ti Bible nga na ambeni article so ayeke na yâ ti ambeti ti e ti mû maboko na ita ni ti mû mbeni kota desizion. Lo lingbi nga ti hunda na ita ni ti gbu li ti lo ti bâ tongana nyen ye so lo yeke soro ti sara ayeke sara ngangu na ndo ti songo ti lo na Jéhovah. Ancien ni alingbi ti fa na ita ni so ayeke kota ye ti tene lo hunda Nzapa na yâ ti sambela ti fa lege na lo kozoni si lo mû mbeni desizion (aProv. 3:5, 6). Na peko ti lisoro ni, ancien ni ayeke zia ita ni ti tene lo wani lo mû desizion.​—aRom. 14:1-4.

¹² A hunda na a-ancien ti sara kua gi na Bible ti fa lege na aita. Tongaso, a yeke kota ye ti tene ala sara kua nzoni na Bible nga ala mû peko ti atënë ti yâ ni nzoni. Tongana a-ancien asara ye so, a yeke sara si ala sara ye ahon ndo ti komandema so Nzapa amû na ala pëpe. Angasangbaga ni ayeke ti ala pëpe, nga zo oko oko kue so ayeke na yâ ti congrégation ayeke kiri tënë na Jéhovah nga na Jésus ndali ti adesizion so lo mû.​—aGal. 6:5, 7, 8.

“ATAPANDE NDALI TI ANGASANGBAGA”

13, 14. Aye wa alingbi mbeni ancien asara ti ga tapande ndali ti angasangbaga ni?

¹³ Na pekoni so Pierre atene na a-ancien ti ‘sara mokonzi’ pëpe na ndo ti aita ti ala, lo wa ala ti ga “atapande ndali ti angasangbaga ni”. (1 Pi. 5:3). Tongana nyen la mbeni ancien alingbi ti ga tapande ndali ti angasangbaga? Gbu li na ndo ti aye use so alingbi mbeni ita asara ti mû lege na lo ti sara kua tongana ancien. A lingbi lo “bata bibe ti lo nzoni” nga a lingbi lo ‘fa lege nzoni na azo ti da ti lo’. Tongana mbeni ancien ayeke na sewa, a lingbi lo fa lege nzoni na azo ti sewa ti lo, “teti tongana mbeni zo ahinga ti fa lege nzoni na azo ti da ti lo pëpe, fade lo yeke bata congrégation ti Nzapa ni tongana nyen?” (1 Tim. 3:1, 2, 4, 5). Kozo ti tene mbeni zo aga ancien, a lingbi lo bata bibe ti lo nzoni, so ti tene lo mä yâ ti afango ye ti Nzapa nzoni nga lo hinga tongana nyen ti sara ye alingbi na ni na yâ ti fini ti lo. Lo yeke duti kpô na ngoi ti aye ti ngangu nga lo yeke gbu li ti lo nzoni kozo ti mû adesizion. Tongana a-ancien asara ye tongaso, a yeke sara si aita na yâ ti congrégation azia bê ti ala na ala.

¹⁴ A-ancien ayeke zia nga nzoni tapande na aita na lege so ala yeke mû li ni ti fa tënë. Na sarango tongaso ala yeke mû tapande ti Jésus. Na ngoi so Jésus ayeke na sese, lo bâ lani fango tënë ti Royaume na nene ni mingi nga lo fa na adisciple ti lo tongana nyen ti sara kua so (Marc 1:38; Luc 8:1). Laso, anzere mingi na awafango tënë ti fa tënë legeoko na a-ancien. Ala bâ so a-ancien ayapu na sarango kota kusala so nga ala lingbi ti manda ye na lege ti kode so a-ancien ayeke fa na ye. So a-ancien aleke na bê ti ala ti mû ngoi ti ala nga na ngangu ti ala ti fa nzoni tënë atâa so ala yeke na aye mingi ti sara, a kpengba aita kue ti sara ye legeoko tongana ala. A-ancien alingbi nga ti zia nzoni tapande na aita na lege so ala yeke leke tere ti ala ndali ti abungbi, ala yeke kiri tënë na ngoi ti abungbi ni nga ala sara ambeni kua, na tapande ti bata Da ti Royaume nzoni nga ti leke yâ ni si aduti na saleté pëpe.​—aÉph. 5:15, 16; diko aHébreu 13:7.

“MÛ MABOKO NA AZO SO AWOKO”

15. Ndali ti ambeni raison wa a-ancien ayeke sara vizite na aita?

¹⁵ Nzoni berger ayeke sara ye hio ti mû maboko na mbeni ngasangbaga so awara kä wala so ayeke na kobela. Legeoko nga, a lingbi a-ancien asara ye hio ti mû maboko na aita so ayeke bâ pasi wala so ayeke na bezoin ti tene a kpengba ala. Aita so ayeke mbakoro nga na ala so tere ti ala ason alingbi ti duti na bezoin ti tene a bâ lege ti ala lâ oko oko na lege ti mitele, me ala yeke mbilimbili na bezoin ti tene a mû maboko na ala na lege ti yingo nga a kpengba ala (1 aThes. 5:14). Peut-être amaseka ti congrégation ayeke sara ngangu ti hon ndo ti “anzara ti bê so ayeke gbu ka amaseka”. (2 Tim. 2:22). A-ancien ayeke mû maboko na aita kue ti congrégation na lege so ala yeke sara vizite na aita ni. Na ngoi ti vizite ni, ala yeke gi ti hinga akpale so aita ayeke na ni nga ala yeke mû na ala wango na yâ ti Bible ti kpengba ala. Tongana a-ancien asara ye hio ti mû maboko na aita, a yeke sara si mingi ti akpale so ala yeke na ni aga kota ape.

16. Nyen la a-ancien alingbi ti sara tongana mbeni ita na yâ ti congrégation ayeke na mbeni kota kpale?

¹⁶ Ka tongana mbeni ita na yâ ti congrégation ayeke na mbeni kota kpale so alingbi ti sara si songo ti lo na Jéhovah abuba? Jacques so asû Bible atene: “Mbeni zo na popo ti ala ayeke na kobela? Zia lo iri a-ancien ti congrégation ti ga na tere ti lo, na zia a-ancien ni asambela ndali ti lo, ala sara mafuta na tere ti lo na iri ti Jéhovah. Na sambela so a sara na mabe ayeke sara si zo ti kobela ni awara sava, na Jéhovah ayeke mû lo na nduzu. Nga, tongana lo sara asiokpari, fade a yeke pardone lo ndali ni.” (Jacq. 5:14, 15). Même tongana mbeni ita so ayeke na “kobela” ‘airi a-ancien’ ape, a yeke nzoni ala sara ye hio ti mû na lo maboko na ngoi so ala hinga ni. Tongana a-ancien asambela legeoko na aita ndali ti akpale ti aita ni nga ala mû maboko na aita ni na angoi ti ngangu, ala yeke fa so ala yeke anzoni berger so ayeke mû ngangu na aita ti ala ti ngbâ ti sara na Nzapa na ngia.

17. Tongana a-ancien amû tapande ti “kota berger”, angasangbaga ayeke bâ nzoni dä tongana nyen?

¹⁷ A-Chrétien so ayeke aberger ayeke sara ngangu ti mû tapande ti Jésus Christ, “kota berger”, na yâ ti aye kue so ala yeke sara na yâ ti bungbi ti Jéhovah. Mungo maboko so aita koli so ayeke mû na angasangbaga, a sara si ala ngbâ ti kpengba nga ti sara na Nzapa be-ta-zo. E kiri singila mingi na aberger ti e so asara ye na nzoni bê nga na Jéhovah, Kota Berger ti e.