2 Gi ti hinga Nzapa nzoni

“Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa.”​—Jean 17:3.

KPALE NI AYEKE SO WA? Ambeni zo atene so Nzapa ayeke dä pëpe. Ambeni atene ti ala so Nzapa ayeke tâ zo pëpe me gi mbeni ngangu. Azo so atene so Nzapa ayeke tâ zo afa atënë so ague nde nde na ndo ti lo nga na ndo ti asarango ye ti tere ti lo.

TONGANA NYEN TI HON NDO TI KPALE SO? Mbeni lege ti hinga Nzapa nzoni ayeke ti bâ aye so lo sara. Bazengele Paul atene: “Asarango ye ti tere ti Nzapa so lê abâ ni pëpe asigigi polele ngbene ye so a leke dunia ti ga na ni, ngbanga ti so a bâ ni na lege ti aye so lo sara, so ti tene ngangu ti lo so ayeke lakue lakue na dutingo ti lo tongana Nzapa.” (aRomain 1:20). Tongana mo mû ngoi ti bâ aye so Nzapa asara, mo lingbi ti manda ye mingi na ndo ti ndara nga na ngangu ti Wasarango e.​—Psaume 104:24; Ésaïe 40:26.

Ye oko, ti hinga asarango ye ti tere ti Nzapa tâ nzoni, zo oko oko ayeke na bezoin ti zi Bible so ayeke tënë ti yanga ti Nzapa, na ti bâ lo wani atënë so ayeke na yâ ni. Zia lege pëpe na azo ti mû desizion na ndo ti lege so a lingbi mo bâ na mbeni ye. Me, sara ye alingbi na wango ti Bible, so atene: “Ala zia ti sara ye akpa ti aye ti ngoi so, me ala changé na sarango si bibe ti ala akiri fini ni, si ala wani alingbi ti hinga ye so bê ti Nzapa aye, so ayeke nzoni, so anzere nga so alingbi kue.” (aRomain 12:2). Na tapande, bâ aye so Bible afa na ndo ti Nzapa na gbe ni ge.

Nzapa ayeke na iri. Na ngoi so a sû Bible, iri ti Nzapa asigigi fani saki mingi na yâ ni. Na yâ ti gbâ ti abible so a kiri peko ni, a yeke wara iri so na Psaume 83:19, so atene: “Si ala hinga so mo, iri ti mo ayeke Yahweh [“Jéhovah,” FD], gi mo oko mo yeke Lo Ti Nduzu Ahon Kue na ndo ti sese kue.”​—La Bible Crampon.

Aye so azo ayeke sara asara si Jéhovah ayeke na ngia wala na vundu. Na pekoni so Jéhovah azi azo ti Israël na ngbâa na Égypte, fani mingi, ala sara ye ague nde na awango ti ndara so lo mû na ala. Kpengba-li ti ala azia “vundu” na bê ti lo. Aye so ala sara ‘amû vundu na Lo Ti Nzoni-kue ti Israël.’​—Psaume 78:40, 41.

Jéhovah ayeke bi bê na e oko oko kue. Jésus atene lani na adisciple ti lo, lo tene: “A yeke kä anzërê use na senge lê ti pata oko pëpe? Me mbeni oko ti anzêrë so ayeke tï na sese pëpe sân ti tene Babâ ti ala ahinga ni. A diko même kuä ti li ti ala oko oko kue awe. Tongaso, ala sara mbeto pëpe: ngere ti ala ahon ngere ti gbâ ti anzêrë.”​—Matthieu 10:29-31.

Nzapa aye mbeni mara wala sarango ye ti mbeni mara ahon ti mbeni pëpe. Bazengele Paul atene na aGrec ti gbata ti Athènes so “na lege ti zo oko, [Nzapa asara] mara oko oko kue ti azo ti duti na lê ti sese kue”. Lo tene nga so Nzapa ayeke “yongoro na e oko oko kue pëpe.” (Kusala 17:26, 27). Bazengele Pierre atene: “Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”​—Kusala 10:34, 35.

NZONI YE TI PEKONI AYEKE SO WA? Ambeni zo ‘ayapu na kusala ti Nzapa, me a yeke na lege ti tâ hingango ye pëpe.’ (aRomain 10:2). Tongana mo hinga ye so Bible afa biani na ndo ti Nzapa, azo ayeke handa mo pëpe nga a yeke mû maboko na mo ti “ga nduru na Nzapa”.​—Jacques 4:8.

Ti hinga ambeni tënë na ndo ni, bâ buku Bible afa nyen biani?,a chapitre 1 so li ti tënë ni ayeke: “Tâ tënë na ndo Nzapa ayeke so wa?”

[Kete tënë na gbe ni]

[Foto na lembeti 6]

Mbeni lege ti hinga Nzapa nzoni ayeke ti bâ aye so lo sara