2 Nzapa ayeke bi bê ti lo biani na e pëpe: A yeke tâ tënë la?

Peut-être mo mä a tene: “Tongana Nzapa abi bê ti lo biani na azo, ka lo zi aye ti sioni nga na pasi na yâ ti dunia awe. Nga, même tongana lo bi bê ti lo na azo kue tongaso, lo yeke bi bê ti lo pëpe na aye so ayeke si na mbi.”

Ye so Bible afa: Jéhovah Nzapa ayeke pëpe na gunda ti aye ti sioni (Jacques 1:13). Atâa so lo lingbi fade ti zi aye ti sioni na ngoi kue, lo zia si azo so ayeke sara ye na lege ni pëpe angbâ juska laso ti tene lo leke tënë so alondo lani na tongo nda ti mbaï ti azo. Na nda ni, Nzapa ayeke sara ye ti nzoni na azo nga lo yeke zi aye ti sioni kue so azo so ake komandema ti lo aga na ni.​—Genèse 3:1-6; Ésaïe 65:17.a

Nde na bingo bê so Nzapa ayeke bi na ndo ti azo kue, lo yeke bi bê ti lo mingi na e oko oko kue. Matthieu 10:29-31 afa so lo yeke bâ anzene nzene ye so ayeke na tere ti e so e hinga même ni pëpe. Versê ni atene: “A yeke kä anzërê use na senge lê ti pata oko pëpe? Me mbeni oko ti anzêrë so ayeke tï na sese pëpe sân ti tene Babâ ti ala ahinga ni. A diko même kuä ti li ti ala oko oko kue awe. Tongaso, ala sara mbeto pëpe: ngere ti ala ahon ngere ti gbâ ti anzêrë.”

Ti hinga tâ tënë ayeke mû maboko na mo: Mingi ni e yeke kpe azo so ayeke sara ye na ngangu nga so ayeke bi bê na amba ti ala pëpe. A yeke ye ti dongo bê pëpe so mvene so azo atene na ndo ti Nzapa atene lo yeke bi bê ti lo na azo pëpe asara si azo mingi ake ti gi ti hinga lo nga ala yeke ga nduru na lo gi tongana mbeni ye nde ti sarango ni ayeke dä pëpe. Tongana mo hinga so Jéhovah Nzapa ayeke bi bê ti lo biani na mo, ye so ayeke pusu mo ti gi ti hinga ye mingi na ndo ti lo nga ti maï mbeni kpengba songo na lo.

Na tapande, mo lingbi ti sambela Nzapa me mo yeke gi bê ti mo wala lo yeke mä mo wala lo yeke kiri tënë na sambela ti mo? Bible adë bê ti e so ‘Lo so Lo mä sambela’ ayeke ngbâ ti mä na ngoi kue azo kue so aga nduru na lo na bê ti ala kue.​—Psaume 65:3.

Nzapa atene na mo ti ‘bi agingo bê ti mo kue na ndo ti lo, ngbanga ti so lo yeke bi bê ti lo na ndo ti mo.’ (1 Pierre 5:7). E lingbi ti zia bê ti e na ndo ti lo même na ngoi ti ye ti ngangu, ndali ti so Bible atene: “L’Éternel ayeke nduru na azo so bê ti ala afâ awe, na Lo sö ala so yingo ti ala ayeke na vundu.”​—Psaume 34:19.

[Kete tënë na gbe ni]

[Kete tënë na lembeti 5]

Tongana Nzapa ayeke bi bê ti lo na e pëpe, ngbanga ti nyen lo tene na e ti sambela lo?