Ye so mo lingbi ti sara ti gbu nda ti Bible

3. Yeda si a mû maboko na mo

Edward John Eyre ague ti bâ ando nde nde ti kodoro ti Australie. Na ngoi so lo yeke sara mbeni ngangu tambela na yâ ti yando ti Nullarbor, lo yeda si azo ti kodoro ni afa na lo tongana nyen ti wara ngu na lege ti ambutu so pupu abungbi ni tongana akete hoto nga na lege ti akeke so a iri ni eucalyptus. So Eyre ayeda ti tene azo so ahinga kodoro ni amû maboko na lo asara si na pekoni lo sö fini ti lo.

TONGANA ti so tapande so afa, tongana mbeni zo aye ti sara mbeni ngangu kusala na lege ni, fani mingi a hunda ti tene mbeni zo so ahinga ye ni ahon lo amû maboko na lo. A yeke nga ye so a hunda ti tene mo sara na ngoi so mo to nda ti diko Bible.

Jésus aku lani pëpe ti tene adisciple ti lo agbu nda ti Bible sân ti tene mbeni zo amû maboko na ala. Mbeni lâ, “lo zi lege ti hingango ndo ti ala kue ti gbu nda ti Mbeti ti Nzapa.” (Luc 24:45). Jésus ahinga so azo so ayeke diko Bible ayeke na bezoin ti tene a mû maboko na ala si ala gbu nda ti aye so Mbeti ti Nzapa afa.

Mungo maboko ti azo wa?

Jésus ahunda na atâ disciple ti lo ti mû maboko na azo ti gbu nda ti Bible. Kozo ti tene Jésus ague na yayu, lo mû yanga lo tene: “Tongaso ala gue, ala sara si azo na popo ti amara kue aga adisciple. . . . Ala fa na ala ti bata aye kue so mbi mû yanga na ala ti sara.” (Matthieu 28:19, 20). Kozo kusala ti aChrétien ayeke ti fa ye; na popo ti aye so ala yeke fa, a yeke wara fango na azo tongana nyen ala lingbi ti sara ye lâ oko oko alingbi na akpengba-ndia ti Bible. Atâ Chrétien ayeke mû maboko na azo ti gbu nda ti Bible.

Ngoi kete na pekoni so Jésus amû yanga na adisciple ti lo ti fa ye na azo, mbeni ye so apika bê ti zo mingi asi. Bible atene so mbeni kota zo ti yangbo ti gbia ti Éthiopie ayeke diko lani mbeni mbage ti prophétie ti Ésaïe. Lo tï na ndo ti ambeni mbage ni so akara lo. Bible atene so ambage so akara lo ayeke so: “Tongana mbeni ngasangbaga, a yeke gue na lo na ndo ti fango anyama, nga tongana mbeni molenge ti ngasangbaga so adekongo pëpe na gbele zo ti fango kuä ti tere ti lo, lo zi yanga ti lo pëpe. Na yâ ti ye ti kamene so a sara na lo, a ke ti fâ ngbanga ti lo na lege ni. Zo wa si ayeke tene ande anzene nzene tënë na ndo ti akotara ti lo? Teti a zi fini ti lo awe na sese so.”​—Kusala 8:32, 33; Ésaïe 53:7, 8.

Kota zo so ahunda Philippe, mbeni Chrétien so ahinga Mbeti ti Nzapa nzoni, lo tene: “Prophète ni ayeke sara tënë ti zo wa? Lo yeke sara tënë ti lo wani wala ti mbeni zo nde?” (Kusala 8:34). Zo ti Éthiopie so, so aye biani ti hinga Mbeti ti Nzapa, ague kozoni awe na Jérusalem ti voro Nzapa, na kite ayeke dä pëpe so lo sambela ti wara fango lege. A yeke polele so aye so lo yeke diko lani anzere na lo nga lo yeke na nzoni bibe. Ye oko, kota zo so ade ti gbu nda ti mbage so pëpe. Na tâ be-ti-molenge, lo hunda Philippe ti mû maboko na lo. Lege so Philippe afa na nda ti atënë ni azia ngia mingi na bê ti lo na asara si lo ga Chrétien.​—Kusala 8:35-39.

A-Témoin ti Jéhovah angbâ lakue ti sara kua so Philippe na tanga ti akozo Chrétien asara lani. Na yâ ti akodoro ahon 235, ala yeda na bê ti ala wani ti mû maboko na azo ti gbu nda ti aye so Bible afa biani. Ala yeke sara ni na lege ti alisoro so ala yeke sara na azo na ndo ti atënë nde nde so ayeke na yâ ti Bible, na ala yeke bâ atënë so oko na oko na yâ ti mbeni ngoi. Kode ti mandango Bible so andu gingo nda ti aye so Bible atene na ndo ti mbeni li ti tënë.a​—Bâ encadré “Anzoni kiringo tënë na atënë so azo ahunda na ndo ti Bible.”

‘A kiri tënë na ahundango tënë ti mbi kue’

A-Témoin ti Jéhovah ato nda ti manda Bible na Steven, Valvanera na Jo-Anne, so a sara tënë ti ala na yâ ti kozo article. Steven atene: “Bê ti mbi apika ti bâ so gi na hakango akpengba-ndia so ayeke na yâ ti aversê nde nde wala atënë nde nde so a sû na yâ ni, fani mingi zo alingbi ti wara akiringo tënë na ahundango tënë ti lo. Kozo ti tene aTémoin ti Jéhovah amanda Bible na mbi, zo oko afa na mbi ti sara tongaso pëpe. Ti hinga so Bible ayeke pëpe mbeni buku so azo ayeke dë gi gaba na ndo ti atënë ti yâ ni sân ti wara mbeni nzoni kiringo tënë adë bê ti mbi.”

Valvanera ayeda na tënë so, na lo tene: “Aye kue so mbi manda ague tâ gi oko na ayeke na lege ni. Mbeni tënë ayeke tâ tënë, gi pëpe ndali ti so a fa ni na eglize, me ngbanga ti so a fa nda ti atënë ni kue na mbeni lege so zo abâ so ayeke na lege ni.” Jo-Anne atene: “Ti bâ so a sara kua na Bible ti kiri tënë na ahundango tënë ti mbi kue asara si mbi ne mingi Wa ti Bible, ndali ti so lo bâ ndo a yo ni la lo sara si a sû na yâ ti Bible anzoni kiringo tënë na atënë kue so azo ayeke hunda tere ti ala na ni.”

Mo hinga mbeni Témoin ti Jéhovah? Ngbanga ti nyen mo hunda na lo pëpe ti fa na mo tongana nyen ala yeke manda Bible na azo? Tongana mo hinga mbeni Témoin ti Jéhovah pëpe, mo lingbi ti sû mbeti na mbeni oko ti adresse so ayeke na lembeti 2 ti Tour ti Ba ndo so. Tongana mo yeke na yingo vulu ti Nzapa, mo diko Bible na nzoni bibe nga mbeni zo so ahinga Bible nzoni amû maboko na mo, mo lingbi ti gbu nda ti Bible.

[Kete tënë na gbe ni]

[Encadré/​Foto na lembeti 8]

Anzoni kiringo tënë na atënë so azo ahunda na ndo ti Bible

Ambeni li ti tënë so aTémoin ti Jéhovah ayeke sara lisoro na ndo ni na ngoi so ala yeke manda Bible na azo ayeke so:

• Ye so Nzapa aleke teti sese ayeke nyen?

• Azo so akui ayeke na ndo wa?

• E yeke na “lâ ti nda ni”?

• Ngbanga ti nyen Nzapa azia si azo abâ pasi?

• Nyen la mbi lingbi ti sara si sewa ti mbi aduti na ngia?

[Afoto na lembeti 8]

Ti gbu nda ti Bible . . . sambela ti wara yingo ti Nzapa, diko ni na nzoni bibe nga yeda si a mû maboko na mo