Yeda na bê kue na ye so a mû na mo Mû ye na bê kue

JÉHOVAH, Babâ ti e ti yayu so aye e mingi ayeke bi bê ti lo na ndo ti e oko oko kue. Bible adë bê ti e so lo yeke bi bê ti lo mingi na awakua ti lo kue (1 Pi. 5:7). Mbeni oko lege so Jéhovah afa so lo yeke bi bê ti lo na e ayeke so lo yeke mû ye na e na alege nde nde ti mû maboko na e ti duti be-ta-zo na lo (És. 48:17). Mingi ni na angoi so e yeke na akpale so abi vundu mingi na bê ti e, Jéhovah aye si e sara kua na aye so lo zia na sese ti mû maboko na e. Ndia ti Moïse amû maboko na e ti bâ so tënë so ayeke tâ tënë.

Na gbe ti Ndia ti Moïse, na ndoye, Jéhovah aleke mbeni ye ti mû maboko na “wanzinga”, so ti tene azo tongana anyindu, awomua nga na awande (Lév. 19:9, 10; Deut. 14:29). Jéhovah ahinga so ambeni wakua ti lo alingbi ti duti na bezoin ti tene amba ti ala amû maboko na ala (Jacq. 1:27). Ni la, zia awakua ti Jéhovah kue aduti nduru ti yeda na mungo maboko ti amba ti ala so Jéhovah apusu ala ti mû ye na ala. Atâa so kue, na ngoi so e yeda na mungo maboko so, a yeke nzoni e sara ni na nzoni bibe.

Na oko ngoi ni, Mbeti ti Nzapa afa nga so lege azi na awakua ti Jéhovah ti mû ye. Dabe ti mo na tënë so a sû na ndo ti “womua so ayeke wayere”, so Jésus abâ lo na temple ti Jérusalem (Luc 21:1-4). Kite ayeke dä pëpe so lo yeke na popo ti azo so ayeke bâ nzoni na lege ti ye so na ndoye, Jéhovah aleke na lege ti Ndia ti Moïse ti mû maboko na awomua. Ye oko, atâa so womua so ayeke wayere, azo adabe ti ala na lo, pëpe tongana mbeni zo so ayeke wara ye na maboko ti azo me tongana mbeni zo ti mungo ye na azo. So lo yeke zo ti mungo ye na azo asara biani si lo yeke na ngia ndali ti so Jésus atene: “Ngia ayeke mingi tongana zo amû ye na zo ahon ti wara ye na maboko ti zo.” (Kus. 20:35). Na pekoni so mo hinga tënë so nzoni awe, na lege wa mo lingbi ti “mû ye lakue na azo” na ti wara ngia na pekoni?​—Luc 6:38.

“Fade mbi mû nyen na L’Éternel”?

Zo ti sungo psaume ahunda tere ti lo, lo tene: “Fade mbi mû nyen na L’Éternel teti ye kue ti nzoni so Lo sara na mbi?” (Ps. 116:12). Aye ti nzoni wa Jéhovah asara na lo? Jéhovah amû maboko na lo na ngoi so “ye ti ngangu na ye ti vundu” asi na lo. Na ndo ni, Jéhovah ‘azi âme ti lo na kui’. Ni la fadeso lo ye ti “mû”, wala ti kiri na Jéhovah peko ti aye so lo sara na lo. Zo ti sungo psaume so aye ti sara nyen? Lo tene: “Fade mbi futa ye ti zendo so mbi zê na L’Éternel.” (Ps. 116:3, 4, 8, 10-14). Lo leke na bê ti lo ti ngbâ ti sara ye alingbi na azendo kue so lo mû na Jéhovah nga ti sara aye kue so Jéhovah aku na mbage ti lo.

Mo lingbi nga ti sara tongaso. Na lege wa? Na lege so na ngoi kue mo yeke gi ti sara ye ague oko na andia nga na akpengba-ndia ti Nzapa. Ni la, sara kue si vorongo Jéhovah angbâ lakue ti duti tâ kota ye na yâ ti gigi ti mo na nga si yingo ti Nzapa afa lege na mo na yâ ti aye kue so mo yeke sara (Zo-ti. 12:15; aGal. 5:16-18). Ti tâ tënë ni, mo lingbi ande lâ oko pëpe ti kiri na Jéhovah peko ti aye kue so lo sara na mo. Atâa so kue, a yeke “mû ngia na bê ti” Jéhovah ti bâ so mo yeda na bê ti mo kue ti mû tere ti mo ti sara na lo (aProv. 27:11). So tâ pendere pasa ti mû ngia na bê ti Jéhovah na lege so!

Sara si aita ti congrégation aduti nzoni

Kite ayeke dä pëpe so mo yeda so congrégation ayeke mû maboko na mo na alege nde nde. Na lege ti congrégation, Jéhovah ayeke mû na e gbâ ti kobe ti yingo. Mo hinga tâ tënë so azi mo na yâ ti afango ye ti wataka nga na bingo na lege ti yingo (Jean 8:32). Na ngoi ti abungbi nga na akota bungbi so “ngbâa be-ta-zo so ayeke sara ye na ndara” aleke, mo hinga aye so ayeke gue na mo ti wara ande fini ti lakue lakue na yâ ti paradis na ndo ti sese so pasi ayeke duti ande dä pëpe (Mat. 24:45-47). Mo lingbi biani pëpe ti diko wungo ti aye ti nzoni kue so mo wara awe na lege ti congrégation nga na aye so mo yeke wara ande. Nyen la mo lingbi ti kiri na ni na congrégation ndali ti aye ti nzoni so mo wara na lege ti lo?

Bazengele Paul atene: “Tere ni kue asara si tere ni amaï na akpengba tere ti lo wani na yâ ti ndoye. Ti sara tongaso, a bungbi amembre ti tere ni oko ti mä tere, na a mû lege na ala ti sara kua maboko na maboko na lege ti ando oko oko so abio atingbi dä si ayeke mû na amembre ni ye so amanke ala, a lingbi na lege so membre oko oko ayeke sara kua alingbi na ngangu ti lo.” (aÉph. 4:15, 16). Atâa so tënë so andu kozoni kue groupe ti aChrétien so a soro ala ti gue na yayu, kpengba-ndia so ayeke na yâ ni andu aChrétien kue laso. Biani, membre oko oko ti congrégation alingbi ti sara si aita aduti nzoni na congrégation amaï. Na alege wa?

E lingbi ti sara ni na lege so e sara ngangu ti tene na ngoi kue e sara si aita ti e akpengba na yâ ti kua ti Jéhovah (aRom. 14:19). E lingbi nga ti sara si “tere ni amaï” na lege so e yeke gi ti lë ambage nde nde ti lengo ti yingo ti Nzapa na yâ ti asarango ye ti e kue na mbage ti amba ti e aChrétien (aGal. 5:22, 23). Na ndo ni, e lingbi ti gi alege nde nde ti “sara ye ti nzoni na azo kue, me mbilimbili na ala so ayeke aita ti e na yâ ti mabe.” (aGal. 6:10; aHéb. 13:16). Azo kue so ayeke na yâ ti congrégation, atâa a yeke aita-koli, aita-wali, amaseka na ambakoro, alingbi ti sara mbeni ye ti ‘kpengba tere ni na yâ ti ndoye.’

Na ndo ni, e lingbi ti mû akode ti e, ngangu ti e nga na aye so e yeke na ni ti sara na kua so ayeke sara si azo asö fini ti ala, kua so congrégation ayeke sara ni. Jésus Christ atene: “Ala wara senge senge.” A yeke nzoni e sara ye tongana nyen? Lo tene: “Ala mû na azo senge senge.” (Mat. 10:8). Ni la, bi tere ti mo mingi na yâ ti kua ti fango tënë ti Royaume nga na ti sarango si azo aga adisciple (Mat. 24:14; 28:19, 20). Ambeni ye akanga lege na mo ti bi tere ti mo mingi dä? Dabe ti mo na womua so ayeke wayere, so Jésus asara tënë ti lo. Ye so lo mû ayeke mingi pëpe. Ye oko, Jésus atene so lo mû ye ahon tanga ti azo kue. Lo mû ye kue so dutingo ti lo amû lege na lo ti mû.​—2 aCor. 8:1-5, 12.

Na bê kue, yeda na maboko so a mû na mo

Ye oko, na ambeni ngoi, a lingbi ti si so mo yeke na bezoin ti tene congrégation amû maboko na mo. Yeda hio na maboko so congrégation alingbi ti mû na mo na ngoi so mo yeke gi ti hon ndo ti akpale so dunia so ayeke ga na ni. Jéhovah asoro akoli so ahinga kusala ti ala na so ayeke bi bê na aita ti “bata congrégation ti Nzapa”, so ti tene ti mû maboko na mo na ngoi so mo yeke na yâ ti aye ti ngangu (Kus 20:28). A-ancien na aita so ayeke na yâ ti congrégation aye ti dë bê ti mo, ti mû maboko na mo nga ti bata mo si sioni asi na mo pëpe na angoi ti ngangu.​—aGal. 6:2; 1 aThes. 5:14.

Ye oko, tongana a mû maboko na mo, yeda na ni na nzoni bibe. Kiri singila lakue ndali ti maboko so a mû na mo. Bâ maboko so amba ti mo aChrétien amû na mo tongana fä ti kota nzobe ti Nzapa (1 Pi. 4:10). Ngbanga ti nyen a yeke kota ye? A yeke kota ye ndali ti so e ye ti sara ye nde na ti azo ti dunia so, so ayeke kiri singila pëpe ndali ti aye so a mû na ala.

Sara ye na lege ni

Na yâ ti lettre so Paul atokua na congrégation ti Philippe, lo tene na ndo ti Timothée lo tene: “Mbi yeke na mbeni zo nde pëpe so ayeke na mara ti bibe ti lo so na so aye biani ti bâ lege ti ala.” Ye oko, Paul akiri atene: “Atanga ni kue ayeke gi gi aye so agbu bê ti ala wani, me aye so agbu bê ti Christ Jésus pëpe.” (aPhil. 2:20, 21). Na gbungo li nzoni na ndo ti tënë so Paul atene, na lege wa e lingbi laso ti kpe ti bi bê ti e gi na ndo ti “aye so agbu bê ti [e] wani”?

E lingbi ti hunda aita ti mû ngoi ti ala ti mû maboko na e ti leke akpale so e wara. Me a yeke nzoni e gi pëpe ti gbu ala gbungo na ngangu ti sara ni. Ngbanga ti nyen? Gbu li na ndo ti ye so: Kite ayeke dä pëpe so e yeke kiri singila mingi tongana mbeni ita amû maboko na e na lege ti mitele na ngoi ti mbeni kpale. Me e yeke gbu ita ni gbungo na ngangu si lo mû maboko na e? Oko pëpe. Legeoko nga, atâa so aita ti e so aye e ayeke lakue na ngia ti mû maboko na e, a yeke nzoni e ku pëpe ti tene ala mû ngoi ti ala kue ti mû maboko na e. Kozoni kue, atâa ye wa amba ti e asara ti mû maboko na e na ngoi ti akpale, e ye si bê ti ala wani la apusu ala ti sara ni.

Kite ayeke dä pëpe so aita ti mo ayeke lakue nduru ti mû maboko na mo na bê ti ala kue. Ye oko, na ambeni ngoi, aita alingbi pëpe ti sara na mo ye kue so mo yeke na bezoin ni. Tongana a si tongaso, hinga biani so Jéhovah ayeke mû ande maboko na mo, tongana ti so lo sara lani na zo ti sungo psaume, atâa akpale so mo lingbi ti wara.​—Ps. 116:1, 2; aPhil. 4:10-13.

Ni la, na singila na bê, yeda hio na aye kue so Jéhovah aleke ti mû maboko na mo, mbilimbili na angoi so mo yeke na yâ ti vundu nga na akpale (Ps. 55:23). Lo ye si mo sara tongaso. Ye oko, lo ye nga si mo duti “zo so amû ye na ngia.” Tongaso, “leke na bê ti” mo kue ti mû ye kue so mo lingbi ti mû ti mû maboko na tâ vorongo (2 aCor. 9:6, 7). Na sarango tongaso, mo lingbi ti sara aye use so: mo yeke yeda na bê kue na ye so a mû na mo nga mo yeke mû ye na bê kue.

[Encadré/Foto na lembeti 32]

“Fade mbi mû nyen na L’Éternel teti ye kue ti nzoni so Lo sara na mbi?”​—Ps. 116:12.

▪ Gi lege kue ti “sara ye ti nzoni na azo kue”

▪ Sara si aita ti mo akpengba na yâ ti kua ti Jéhovah

▪ A lingbi na dutingo ti mo, mû mbage mingi na yâ ti kua ti sarango si azo aga adisciple