Bata nzoni bibe so ayeke na yâ ti congrégation

“Zia kota nzobe ti Seigneur ti e Jésus Christ aduti na bibe so ala yeke na ni so.”​—APHIL. 4:23.

NA LEGE WA E YEKE MAÏ NZONI BIBE NA YÂ TI CONGRÉGATION . . .

na ngoi so e yeke na tere ti aita ti e?

na lege so e yapu na fango tënë?

na fango na gigi tënë ti akota siokpari?

1. Nyen la a gonda congrégation ti Philippes na ti Thyatire ndali ni?

NA NGOI ti akozo Chrétien, aita ti congrégation ti Philippes ayeke na mosoro na lege ti mitele pëpe. Me, ala yeke mû ye mingi na zo nga ala fa so ala ye aita ti ala mingi (aPhil. 1:3-5, 9; 4:15, 16). Ni la, na hunzingo ti lettre so Paul atokua na ala lo tene: “Zia kota nzobe ti Seigneur ti e Jésus Christ aduti na bibe so ala yeke na ni so.” (aPhil. 4:23). Teti so aChrétien ti Thyatire ayeke na mara ti bibe ni so, Jésus so awara gloire atene na ala lo tene: “Mbi hinga aye so mo yeke sara, mbi hinga ndoye ti mo, mabe ti mo, kusala so mo sara na azo, gbungo ngangu so mo gbu; na mbi hinga so aye so mo sara fadeso ayeke mingi ahon ati so mo sara kozo.”​—Apoc. 2:19.

2. Na lege wa bibe ti e ayeke sara ngangu na ndo ti bibe so ayeke na yâ ti congrégation?

² Laso nga kue acongrégation ti aTémoin ti Jéhovah oko oko kue ayeke na mbeni bibe, wala mbeni bango ndo so amû ndo na yâ ni. Ambeni congrégation ayeke dä so a hinga mingi ti azo ti yâ ni na sarango ye na nzoni bê nga na ndoye. Ambeni ayeke dä so ala yapu mingi na yâ ti kusala ti fango tënë nga na kusala ti ngoi kue. Tongana e oko oko e gi ti maï mbeni nzoni bibe, e yeke sara si congrégation angbâ ti duti beoko nga ti maï na lege ti yingo (1 aCor. 1:10). Me, tongana e yeke na nzoni bibe pëpe, a lingbi ti sara si congrégation ni alango na lege ti yingo, aita ayapu pëpe nga alingbi même ti sara si azo akanga lê na ndo ti ye ti sioni (1 aCor. 5:1; Apoc. 3:15, 16). Bibe wa la congrégation ti mo ayeke na ni? Nyen la mo lingbi ti sara ti maï mbeni nzoni bibe na yâ ti congrégation?

MAÏ NZONI BIBE NA YÂ TI CONGRÉGATION

3, 4. Tongana nyen la e lingbi ti “mû merci na [Jéhovah] na yâ kota bungbi ti azo”?

³ Mbeni zo ti sungo psaume ahe bia atene: “Fade mbi mû merci na [Jéhovah] na yâ kota bungbi ti azo, fade mbi sepela Mo na popo ti azo mingi.” (Ps. 35:18). Zo ti sungo psaume so ayeke sepela Jéhovah na ngoi so lo yeke na popo ti awakua ti Nzapa. Abungbi ti congrégation so a yeke sara ni yenga na yenga, so Mandango Tour ti Ba Ndo ayeke dä, ayeke ambeni nzoni ngoi ti tene e fa na lege ti acommentaire ti e so e yapu nga e yeke na mabe. A yeke nzoni e oko oko kue e hunda tere ti e: ‘Mbi yeke mû acommentaire mingi na bungbi tongana lege ayeke dä? Mbi yeke leke abungbi ni nzoni nga mbi yeke mû anzoni commentaire? Tongana mbi yeke babâ ti sewa, mbi yeke mû maboko na amolenge ti mbi ti leke acommentaire ti ala kozoni nga mbi yeke fa na ala ti kiri tënë na lege ti atënë ti ala wani?’

⁴ David afa so kamba ayeke na popo ti lutingo ngangu nga na hengo bia. Lo tene: “Mbi leke bê ti mbi awe, O Nzapa, mbi leke bê ti mbi awe. Fade mbi sara bia, biani, fade mbi sara bia ti sepela.” (Ps. 57:8). Abia so e yeke he na ngoi ti abungbi ayeke anzoni ngoi ti “sara bia ti sepela” Jéhovah na bê ti e kue. Tongana e hinga ambeni bia nzoni pëpe, ngbanga ti nyen e gi ti manda ni na ngoi ti Vorongo Nzapa na sewa ape? Zia e leke na bê ti e ti ngbâ ti ‘sara bia na Jéhovah na lâ ti fini ti e kue nga ti sara bia ti sepela lo tongana e de na fini.’​—Ps. 104:33.

5, 6. E lingbi ti sara nyen ti duti azo so ayeke yamba agene nga ayeke mû ye mingi na zo? Sarango tongaso ayeke maï nyen na yâ ti congrégation?

⁵ Mbeni lege ti maï bibe ti ndoye na yâ ti congrégation ayeke ti yamba aita ti e na ndo ti e. Na yâ ti ndangba chapitre ti mbeti ti Paul na aHébreu, lo mû nga wango so: “Zia yengo tere ti ala ti aita angbâ ti gue. Ala girisa pëpe tënë ti yambango agene nzoni.” (aHéb. 13:1, 2). Ti mû kobe na asurveillant so ague na ndo nde nde nga na awali ti ala wala aita ti congrégation so ayeke sara kusala ti ngoi kue ayeke mbeni nzoni lege ti yambango agene. Pensé nga na awomua, asewa so gi babâ wala mama ni la ayeke bata amolenge ni nga na ambeni zo so ngoi na ngoi e lingbi ti tisa ala ti te mbeni kobe wala ti bungbi oko na e ti voro Nzapa na sewa.

⁶ Paul amû yanga na Timothée ti wa azo “ti sara ye ti nzoni, ti sara anzoni kusala mingi, ti duti azo so maboko ti ala awoko, ti duti nduru ti kangbi ye na zo, si ala bata tongana mbeni mosoro ndali ti ala wani mbeni nzoni gere teti gigi ti kekereke na mbeni nzoni ndo, tongaso si ala gbu fini so ayeke tâ fini ni biani.” (1 Tim. 6:17-19). Paul ayeke wa lani amba ti lo aChrétien ti gi ti duti na bibe ti mungo ye na zo. Même na angoi so warango nginza ayeke ngangu, e lingbi ti maï bibe ti mungo ye na zo. Mbeni nzoni lege ti sara ni ayeke ti yô wala ti futa lege na ambeni ita so ayeke na bezoin ti mungo maboko ti gue na fango tënë wala na abungbi. Na lege wa aita so awara mara ti mungo maboko tongaso alingbi ti maï nzoni bibe na yâ ti congrégation? Ala yeke sara ni tongana ala kiri singila, peut-être na mungo mbeni ye so alingbi na ngangu ti ala ti kanga na mbage ti dû ti nginza so a mû ti vo na essence so ngere ni ague na li ni. Mbeni lege ti tene e sara si aita ti e abâ so e yeke na bezoin ti ala nga e ye ala mingi ayeke ti mû ngoi mingi ti duti na ala. Tongana e sara aye ti nzoni mingi na “ala so ayeke aita ti e na yâ ti mabe” nga e duti nduru ti mû ngoi ti e nga na aye ti e ti mû maboko na ala, ndoye ti e na mbage ti ala ayeke kono nga e yeke pusu ambeni zo na yâ ti congrégation ti duti na nzoni bibe.​—aGal. 6:10.

7. Na lege wa batango atënë ti secret ayeke mû maboko ti bata nzoni bibe na yâ ti congrégation?

⁷ Bâ nga ambeni ye so ayeke kpengba ndoye so ayeke na popo ti e na amba ti e aChrétien: dutingo nzoni kamarade nga zo so ayeke sigigi na atënë ti secret kirikiri pëpe. (Diko aProverbe 18:24.) Atâ kamarade ayeke bata asecret ti mba. Tongana mbeni ita ti e afa na e atënë ti bê ti lo nga na abibe ti lo na lo hinga biani so e yeke sigigi na tënë ni pëpe, ndoye so ayeke na popo ti e na lo ayeke kiri ti kpengba ahon ti kozo. Zia e duti mbeni kamarade so ayeke bata atënë ti secret nga e mû maboko na congrégation ti duti tongana azo ti sewa so aye tere.​—aProv. 20:19.

YAPU NA FANGO TËNË

8. Wango wa a mû na azo ti Laodicée? Ngbanga ti nyen?

⁸ Na ngoi so Jésus ayeke sara tënë na congrégation ti Laodicée, lo tene: “Mbi hinga aye so mo sara, mbi hinga so mo yeke dê pëpe nga mo yeke wâ pëpe. Mbi ye fade si mo yeke dê wala mo yeke wâ. Tongaso, so mo yeke wâ gi kete nga mo yeke wâ pëpe wala dê pëpe so, mbi yeke dë mo na yanga ti mbi na gigi.” (Apoc. 3:15, 16). Azo ti Laodicée ayapu teti fango tënë pëpe. Peut-être mara ti bibe so asara nga ngangu na ndo ti songo ti ala na amba ti ala. Ni la, na ndoye Jésus awa ala lo tene: “Azo kue so mbi ye ala mingi, mbi suku na ala nga mbi se ala. Tongaso yapu na sarango ye nga changé bê ti mo.”​—Apoc. 3:19.

9. Na lege wa la bango ndo ti e na ndo ti fango tënë ayeke sara ngangu na ndo ti bibe ti congrégation?

⁹ Ti maï nzoni bibe na yâ ti congrégation, a yeke nzoni e yapu na fango tënë. Mbeni ye so a zia congrégation na sese ndali ni ayeke ti gi na yâ ti territoire azo so ayeke tongana angasangbaga nga ti sara si ala kpengba na lege ti yingo. Tongaso, a lingbi e yapu na yâ ti kusala ti sarango adisciple tongana ti Jésus (Mat. 28:19, 20; Luc 4:43). Tongana e yapu na fango tënë, a yeke sara si e duti beoko tongana azo so ayeke “sara kusala maboko na maboko na Nzapa.” (1 aCor. 3:9). Tongana, na fango tënë e bâ amba ti e so ayeke gbu koko ti mabe ti ala nga ala yeke fa so ala bâ aye ti yingo na nene ni, a yeke pusu e ti ye ala nga ti ne ala mingi. Nga, ti sara kua maboko na maboko na fango tënë ayeke sara si e duti beoko na yâ ti congrégation.​—Diko 1 aCorinthien 1:10.

10. Tongana e gi ti maï kode ti fango tënë ti e, a yeke sara nyen na ndo ti azo na yâ ti congrégation?

¹⁰ Ngangu so e yeke sara ti maï kode ti fango tënë ti e ayeke sara nga ye ti nzoni na ndo ti amba ti e. Tongana e bi bê ti e mingi na ndo ti azo so e yeke tingbi na ala na fango tënë, nga e sara ngangu ti ndu bê ti azo so ayeke mä e, e yeke yapu mingi na fango tënë (Mat. 9:36, 37). Tongana e yapu, a yeke pusu azo so ayeke na tere ti e ti yapu. Jésus atokua lani adisciple ti lo use use ti fa tënë ahon ti tene zo oko oko la ague (Luc 10:1). Ye so ayeke mû lege na ala ti kpengba mba nga ti manda ye na tere ti mba. A yeke sara nga si ala yapu na yâ ti fango tënë. A nzere na e pëpe ti sara kusala na awafango tënë ti Royaume so ayapu? So ala yapu so amû ngangu na e nga amû maboko na e ti ngbâ ti fa tënë.​—aRom. 1:12.

KPE TI DIKO TËNË NA GBE TI GO NGA HONDE NDO TI KOTA SIOKPARI PËPE

11. Azo ti Israël amaï mara ti bibe wa na ngoi ti Moïse, na ye so asara nyen na ndo ti ala?

¹¹ Ayenga kete na pekoni so azo ti Israël aga mbeni mara, ala to nda ti dema tere nga ti diko tënë na gbe ti go. Ye so ague na ala ti sara kpengba-li na Jéhovah nga na azo so lo mû ala ti sara tënë na iri ti lo (Ex. 16:1, 2). Na popo ti azo ti Israël so asigigi na Égypte, gi mbeni kete wungo ti ala la awara lege ti bâ Sese ti Zendo. A kanga lege même na Moïse ti si na Sese ti Zendo ndali ti sarango ye ti lo na ngoi so azo ti Israël asara ye na lege ni pëpe (Deut. 32:48-52). Nyen la e lingbi ti sara laso si e tï pëpe na yâ ti sioni bibe?

12. E lingbi ti sara nyen ti kpe ti maï bibe ti dikongo tënë na gbe ti go?

¹² A lingbi e kpe bibe ti dikongo tënë na gbe ti go. Atâa so sarango tere kete nga nengo azo so ayeke na komandema ayeke mû maboko na e, a lingbi e bâ nzoni azo so e yeke sara kamarade na ala. Tongana e soro angia so e yeke sara nzoni pëpe wala e mû ngoi mingi ti duti na amba ti e ti place ti kua wala ti ekole so ayeke bi bê ti ala oko pëpe na ndo ti afango ye ti Jéhovah so ayeke mbilimbili, a yeke ga na e kpale. A yeke nzoni e kpe ti duti mingi na azo so ayeke na sioni bibe nga na ala so ayeke pusu zo ti sara gi ye so bê ti lo aye.​—aProv. 13:20.

13. Aye ti sioni wa ayeke ga na peko ti dikongo tënë na gbe ti go na yâ ti congrégation?

¹³ Dikongo tënë na gbe ti go alingbi ti ga na ambeni ye ti sioni na lege ti yingo. Na tapande, dikongo tënë na gbe ti go alingbi ti buba yâ ti siriri nga na dutingo beoko ti congrégation. Nga, demango tere na tere ti aita ti e aChrétien ayeke mû gi vundu na ala pëpe me alingbi nga ti sara si e tï na yâ ti siokpari ti pango ndo nga na asioni tënë (Lév. 19:16; 1 aCor. 5:11). Ambeni zo ti dikongo tënë na gbe ti go so ayeke lani na yâ ti congrégation na ngoi ti akozo Chrétien ‘abâ ala so akomande na ndo ti ala tongana ambumbuse zo. Ala yeke zonga ala so Nzapa amû gloire na ala.’ (Jude 8, 16). A yeke polele so dikongo tënë na gbe ti go na tere ti azo so ayeke mû li ni na yâ ti congrégation anzere na lê ti Nzapa pëpe.

14, 15. (a) Tongana e kanga lê na ndo ti mbeni kota siokpari, nyen la alingbi ti si na congrégation ni kue? (b) Nyen la a lingbi e sara tongana e hinga so mbeni zo asara kota siokpari na lo honde ni?

¹⁴ Ka tongana e hinga so mbeni zo ayeke sara siokpari na hondengo ni, peut-être nyongo sämba ahon ndo ni, bango porno wala sarango aye ti kirikiri? (aÉph. 5:11, 12). Tongana e kanga lê na ndo ti kota siokpari, a yeke kanga lege na yingo vulu ti Jéhovah ti sara kusala na yâ ti congrégation nga a yeke buba siriri ti yâ ti congrégation ni kue (aGal. 5:19-23). Legeoko tongana ti so a lingbi aChrétien ti Corinthe azi aye ti sioni na popo ti ala, laso nga a lingbi e zi aye kue so alingbi ti sara si congrégation aga sioni tongaso si e bata nzoni bibe so ayeke na yâ ni. Nyen la mo lingbi ti sara ti bata siriri ti congrégation?

¹⁵ Tongana ti so a sara tënë ni fade, a yeke kota ye ti tene e sigigi na atënë kirikiri pëpe, mbilimbili tongana a yeke atënë ti bê wala abibe ti amba ti e so ala fa ni na e. Ti mû tënë ti secret ti mbeni zo ti gue ti tene ni na azo ayeke sioni nga ayeke mû vundu na zo. Me, tongana mbeni zo asara mbeni kota siokpari, a lingbi a sara tënë ni na azo so Bible amû lege na ala ti bâ lege ti tënë ni, so ti tene a-ancien ti congrégation. (Diko Lévitique 5:1.) Ni la, tongana e hinga so mbeni ita atï na yâ ti mara ti kota siokpari tongaso, a yeke nzoni e wa lo ti gue ti bâ a-ancien ti tene ala mû maboko na lo (Jacq. 5:13-15). Me tongana lo sara ni hio pëpe, a lingbi e gue e fa tënë ni na a-ancien.

16. Na lege wa fango na gigi tënë ti mbeni kota siokpari ayeke mû maboko ti bata bibe ti congrégation?

¹⁶ A yeke nzoni azo ti yâ ti congrégation aduti nzoni, nga a lingbi e mû maboko ti bata nzoni duti ni so na lege so tongana mbeni zo asara kota siokpari e yeke sara tënë ni na a-ancien. Tongana a-ancien aga na zo ni ti hinga sioni so lo sara na lo changé bê ti lo nga lo yeda na sengo ndo ni, lo yeke buba pëpe nzoni bibe ti congrégation. Ka tongana zo ni ake ti changé bê ti lo na lo yeda pëpe na wango so na ndoye a-ancien amû na lo? Tongana a bi lo na gigi ti congrégation, a yeke mo bâ mo tene a “lungula,” wala a zi ye ti sioni na popo ti e nga a bata bibe ti congrégation. (Diko 1 aCorinthien 5:5.) Biani, ti bata bibe ti congrégation ahunda ti tene e oko oko kue e sara mbeni ye, e sara kua maboko na maboko na bungbi ti a-ancien nga e bata nzoni duti ti amba ti e aChrétien.

WA AZO TI BATA “BEOKO TI YINGO”

17, 18. Nyen la ayeke mû maboko na e ti “bata beoko ti yingo”?

¹⁷ So akozo disciple ti Jésus ‘amû tere ti ala kue na fango ye ti abazengele’ asara si congrégation aduti beoko (Kus. 2:42). Ala bâ wango ti Mbeti ti Nzapa nga na fango lege so ala wara na mbage ti a-ancien na nene ni. Teti so a-ancien ti laso ayeke sara kusala maboko na maboko na ngbâa be-ta-zo so ayeke sara ye na ndara, ala yeke wa azo kue ti yâ ti congrégation nga ala yeke mû maboko na ala ti ngbâ beoko (1 aCor. 1:10). Tongana e yeda na aye so bungbi ti Jéhovah afa na so aluti na ndo ti Bible nga e mû peko ti fango lege ti a-ancien, e yeke fa biani so e ‘sara ngangu ti bata beoko ti yingo na yâ ti kamba ti siriri so abungbi e oko.’​—aÉph. 4:3.

¹⁸ Tongaso, zia e sara kue ti bata nzoni bibe na yâ ti congrégation. Tongana e sara ni, kite ayeke pëpe so ‘kota nzobe ti Seigneur ti e Jésus Christ ayeke duti na bibe so e yeke na ni so.’​—aPhil. 4:23.

[Foto na lembeti 19]

Mo yeke gi ti maï nzoni bibe na lekengo anzoni commentaire?

[Foto na lembeti 20]

Sara si nzoni bibe amaï na gingo ti hinga abia ti e nzoni