Mä yanga na gbu ngangu tongana Christ

“Ala gbu ngangu! Mbi hon dunia so na ngangu awe.”​—JEAN 16:33.

1. Tongana nyen Jésus amä yanga ti Nzapa na yâ ti aye kue?

JÉSUS CHRIST asara lakue ye so bê ti Nzapa aye. Lo pensé lâ oko pëpe ti ke yanga ti Babâ ti lo ti yayu (Jean 4:34; aHéb. 7:26). Me aye so asi na lo giriri na sese ahunda na lo ti sara ngangu si lo mä yanga. Na tongo nda ti kusala ti Jésus ti fango tënë, awato ti lo, na Satan nga kue, atara ti pusu lo, ti forcé lo wala ti handa lo si lo duti be-ta-zo pëpe (Mat. 4:1-11; Luc 20:20-25). Awato so asara si bê ti Jésus ason mingi, vundu asara lo mingi nga ala sara pasi na lo mingi. Na nda ni, ala wara lege ti fâ lo na ndo ti keke ti pasi (Mat. 26:37, 38; Luc 22:44; Jean 19:1, 17, 18). Na yâ ti aye so kue, na atâa ngangu pasi so lo bâ, Jésus “amä yanga juska na kuâ”.​—Diko aPhilippien 2:8.

2, 3. E lingbi ti manda nyen na ndo ti mango yanga so Jésus amä atâa apasi so lo bâ?

² Dutingo ti Jésus tongana zo na sese nga na aye so asi na lo afa na lo mbeni fini lege ti mango yanga (aHéb. 5:8). Mo lingbi ti bâ so mbeni ye ti tene Jésus amanda ahon sarango kusala ti Jéhovah ayeke dä pëpe. Kozoni kue, lo na Jéhovah aduti teti angu mingi mingi na lo yeke ândö “wakode” ti Nzapa na ngoi ti création (aProv. 8:30). Ye oko, so lo gbu mabe ti lo ngangu tongana zo atâa pasi kue so lo bâ afa na gigi so lo yeke be-ta-zo. Songo so ayeke na popo ti Jésus na Babâ ti lo akpengba mingi. E lingbi ti manda nyen na ndo ti aye so asi na lo so?

³ Atâa so giriri lo yeke mbeni zo so alingbi kue, Jésus agi ti mä yanga na lege ti ngangu ti lo wani pëpe. Lo sambela Nzapa ti mû na lo maboko ti ngbâ ti mä yanga. (Diko aHébreu 5:7.) Ti tene e nga e ngbâ ti mä yanga, a lingbi e duti na tâ be-ti-molenge na e sambela Nzapa lakue ti mû maboko na e. Ndani la bazengele Paul awa aChrétien, lo tene: “Ala bata na li ti ala bango ndo so, so lani Christ Jésus nga ayeke na ni,” so “lo sara tere ti lo kete na lo ga zo so amä yanga juska na kuâ”. (aPhil. 2:5-8). Fini ti Jésus afa so azo kue alingbi ti mä yanga même na popo ti azo ti sioni. Tâ tënë, Jésus ayeke ti lo wasiokpari pëpe; ka ti e so e yeke awasiokpari, a yeke tongana nyen?

E lingbi ti mä yanga atâa so e yeke awasiokpari

4. So a sara e na ngangu ti soro ti sara ye so bê ti e aye, a ye ti tene nyen?

⁴ Nzapa asara Adam na Ève, na lo mû na ala hingango ndo nga na ngangu ti soro ti sara ye so bê ti ala aye. E so e yeke ahale ti ala, e nga e yeke na ngangu so. Tënë so aye ti tene nyen? A ye ti tene so e lingbi ti soro ti sara ye ti nzoni wala ye ti sioni. A ye ti tene nga so, Nzapa amû na e liberté ti soro ti mä yanga ti lo wala ti ke yanga ti lo. Na ndo ti kota liberté so e yeke na tënë ti kiri na ni. Biani, adesizion ti e alingbi ti ga na e fini wala kuâ. A lingbi nga ti ndu azo so angoro e.

5. Kpale wa e kue e yeke na ni? E lingbi ti hon ndo ni tongana nyen?

⁵ Ndali ti siokpari so a dü e na ni, mango yanga ayeke kete ye pëpe. A yeke si ka so ayeke ngangu na e ti sara ye alingbi na andia ti Nzapa. Paul awara mara ti kpale so. Lo sû na mbeti lo tene: “Mbi bâ na yâ ti amembre ti tere ti mbi mbeni ndia so ayeke sara bira na ndia ti bibe ti mbi na so ayeke gue na mbi tongana ngbâa na mbage ti ndia ti siokpari so ayeke na yâ ti amembre ti tere ti mbi.” (aRom. 7:23). Ti tâ tënë ni, tongana a hunda na zo ti zia mbeni ye ti lo pëpe, wala ti bâ pasi pëpe wala lo bâ so kpale ayeke dä pëpe, mango yanga ayeke ngangu na lo pëpe. Me e yeke sara ye tongana nyen na ngoi so bê ti e aye ti tene e mä yanga me na mbeni mbage “nzara ti mitele, [na] nzara ti lê” asara e? Asioni nzara so alondo ndali ti so e yeke awasiokpari nga alondo na “yingo ti dunia so” angoro e, na anzara so ayeke ngangu mingi (1 Jean 2:16; 1 aCor. 2:12). Ti luti ngangu na gbele ni, a lingbi e ‘leke bê ti e’ kozoni si e tingbi na akpale wala atara na ti ngbâ ti mä gi yanga ti Jéhovah, atâa ye wa asi (Ps. 78:8). Na yâ ti Bible, e yeke na tapande ti azo mingi so asara tongaso ndali ti so ala leke bê ti ala.​—Esdras 7:10; Dan. 1:8.

6, 7. Fa na lege ti mbeni tapande tongana nyen mandango ye e mveni alingbi ti mû maboko na e ti sara ye na ndara.

⁶ Mbeni lege ti leke bê ti e ayeke ti manda Bible na ambeti ti bungbi nzoni. Zia e mû mbeni tapande, tara ti bâ so ayeke mo la ye so asi na mo. Peut-être a yeke lakui ti mandango ye ti mo mveni. Mo londo ti sambela Jéhovah ti mû maboko na mo na lege ti yingo ti lo ti sara ye alingbi na tënë so mo manda na yâ ti Mbeti ti lo. Mo leke ti bâ mbeni limon na ndade ni na lakui. Mo mä so ambeni zo asara nzoni tënë ti limon ni; me mo hinga nga so na yâ ti limon ni lango-sioni na sarango ye ti ngangu na zo ayeke dä.

⁷ Wango ti Paul na aÉphésien 5:3 aga na li ti mo: “Tongana ti so a lingbi na azo so ayeke nzoni-kue, zia a sara même tënë ti lango-sioni, tënë ti sioni ye nde nde kue wala ti bê ti warango ye na popo ti ala pëpe.” Bê ti mo atï nga na ndo ti wango ti Paul so ayeke na aPhilippien 4:8. (Diko ni.) Tongana mo gbu li na ndo ti wango ti Nzapa so, hunda tere ti mo: ‘Tongana mbi kanga lê ti mbi na ndo ni si mbi bâ mara ti alimon tongaso, mbi yeke mû peko ti tapande ti tâ mango yanga ti Jésus la?’ Fade mo yeke sara nyen? Mo yeke zia gi na li ti mo ti bâ gi limon ni?

8. Ngbanga ti nyen a lingbi e ke lâ oko pëpe ti mû peko ti akpengba-ndia ti Jéhovah so andu nzoni sarango ye?

⁸ E yeke handa tere ti e ti ke ti mû peko ti akpengba-ndia ti Jéhovah so andu nzoni sarango ye, peut-être na tenengo so asioni kamarade alingbi ti sara sioni na ndo ti e pëpe, même tongana asioni kamarade so andu nga angia ti ngangu na angia so tënë ti lango-sioni ayeke dä. Ahon ti wara amara ti bibe tongaso, a lingbi e bata tere ti e wani na amolenge ti e yamba na bibe ti Satan. Zo ti fango yaka ayeke sara kua ngangu ti bata yaka ti lo si wâ atï dä pëpe, teti so tongana wâ atï na yaka ni alingbi ti gbi ni même ti gbi ambeni yaka so angoro ni. Legeoko nga, a lingbi lê ti e azi ngangu na ndo ti tënë ti batango tere ti e na gbele “amayele” ti Satan.​—aÉph. 6:11.

9. Ngbanga ti nyen a lingbi e leke na bê ti e ti mä yanga ti Jéhovah lâ oko oko?

⁹ Lâ oko oko, e ye wala e ye pëpe, a lingbi e soro ti sara ye so Jéhovah aye wala pëpe. Ti wara salut, a lingbi e mä yanga ti Nzapa na e bata akpengba-ndia ti lo. Na sarango tongana Christ so amä yanga ti Nzapa “juska na kuâ,” e fa na gigi so e yeke na tâ mabe. Fade Jéhovah afuta dutingo be-ta-zo ti e. Jésus amû zendo so: “Zo so agbu ngangu juska na nda ni, lo si a yeke sö lo ande.” (Mat. 24:13). A sigigi polele so a hunda na zo ti gi ti duti na tâ gbungo ngangu, tongana ti Jésus.​—Ps. 31:25.

Jésus: kota tapande ti sarango ye na mbeto pëpe

10. Atënë wa alingbi ti sara ngangu na ndo ti e? A lingbi e sara ye tongana nyen?

¹⁰ Teti so e yeke na popo ti azo ti dunia so, a lingbi e sara ye na mbeto pëpe si abibe na asarango ye ti ala asara sioni na ndo ti e pëpe. A-Chrétien ayeke na gbele ti atënë tongana tënë ti tambela ti zo, ti dutingo ti zo na popo ti amba ti lo, ti nginza na ti bungbi ti vorongo Nzapa so alingbi ti sara ngangu na ndo ti ala si ala gue nde na nzoni lege ti Jéhovah. Sewa ti ambeni mingi akanga lege na ala. Na yâ ti ambeni kodoro, akota da-mbeti ayeke fa fadeso mingi so zo abâ gigi na lege ti nyama, nga tënë so atene Nzapa ayeke dä pëpe agbu bê ti azo mingi. Na gbele aye ti ngangu tongaso, e lingbi ti kanga maboko ti e na e duti pëpe. A lingbi e sara mbeni ye ti luti ngangu si e bata tere ti e. Tapande ti Jésus afa tongana nyen e nga e lingbi ti hon ndo ti aye so.

11. Na lege wa gbungo li na ndo ti tapande ti Jésus ayeke mû na e ngangu mingi?

¹¹ Jésus atene na adisciple ti lo: “Na yâ ti dunia so, aye ti vundu ayeke si na ala, me ala gbu ngangu! Mbi hon dunia so na ngangu awe.” (Jean 16:33). Lo zia lege lâ oko pëpe na dunia so ti sara ngangu na ndo ti lo. Lo zia nga lâ oko pëpe si dunia so akanga lege na lo ti sara kusala ti lo ti fango tënë wala apusu lo ti doro andia ti vorongo tâ Nzapa na ti zia nzoni tambela ti lo; e nga a lingbi e sara tongaso. Jésus atene tënë ti adisciple ti lo na yâ ti sambela, lo tene: “Ala yeke ti dunia so pëpe legeoko tongana ti so mbi yeke ti dunia so pëpe.” (Jean 17:16). Tongana e manda ye na ndo ti tapande ti Christ so asara ye na mbeto pëpe na e gbu li na ndo ni ayeke mû na e ngangu ti duti lakue yamba na dunia so.

Manda ti sara ye na mbeto pëpe tongana ti Jésus

12-14. Tapande wa afa so Jésus asara ye na mbeto pëpe?

¹² Jésus asara ye na mbeto pëpe na yâ ti kusala ti lo kue. Na lege ti ngangu so Babâ ti lo amû na lo, na mbeto pëpe, Jésus “alï na yâ ti temple na lo tomba azo so ayeke kä ye nga na azo kue so ayeke vo ye na yâ ni. Nga, lo kinda atable ti azo so ayeke changé nginza na aye ti duti ti azo so ayeke kä akolokoto.” (Mat. 21:12). Tongana aturugu aga ti gbu lo na ndangba bï ti lo na sese, sân mbeto lo mû devant ti bata adisciple ti lo, lo tene: “Tongana mbi la si ala yeke gi mbi, ala zia ala so ague ti ala.” (Jean 18:8). Kete na pekoni, lo tene na Pierre ti zia yamba épée ti lo, na tongaso lo fa na gigi so lo zia bê ti lo gi na Jéhovah, me na aye ti bira ti sese so pëpe.​—Jean 18:11.

¹³ Na mbeto pëpe, Jésus asigigi na nda ti awafango ye ti wataka so ayeke na ndoye pëpe na ngoi ti lo nga lo fa na gigi asioni fango ye ti ala. Lo tene: “Mawa na ala, ascribe na aFarizien, ala awahandango lê ti zo! ala kanga lege ti royaume ti yayu na azo. . . . Ala bâ na nene ni pëpe aye so ayeke kota ahon ni na so Ndia ahunda: So ti tene mbilimbili, sarango nzoni bê na zo nga dutingo be-ta-zo. . . . Ala yeke sukula tere ti kopo na ti sembe si avuru, me yâ ni asi singo na aye so a gbu na ngangu nga na sarango ye ahon ndo ni.” (Mat. 23:13, 23, 25). A lingbi adisciple ti Jésus aduti na mara ti ngangu tongaso ngbanga ti so amokonzi-nzapa ayeke sara ande nga ngangu na ala na amokonzi-nzapa ni ayeke fâ ande ambeni na popo ti ala.​—Mat. 23:34; 24:9.

¹⁴ Jésus aluti nga na asioni yingo. Mbeni lâ, lo tingbi na mbeni ngangu koli so sioni yingo ayeke na yâ ti lo na so zo oko alingbi pëpe ti kanga lo na zingiri. Na mbeto pëpe, Jésus atomba gbâ ti asioni yingo so akomande koli so (Marc 5:1-13). Na ngoi ti e, Nzapa amû na aChrétien ngangu ti sara amiracle tongaso pëpe. Ye oko, na yâ ti kusala ti e ti fango tënë na ti fango ye na azo, e nga e yeke tiri bira ti yingo na Satan, lo so “asara si bibe ti azo so amä na bê pëpe avuko”. (2 aCor. 4:4). Tongana ti Jésus, aye ti bira ti e “ayeke ti mitele pëpe, me Nzapa asara si aye ti bira so akpengba ti kinda na aye so gere ni aluti ngangu”: asioni fango ye ti abungbi ti vorongo Nzapa (2 aCor. 10:4). Na sarango kusala nzoni na aye ti bira ti Nzapa so, e yeke manda ye mingi na ndo ti tapande ti Jésus.

15. Sarango ye ti Christ na mbeto pëpe aluti na ndo ti nyen?

¹⁵ Sarango ye ti Jésus na mbeto pëpe aluti pëpe na ndo ti senge ngangu so zo asara ti pika lê ti azo, me a luti na ndo ti mabe. A lingbi ti e nga a duti tongaso (Marc 4:40). E yeke wara tâ mabe tongana nyen? Tapande ti Jésus amû maboko na e. Lo fa na gigi so lo hinga Mbeti ti Nzapa nzoni na lo zia bê ti lo kue na ni. Ye ti bira ti Jésus ayeke pëpe tâ épée so lê abâ, me a yeke épée ti yingo, so ti tene Mbeti ti Nzapa. Lege mingi lo fa so tënë so lo yeke tene alondo na yâ ti Mbeti ti Nzapa. Mingi ni lo zia na tongo nda ti tënë ti lo atënë so: “A sû na Mbeti ti Nzapa a tene”, so ti tene Bible.a

16. Tongana nyen e lingbi ti wara mabe so ayeke kota?

¹⁶ Ti kpengba mabe ti e si amû lege na e ti luti ngangu na gbele atara so ayeke si lakue ndali ti so e yeke adisciple ti Jésus, a yeke ngbanga ti e ti diko na ti manda Bible lâ na lâ na ti gue na abungbi, ti yôro na li ti e atâ tënë so ayeke gunda ti mabe (aRom. 10:17). A lingbi e nga e gbu li nzoni na ndo ti ye so e manda na ti zia ni si alinda na bê ti e. Gi mabe so ayeke na fini si alingbi ti pusu e ti sara ye na mbeto pëpe (Jacq. 2:17). Na a lingbi e sambela ti wara yingo vulu teti so mabe ayeke mbage ti lengo ti yingo.​—aGal. 5:22.

17, 18. Tongana nyen mbeni ita-wali asara ye na mbeto pëpe na ekole?

¹⁷ Mbeni ita-wali so ade maseka so iri ti lo ayeke Kitty ahinga tongana nyen tâ mabe alingbi ti sara si e duti na mbeto pëpe. Na kete ti lo, lo hinga so a lingbi lo sara “kamene ti nzoni tënë pëpe” na ekole, na lo ye mingi ti fa nzoni tënë na amba ti lo élève (aRom. 1:16). Ngu oko oko, lo gi lege ti fa nzoni tënë na amba ti lo, me mbeto asara lo mingi. Ngu mingi na pekoni, lo changé ekole ni. Lo tene: “Ti so ni so, mbi yeke zia ahon pëpe, mbi yeke sara mbeni ye ti kanga lê ti angoi so mbi zia ahon so.” Kitty asambela ti sara ye na mbeto pëpe, ti wara ndara na ti wara nzoni ngoi ti sara ni tongana ti Christ.

¹⁸ Na kozo lango ti mandango mbeti, a hunda na a-élève ni oko na oko ti fa tere ti ala. Mingi ti ala afa nzapa so ala sara, na ala tene so ala yeke gue lakue lakue na abungbi ni pëpe. Kitty abâ so ngoi so lo sambela Nzapa ndali ni asi awe. Tongana a si na tour ti lo fadeso, na mbeto pëpe lo tene: “Mbi yeke Témoin ti Jéhovah, na ye so afa na mbi lege ti voro Nzapa na ti sara ye nzoni ayeke Bible.” Na ngoi so lo ngbâ ti sara tënë, amba ti lo akomanse ti zere lo. Me ambeni na popo ni amä lo nzoni na ala hunda atënë na lo na pekoni. Wafango mbeti ni afa même Kitty na amba ti lo tongana nzoni tapande ti zo so abata tënë ti Nzapa ti lo. Kitty ayeke na ngia ti manda ye na lege ti tapande ti Jésus so asara ye na mbeto pëpe.

Duti na mabe na sara ye na mbeto pëpe tongana Christ

19. (a) Tâ mabe andu nyen? (b) Tongana nyen e lingbi ti mû ngia na Jéhovah?

¹⁹ Abazengele ti Jésus ahinga nga so a lingbi sarango ye ti ala na mbeto pëpe aluti na ndo ti mabe. Ala hunda mingi na Jésus ti “sara si mabe ti [ala] akiri akono.” (Diko Luc 17:5, 6.) Tâ mabe ayeke gi pëpe senge mango na bê so Nzapa ayeke dä. A ndu nga maïngo mbeni kpengba songo na Jéhovah, tongana songo so ayeke na popo ti mbeni kete molenge na babâ ti lo so andoye lo. Na gbe ti yingo ti Nzapa, Salomon asû tënë so na mbeti: “Molenge ti mbi, tongana bê ti mo ayeke na ndara, fade bê ti mbi awara ngia, même tâ bê ti mbi mveni. Biani, fade bê ti mbi aduti na ngia, tongana yanga ti mo asara tënë na lege ni.” (aProv. 23:15, 16). Legeoko nga, tongana e gbu akpengba-ndia ti Jéhovah na mbeto pëpe, e yeke mû ngia na lo, teti e hinga so sarango tongaso ayeke zi mbeto na yâ ti e. Ni la, zia e sara lakue tongana ti so Jésus asara, na e gbu tënë ti ye so ayeke mbilimbili na mbeto pëpe!

[Kete tënë na gbe ni]

Mo lingbi ti fa nda ni?

• Ye wa alingbi ande ti mû maboko na e ti ngbâ ti mä yanga atâa e yeke awasiokpari?

• Tâ mabe aluti na ndo ti nyen? Tongana nyen a lingbi ti mû maboko na e ti sara ye na mbeto pëpe?

• Mango yanga na sarango ye na mbeto pëpe tongana Christ ayeke ga na e nyen?

[Foto na lembeti 16]

Mo ‘leke bê ti mo’ ti luti na gbele atara?

[Foto na lembeti 18]

Tongana Jésus, a lingbi sarango ye ti e na mbeto pëpe aluti na ndo ti mabe