Mo bâ na nene ni ye so Jéhovah asara ti zi mo?

“Zia a gonda Jéhovah Nzapa ti Israël ngbanga ti so lo bi lê ti lo na mbage ti azo ti lo na lo zi ala.”​—LUC 1:68.

1, 2. Tongana nyen a lingbi ti haka sioni dutingo so e yeke na yâ ni? Ahundango ndo wa e yeke sara tënë na ndo ni?

TARA ti bâ so mo yeke na ndo ti gbogbo ti kobela na da-nganga. Mo yeke place oko na ambeni zo so ayeke na mara kobela ti mo, mbeni kobela ti fango zo so ade a wara yorö ni pëpe. Tongana mo mä so mbeni wanganga ayeke sara ngangu ti gi yorö ni, ye so amû na mo beku. Tere ti mo ayeke dö dongo ti hinga aye kue na ndo ti gingo yorö so. Mbeni lâ, mo mä so a wara yorö ni awe! Wanganga ni azia ambeni ye ti lo mingi ti gi ti wara yorö so. Mo yeke sara ye tongana nyen? Kite ayeke pëpe so bê ti mo ayeke pusu mo ti ne na ti kiri singila na koli so asara ngangu ti zi mo na amba ti mo mingi na yâ ti kuâ so.

² Ye so e londo ti sara tënë ni akpa konongo yâ ti tënë, me alingbi biani na dutingo so e kue e yeke na yâ ni. E oko oko kue e yeke na yâ ti mbeni dutingo so ayeke ngangu mingi ahon ti so e sara tënë ni. E yeke tâ na bezoin ti mbeni zo ti sö e. (Diko aRomain 7:24.) Ti zi e, Jéhovah asara kota sacrifice. Molenge ti lo asara nga tongaso. Zia e bâ akota hundango tënë osio: Ngbanga ti nyen a lingbi a zi e? A lingbi Jésus asara nyen ti zi e? A lingbi Jéhovah asara nyen ti zi e? Na tongana nyen e lingbi ti fa so e bâ na nene ni ye so Nzapa asara ti zi e?

A lingbi a zi e ngbanga ti nyen?

3. Na lege wa siokpari ayeke tongana mbeni kobela so amû ndo kue?

³ Mbeni gingo nda ti ye so a sara a ninga pëpe afa so, mbeni oko ti asioni kobela so amû ndo kue na yâ ti mbaï ti azo ayeke Grippe Espagnole ti ngu 1918, so afâ azo kutu na kutu. Ambeni kobela ayeke fâ azo mingi nga tongaso. A lingbi ti gbu mbeni kete wungo ti azo, me mingi ti azo ni akobela ni afâ ala.a Ye oko, tongana a haka siokpari na mara ti kobela so a yeke duti tongana nyen? Dabe ti mo na tënë ti aRomain 5:12 “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” Siokpari agbu azo kue, teti azo kue asara siokpari. (Diko aRomain 3:23.) Azo oke la akui na siokpari? Paul asû na mbeti so siokpari aga na kuâ na “azo kue”.

4. Bango ndo ti Jéhovah na ndo ti yongo ti fini ti e ayeke so wa? Tongana nyen bango ndo ti lo ayeke nde na ti azo mingi laso?

⁴ Azo mingi laso abâ siokpari na kuâ tongana ye so ayeke na lege ni. Ala gi bê ti ala na ndo ti kuâ so amû zo hio, me ala ke ti yeda na kuâ so aga yeke yeke na lege ti gango mbakoro. A yeke ngangu pëpe na azo ti girisa bango ndo ti Wasarango ala. Fini ti e ayeke nduru mingi na a yeke ye so lo ye la pëpe. Ti tâ tënë ni, zo oko ade ti sara “lango oko” na lê ti Jéhovah pëpe (2 Pi. 3:8). Bible atene so fini ti e aninga pëpe tongana pere so asigigi wala tongana wungo pupu (Ps. 39:6; 1 Pi. 1:24). A lingbi e bata ye so na li ti e. Ngbanga ti nyen? Tongana e hinga so “kobela” so, wala siokpari so e yeke na yâ ni ayeke ngangu, fade e bâ na nene ni “yorö” ni so ayeke zingo e.

5. Ye wa siokpari akanga lege na e ti wara?

⁵ Ti hinga ngangu ti siokpari na aye so lo ga na ni, a lingbi e gi ti bâ ye so siokpari asara na ndo ti e. A lingbi ti duti ngangu na e kete ti gbu nda ni ngbanga ti so siokpari akanga lege na e ti wara mbeni ye so kozo babâ na mama ti e ayeke na ni. Na tongo nda ni Adam na Ève ayeke na fini so alingbi kue. Na lege so, ala yeke na ngangu ti komande bibe ti ala, atënë ti bê ti ala na asarango ye ti ala. Ye oko akanga lege na ala pëpe ti maï tongana awakua ti Jéhovah Nzapa, ti maï anzoni sarango ye so ala yeke na ni. Ye oko, ala bi pendere matabisi so na ngonda. Na sorongo ti sara siokpari na tere ti Nzapa, ala girisa teti ala wani nga teti ahale ti ala mara ti fini so Jéhovah aye fade ti tene ala duti na ni (Gen. 3:16-19). Na oko ngoi ni, ala bi na tere ti ala nga na tere ti e sioni “kobela” so e sara tënë ni. Na lê ni lê ni, Jéhovah adë ngbanga na ndo ti ala. Me ti e, lo mû na e beku so fade a zi e mbeni lâ.​—Ps. 103:10.

A lingbi Jésus asara nyen ti zi e?

6, 7. (a) Tongana nyen Jéhovah afa so ti sö azo ayeke hunda ande ti mû kota sandaga? (b) Asandaga so Abel na ababâ ti sewa so aduti lani na fini kozo na Ndia amû afa na e nyen?

⁶ Jéhovah ahinga so ti zi ahale ti Adam na Ève a hunda ti sara kota sacrifice. Na yâ ti prophétie so e wara na Genèse 3:15, a fa na e mbeni ye so a hunda ti sara ti zi azo. Fade Jéhovah amû mbeni “hale”, zo ti songo azo, so mbeni lâ lo yeke futi Satan. Ye oko, zo ti songo azo so ayeke bâ ande pasi na mbeni ngoi, lo yeke wara mbeni kä na lege ti fä na ndagere ti lo. A kpa ye so ason na alingbi ti woko lo na yâ ti kusala ti lo, me ye so aye ti tene nyen? Nyen la mbilimbili a lingbi asi na lo so Jéhovah asoro lo?

⁷ Ti sö azo na yâ ti siokpari, a lingbi zo ti songo azo amû mbeni ye ti kanga na ndo ti siokpari so, mbeni ye so alingbi ti sara songo na popo ti azo na Nzapa na zingo aye so siokpari aga na ni. Ye so ahunda nyen? Ambeni ye so asi kozo afa so a lingbi a mû mbeni sandaga. Na ngoi so Abel, kozo zo so ayeke be-ta-zo amû sandaga ti anyama na Jéhovah, Nzapa abâ lo na nzoni lê. Na pekoni, ambeni babâ ti sewa so akpe mbeto ti Nzapa tongana na Noé, Abraham, Jacob na Job amû mara ti sandaga tongaso, na a nzere na Nzapa (Gen. 4:4; 8:20, 21; 22:13; 31:54; Job 1:5). Angu mingi mingi na pekoni, Ndia ti Moïse asara si azo akiri ahinga tënë ti mungo sandaga nzoni mingi.

8. Ye wa kota prêtre ayeke sara ngu oko oko na Lango ti Kangango ndo ti Siokpari?

⁸ Na popo ti akota sandaga so ahon atanga ni kue so Ndia ahunda, e yeke na asandaga so a yeke sara ngu oko oko na Lango ti Kangango ndo ti Siokpari. Na lango ni so, kota prêtre ayeke sara ambeni kusala so ayeke fä ti ambeni ye. Lo mû sandaga na Jéhovah ti kanga ndo ti asiokpari: kozoni ndali ti bungbi ti aprêtre, na pekoni ndali ti amara so ayeke aprêtre pëpe. Kota prêtre alï na Ndo so ayeke nzoni-kue ahon atanga ni ti tabernacle wala temple, na ndo so kâ gi lo si lo lingbi ti gue na gi na oko lango ni so na yâ ti ngu oko. Kâ lo fi mênë ti sandaga ni na gbele ti arche ti mbele. Na ndo ti arche so, mbeni lumière, mbeni mbinda ti wâ so ngoi na ngoi aza, a fa so Jéhovah Nzapa ayeke na ndo so.​—Ex. 25:22; Lév. 16:1-30.

9. (a) Na Lango ti Kangango ndo ti Siokpari, kota prêtre ayeke fä ti zo wa? Asandaga so lo mû aduti fä ti nyen? (b) Lingo ti kota prêtre na Ndo so ayeke nzoni-kue ahon atanga ni aduti fä ti nyen?

⁹ Yingo vulu apusu bazengele Paul ti fa nda ti akusala so. Lo fa so kota prêtre ni ayeke Messie, Jésus Christ, na anyama so a mû na sandaga ayeke fini ti Christ so lo mû na sandaga (aHéb. 9:11-14). Sandaga so alingbi kue so akanga biani ndo ti siokpari ti bungbi ti azo use: bungbi ti aprêtre 144 000 so ayeke aita ti Christ so a soro ala na lege ti yingo nga na “ambeni ngasangbaga”. ( Jean 10:16). Tongana kota prêtre alï na Ndo so ayeke nzoni-kue ahon atanga ni, lo duti fä ti lingo ti Jésus na yayu ti fa na gbele Jéhovah Nzapa ngere ti fini ti lo so a futa ti zi azo.​—aHéb. 9:24, 25.

10. Prophétie ti Bible afa ye wa so ayeke si na Messie?

¹⁰ A yeke polele so, ti zi ahale ti Adam na Ève a hunda ti mû kota sandaga. A lingbi Messie amû fini ti lo tongana sandaga! Na yâ ti mbage ti Mbeti ti Nzapa so a sû ândö na Hébreu, aprophète afa anzene nzene tënë mingi na ndo ni. Na tapande, prophète Daniel atene so “Gbia ni, Lo so A sa mafuta na li ti Lo” fade “a lungula” lo, wala a fâ lo, “ti sara songo teti sioye”. (Dan. 9:24-26). Ésaïe afa kozoni awe so fade a ke Messie, a sara ngangu na lo na a fâ lo, wala a kpo lo, teti siokpari ti azo.​—És. 53:4, 5, 7.

11. Na alege wa Molenge ti Jéhovah afa so lo yeke nduru ti mû fini ti lo ti zi e?

¹¹ Kozo ti ga na ndo ti sese, oko Molenge ti Nzapa ahinga so ti zi azo ayeke hunda ye mingi na mbage ti lo ti sara. A lingbi lo wu pono, na pekoni a fâ lo. Tongana Babâ ti lo afa na lo aye so ayeke si na lo, lo kpe wala lo sara ngangu-li? Oko pëpe, me lo woko tere ti lo na gbe ti yanga so Babâ ti lo amû (És. 50:4-6). Legeoko nga, na ngoi so lo yeke na sese, Jésus asara ye so Babâ ti lo aye. Ngbanga ti nyen? Lo kiri tënë lo tene: “Mbi ndoye Babâ.” Lo kiri lo tene: “Tongana mbeni zo akä âme ti lo na kuâ ndali ti akamarade ti lo, mbeni ndoye ti hon so ayeke dä pëpe.” (Jean 14:31; 15:13). Ti bâ ni nzoni, zingo e alondo mingi ni na lege ti ndoye ti Molenge ti Jéhovah. Atâa so a hunda na lo ti mû fini ti lo so alingbi kue, lo yeke na ngia ti sara ni ti zi e.

A lingbi Jéhovah asara nyen ti zi e?

12. Tënë ti ngere so a futa ti zi azo alondo na zo wa? Lo sara ni ngbanga ti nyen?

¹² A yeke pëpe Jésus la ayeke na gunda ti sandaga ti ngere so a futa ti zi na azo wala a yeke pëpe lo la lo leke ti tene a sara ni. Me, sandaga ti ngere so ayeke mbeni kpengba ye na yâ ti ye so bê ti Jéhovah aye. Bazengele Paul atene so gbalaka so ayeke na yâ ti temple, so a mû asandaga na ndo ni, ayeke fä ti ye so bê ti Jéhovah aye (aHéb. 10:10). Ni la, zingo e so a zi e na lege ti sandaga ti Christ alondo kozoni kue na Jéhovah (Luc 1:68). A yeke fä ti ye so bê ti Jéhovah aye so alingbi kue nga fä ti kota ndoye ti lo na mbage ti azo.​—Diko Jean 3:16.

13, 14. Tongana nyen tapande ti Abraham amû maboko na e ti bâ na nene ni ye so Jéhovah asara na mbage ti e?

¹³ A lingbi Jéhovah asara nyen ti fa ndoye ti lo na mbage ti e na lege so? A yeke ngangu na e ti gbu nda ni. Ye oko, mbeni tënë ayeke na yâ ti Bible so alingbi ti mû maboko na e ti gbu nda ti tënë ni nzoni. Jéhovah ahunda na Abraham so ayeke be-ta-zo ti sara mbeni ye so ahon ngangu ti zo: ti mû molenge ti lo Isaac na sandaga. Abraham ayeke babâ ti ndoye. Jéhovah asara tënë ti Isaac na lo tongana “molenge ti mo ngengele oko, lo so mo ndoye lo”. (Gen. 22:2). Abraham abâ sarango ye so bê ti Jéhovah aye tongana ye so ayeke kota mingi na lê ti lo ahon ndoye ti lo na mbage ti Isaac. Abraham ague na lo sara ye so Jéhovah ahunda na lo. Me, Jéhovah akanga lege na Abraham ti sara ye so lo mveni lo yeke sara mbeni lâ. Nzapa atokua mbeni ange ti lo ti kanga lege na Abraham tâ gi na ngoi so lo ye ti mû Isaac na sandaga. Abraham ayeke nduru ti mä yanga ti Nzapa ti lo na yâ ti ngangu tara so. Lo hinga na bê ti lo kue so oko beku ti bango molenge ti lo ayeke na lege ti zingongo ti akuâ. Me lo yeke na mabe so fade Nzapa ayeke zingo akuâ. Paul atene so Abraham akiri awara Isaac tongana mbeni zo so azingo na kuâ, “na ye so aduti tongana mbeni tapande ti ye.”​—aHéb. 11:19.

¹⁴ Mo gbu li ti mo na ndo ti vundu ti Abraham na ngoi so lo leke ti mû molenge ti lo na sandaga? Na mbeni lege, ye so asi na Abraham amû maboko na e ti hinga vundu ti Jéhovah na mungo na sandaga lo so lo iri lo “Molenge ti mbi so mbi ndoye lo mingi”. (Mat. 3:17). Dabe ti mo so vundu ti Jéhovah ayeke mingi. Lo na Molenge ti lo ayeke na kpengba songo teti angu kutu mingi, na peut-être même angu ngbundangbu mingi. Molenge ni asara kua na tere ti Babâ ni tongana “wakode” so lo ndoye lo mingi nga tongana Wayanga ti lo, “Tënë ni”. (aProv. 8:22, 30, 31; Jean 1:1). Dutingo ti Jéhovah na ngoi so a sara sana na Molenge ti lo, a he lo, na a fâ lo tongana zo ti kengo ndia ayeke mbeni ye so ahon gbungo li ti e. Zingo e ahunda na Jéhovah ti sara kota sacrifice! Fadeso, tongana nyen e yeke fa so e bâ zingo e so na nene ni?

Tongana nyen mo yeke fa so mo bâ zingo mo so na nene ni?

15. Tongana nyen Jésus ahunzi kota kusala ti kangango ndo ti siokpari? Ye so azi lege na nyen?

¹⁵ Jésus ahunzi kota kusala ti kangango ndo ti siokpari na peko ti so a zingo lo na kuâ na lo kiri na yayu. Tongana lo kiri na mbage ti Babâ ti lo so lo ndoye lo mingi, lo fa na lo ngere ti sandaga ti lo. Aye ti nzoni mingi aga na pekoni. Pardon kue teti asiokpari ayeke fadeso dä, kozoni ndali ti asiokpari ti aita ti Christ so a soro ala ti gue na yayu, na pekoni ndali ti “azo ti dunia kue.” Ndali ti sandaga so, azo kue so laso agbian bê ti ala na peko ti siokpari ti ala na aga atâ disciple ti Christ alingbi ti duti na nzoni songo na Jéhovah Nzapa (1 Jean 2:2). Ye so abâ mo tongana nyen?

16. Tapande wa e lingbi ti mû ti fa ngbanga ti nyen a lingbi e bâ na nene ni zingo e so Jéhovah azi e?

¹⁶ Zia e kiri na ndo ti tapande so e mû na tongo nda ni. Tongana wanganga so awara yorö ni aga na tere ti azo ti kobela ni na lo tene: zo kue so amû yorö ni na lo sara ye so a fa ndali ti mungo yorö ni fade lo wara sava. Ka tongana mingi ti amba ti mo ake ti mä wango ti wanganga ni na ala tene so a yeke ngangu mingi na ala ti sara ye so lo hunda? Fade mo sara ye tongana ala atâa so mo hinga so yorö ni ayeke kaï kobela ni? Oko pëpe! Kite ayeke pëpe so mo yeke kiri singila ndali ti yorö so na mo yeke sara ye so wanganga ni ahunda, peut-être même mo yeke fa na amba ti mo ye so mo sara. Na mbeni lege so ayeke kota, e kue e lingbi ti fa na Jéhovah so e bâ na nene ni zingo e so lo zi e na lege ti sandaga ti Molenge ti lo.​—Diko aRomain 6:17, 18.

17. Na alege wa mo lingbi ti fa so mo kiri singila teti ye so Jéhovah asara ti zi mo?

¹⁷ Tongana e bâ na nene ni ye so Jéhovah na Molenge ti lo asara ti zi e na yâ ti siokpari na kuâ, fade e fa ni na gigi (1 Jean 5:3). Fade e tiri na abibe so ayeke pusu e ti sara siokpari. Fade e yeke sara siokpari na mbana pëpe na fini ti e ayeke duti use use pëpe. Sarango siokpari na mbana afa so e bâ na nene ni oko pëpe wala e kiri singila pëpe teti ngere so a futa ti zi e. Nde na so, e yeke fa so e kiri singila na sarango ngangu ti bata nzoni songo na Nzapa (2 Pi. 3:14). E yeke fa ni na gigi na fango na amba ti e pendere beku ti zingo e, si ala nga alingbi ti duti na nzoni songo na Jéhovah na ala wara beku ti fini ti lakue lakue (1 Tim. 4:16). Kite ayeke pëpe so Jéhovah na Molenge ti lo alingbi ti tene e mû kete mbage ti ngoi ti e na ngangu ti e ti sepela na ala! (Marc 12:28-30). Gbu li ti mo kete! E lingbi ti ku ngoi so fade a zi siokpari kue na tere ti e. E lingbi ti duti na mara fini so Jéhovah aye na tongo nda ni, fini so alingbi kue, fini ti lakue lakue: so kue ngbanga ti ye so Jéhovah asara ti zi e!​—aRom. 8:21.

[Kete tënë na gbe ni]

Mo yeke kiri tënë tongana nyen?

• Ngbanga ti nyen mo yeke na bezoin ti tene a zi mo hio?

• Mungo tere ti Jésus lo mveni na sandaga andu mo tongana nyen?

• Tongana nyen mo bâ matabisi ti ngere so Jéhovah afuta ti zi azo?

• Ye wa mo yeke sara ti fa na Jéhovah so mo yeda na aye so lo sara ti zi mo?

[Foto na lembeti 30]

Na Lango ti Kangango ndo ti Siokpari, kota prêtre ti Israël aduti fä ti Messie

[Foto na lembeti 31]

So Abraham ayeke nduru ti mû molenge ti lo na sandaga afa na e ye mingi na ndo ti kota sandaga so Jéhovah amû