Yingo ti Nzapa afa lege na azo na ngoi ti akozo Chrétien nga laso
“A yeke gi oko yingo ni si asara akusala so kue.”—1 ACOR. 12:11.
1. Aye wa e yeke bâ na yâ ti article so?
PENTECÔTE ti ngu 33 ayeke lani mbeni lango so ambeni pendere ye asi (Kus. 2:1-4). Tukungo yingo vulu na ndo ti azo na lango ni so na ngoi ti akozo Chrétien afa kota gbiango ye so Nzapa aga na ni na yâ ti lege so lo yeke sara ye na mbage ti awakua ti lo. Na yâ ti article so ahon, e bâ ambeni lege so yingo ti Nzapa amû maboko na abe-ta-zo ti giriri ti sara ambeni ngangu kusala nga na ambeni nzene nzene kusala. Kangbi wa la ayeke na yâ ti lege so yingo ti Nzapa asara kusala lani na ndo ti azo so ayeke na ngoi so aga kozo na ngoi ti aChrétien nga na lege so yingo ti Nzapa asara kusala na ndo ti akozo Chrétien? Na lege wa aChrétien ayeke bâ nzoni laso na lege ti kusala ti yingo vulu ti Nzapa? Zia e bâ ni.
“Bâ, mbi yeke maseka-wali so ayeke ngbâa ti Jéhovah!”
2. Tongana nyen la Marie abâ lani ye so yingo vulu asara?
2 Na ngoi so a tuku lani yingo vulu so amû zendo ni na ndo ti adisciple na yâ ti mbeni kota chambre na Jérusalem, Marie ayeke dä (Kus. 1:13, 14). Ye oko, ahon angu 30 tongaso kozoni na ye so asi so, lo bâ awe ye so yingo ti Jéhovah asara na mbeni lege so apika bê. Jéhovah amû fini ti Molenge ti lo kâ na yayu lo zia ni na yâ ti Marie na sese na ngoi so Marie ade ti hinga koli pëpe. A yeke “na lege ti yingo vulu” la lo mû ngo so.—Mat. 1:20.
3, 4. Bê ti Marie ayeke tongana nyen na ndo ti ye so Nzapa ahunda na lo ti sara? Tongana nyen la e lingbi ti mû tapande ti lo?
3 Ngbanga ti nyen Marie awara mara ti kota pasa so me mbeni zo nde pëpe? Na peko ti so ange ni afa lani na Marie ye so Nzapa aye ti sara na lege ti lo, na nzerengo tere Marie atene: “Bâ, mbi yeke maseka-wali so ayeke ngbâa ti Jéhovah! Zia ye ni asi na mbi gi tongana ti so mo tene.” (Luc 1:38). Atënë ti Marie so afa ye so ayeke na bê ti lo na so Nzapa abâ ni kozo awe. So lo kiri tënë hio afa so lo yeke lani nduru ti yeda ti sara ye so bê ti Nzapa aye na ndo ti tënë ni so. Lo hunda lani ange ni oko pëpe na ndo ti ye so azo ti ndo so lo yeke dä ayeke tene ande na ndo ti ngo ti lo ni wala ye so a lingbi ti sara na ndo ti songo ti lo na koli so aga na peko ti lo. So Marie atene lo yeke ngbâa ti Jéhovah, lo fa so lo zia bê ti lo kue na Jéhovah.
4 Na ambeni ngoi mo bâ so akpale wala akusala so mo yeke na ni na yâ ti bungbi ti Jéhovah ahon ndo ti mo? A lingbi e oko oko kue e hunda tere ti e: ‘Mbi zia bê ti mbi kue na Jéhovah ti sara si ye ni aga nzoni alingbi na ye so bê ti lo aye? Mbi yeke biani nduru ti sara ye so Jéhovah aye ti tene mbi sara?’ Zia mo hinga na bê ti mo kue so Nzapa ayeke mû yingo ti lo na azo so azia bê ti ala kue na lo nga so ayeda ti sara ye so Kota Mokonzi ti ala ahunda.—Kus. 5:32.
Yingo vulu amû lani maboko na Pierre
5. Na alege wa Pierre abâ kusala ti yingo vulu kozoni na Pentecôte ti ngu 33?
5 Legeoko tongana Marie, bazengele Pierre abâ ngangu ti yingo vulu ti Nzapa na ndo ti lo wani kozoni na Pentecôte ti ngu 33. Jésus amû na lo nga na ambeni bazengele ngangu ti tomba asioni yingo (Marc 3:14-16). Atâa so Bible asara nzene nzene tënë na ndo ni pëpe, na bango ni Pierre asara kusala lani na ngangu so. A bâ nga ngangu ti Nzapa na ndo ti Pierre na ngoi so Jésus atene na lo ti tambela na ndo ti Kota Ngu ti Galilée ti gue na tere ti lo, na Pierre asara ni. (Diko Matthieu 14:25-29.) A yeke polele so Pierre azia bê ti lo na ndo ti yingo vulu ti mû maboko na lo ti sara akusala ti ngangu. Ngoi kete na pekoni yingo so ayeke sara ande kusala na ndo ti Pierre nga na amba ti lo adisciple na mbeni fini lege nde.
6. Aye wa yingo ti Nzapa amû lege na Pierre ti sara na ngoi ti Pentecôte ti ngu 33 nga na pekoni?
6 Na Matanga ti Pentecôte ti ngu 33, na lege ti miracle a mû na Pierre nga na ambeni zo ngangu ti sara tënë na ayanga ti kodoro ti azo so aga gango na Jérusalem. Na pekoni, Pierre amû li ni ti sara tënë na azo so abungbi (Kus. 2:14-36). Biani, koli so, so na ambeni ngoi lo yeke sara ye hio hio nga lo yeke sara ye na mbeto awara ngangu ti fa tënë na mbeto pëpe atâa so a ke na ala ti fa tënë nga a sara ye ti ngangu na ala (Kus. 4:18-20, 31). Nzapa amû na lo hingango ye na lege ti yingo ti lo (Kus. 5:8, 9). Nga a mû même na lo ngangu ti zingo mbeni kuâ.—Kus. 9:40.
7. Afango ye ti Jésus wa la Pierre agbu ndani gi na pekoni so a soro lo ti gue na yayu?
7 Même kozoni na Pentecôte ti ngu 33, Pierre agbu lani nda ti mingi ti atâ tënë so Jésus afa (Mat. 16:16, 17; Jean 6:68). Me na yâ ti afango ye ti Jésus ambeni ye ayeke dä so lo gbu ndani gi na peko ti Pentecôte ti ngu 33. Na tapande, Pierre ahinga lani pëpe so a yeke zingo Jésus na kuâ na lango ota ni nga lo hinga pëpe so Royaume ayeke duti na yayu (Jean 20:6-10; Kus. 1:6). Tënë ti azo so ayeke ga acréature ti yingo na ayeke komande na yâ ti Royaume ti yayu ayeke lani mbeni ye so Pierre ahinga ni kozo pëpe. A yeke gi na pekoni so lo wara batême ti yingo vulu nga a mû na lo beku ti guengo na yayu awe la lo ga ti gbu nda ti afango ye ti Jésus na ndo ti atënë so.
8. Atâ tënë wa aChrétien so a soro ala ti gue na yayu nga “ambeni ngasangbaga” awara lege ti hinga ni?
8 Afango ye ti Jésus so kozoni adisciple ti lo agbu nda ni kozoni pëpe, ala gbu ndani na pekoni so a tuku yingo vulu na ndo ti ala. Na gbe ti yingo ti Nzapa, aChrétien so asû ambage ti Mbeti ti Nzapa na Grec ândö, ti tene e bâ nzoni dä, afa apendere tâ tënë na ndo ti ye so Nzapa aleke ti sara (aÉph. 3:8-11, 18). Laso, aChrétien so a soro ala ti gue na yayu nga na ala so ayeke ti “ambeni ngasangbaga” ayeke te kobe ti yingo legeoko, ala kue ayeke manda a-oko tâ tënë so (Jean 10:16). Mo kiri singila ndali ti so yingo vulu amû maboko na mo ti hinga ye na ndo ti Bible nga ti gbu ndani so?
Paul “asi na yingo vulu”
9. Yingo vulu amû maboko lani na Paul ti sara nyen?
9 Nduru na ngu oko tongaso na peko ti Pentecôte ti ngu 33, mbeni zo nde nga awara yingo vulu so ayeke matabisi ti Nzapa. A yeke Saul so na pekoni a iri lo Paul. Yingo ti Nzapa amû na lo ngangu ti sara aye so angbâ ti mû maboko na e laso. Na gbe ti yingo ti Nzapa, bazengele Paul asû ambeti 14 so ayeke mbage ti Bible. Nga, legeoko tongana ti so a mû lani maboko na Pierre, yingo ti Nzapa amû maboko na Paul ti gbu nda ti ye na ndo ti beku ti mbeni fini so alingbi ti hinga kuâ pëpe nga na tere so alingbi ti buba pëpe na yayu, nga ti sû tënë polele na ndo ni. Na lege ti yingo vulu, Paul asava akobela, lo tomba asioni yingo nga lo zingo même kuâ! Ye oko, ngangu so lo wara lani na lege ti yingo vulu ayeke ti mû lege na lo ti sara mbeni kpengba ye. Awakua ti Nzapa awara ngangu ti sara oko ye so laso, atâa so ala wara ni na lege ti miracle pëpe.
10. Na lege wa yingo vulu amû ngangu na Paul ti sara tënë?
10 Paul so “asi na yingo vulu” asara tënë na mbeto pëpe na mbeni zo ti likundu. Ye so asara ngangu mingi na ndo ti kota zo so ayeke na li ti kodoro ti Chypre so amä lisoro ti ala ni kue. Proconsul so ayeda na tâ tënë, “teti bê ti lo adö na tënë ti Jéhovah so a fa ni.” (Kus. 13:8-12). A yeke polele so Paul ahinga so gi yingo ti Nzapa la alingbi ti mû ngangu na lo ti fa tâ tënë na mbeto pëpe (Mat. 10:20). Na pekoni lo hunda na congrégation ti Éphèse ti sambela ndali ti lo si a mû na lo “ngangu ti sarango tënë”.—aÉph. 6:18-20.
11. Tongana nyen la yingo ti Nzapa afa lege lani na Paul?
11 Yingo vulu amû lege na Paul ti sara tënë, me na mbeni ngoi, yingo vulu ake na lo ti sara tënë na yâ ti ambeni kodoro. Yingo ti Nzapa afa lege na lo na ngoi so lo yeke lani na yâ ti tambela ti lo ti missionnaire. (Kus. 13:2; diko Kusala 16:6-10.) Jéhovah angbâ lakue ti sara kusala na yingo ti lo ti fa lege na kusala ti fango tënë. Tongana Paul, awakua ti Jéhovah kue so amä yanga ti lo asara kue ti fa tâ tënë na mbeto pëpe nga na nzara ni. Atâa so laso e yeke bâ pëpe fango lege ti Nzapa na lê ti e polele tongaso tongana ti so a sara na ngoi ti Paul, e lingbi ti hinga na bê ti e kue so Jéhovah ayeke sara kusala na yingo vulu ti lo ti sara kue si azo so aye ti hinga tâ tënë amä ni.—Jean 6:44.
“Alege ti sarango kusala ayeke mingi”
12-14. Lege so yingo ti Nzapa ayeke sara kusala na ndo ti awakua ti lo kue ayeke gi oko? Fa ndani.
12 Ye so e diko na ndo ti lege so Jéhovah airi tënë nzoni na ndo ti congrégation ti aChrétien so a soro ala ti gue na yayu na ngoi ti akozo Chrétien amû ngangu na e laso mingi. Girisa pëpe atënë so Paul asû na gbe ti yingo ti Nzapa na congrégation ti Corinthe na ndo ti amatabisi ti yingo so ala wara na lege ti miracle na ngoi ni kâ, lo tene: “Yâ ti amatabisi ayeke nde nde, me gi oko yingo si ayeke dä. Yâ ti akusala ayeke nde nde, me gi oko Seigneur si ayeke dä. Yâ ti alege ti sarango kusala ayeke mingi, me a yeke gi oko Nzapa si amû na azo kue alege ti sarango kua so kue.” (1 aCor. 12:4-6, 11). Tâ tënë, yingo vulu alingbi ti sara kusala na ndo ti awakua ti Nzapa nde nde nga na alege nde nde ndali ti mbeni mbilimbili ye. Biani, “kete kundu” ti Christ nga na “ambeni ngasangbaga” ti lo, ala kue alingbi ti wara yingo vulu (Luc 12:32; Jean 10:16). Ye oko, lege so yingo vulu ayeke sara kusala na ndo ti amembre oko oko ti congrégation ayeke nde nde.
13 Na tapande, a soro a-ancien na gbe ti yingo vulu (Kus. 20:28). Me a yeke pëpe aChrétien kue so a soro ala na lege ti yingo ti gue na yayu la ayeke a-ancien na yâ ti congrégation. Ye so afa nyen na e? A fa so yingo ti Nzapa ayeke sara kusala na ndo ti amembre ti congrégation na alege so ayeke nde nde.
14 Yingo so asara si azo so a soro ala ti gue na yayu ahinga so ala wara “mbeni yingo so Nzapa amû ti mû ala ti ga amolenge ti lo” ayeke oko yingo so Jéhovah asara kusala na ni ti zingo oko Molenge ti lo na kuâ ti wara mbeni fini so alingbi ti hinga kuâ pëpe na yayu. (Diko aRomain 8:11, 15.) Gi oko yingo so la Jéhovah asara kusala na ni lani ti leke dunia so (Gen. 1:1-3). Na lege ti oko yingo so Jéhovah asara lani si akode ti Betsalel amaï ti sara kpengba kusala so andu tabernacle, lo mû ngangu na Samson ti sara aye so ahunda mbeni kota ngangu nga lo mû maboko na Pierre ti tambela na ndo ti ngu. Tongaso, ti wara yingo ti Nzapa na ti tene a soro mbeni zo na lege ti yingo ti gue na yayu ayeke aye use so ayeke nde nde. Ti azo so a soro ala ti gue na yayu, a yeke sara ni na mbeni lege so ayeke nde mingi na a yeke Nzapa la ayeke soro ala.
15. A yeke ngbâ ande lakue lakue ti batize azo na lege ti yingo vulu? Fa ndani.
15 Yingo vulu ti Nzapa ayeke sara kusala lakue na ndo ti awakua be-ta-zo ti lo na alege nde nde. A sara kusala ândö na ndo ti ala angu saki mingi kozoni na ngoi so Nzapa ato nda ti soro azo ti gue na yayu. A yeke na Pentecôte ti ngu 33 la Nzapa ato nda ti soro azo tongaso, me a yeke ngbâ ande teti lakue lakue pëpe. Batême ti yingo ayeke hunzi, me yingo vulu ayeke ngbâ ande ti sara kusala na ndo ti azo ti Nzapa tongaso si ala lingbi ti sara ye so bê ti lo aye teti lakue lakue.
16. Ye wa yingo ti Nzapa ayeke mû maboko na awakua ti lo laso ti sara?
16 Mbeni ye nde wa a yeke sara ni laso na ndo ti sese grâce na mungo maboko ti yingo vulu ti Jéhovah? Kiringo tënë ni ayeke na Apocalypse 22:17 so atene: “Yingo na wali so amû koli fini fini angbâ ti tene: ‘Ga!’ Nga, zo so amä tënë so, zia lo tene: ‘Ga!’ Zo so nzara ti ngu asara lo, zia lo ga; zo so aye, zia lo nyon ngu so amû fini na zo, lo nyon ni senge senge.” Yingo ti Nzapa ayeke pusu aChrétien laso ti gue na tisango ndo so na ndo kue na “zo so aye” ti nyon ngu so amû fini na zo. A-Chrétien so a soro ala ti gue na yayu ayeke mû li ni na yâ ti kusala so. A-Chrétien so ayeke ti ambeni ngasangbaga nga kue ayeke gue na tisango ndo so na ndo kue. Yingo vulu ayeke fa lege na groupe ti aChrétien so use kue ti sara kusala so. Groupe ti aChrétien so use kue amû tere ti ala awe na Jéhovah na lege so a batize ala “na iri ti Babâ, na ti Molenge na ti yingo vulu.” (Mat. 28:19). Nga, ala kue ayeda ti tene yingo ti Nzapa asara ngangu na yâ ti fini ala, ala zia si yingo ni apusu ala ti lë lengo ti yingo ni (aGal. 5:22, 23). Legeoko tongana ti aChrétien so a soro ala ti gue na yayu, ambeni ngasangbaga ayeda ti tene yingo ti Nzapa amû maboko na ala. Na mungo maboko ti yingo so, ala sara kue ti duti na sioni oko pëpe na yâ ti fini ti ala tongaso si ala nzere na Nzapa.—2 aCor. 7:1; Apoc. 7:9, 14.
Ngbâ lakue ti hunda ti wara yingo vulu
17. Tongana nyen la e lingbi ti fa so e yeke na yingo ti Nzapa?
17 Tongaso, atâa beku so Nzapa amû na mo ayeke ti wara fini ti lakue lakue na yayu wala na sese, Jéhovah alingbi ti mû na mo “ngangu so ahon ti so zo ayeke na ni” ti tene mo ngbâ be-ta-zo na ti wara futa ti mo (2 aCor. 4:7). So mo ngbâ lakue ti fa nzoni tënë ti Royaume alingbi ti sara si azo ahe mo. Me girisa pëpe so “tongana a yeke zonga [mo] ndali ti iri ti Christ, [mo] duti na ngia, ngbanga ti so yingo ti gloire, so ti tene yingo ti Nzapa, ayeke duti na ndo ti [mo].”—1 Pi. 4:14.
18, 19. Na lege wa Jéhovah ayeke mû maboko na mo na lege ti yingo vulu? A lingbi mo ngbâ lakue ti sara nyen?
18 Yingo vulu ayeke matabisi ti Nzapa so lo yeke mû senge senge na azo so agi na bê ti ala kue ti wara ni. A lingbi ti sara si akode ti mo amaï nga ti sara si mo duti na nzara ti sara kusala ti Nzapa na ngangu ti mo kue. “A yeke Nzapa si ayeke sara kusala na yâ ti ala ti tene ala duti na nzara ti sara ye nga ala sara ye, na lo sara tongaso ndali ti so a nzere na bê ti lo.” Mungo maboko ti yingo vulu nga na ngangu so e yeke sara na bê ti e kue ti “gbu tënë ti fini ngangu” ayeke mû lege na e ti “ngbâ ti sara kua ndali ti salut ti [e] wani juska a ga nzoni; [e] sara ni tongana azo so ayeke na mbeto nga so tere ti ala adö.”—aPhil. 2:12, 13, 16.
19 Ni la, zia bê ti mo kue na yingo ti Nzapa, sara akusala kue so lo mû na mo na bê ti mo kue, sara ni nzoni nga hunda na Jéhovah ti mû maboko na mo (Jacq. 1:5). Lo yeke mû maboko na mo ti gbu nda ti Mbeti ti lo, ti hon ndo ti akpale nga ti fa nzoni tënë. Jésus amû zendo atene: “Ala ngbâ ti hunda ye, na fade a yeke mû ni na ala. Ala ngbâ ti gi ye, na fade ala yeke wara ni. Ala ngbâ ti pika yanga-da, na fade a yeke zi ni na ala.” (Luc 11:9, 13). Ye so andu nga ti hunda ti wara yingo vulu. Tongaso, ngbâ ti hunda Jéhovah ti tene mo kue mo ga tongana awakua be-ta-zo ti giriri nga na ti laso so yingo vulu ti Nzapa afa lege na ala.
Mo lingbi ti fa ndani?
• Na tapande ti Marie, bango ndo wa a lingbi e duti na ni ti wara aye ti nzoni?
• Na lege wa yingo ti Nzapa afa lege na Paul?
• Tongana nyen la yingo ti Nzapa ayeke fa lege laso na awakua ti Nzapa?
[Foto na lembeti 26]
Yingo ti Nzapa amû maboko na Paul ti hon ndo ti ngangu so asioni yingo ayeke sara na ndo ti zo
[Foto na lembeti 28]
Yingo vulu ayeke mû maboko laso na aChrétien atâa beku ti ala ayeke so wa