Ngbanga ti nyen ti zia yingo ti Nzapa ti fa lege na mo?

“Mo yeke Nzapa ti mbi. Zia nzo Yingo ti Mo afa na mbi lege.”​—PS. 143:10.

1. Mû mbeni tapande ti fa so tongana mbeni zo aye ti gue na mbeni ndo so lo hinga lege ni pëpe, a yeke nzoni ti tene lo na mbeni zo so ahinga lege ni la ague.

TARA ti bâ so mo yeke hon na yâ ti mbeni ndo so ade mo hon dä lâ oko pëpe ti gue na mbeni ndo. Mo na mbeni zo so mo zia bê ti mo na lo na so asi na ndo ni so kozo awe la ayeke gue. Tongana lo hinga lege ni nzoni, lo yeke gue na mo na ndo ni so. Tongana mo mä yanga ti lo, mo yeke girisa pëpe.

2, 3. (a) Kota ngangu wa Jéhovah asara kusala na ni a sara angu mingi mingi awe? (b) Ngbanga ti nyen a yeke nzoni ti ku ti tene ngangu ti Nzapa so lê ayeke bâ pëpe afa lege na e laso?

² Mbeni ngangu ayeke dä so lê abâ pëpe so e yeke na bezoin ni mingi ti tene afa lege na e. A yeke ngangu wa? A yeke ngangu so a sara tënë ni na yâ ti akozo versê ti Bible. Mbeti ti Genèse asara tënë ti aye so Nzapa asara a sara angu mingi mingi kozo awe, a tene: “Kozoni, Nzapa acréé ayayu na sese.” Na ngoi so lo leke ayayu na sese, lo sara kusala na kota ngangu ti lo ti leke na aye ndali ti so mbaï ni atene: “Yingo ti Nzapa aduti na ndo lê ti ngu.” (Gen. 1:1, 2). Ye wa la ayeke sara kusala? A yeke yingo vulu so ayeke ngangu so Nzapa asara na kusala ti sara na aye. E yeke na fini ndali ti so Jéhovah asara kusala na yingo so ti leke aye kue.​—Job 33:4; Ps. 104:30.

³ Me e azo so e yeke na fini, a yeke nzoni ti ku ti tene ngangu so Nzapa asara kusala na ni ti sara na aye asara ngangu na yâ ti fini ti e? Jésus so ayeke Molenge ti Nzapa wani ahinga so a yeke nzoni e zia si ngangu ti Nzapa asara kusala na yâ ti fini ti e ndali ti so lo tene na adisciple ti lo, lo tene: ‘Yingo ayeke fa lege na ala na yâ ti tâ tënë kue.’ (Jean 16:13). Yingo ni so ayeke nyen? Ngbanga ti nyen a yeke nzoni e yeda ti tene a fa lege na e?

Yingo vulu ayeke nyen?

4, 5. (a) Bibe wa so ayeke na lege ni pëpe azo so amä na bê na tënë ti Nzapa Babâ, Nzapa Molenge, na Nzapa Yingo vulu ayeke na ni na ndo ti yingo vulu? (b) Tongana nyen la mo lingbi ti fa ye so a iri ni biani yingo vulu?

⁴ Peut-être ambeni zo so mo fa tënë na ala ayeke na mbeni bango ndo so ayeke nde na ti Bible na ndo ti yingo vulu. Azo so amä na bê na tënë ti Nzapa Babâ, Nzapa Molenge, na Nzapa Yingo vulu apensé ti ala so yingo vulu ayeke mbeni zo so lo na Nzapa Babâ ni alingbi tere (1 aCor. 8:6). Me tënë ti Nzapa Babâ, Nzapa Molenge, na Nzapa Yingo vulu ayeke ti lo nde na ye so Bible afa.

⁵ Tongaso, yingo vulu ni ayeke gi nyen biani? Mbupa ti Hébreu, ruʹach, so a kiri pekoni na ‘yingo’ na Genèse 1:2 a lingbi nga ti kiri pekoni na ‘pupu.’ (Gen. 8:1). Legeoko tongana ti so zo ayeke bâ pupu pëpe me lo yeke bâ ngangu ni, yingo vulu nga kue zo alingbi ti bâ ni pëpe me lo yeke bâ aye ti pekoni. Yingo so ayeke ngangu so alondo na Nzapa so lo sara kusala na ni na ndo ti azo wala na ndo ti aye ti sara ye so lo ye. A yeke ngangu ti mä na bê so mara ti ngangu tongaso alondo na Nzapa ti Ngangu Ahon Kue? Oko pëpe!​—Diko Ésaïe 40:12, 13.

6. Kpengba ye wa David ahunda na Jéhovah?

⁶ Jéhovah angbâ ti sara kusala na yingo ti lo ti fa lege na e na yâ ti fini ti e? Lo mû zendo na David lo tene: “Fade Mbi wa mo, na Mbi fa na mo lege so a lingbi mo tambela dä.” (Ps. 32:8). David ayeda na ni? En, ndali ti so lo voro yanga na Jéhovah lo tene: “Fa na mbi lege ti sara ye so Mo ye, teti Mo yeke Nzapa ti mbi. Zia nzo Yingo ti Mo afa na mbi lege.” (Ps. 143:10). E nga kue a yeke nzoni e yeda ti tene yingo ti Nzapa afa lege na e. Ngbanga ti nyen? Zia e bâ araison ni osio.

E lingbi pëpe ti fa lege na tere ti e wani

7, 8. (a) Ngbanga ti nyen la sân Nzapa e lingbi pëpe ti fa lege na tere ti e wani? (b) Tapande wa amû maboko na e ti hinga ndani so e yeke na bezoin ti tene Nzapa afa lege na e na yâ ti sioni dunia so?

⁷ Kozoni, a yeke nzoni e yeda ti tene yingo ti Nzapa afa lege na e ndali ti so e lingbi pëpe ti fa lege na tere ti e wani. “Ti fa lege” aye ti tene “ti fa na zo lege so a lingbi lo mû ni.” Ye oko, Jéhovah aleke e pëpe na ngangu ti fa lege na tere ti e wani, mbilimbili e so e yeke na siokpari na tere ti e. Prophète Jérémie atene: “O L’Éternel, mbi hinga lege ti zo ayeke na tïtî lo mveni pëpe; na a yeke na bê ti zo so atambela ti fa lege na gere ti lo nga pëpe.” (Jér. 10:23). Ngbanga ti nyen? Jéhovah afa na Jérémie ndani so e lingbi pëpe ti fa lege na tere ti e wani. Jéhovah asara tënë ti zo ti yâ ni ti e, lo tene: “Bê ti zo ayeke na handa ahon mbeni ye kue na ayeke sioni mingi; zo nyen alingbi hinga bê ti zo?”​—Jér. 17:9; Mat. 15:19.

⁸ Tongana mbeni zo lo oko lo gue yongoro na yâ ti mbeni yando so lo hinga ni nzoni pëpe, sân ti mû mbeni zo so ahinga ndo ni nzoni, lo lingbi ti wara kpale pëpe? Teti so lo hinga pëpe tongana nyen ti bata fini ti lo na yâ ti sioni ndo tongaso nga tongana nyen ti hon ti si na ndo so lo ye ti gue dä, lo yeke zia fini ti lo na yâ ti kpale. Legeoko nga, zo so apensé so lo lingbi ti fa lege na lo wani na yâ ti sioni dunia so sân ti yeda ti tene Nzapa afa na lo nzoni lege so a lingbi lo mû, lo yeke zia fini ti lo na yâ ti kota kpale. E lingbi ti hon na yâ ti sioni dunia so nzoni gi tongana e hunda na Jéhovah oko ye so David ahunda na lo na yâ ti sambela, lo tene: “Mbi zia ti tambela na lege ti Mo pëpe, gere ti mbi anzene pëpe.” (Ps. 17:5; 23:3). Tongana nyen la e lingbi ti wara mara ti fango lege tongaso?

9. Tongana ti so a fa na lembeti 19, na lege wa yingo ti Nzapa alingbi ti fa lege na e nzoni?

⁹ Tongana e sara tere ti e kete na e yeda ti tene Nzapa afa lege na e, lo yeke mû na e yingo vulu ti lo ti fa lege na e nzoni. Ngangu ni so ayeke mû maboko na e tongana nyen? Jésus atene na disciple ti lo atene: “Wamungo maboko, yingo vulu, so Babâ ayeke tokua ande na iri ti mbi, lo si lo yeke fa ande na ala aye kue, nga lo yeke dabe ti ala na aye kue so mbi fa na ala.” (Jean 14:26). Tongana lakue e yeke sambela na ngoi so e yeke manda Mbeti ti Nzapa so na yâ ni a yeke wara nga afango ye ti Jésus, yingo vulu ayeke sara si e kiri e hinga nzoni mingi ndara ti Jéhovah so ndani alï mingi, ye so ayeke sara si e yeke sara tâ gi ye so lo ye (1 aCor. 2:10). Nga, tongana aye so e ku tere ti e na ni pëpe asi na yâ ti fini ti e, yingo ti Nzapa ayeke mû maboko na e ti hinga ye so a lingbi e sara. Yingo vulu ayeke dabe ti e na aye so e manda awe na yâ ti Bible nga a yeke mû maboko na e ti hinga tongana nyen ti sara kusala na aye ni so ti mû anzoni desizion.

Yingo ti Nzapa afa lege lani na Jésus

10, 11. Nyen la Jésus aku lani ti tene yingo vulu asara ndali ti lo? Yingo vulu amû maboko na lo tongana nyen?

¹⁰ Use ni, a yeke nzoni ti zia si yingo ti Nzapa afa lege na e ndali ti so Nzapa afa lege na Molenge ti lo wani na ni. Kozo si lo ga na sese, oko Molenge ti Nzapa ahinga prophétie so: “Fade Yingo ti L’Éternel aduti na ndo Lo, yingo ti ndara na ti hingango nda ti ye, yingo ti wango tënë na ti ngangu, yingo ti hingango ye na ti kpengo mbeto ti L’Éternel.” (És. 11:2). Tara ti bâ tongana nyen Jésus ayeke na ngia lani ti wara mungo maboko ti yingo ti Nzapa na yâ ti aye so lo tingbi na ni na ngoi so lo yeke na sese ge!

¹¹ Tënë ti Jéhovah aga lani tâ tënë. Évangile ti Luc asara tënë ti ye so asi lani hio na peko ti batême ti Jésus, a tene: “Jésus, so asi singo na yingo vulu, alondo na Ngu ti Jourdain lo kiri. Na yingo afa lege na lo ti gue ti tambela na yando.” (Luc 4:1). Kâ, na ngoi so Jésus amû jeûne, lo sambela, nga lo yeke gbu li ti lo, peut-être Jéhovah afa ye na lo nga lo leke lo ndali ti aye so ayeke ku lo. Ngangu ti Nzapa asara lani kusala na ndo ti bibe ti Jésus nga na bê ti lo, a fa lege na apensé ti lo nga na adesizion ti lo. Ye so asara si Jésus ahinga ye so a lingbi lo sara na yâ ti aye kue so asi, na lo sara tâ gi ye so Babâ ti lo aye ti tene lo sara.

12. Ngbanga ti nyen a yeke kota ye ti hunda ti tene yingo ti Nzapa afa lege na e?

¹² Teti so Jésus abâ na nene ni aye so yingo ti Nzapa asara na yâ ti fini ti lo wani, lo fa na adisciple ti lo so a yeke kota ye ti tene ala hunda ti wara yingo ti Nzapa nga ti zia si a fa lege na ala. (Diko Luc 11:9-13.) Ngbanga ti nyen a yeke kota ye ti tene e sara tongaso? Ndali ti so yingo vulu alingbi ti changé lege so e yeke pensé na ni ti tene ague oko na bibe ti Christ (aRom. 12:2; 1 aCor. 2:16). Tongana e zia si yingo ti Nzapa afa lege na e na yâ ti fini ti e, e lingbi ti pensé tongana Christ nga ti mû tapande ti lo.​—1 Pi. 2:21.

Yingo ti dunia so ayeke gue na e yongoro

13. Yingo ti dunia so ayeke nyen? A yeke pusu zo ti sara aye wa?

¹³ Ota raison so ndali ni e ye ti tene yingo ti Nzapa afa lege na e ayeke so sân ni yingo ti dunia so, so ayeke sara ngangu na yâ ti fini ti mingi ti azo laso, alingbi ti gue na e yongoro. Dunia so ayeke na mbeni ngangu ti lo wani so ayeke pusu azo ti sara aye so ayeke tâ nde na ye so yingo vulu ayeke pusu e ti sara. Ahon ti pusu azo ti duti na bibe ti Christ, yingo ti dunia so ayeke pusu azo ti duti na bibe nga na asarango ye so ague oko na ti mokonzi ti dunia ni so ayeke Satan. (Diko aÉphésien 2:1-3; Tite 3:3.) Na ngoi so mbeni zo azia si yingo ti dunia so afa lege na lo na lo tï na yâ ti akusala ti mitele, aye ti sioni mingi ayeke ga na pekoni, nga a yeke sara si Royaume ti Nzapa ayeke ga ye ti lo pëpe.​—aGal. 5:19-21.

14, 15. E lingbi ti sara nyen ti dö sese na yingo ti dunia so?

¹⁴ Jéhovah amû na e aye so e yeke na bezoin ni ti dö sese na yingo ti dunia so. Bazengele Paul atene: “Ala ngbâ ti wara ngangu na yâ ti Seigneur nga na yâ ti kota ngangu ti ngangu ti lo . . . si ala wara lege ti gbu lê ni na lâ ti sioni.” (aÉph. 6:10, 13). Na lege ti yingo ti lo, Jéhovah akpengba e ti dö sese na Satan so ayeke sara kue ti handa e (Apoc. 12:9). Yingo ti dunia so ayeke ngangu, na e lingbi ti kpe ni kue kue kue pëpe. Me e lingbi ti dö sese na ni. Yingo vulu ayeke même ngangu ahon ni, na a yeke mû maboko na e!

¹⁵ Bazengele Pierre asara tënë ti azo ti ngoi ti lo so ândö ayeke aChrétien me so adö lege ni azia, lo tene: “Ala dö nzoni lege azia awe, si ala yeke handa tere ti ala wani.” (2 Pi. 2:15). E kiri singila mingi so e wara “yingo ti dunia so pëpe, me yingo so alondo na Nzapa”! (1 aCor. 2:12). Tongana e zia si yingo vulu asara ngangu na ndo ti e nga e gi ti bâ nzoni na lege ti aye kue so Jéhovah amû na e ti tene e ngbâ ti duti na kpengba songo na lo, e yeke wara lege ti dö sese na yingo ti sioni dunia ti Satan so.​—aGal. 5:16.

Yingo vulu ayeke lë nzoni lengo

16. Yingo vulu alingbi ti pusu e ti lë lengo wa?

¹⁶ Osio raison ni so ndali ni e ye si yingo ti Nzapa asara kusala na yâ ti e ayeke so azo so azia si yingo so afa lege na ala ayeke lë nzoni lengo na yâ ti fini ti ala. (Diko aGalate 5:22, 23.) Zo wa na popo ti e aye pëpe ti duti zo so aye azo mingi, so ayeke na ngia, nga so ayeke na siriri na azo? Zo wa na popo ti e aye pëpe ti duti zo so ahinga ti kanga bê ti ku, zo so ayeke sara nzoni na zo wala zo so ayeke na bê so aye gi ti sara nzoni na zo? Ti duti na kpengba mabe, ti sara ye na ngangu pëpe, nga ti kanga nzara ti bê, a yeke ga na ye ti nzoni na zo, zo wa la na popo ti e aye pëpe ti duti na mara ti asarango ye tongaso? Yingo ti Nzapa asara si e duti na anzoni sarango ye so aga na ye ti nzoni na e nga na azo so e na ala e yeke ndo oko wala azo so e na ala e yeke voro Nzapa oko. Ti gi ti duti na lengo so ayeke mbeni ye so a lingbi zo asara ni lakue, teti so katikati ayeke pëpe na lengo ti yingo so e yeke na bezoin ni wala so a lingbi e lë ni.

17. E lingbi ti sara nyen ti duti na mbeni mbage ti lengo ti yingo mingi?

¹⁷ A yeke na lege ti ndara ti hunda tere ti e ti bâ wala atënë ti yanga ti e nga na asarango ye ti e afa polele so yingo vulu ayeke fa lege na e nga e yeke lë lengo ti yingo ni (2 aCor. 13:5a; aGal. 5:25). Tongana e bâ so e yeke na bezoin ti gi ti duti na ambeni mbage ti lengo ti yingo, e lingbi ti sara kusala maboko na maboko mingi na yingo vulu ti gi ti lë ambage ti lengo ni so. E yeke sara ni na lege so e yeke manda ye na ndo ti ambage nde nde ti lengo ti yingo tongana ti so a fa ni na yâ ti Bible nga na yâ ti ambeti ti e. Na sarango tongaso e yeke hinga tongana nyen ti lë lengo ti yingo ni so na yâ ti fini ti e ti lâ oko oko nga ti sara ngangu ti lë ni mingi.a Na ngoi so e bâ aye ti peko ti kusala ti yingo ti Nzapa na yâ ti fini ti e nga na yâ ti fini ti amba ti e aChrétien, e yeke bâ polele ndani so a lingbi e zia si yingo ti Nzapa afa lege na e.

Mo yeke zia si yingo ti Nzapa afa lege na mo?

18. Na lege wa Jésus ayeke mbeni tapande teti e na ndo ti tënë ti sarango ye alingbi na fango lege ti yingo ti Nzapa?

¹⁸ Bible atene so na ngoi so Jésus ayeke lani zo na sese ge, lo bâ ngangu ti yingo vulu ti Nzapa na yâ ti fini ti lo. Lo yeda ti tene yingo vulu asara ngangu na ndo ti lo, nga na ngoi so a pusu lo ti sara ye, lo yeda na ni na lo sara ye alingbi na ni (Marc 1:12, 13; Luc 4:14). Mo nga kue mo yeke tongaso?

19. A lingbi e sara nyen ti tene yingo vulu aga ngangu so ayeke fa lege na e na yâ ti fini ti e?

¹⁹ Ngangu ti Nzapa angbâ lakue ti sara kusala na ndo ti bibe nga na bê ti azo so aye ti tene a sara ngangu na ndo ti ala nga a fa lege na ala. Na lege wa mo lingbi ti zia si a sara ngangu na ndo ti mo ti fa na mo nzoni lege so alingbi mo mû? Sambela Jéhovah lakue ti tene lo mû na mo yingo ti lo nga ti mû maboko na mo ti yeda si yingo ni so asara ngangu na ndo ti mo. (Diko aÉphésien 3:14-16.) Sara ye ague oko na asambela ti mo na gingo wango na yâ ti Mbeti ti Nzapa, Bible, so a sû ni na gbe ti yingo vulu (2 Tim. 3:16, 17). Sara ye alingbi na awango ti ndara so ayeke na yâ ni nga duti nduru ti yeda na fango lege ti yingo vulu. Na sarango tongaso, mo yeke fa so mo mä na bê na ngangu so Jéhovah ayeke na ni ti fa na mo nzoni lege so a lingbi mo mû na yâ ti sioni dunia so.

[Kete tënë na gbe ni]

Mo lingbi ti fa ndani?

• Na lege wa yingo vulu alingbi ti sara ngangu na yâ ti fini ti e?

• Araison osio so ndali ni a yeke nzoni e yeda ti tene yingo ti Nzapa afa lege na e ayeke so wa?

• Nyen la e lingbi ti sara ti wara ye ti nzoni mingi na lege ti fango lege ti yingo vulu?

[Foto na lembeti 17]

Yingo ti Nzapa afa lani lege na fini ti Jésus

[Foto na lembeti 19]

Yingo ti Nzapa asara ngangu na ndo ti bibe nga na bê ti azo nga ayeke fa lege na ala