Pasi aga nduru ti hunzi awe!

NZONI GOUVERNEMENT LA AYEKE KOMANDE ANDE

“Fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.”​—Daniel 2:44.

Royaume ti Nzapa ni ayeke mbeni gouvernement so ayeke ti lo na yayu kâ, na Jésus Christ la ayeke Gbia ni so Nzapa azia lo na ndo ni. Fade Jésus ayeke komande na place ti agouvernement kue ti azo na lo yeke sara si a sara na yayu nga na sese ge ye so bê ti Nzapa aye (Matthieu 6:9, 10). Mbeni gouvernement ti azo ayeke kinda ande gouvernement so lâ oko ape, ngbanga ti so gouvernement ni so ayeke “royaume ti Seigneur na Sauveur ti e Jésus Christ” na ayeke “ngbâ lakue lakue.” Ye so ayeke sara nga si siriri ayeke duti dä lakue lakue.​—2 Pierre 1:11.

ABUNGBI TI NZAPA TI WATAKA AYEKE DUTI DÄ MBENI APE

“Satan wani ayeke gbian tere ti lo lakue ti ga mbeni ange ti lumière. Tongaso a yeke fini ye pëpe tongana awakua ti lo ayeke gbian tere ti ala nga lakue ti ga awakua ti mbilimbili. Me ye so ayeke si ande na ala na nda ni ayeke lingbi na akusala ti ala.”​—2 aCorinthien 11:14, 15.

Fade a yeke fa dandara so abungbi ti vorongo nzapa ti wataka ayeke ye ti maboko ti Zabolo, na a yeke futi ni biaku biaku. Ye so ayeke sara si tënë ti kengo zo senge senge nga na ti fango azo gbani gbani ahunzi. A yeke mû lege na azo so aye “tâ Nzapa so ayeke na fini” ti voro Jéhovah na “mabe [so] ayeke oko,” nga na “yingo . . . na tâ tënë”. So siriri ande! Nga azo kue ayeke duti beoko.​—1 aThessalonicien 1:9; aÉphésien 4:5; Jean 4:23.

A YEKE ZI ANDE SIOKPARI NA TERE TI AZO KUE

“Nzapa wani ayeke duti ande na ala. Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”​—Apocalypse 21:3, 4.

Jéhovah Nzapa ayeke sara ande si aye ni so asi grâce na Molenge ti lo Jésus, so amû lani fini ti lo na sandaga ndali ti azo kue (Jean 3:16). Ande na gbe ti komandema ti Jésus, a yeke zi ande siokpari na tere ti azo kue, ala ga nzoni. A sara si pasi ayeke dä mbeni ape, ndali ti so “Nzapa wani ayeke duti ande na ala” na lo yeke “mbô ngu ti lê kue na lê ti ala”. Fade tënë ti pasi na ti dutingo na siokpari na tere ti mo zo ayeke ga gi ngbene ye. Mbeni ye ni nga ayeke so sese ni ayeke ga “ye ti héritier ti azo ti mbilimbili, na fade ala duti dä lakue.”​—Psaume 37:29.

ASIONI YINGO AYEKE DUTI DÄ MBENI APE

“Lo [Jésus Christ, lo] gbu sioni nyama so akpa ngbo so, ngbo ti giriri, so ayeke Zabolo na Satan, na lo kanga lo teti ngu saki oko. Lo bi lo na yâ ti kota dû so alï mingi, lo kanga yanga ni na ndo ti lo nga lo kpo nzoroko dä, si lo handa amara mbeni pëpe.”​—Apocalypse 20:2, 3.

Na ngoi so a yeke bi Satan na asioni yingo na yâ ti “kota dû so alï mingi,” ala lingbi ti sara ye oko ape, ngangu ti ala kue ayeke mingo. Ala yeke sara ande sioni na azo ape. So tâ dengo bê ande na yâ ti mbeni dunia so Satan na asioni yingo ayeke sara ngangu na ndo ni ape!

“ALANGO TI NDA NI” AYEKE HUNZI

“Alango ti nda ni” ayeke hunzi ande na ngoi ti ye so Jésus airi ni “kota ye ti vundu”. Lo tene: “Na ngoi ni so, fade mbeni kota ye ti vundu ayeke si, ye ti vundu so mara ni ade ti si lâ oko pëpe ngbene ye so dunia abâ gigi juska fadeso, na mara ni ayeke kiri ti si ande mbeni pëpe.”​—Matthieu 24:21.

Ye ti vundu ni so ayeke kota mingi teti so ambeni ye ti ngangu so ayeke si ande so, mara ni ade ti si tongaso lâ oko ape. Kota ye ti vundu ni ayeke gue ti hunzi ande na “bira ti kota lango ti Nzapa, Lo ti ngangu ahon kue”, so a hinga ni mingi na iri ti “Harmaguédon.”​—Apocalypse 16:14, 16.

Atâa na ndo wa, azo kue so aye ye so ayeke mbilimbili ayeke ku kungo ti tene sioni dunia so ahon. Bâ ambeni nzoni ye ni so ala yeke wara ande na gbe ti Royaume ti Nzapa.

AMBENI NZONI YE SO NZAPA AYEKE SARA ANDE

Lo yeke sara si “azo mingi mingi” asö kuâ na alï na yâ ti fini dunia so siriri ayeke duti dä: Bible atene so “azo mingi mingi” so a hinga wungo ti ala ape ayeke sigigi “na yâ ti kota ye ti vundu” na ala yeke duti ande na yâ ti fini dunia so mbilimbili ayeke duti dä (Apocalypse 7:9, 10, 14; 2 Pierre 3:13). Azo ni so ayeke kiri ande singila na Jésus Christ, “Molenge ti ngasangbaga ti Nzapa . . . , lo so azi siokpari ti dunia so”, ndali ti so lo sö ala.​—Jean 1:29.

Lo yeke fa ye ande na azo si ala bâ nzoni dä: Ande na yâ ti fini dunia, sese ni ayeke si “na ndara ti L’Éternel,” Jéhovah (Ésaïe 11:9). Nzapa ayeke fa ande na azo tongana nyen ti duti na siriri na popo ti ala nga tongana nyen ti bâ lege ti aye so ayeke na ndo ti sese. Nzapa atene: “Mbi yeke L’Éternel Nzapa ti mo, Lo so awa mo si mo ga nzoni, Lo so afa na mo lege so a lingbi mo tambela dä.”​—Ésaïe 48:17.

Fade a yeke zingo ande azo so akui awe: Lani, tongana Jésus ayeke na ndo ti sese ge, lo zingo kamarade ti lo Lazare na kuâ (Jean 11:1, 5, 38-44). Na sarango tongaso, lo fa so lo yeke zingo ande azo mingi na gbe ti Royaume ti Nzapa.​—Jean 5:28, 29.

Lo yeke sara ande si siriri na sarango ye na lege ni amû ndo na angbâ lakue lakue: Na gbe ti komandema ti Christ, sarango ye ti sioni ayeke ti lo dä ande ape. E tene tongaso ngbanga ti nyen? Ngbanga ti so Jésus ayeke diko aye so ayeke na bê ti azo. Tongaso lo yeke hinga zo wa la ayeke tâ mbilimbili nga zo wa la ayeke tâ sioni. Ala so aye ti changé sioni sarango ye ti ala ape ayeke ngbâ ande na yâ ti fini dunia ti Nzapa ape.​—Psaume 37:9, 10; Ésaïe 11:3, 4; 65:20; Matthieu 9:4.

Aye so e sara tënë ni so ayeke gi ambeni mbage ti aye so Bible afa ândö na ndo ti pendere ngoi so ayeke ga so. Na ngoi so Royaume ti Nzapa ayeke komande sese, siriri ayeke mû ande ndo kue nga ayeke ngbâ kpu na kpu (Psaume 37:11, 29). Apasi na avundu so azo ayeke na ni ayeke hunzi. Nzapa wani la atene ni na yanga ti lo mveni. Lo tene: “Bâ, Mbi sara si ye kue aga fini. . . .tënë so ayeke tâ tënë na biani.”​—Apocalypse 21:5.