Fa ye na amolenge ti mo
Jérémie azia kusala ni pëpe
A SI na mo awe ti tene bê ti mo anze ti sara mbeni ye na mo yeke na nzara ti sara ye ni so pëpe?—a A si na azo mingi. A si ândö nga na Jérémie na ngoi so lo de maseka. Ye oko, lo zia si atënë wala asarango ye ti azo apusu lo ti zia kusala ti lo pëpe. Zia e bâ tongana nyen Jérémie ayeke mbeni zo so ayeke nde mingi na lê ti Nzapa, même atâa so lo yeke na nzara ti zia kusala ti lo.
Kozoni si a dü Jérémie, tâ Nzapa, Jéhovah, asoro lo ti ga prophète ti tene lo gboto mê ti azo so ayeke sara ye so anzere na Nzapa pëpe. Mo hinga tënë so Jérémie atene na Jéhovah ngu mingi na pekoni?— “Mbi hinga lege ti sara tënë pëpe, teti mbi de molenge.”
Ti mo, Jéhovah atene nyen na Jérémie?— Na nzoni bê me lo woko yâ ti tënë ni pëpe, lo tene: ‘Tene pëpe, mo de molenge, teti fade mo gue na azo kue so Mbi to mo na ala, na fade mo fa tënë ti ye kue so Mbi komande mo. Zia mbeto ti ala asara mo pëpe.’ Ngbanga ti nyen? Jéhovah atene: “Mbi yeke na mo ti sö mo.”—Jérémie 1:4-8.
Me, tongana ti so e tene fade awe, bê ti Jérémie anze na pekoni. A yeke ndali ti so azo ahe lo teti so lo yeke sara na Nzapa. Jérémie atene: ‘Azo kue ahe mbi; mbi ga ye ti he lakue.’ Tongaso lo ye ti zia kusala ni. Lo tene: “Fade mbi sara tënë ti [Jéhovah] pëpe, wala mbi sara tënë na iri ti Lo mbeni pëpe.” Me, biani lo zia kusala ni?
Jérémie atene: ‘Tënë ti L’Éternel aga na yâ bê ti mbi tongana wâ so agbi na yâ bio ti mbi; mbi woko na lege ti batango ye so.’ (Jérémie 20:7-9). Atâa so na mbeni ngoi mbeto asara Jérémie, ndoye ti lo na mbage ti Jéhovah asara si lo zia kusala ni pëpe. Zia e bâ tongana nyen Nzapa abata Jérémie ngbanga ti so lo zia kusala ni pëpe.
Jéhovah atene na Jérémie ti tene na azo ti Jérusalem so fade a yeke futi kodoro ni tongana ala changé sioni lege ti ala pëpe. Tongana Jérémie agboto mê ti azo ni, ala sara ngonzo na ala tene: “Zo so alingbi na kui.” Ye oko Jérémie ahunda mingi na ala ti “mä yanga ti L’Éternel Nzapa”. Na lo tene: ‘A lingbi i hinga so, tongana i fâ mbi, fade i sara si mênë ti zo ti mbilimbili aga na li ti i mveni, teti L’Éternel si ato mbi na i ti sara tënë so kue na i.’ Mo hinga ye so asi na pekoni?—
Bible atene: “Amokonzi na azo kue asara tënë na asacrificateur na aprophète, ala tene, Zo so alingbi na kui pëpe, teti lo sara tënë na e na iri ti L’Éternel Nzapa ti e.” Ni la tongana Jérémie asara mbeto pëpe na lo ngbâ ti sara kusala ni, Jéhovah abata lo. Zia e bâ fadeso ye so asi na Urie, so ayeke nga mbeni prophète ti Jéhovah so asara ye tongana Jérémie pëpe.
Bible atene: ‘Urie ayeke fa tënë na iri ti L’Éternel na ndo Jérusalem, a lingbi na tënë kue ti Jérémie.’ Me tongana ngonzo agbu Gbia Jojakim na tere ti Urie, mo hinga ye so Urie asara?— Mbeto asara lo, lo zia ti sara ye so bê ti Nzapa aye, na lo kpe lo gue na Égypte. Tongaso gbia ni atokua azo kâ ti gi lo ti ga na lo. Na tongana ala gbu lo, mo hinga ye so sioni gbia so asara?— Lo fâ Urie na épée!—Jérémie 26:8-24.
Ngbanga ti nyen mo yeke tene so Jéhovah abata Jérémie na lo bata Urie pëpe?— Tâ tënë, mbeto asara Jérémie tongana ti so asara Urie, me ti Jérémie, lo zia pëpe ti sara na Jéhovah na lo kpe pëpe. Lo zia kusala ni pëpe. Ti mo e manda nyen na ndo ti tapande ti Jérémie?— A yeke so na ambeni ngoi a lingbi ti duti ngangu ti sara ye so Nzapa ahunda, me a lingbi e zia bê ti e na lo na e mä yanga ti lo lakue.
[Kete tënë na gbe ni]
a Tongana mo yeke diko ye na amolenge na mo bâ a zia (—), a fa so a lingbi mo luti na mo hunda tënë na ala.
Ahundango tënë:
○ Kusala wa Nzapa asoro lani Jérémie ti sara?
○ Ngbanga ti nyen Jérémie aye ti zia kusala ni?
○ Ngbanga ti nyen Nzapa abata Jérémie, me lo bata Urie pëpe?
○ Mo manda nyen na ndo ti tapande ti Jérémie?