Ala amaseka, ala maï nzara ti ala ti sara na Jéhovah

“Fadeso, mo dabe mo na Lo so acréé mo, na lâ ti pendere ti mo.”​—ZO-TI. 12:3.

1. Tisango ndo wa a mû lani na amolenge so ayeke na Israël?

ASARA angu 3500 tongaso awe so Moïse, prophète ti Jéhovah, amû yanga na aprêtre nga na a-ancien ti Israël lo tene: “I bungbi azo kue, akoli, awali, amolenge . . . , si ala mä tënë so, ala manda, ala kpe mbeto ti L’Éternel Nzapa ti i, na ala bata na ala sara na lege ti tënë kue ti Ndia so.” (Deut. 31:12). Bâ so, a hunda na akoli, awali nga na amolenge ti bungbi ti voro Jéhovah. Biani, même amaseka ayeke na popo ti azo so a hunda na ala ti mä tënë, ti manda ye, na ti sara ye alingbi na aye so Jéhovah afa.

2. Na lege wa Jéhovah afa so lo bi bê ti lo na amaseka so ayeke na yâ ti congrégation ti akozo Chrétien?

² Na ngoi ti akozo Chrétien nga Jéhovah angbâ ti fa so lo bi bê ti lo na amaseka so akpe mbeto ti lo. Na tapande, na lege ti yingo ti lo, lo pusu bazengele Paul ti zia na yâ ti ambeni mbeti so lo tokua na acongrégation ambeni fango ye so abâ gi amaseka. (Diko aÉphésien 6:1; aColossien 3:20.) A-Chrétien so ade maseka na so asara ye alingbi na awango so, angbâ lakue ti kiri singila na Babâ ti ala ti yayu so andoye ala na lo iri tënë nzoni na ndo ti ala.

3. Tongana nyen laso amaseka afa so ala ye ti sara na Nzapa?

³ A tisa laso amaseka ti bungbi ti voro Jéhovah? En! Biani, a nzere mingi na azo ti Nzapa kue ti bâ so amaseka mingi mingi na ndo ti sese kue amû na bê kue wango ti Paul so atene: “Zia e bi lê na ndo ti mba ti pusu mba ti duti na ndoye na ti sara apendere kusala, e kpe bungbi ti e pëpe, tongana ti so ambeni zo ayeke sara ka, me e wa tere na popo ti e nga e ngbâ ti sara ni mingi ahon ti kozo, so ala bâ lango ni ayeke pusu nduru.” (aHéb. 10:24, 25). Na ndo ni, akete molenge mingi ayeke fa nzoni tënë ti Royaume ti Nzapa legeoko na ababâ na amama ti ala (Mat. 24:14). Nga ti fa ndoye so ala yeke na ni na bê ti ala na mbage ti Jéhovah, ngu oko oko amaseka saki na saki ayeke mû batême na ala wara aye ti nzoni mingi na pekoni ndali ti so ala ga adisciple ti Christ.​—Mat. 16:24; Marc 10:29, 30.

Ngoi ni la, yeda na tisango ndo so biani

4. A lingbi amaseka awara ngu oke awe si ala yeda na tisango ndo so Nzapa atisa ala ti sara na lo?

⁴ Zo-ti-fa-tene 12:3 atene: “Fadeso, mo dabe mo na Lo so acréé mo, na lâ ti pendere ti mo.” Ala amaseka, ala bâ ti ala so a lingbi ala wara ngu oke si ala yeda na tisango ndo so a tisa ala ti voro Jéhovah na ti sara na lo so? Mbeti ti Nzapa afa mbeni ngu pëpe. Me, sara mbeto pëpe ndali ti so mo pensé so mo ngbâ kete mingi mo lingbi pëpe ti mä tënë ti Jéhovah na ti sara na lo. Atâa mo yeke na ngu oke, a wa mo ti yeda na tisango ndo so sân ti ku.

5. Ababâ na amama alingbi ti sara nyen ti mû maboko na amolenge ti ala ti gue na li ni na lege ti yingo?

⁵ Ti mingi ti ala amaseka, a yeke babâ na mama ti ala wala mbeni oko si amû maboko na ala ti gue na li ni na lege ti yingo. Tongana ti mo nga ayeke tongaso, mo yeke tongana Timothée so a sara tënë ti lo na yâ ti Bible. Na ngoi so lo de foroto, mama ti lo Eunice na âta ti lo Loïs afa na lo aMbeti so ayeke nzoni-kue (2 Tim. 3:14, 15). Tongana ti Timothée, babâ na mama ti mo amanda Bible na mo, asambela na mo, ague na mo na abungbi nga na akota bungbi ti azo ti Nzapa, nga ala gue na mo na fango tënë. Biani, kusala ti fango lege ti Nzapa na mo ayeke mbeni kota kusala mingi so Jéhovah la amû ni na babâ na mama ti mo. So ala ndoye mo na ala yeke bi bê ti ala na mo so, mo bâ ni na nene ni?​—aProv. 23:22.

6. (a) Ti gue oko na Psaume 110:3, Jéhovah aye si e voro lo tongana nyen? (b) Aye wa e yeke gue ti bâ fadeso?

⁶ Me, na ngoi so ala amaseka ala yeke kono, Jéhovah aye si “ala wani alingbi ti hinga ye so bê ti Nzapa aye, so ayeke nzoni, so anzere nga so alingbi kue”, tâ gi tongana ti so Timothée asara (aRom. 12:2). Tongana mo sara tongaso, mo yeke sara ande kusala mingi na yâ ti congrégation. Mo yeke sara ni pëpe ndali ti so babâ na mama ti mo aye, me ndali ti so mo ye ti sara ye so Nzapa aye. Tongana mo yeke sara na Jéhovah na bê ti mo wani, a yeke nzere na lo mingi (Ps. 110:3). Tongaso, na lege wa mo lingbi ti fa so mo ye ti maï nzara ti mo ti mä tënë ti Jéhovah na ti sara ye alingbi na afango ye ti lo? E yeke bâ akota ye ota so na yâ ni mo lingbi ti fa ni. Aye ota so aluti na ndo ti mandango ye, sambela nga sarango ye. Zia e bâ aye so oko na oko.

Gi ti hinga so Jéhovah ayeke tâ zo

7. Tongana nyen Jésus azia nzoni tapande ti mandango Mbeti ti Nzapa? Nyen la amû maboko na lo ti sara ni?

⁷ Dikongo Bible ayeke kozo ye so na lege ni mo lingbi ti fa so mo ye ti maï nzara ti mo ti sara na Jéhovah. Tongana mo diko Mbeti ti Nzapa lakue lakue, mo yeke kaï nzara ti mo na lege ti yingo na mo yeke hinga aye so ayeke na ngere mingi (Mat. 5:3). Jésus azia na e tapande ni. Mbeni lâ na ngoi so lo yeke lani na ngu 12, babâ na mama ti lo awara lo na yâ ti temple, “lo yeke duti na popo ti awafango ye, lo yeke mä ala nga lo yeke hunda tënë na ala”. (Luc 2:44-46). Tâ gi na ngoi so lo ngbâ kete, Jésus amaï nzara ti lo teti Mbeti ti Nzapa nga lo ye ti gbu ndani. Nyen la amû maboko na lo ti sara tongaso? Kite ayeke pëpe so mama ti lo Marie na Joseph, babâ so abata lo, amû maboko na lo mingi. Ala yeke awakua ti Nzapa so afa lani tënë ti Nzapa na Jésus na ngoi so lo de foroto.​—Mat. 1:18-20; Luc 2:41, 51.

8. (a)  Na ngoi wa la a lingbi ababâ na amama ato nda ti zia nzara ti Bible na yâ ti amolenge ti ala? (b) Fa mbeni tapande so afa nzoni ti fango ye na amolenge na ngoi so ala ade foroto.

⁸ Legeoko nga, laso ababâ na amama so akpe mbeto ti Nzapa ahinga so a yeke kota ye mingi ti zia nzara ti Bible na yâ ti amolenge ti ala na ngoi so ala ade foroto (Deut. 6:6-9). A yeke ye so mbeni ita-wali so iri ti lo ayeke Rubi asara lani ngoi kete na pekoni so lo dü Joseph, kozo molenge ti lo ti koli. Lâ na lâ, Rubi ayeke diko na lo Mbeti ti ambaï ti yâ ti Bible. Na ngoi so Joseph ayeke kono, Rubi amû maboko na lo ti bata na li ti lo ambeni versê ti Bible. Fango ye so aga na ye ti nzoni na Joseph? Kete na pekoni so lo manda ti sara tënë, Joseph afa peko ti ambaï ni lo mveni. Na ngoi so lo wara ngu oku, lo sara kozo devoir ti lo na Ekole ti Kusala ti aChrétien.

9. Ngbanga ti nyen a yeke kota ye ti diko Bible na ti gbu li na ndo ni?

⁹ Ti sara si ala gue na li ni na lege ti yingo, a yeke nzoni ala amaseka ala zia si dikongo Bible lâ oko oko aga ye so ala yeke sara lakue juska ala ga kangba (Ps. 71:17). Ngbanga ti nyen dikongo Bible alingbi ti mû maboko na mo ti gue na li ni? Bâ tënë so Jésus atene na yâ ti sambela na Babâ ti lo: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa.” (Jean 17:3). Biani, na ngoi so mo yeke hinga ye mingi na ndo ti Jéhovah, mo yeke bâ lo tongana tâ zo na lê ti mo ahon ti kozo na mo yeke kiri ti ye lo mingi (aHéb. 11:27). Tongaso, na ngoi kue so mo yeke diko mbeni mbage ti Bible, mû ngoi ni so ti manda mbeni fini ye na ndo ti Jéhovah. Hunda tere ti mo: ‘Ye so mbi diko afa na mbi nyen na ndo ti asarango ye ti Jéhovah? Tongana nyen versê so afa so Nzapa andoye mbi na lo bi bê ti lo na mbi?’ Ti mû ngoi ti gbu li na ndo ti ahundango ndo so, a yeke mû ande maboko na mo ti hinga abibe ti Jéhovah, atënë ti bê ti lo nga na aye so lo hunda na mo. (Diko aProverbe 2:1-5.) Na tapande ti maseka Timothée, ye so mo manda na yâ ti Mbeti ti Nzapa ayeke “ga na mo ti ye pekoni” na ayeke pusu mo ti voro Jéhovah na bê ti mo wani.​—2 Tim. 3:14.

Lege so sambela ayeke sara si mo ye Jéhovah mingi

10, 11. Na lege wa sambela ayeke mû maboko na mo ti maï nzara ti mo ti sara na Nzapa?

¹⁰ Sambela ayeke use ye so na lege ni mo lingbi ti maï nzara ti mo ti sara na Jéhovah na bê ti mo kue. Psaume 65:3 atene: “O Mo so Mo mä sambela, fade mi kue aga na Mo.” Même na ngoi so azo ti Israël ayeke lani mara so Nzapa ate mbela na ala, awande so aga na temple ti Jéhovah alingbi ti ga nduru na lo na yâ ti sambela (1 aGbia 8:41, 42). Nzapa ayeke zia kangbi na popo ti azo pëpe. Azo so ayeke bata acommandement ti lo ayeke na kite oko pëpe so lo yeke mä ala (aProv. 15:8). Biani, tënë “mi kue” aye nga ti sara tënë ti ala amaseka.

¹¹ Ala hinga so nzoni lisoro ayeke kota ye teti atâ kamarade. Mo ye peut-être mingi ti fa apensé ti mo, agingo bê ti mo nga na atënë ti bê ti mo na mbeni kamarade ti mo so mo ye lo mingi. Legeoko nga, mo yeke sara lisoro na Kota Wasarango mo na lege ti asambela so atënë ti yâ ni alondo na bê ti mo (aPhil. 4:6, 7). Sara tënë na Jéhovah tongana ti so mo yeke zi bê ti mo na mbeni babâ wala mama so aye mo wala mbeni kamarade ti mo so mo ye lo mingi. Ti tâ tënë ni, kota kamba ayeke na popo ti lege so mo yeke sambela Jéhovah nga na lege so mo yeke bâ na lo. Tongana songo ti mo na Jéhovah akpengba, mo yeke bâ ande so atënë ti yâ ti sambela ti mo ayeke ne ahon ti kozo.

12. (a) Ngbanga ti nyen asambela so tënë ti yâ ni ane ayeke pëpe gi asenge tënë? (b) Nyen la ayeke mû maboko na mo ti bâ so Jéhovah ayeke nduru na mo?

¹² Me, asambela so atënë ti yâ ni ane ayeke pëpe gi asenge tënë. A ndu atënë ti gbe ti bê ti mo. Na yâ ti asambela ti mo, fa so mo ndoye Jéhovah mingi, mo ne lo mingi na fa so mo zia bê ti mo kue na lo. Na ngoi so mo bâ tongana nyen Jéhovah akiri tënë na asambela ti mo, mo wani mo yeke bâ ande so “L’Éternel ayeke nduru na azo kue so adi iri ti Lo”. (Ps. 145:18). Biani, Jéhovah ayeke ga nduru na mo, lo yeke kpengba mo ti ke Zabolo na ti mû anzoni desizion.​—Diko Jacques 4:7, 8.

13. (a) Na lege wa dutingo na kpengba songo na Nzapa amû maboko na mbeni ita-wali? (b) Na lege wa kpengba songo na Nzapa ayeke mû maboko na mo ti hon ndo ti ngangu so amba ti mo ayeke sara na ndo ti mo?

¹³ Bâ tongana nyen dutingo na kpengba songo na Jéhovah amû ngangu na Cherie. Na lycée, lo wara acadeau ndali ti so lo wara anzoni note nga ndali ti so lo yeke sara angia ti awanguru nzoni mingi. Na ngoi so lo hunzi ekole ti lo na lycée, a mû na lo bourse ti mû lege na lo ti manda mbeti ayo. Cherie atene: “Mo bâ bourse ni, bê ti mo ayeke pusu mo ti yeda na ni na azo so afa na mbi angia ti awanguru nga na amba ti mbi ti ekole apusu mbi ti yeda na ni.” Me lo hinga so, ti manda mbeti ayo, a yeke hunda ande na lo ti mû ngoi ti lo mingi ti diko mbeti na ti leke tere ti lo ndali ti mandako ti angia ti awanguru. Ye so ayeke sara si lo yeke wara ande ngoi mingi ti sara na Jéhovah pëpe. Cherie asara lani nyen? Lo tene: “Na pekoni so mbi sambela Jéhovah, mbi ke ti mû bourse ni na mbi mû kusala ti pionnier permanent.” Lo ga nduru ti sara ngu oku na yâ ti kusala ni awe. Cherie atene: “Mbi yeke na vundu kete pëpe. Mbi yeke na ngia ndali ti so mbi hinga so desizion so mbi mû anzere na Jéhovah. Biani, tongana mo zia Royaume ti Nzapa na kozo ndo, fade a yeke zia na mo aye kue na ndo ni.”​—Mat. 6:33.

Nzoni sarango ye ti mo ayeke fa so ‘bê ti mo ayeke na sioni kete pëpe’

14. Ngbanga ti nyen nzoni sarango ye ti mo ayeke kota ye mingi na lê ti Jéhovah?

¹⁴ Sarango ye ti mo ayeke ota ye so na lege ni mo lingbi ti fa so mo ye ti sara na Jéhovah na bê ti mo wani. Jéhovah ayeke iri tënë nzoni na ndo ti amaseka so angbâ lakue ti duti na nzoni tambela. (Diko Psaume 24:3-5.) Samuel so ayeke lani maseka ake ti mû peko ti sioni sarango ye ti amolenge ti Kota Prêtre Elie. Azo abâ lani nzoni tambela ti Samuel. Bible atene: “Samuel amaï lakue, na lo ga nzoni na lê ti L’Éternel, na lê ti azo nga.”​—1 Sam. 2:26.

15. Fa ambeni raison so ndali ni mo ngbâ ti duti na nzoni sarango ye.

¹⁵ E yeke na yâ ti mbeni dunia so asi singo na azo so bazengele Paul asara tënë ti ala. A yeke azo so andoye gi tere ti ala wani, azo ti baba, azo so ake yanga ti ababâ na amama ti ala, azo so ahinga ti kiri singila pëpe, azo so ayeke be-ta-zo pëpe, azo so ayeke asioni zo, azo so wuma ti ala ahon ndo ni nga na azo so andoye angia ahon ti ndoye Nzapa (2 Tim. 3:1-5). Tongaso, a yeke kete ye pëpe teti mo ti ngbâ lakue ti duti na nzoni tambela na popo ti mara ti azo tongaso. Ye oko, na ngoi kue so mo yeke sara ye so ayeke nzoni na mo ke ti sara ye ti sioni, mo yeke fa so mo mû mbage ti Nzapa na ndo ti tënë so andu zo so ayeke na droit ti komande dunia kue (Job 2:3, 4). A yeke nzere nga ande na mo ti hinga so mo kiri tënë na pendere tisango ndo ti Jéhovah so: “Molenge ti mbi, mo duti na ndara na mo mû ngia na bê ti mbi, si mbi lingbi kiri tënë na zo so azonga mbi.” (aProv. 27:11). Na ndo ni, ti hinga so mo zia ngia na bê ti Jéhovah ayeke maï nzara ti mo ti sara na lo.

16. Tongana nyen mbeni ita-wali azia ngia na bê ti Jéhovah?

¹⁶ Na ngoi so mbeni ita-wali so iri lo ayeke Carol ayeke lani na ngu 13-19, lo sara ye lakue alingbi na aye so Bible afa tongana lo yeke gue na ekole. Azo abâ nzoni tambela ti lo. Nyen la asi lani? Amba ti Carol ti ekole ahe lo ndali ti so yingo-ti-hinga ti lo so Bible afa lege na ni amû lege na lo pëpe ti sara amatanga nde nde nga na amatanga ti kodoro. Na angoi ni so, lo wara lege ti fa na amba ti lo aye so lo mä na bê na ni. Angu mingi na pekoni, mbeni mba ti Carol so ândö lo na lo asara ekole atokua na lo mbeni mbeti. Na yâ ni lo tene: “A ninga awe la mbi yeke gi ti wara mo na ti kiri singila na mo. Mo yeke lani mbeni Chrétien so ade maseka na so ayeke na nzoni tambela na mo yeke mbeni nzoni tapande. Na mbeto pëpe mo ke lani ti yôro tere ti mo na yâ ti amatanga nde nde. Azo abâ lani aye so kue. Kozo Témoin ti Jéhovah so mbi tingbi na lo ayeke mo.” Nzoni tapande ti Carol asara ye lani mingi na ndo ti mba ti lo ti ekole so na ye so a sara si na pekoni lo to nda ti manda Bible. Na yâ ti mbeti so lo tokua na Carol, lo fa so lo wara batême asara ngu 40 na ndo ni awe. Na tapande ti Carol, ala amaseka so laso ayeke na mbeto pëpe ti sara ye alingbi na aye so Bible afa, ala lingbi ti pusu azo so aye tâ tënë ti hinga Jéhovah.

Amaseka so ayeke sepela Jéhovah

17, 18. (a) Bê ti mo ayeke tongana nyen na ndo ti amaseka so ayeke na yâ ti congrégation ti mo? (b) Ye ti nzoni wa ayeke ku amaseka so akpe mbeto ti Nzapa?

¹⁷ E kue so e yeke na yâ ti bungbi ti Jéhovah so ayeke na ndo ti sese kue, bê ti e apika mingi ti bâ amaseka saki na saki so ayeke sara na Jéhovah na bê ti ala kue! Amaseka so ayeke maï nzara so ala yeke na ni ti voro Jéhovah na lege so ala yeke diko Bible lâ oko oko, ala yeke sambela na ala yeke sara ye ague oko na ye so bê ti Nzapa aye. Nzoni tapande ti amaseka so azia ngia na bê ti ababâ na amama ti ala nga na bê ti awakua ti Jéhovah kue.​—aProv. 23:24, 25.

¹⁸ Na yâ ti ngoi so ayeke ga, amaseka so ayeke be-ta-zo ayeke duti ande na popo ti azo so ayeke sö kuâ ti lï na yâ ti fini dunia so Nzapa amû zendo ni (Apoc. 7:9, 14). Na yâ ni, ala yeke wara ande gbâ ti aye ti nzoni na ngoi so ala yeke ngbâ lakue ti kiri singila na Jéhovah. Ala yeke wara ande lege ti sepela lo teti lakue lakue.​—Ps. 148:12, 13.

Mo lingbi ti fa nda ni?

• Na lege wa amaseka alingbi laso ti mû mbage na yâ ti tâ vorongo?

• Tongana mo ye ti bâ nzoni na lege ti dikongo Bible, ngbanga ti nyen a yeke nzoni ti gbu li na ndo ti ye so mo diko?

• Na lege wa sambela ayeke mû maboko na mo ti ga nduru mingi na Jéhovah?

• Nzoni tambela ti mbeni Chrétien asara nyen na ndo ti mbeni zo?

[Foto na lembeti 17]

Dikongo Bible lâ oko oko ayeke ye so mo yeke sara ka lakue?