Ala sara mbeto ti nda ni mbeni pëpe

NA YÂ ti angu so aga kete kozoni na ngu 1980, Gary na Karen abâ atene futingo ti dunia so aga nduru ti si awe. Ye so asara si ala londo na yâ ti gbata ti ala ala gue na mbeni kete kodoro na ala mû desizion ti tene ala wani aleke aye so ala yeke na bezoin ni. Ala ye ti sö kuâ.

Ti wara akode so ala yeke na bezoin ni, ala vo abuku, ala gue na yâ ti ambeni bungbi so a leke ni ti fa ye na azo, ala hunda wango na mbage ti azo ti hinga ye so ala lingbi ti sara ti sö kuâ. Ala fâ yaka nga ala lu akeke 50 so a yeke te ka lê ni. Ala bata gbâ ti agbakuru ti kua nga na angongoa ti kobe. Ala manda ti lu angongoa ti kobe na ti bata alê ti kobe ni. Mbeni kamarade ti ala afa na ala tongana nyen ti fâ nyama nga ti sara hulengo ni. Karen agi ti hinga akugbe ti yâ ti gbako nga na ambeni gunda ti keke so ala lingbi ti te ni tongana kobe ti ala ahunzi. Gary amanda ti sara mbeni ye tongana pétrole na lege ti nzo, lo manda nga ti leke foyé ti tongo na kobe nga ti leke da.

Karen atene: “Ndali ti aye ti ngangu so ayeke si lani na yâ ti dunia na ngoi ni so, mbi pensé so na yâ ti kete ngoi a yeke futi azo ti dunia.” Gary atene: “Tongana tanga ti amaseka kue, mbi lï lani na yâ ti mbeni bungbi so ayeke gi ti kanga lege na tënë ti mara, ti bira ti kodoro ti Vietnam nga na tënë ti goro. Me hio, mbi ga ti bâ so aye ni ayeke biani ngangu mingi. Ye ni ayeke mo bâ mo tene azo ayeke sara ye so ayeke gue na ala ti wara kuâ tongana aye angbâ ti gue gi tongaso.”

Gary atene: “Na mbeni bï, so mbi yeke na ngoi kete, mbi mû Bible na mbi diko ni ti londo na Matthieu a si na Apocalypse. Na yâ ti abï osio so aga na pekoni, mbi kiri mbi diko ambeni mbage ni. Na lango oku ni na ndapre, mbi tene na Karen: ‘E yeke na yâ ti alango ti nda ni. Na yâ ti kete ngoi, Nzapa ayeke zi aye ti sioni kue na ndo ti sese. A yeke nzoni e gi ti wara azo so ayeke sö ande kuâ.’ ” Gary na Karen ague na yâ ti abungbi ti vorongo Nzapa nde nde ti gi azo so aye ti leke tere ti ala ndali ti ngoi ti nda ni.

A ninga pëpe, aTémoin ti Jéhovah asi na yanga-da ti e na ala to nda ti manda Bible na e. Karen adabe ti lo lo tene: “Tere ti mbi anzere lani mingi ngbanga ti so a fa nda ti aversê ti Bible nzoni na mbi. Ye so mbi yeke gi lani ayeke tâ tënë na ndo ti ngoi ti nda ni na mbi wara ni awe. Biani, mbeni tâ beku teti kekereke ayeke dä. Me ye so ayeke nzoni mingi ayeke so, mbi to nda ti lë mbeni songo na Babâ ti mbi ti yayu, Wasarango ye kue nga Nzapa ti dunia.”

Gary atene: “Mbi bâ so mbi lingbi ti sara mbeni nzoni ye na yâ ti fini ti mbi. Na ngoi so mbi to nda ti manda Bible, mbi yeke manda ni na nzara ni na mbi ye ti zia lege ni pëpe. Mbi diko aprophétie ti Bible na mbi gi ti bâ tongana nyen so aprophétie ni aga tâ tënë. Aye so kue asara si mbi hinga biani so Nzapa aga nduru ti sara mbeni ye awe. Mbi pensé so ‘a lingbi azo aleke tere ti ala, ndali ti mbeni kota kpale pëpe, me ndali ti mbeni fini so Nzapa aye ti mû na e.’ ” Gary na Karen ayeke fadeso na nzoni bango ndo na ndo ti gigi ti kekereke. Ala yeke gi bê ti ala ndali ti futingo ti dunia so mbeni pëpe, me ala hinga biani so fade Jéhovah ayeke zi akpale so azo ayeke bâ pasi ndali ni laso na lo yeke sara si sese akiri aga paradis.

Ahon fadeso ngu 25 na pekoni awe, nyen la Gary na Karen ayeke sara? Karen atene: “Lakue mbi ngbâ ti gi ti tene mabe ti mbi nga na ndoye ti mbi na mbage ti Jéhovah akpengba, na mbi yeke mû maboko na amba ti mbi ti sara nga tongaso. Mbi na Gary e yeke mû maboko na mba ti tene na lege ti yingo sewa ti e akpengba nga e voro Nzapa beoko. E yeke sara kue ti bata mbeni nzoni kapa ti akusala ti e, na e yeke gi ti wara gbâ ti akungba pëpe tongaso si e lingbi ti wara lege ti bi bê ti e na amba ti e nga na abezoin ti ala.”

Gary akiri atene: “Mbi yeke sambela lakue ti tene Royaume ti Nzapa aga ti mû maboko na azo kutu na kutu. Lakue tongana mbi yeke fa nzoni tënë ti Royaume ti Nzapa na azo, mbi yeke sambela ti tene tënë ti beku so ayeke na yâ ti Bible andu kamême bê ti mbeni zo oko. Na yâ ti angu 25 na ndo ni so ahon Jéhovah akiri tënë na sambela so. Mbi na Karen e hinga so na yâ ti kete ngoi fade Jéhovah ayeke changé aye mingi na ndo ti sese, me e sara mbeto ti nda ni mbeni pëpe.”​—Matthieu 6:9, 10; 2 Pierre 3:11, 12.

[Foto ma lembeti 9]

Fadeso Gary na Karen aye mingi ti mû maboko na amba ti ala ti hinga beku so ayeke na yâ ti Bible