Lisoro na mbeni wali: Jésus ayeke Nzapa?

ATÉMOIN TI JÉHOVAH aye ka ti sara lisoro na azo na ndo ti Bible. Mbeni tënë ti yâ ti Bible ayeke dä so agbu bê ti mo na so mo ye ti hinga ndani? Mo ye ti hinga ye na ndo ti mbeni ye so aTémoin ti Jéhovah amä na bê dä wala so ala yeke sara ni? Tongaso, ti peko tongana mo tingbi na aTémoin ti Jéhovah, hunda tënë ni na ala. A yeke nzere ande na ala ti sara lisoro na mo na ndo ni.

Atënë so na gbe ni ge afa lisoro so mbeni Témoin ti Jéhovah alingbi ti sara na mbeni zo. Na tapande, mbeni Témoin ti Jéhovah, so e yeke iri lo Carine, ayeke fa tënë na mbeni wali so e yeke iri lo Samantha.

Ala yeke mä ka na bê na Jésus ape?

Samantha: Pasteur ti mbi atene so ala aTémoin ti Jéhovah ayeke mä ka na bê na Jésus ape. Tâ tënë la?

Carine: Zia mbi tene na mo kozoni so e mä na bê na Jésus. Na e, a lingbi zo amä na bê na Jésus si lo lingbi ti wara salut.

Samantha: Mbi kue mbi pensé tongaso.

Carine: So ayeke nzoni. Me peut-être mo hunda tere ti mo, mo tene: ‘Tongana aTémoin ti Jéhovah amä na bê na Jésus, ka ngbanga ti nyen la azo atene ti ala so ala mä na bê na Jésus ape?’

Samantha: En, mbi ye ti hinga ngbanga ti nyen.

Carine: Ti tene ni na nduru tënë, Jésus ayeke zo so e mä na bê na lo biani, me atënë so azo ayeke tene ka na ndo ti lo, kue la si e mä na bê na ni ape.

Samantha: Mo lingbi ti mû na mbi mbeni tapande?

Carine: En. Na tapande, ambeni zo atene so Jésus ayeke gi mbeni senge nzoni zo. Me ti e a yeke tongaso ape.

Samantha: Mbi nga kue mbi bâ lo tongaso ape.

Carine: Bango ndo ti mbi na ti mo ague oko. Use tapande ni ayeke so e aTémoin ti Jéhovah e yeda pëpe na ambeni fango ye so azo ayeke fa so ague nde na ye so lo Jésus wani atene na ndo ti songo ti lo na Nzapa.

Samantha: Ti tongana nyen ni la?

Carine: A-eglize mingi atene so Jésus ayeke Nzapa. A fa ni na mo nga tongaso ape?

Samantha: En, pasteur ti mbi afa na mbi so Nzapa na Jésus ayeke oko.

Carine: Mo pensé so ti tene e hinga tâ tënë na ndo ti Jésus, a yeke nzoni e gi ti hinga ye so lo wani lo fa na ndo ti lo ape?

Samantha: Mbi pensé tongaso.

Jésus atene ti lo nyen?

Carine: Zia e bâ mbeni versê so azi lê ti e na ndo ti tënë so. A yeke na mbeti ti Jean 6:38. E mä tënë so Jésus atene: “Mbi londo na yayu mbi zu ti sara pëpe ye so bê ti mbi aye, me ti sara ye so bê ti lo so atokua mbi aye.” Tongana Jésus ayeke fade Nzapa, ka tënë ni so ayeke tongana nyen?

Samantha: Hûm, mbi hinga ape.

Carine: Bâ ni nzoni. Jésus atene pëpe so lo londo na yayu lo ga na sese ti sara ye so bê ti lo wani aye.

Samantha: Ni la. Lo tene so ni ga ti sara ye so bê ti Lo so atokua ni aye.

Carine: Bon, tongana Jésus ayeke Nzapa, ka zo wa la atokua lo na sese ge, zo wa? Nga, ngbanga ti nyen la Jésus asara ye so bê ti zo ni so aye?

Samantha: Mbi bâ ye so mo ye ti tene. Me, ade kue ape.

Carine: Zia e bâ mbeni tapande ni nde. A yeke mbeni tënë so Jésus atene, so ague oko na ti so fade. A yeke na Jean 7:16. Mo peut ti diko ni?

Samantha: En, mbi diko ni senge. “Jésus akiri tënë na ala, lo tene: ‘Ye so mbi fa ayeke ti mbi pëpe, me a yeke ti lo so atokua mbi.’”

Carine: Merci. Na lege ti versê so, Jésus afa gi ye ti li ti lo wani?

Samantha: Ên-ën. Lo tene so ye so lo fa so alondo na Zo so atokua lo.

Carine: Ni la. Bon, e kiri e hunda: ‘Zo wa la atokua Jésus, zo wa? Nga zo wa la azia atënë ni so na yanga ti Jésus ti fa na azo, zo wa?’ Zo ni so ayeke kota ahon Jésus ape? teti watokua ayeke kete na zo so atokua lo, ni la ape?

Samantha: So tënë! Lâ oko mbi diko versê so ape.

Carine: Bâ nga tënë so Jésus atene na Jean 14:28: “Ala mä so mbi tene na ala: Mbi yeke gue na fade mbi yeke kiri na mbage ti ala. Tongana ala ndoye mbi, ala yeke duti na ngia so mbi yeke gue na Babâ, teti Babâ ayeke kota ahon mbi.” Na lege ti versê so, ti Jésus songo ti lo na Nzapa ayeke tongana nyen?

Samantha: Lo tene so Babâ ni ayeke kota ahon ni. Peut-être lo ye ti tene so Nzapa ayeke kota ahon lo la!

Carine: Tâ gi ni la. Na tapande, bâ tënë so Jésus atene na adisciple ti lo na mbeti ti Matthieu 28:18. Versê ni atene: “A mû na mbi komandema kue na yayu nga na sese.” Est-ce que Jésus atene so depuis la ni yeke na komandema na ndo ti ye kue?

Samantha: Ên-ën, lo tene tongaso ape. Lo tene so a mû komandema ni na lo mungo.

Carine: Tongana fade Jésus ayeke Nzapa, a sara tongana nyen si a mû na lo komandema ni mungo? Nga, zo wa la amû na lo ni, zo wa?

Samantha: So kpengba hundango tënë la!

Lo yeke sara lani tënë na zo wa la?

Carine: Mbeni ye nde ayeke nga dä so tongana e tene Jésus ayeke Nzapa ni mveni, tënë ni ayeke gbu ngu ape.

Samantha: A yeke nyen?

Carine: A yeke ye so andu batême ti Jésus, so ayeke na Luc 3:21, 22. Mo ye ti diko ni?

Samantha: Nzoni. “Na peko ti so a batize azo kue awe, a batize Jésus nga, na tongana lo yeke sambela, yayu azi na yingo vulu aga na yâ ti mbeni tere tongana mbeni kolokoto na a zu na ndo ti lo, na mbeni go asara tënë na yayu, a tene: ‘Mo yeke Molenge ti mbi, so mbi ndoye mo mingi; bê ti mbi anzere na mo mingi.’”

Carine: Jésus asara nyen na peko ti so a batize lo?

Samantha: Lo sambela.

Carine: Ni la. Me tongana Jésus ayeke fade Nzapa, ka zo wa la lo yeke sambela lo so?

Samantha: Pendere hundango tënë la. Mbi yeke gue ti hunda na pasteur ti mbi.

Carine: Bâ nga so na peko ti so Jésus asigi na yâ ti ngu ni, mbeni zo asara tënë na lo na yayu. Zo ni so atene nyen?

Samantha: Lo tene so Jésus ayeke Molenge ti ni, so ni ndoye lo na so bê ti ni anzere na lo mingi.

Carine: Ni la. Me tongana Jésus ayeke fade Nzapa, ka zo wa la asara tënë ni so, zo wa?

Samantha: Lâ oko mbi pensé na ndo ni tongaso ape.

Ndali ti nyen Jésus atene Nzapa ayeke “Babâ” na ni yeke ti ni “Molenge” ni?

Carine: Mbi ye si e bâ mbeni tënë ni. E diko fade so Jésus atene Nzapa ayeke Babâ ti lo ti yayu. Nga na peko ti so lo wara batême, mbeni go asara tënë na Jésus atene Jésus ayeke Molenge ti ni. Jésus nga kue atene ni yeke Molenge ti Nzapa. Mbi hunda mo, mo yeke mû tapande ti azo wa na yâ ti mbeni sewa ti fa na mbi so azo use alingbi tere?

Samantha: Mbi yeke mû tapande ti aita use.

Carine: Ni la, na peut-être même tapande ti angbo. Me Jésus atene so Nzapa ayeke Babâ ni, na lo wani lo yeke Molenge ni. Tongaso, na mo Jésus aye ti tene nyen la?

Samantha: Mbi mä yâ ti tënë ti mo ni awe. So ti tene, na yâ ti tënë ti Jésus ni, lo fa so mbeni oko ayeke kota ahon mbeni.

Carine: Tâ gi ni la. Mo wara fade mbeni pendere tapande ti fa tongana nyen la azo use alingbi tere, so ayeke ti aita use wala angbo. Me tongana Jésus ayeke fade tâ lo Nzapa ni wani, mo pensé so Jésus, lo so ayeke Kota Wafango ye, ayeke mû mara ti tapande so ape? ti fa so lo na Nzapa alingbi tere ape? Peut-être même lo lingbi ti wara mbeni nzoni tapande ahon so. Mo bâ ni tongaso ape?

Samantha: En, lo lingbi fade ti sara tongaso.

Carine: Me a yeke ye so lo sara ape! Lo tene so songo ti lo na Nzapa ayeke tongana ti “Babâ” na “Molenge.”

Samantha: Mbeni nene tënë la mo bi na sese so.

Akozo disciple ti Jésus atene ti ala lani nyen?

Carine: Kozo si mbi zia mo, mbi ye ti tene e bâ mbeni tënë ni dä, tongana mo yeke na ngoi kete.

Samantha: En, mbi yeke na ngoi.

Carine: Tongana Jésus ayeke Nzapa, mo pensé so adisciple ti Jésus ayeke tene ni dandara ape?

Samantha: En, ala yeke tene ni.

Carine: Me versê oko asara tënë ni ape. Nde na so, bâ tënë so bazengele Paul atene na mbeti ti aPhilippien 2:9. Lo fa ye so Nzapa asara na peko ti so Jésus akui na lo zingo na kuâ. Versê ni atene: “Nzapa ayä lo [so ti tene, Jésus] na nduzu na mbeni kota ndo so ahon ti kozo ni, na nzoni bê Nzapa amû na lo iri so ayeke na ndo ti tanga ti airi kue.” Na yâ ti versê so, Nzapa asara nyen na Jésus?

Samantha: Nzapa ayä lo na nduzu na mbeni kota ndo so ahon ti kozo ni.

Carine: Tâ tënë. Me tongana fade Jésus, kozoni si lo kui, lo lingbi tere na Nzapa, na Nzapa, na peko ti so lo zingo lo, ayä lo na nduzu, mo pensé so Jésus ayeke duti kota ahon Nzapa ape? Zo wa la ayeke kota ahon Nzapa, zo wa?

Samantha: Zo oko ape.

Carine: Ni la, zo oko ape. Tongaso, na lege ti aye so e bâ fade ge so, ti mo Bible afa so Jésus ayeke Nzapa?

Samantha: Bible afa ni tongaso ape. Lo tene so Jésus ayeke Molenge ti Nzapa.

Carine: A yeke tongaso. Na hinga so e aTémoin ti Jéhovah e bâ Jésus na nene ni mingi. Na e, kuâ ti lo azi lege na abe-ta-zo kue ti wara salut, teti lo yeke Messie ni so Nzapa amû zendo ti lo ândö so.

Samantha: Mbi yeda nga na tënë ni so.

Carine: Me e lingbi ti sara nyen ti fa na Jésus so tënë ti kuâ ti lo agbu bê ti e mingi?a Mo hunda tënë so na tere ti mo awe?

Samantha: En, mbi hunda tere ti mbi na ndo ni awe.

Carine: Tongana mo ye, mbi lingbi ti kiri na semaine ti peko ti tene e bâ kiringo tënë ti Bible na ndo ni. A gue?

Samantha: En, semaine ti peko mbi yeke dä.

Carine: Mbi yeke ga ande. Bon iri ti mbi Carine. Ka ti mo ayeke zo wa?

Samantha: Samantha.

Carine: Tongaso, na yenga ti peko.

Samantha: Nzoni.

[Kete tënë na gbe ni]