Ye so asara si e yeke na ngia na yâ ti fini ti e

KETE na pekoni so mbi dü molenge ti mbi ti koli Gary na ngu 1958, mbi bâ so mbeni ye atambela nzoni na yâ ti tere ti lo pëpe. Me, adocteur amû nze bale-oko ti sara kizama ti hinga kobela ti lo ni nga a sara ngu oku na pekoni la akota docteur ti Londres aga ti fa biani so lo yeke na kobela. Ngu gumbaya na peko ti Gary, mbi dü molenge ti mbi ti wali Louise. Lo yeke na oko mara ti kobela ti Gary, me ti lo ni ayeke même ngangu ahon ti Gary. Ye so amû lani vundu na mbi mingi.

Adocteur ni atene na mbi yeke atene: “Amolenge ti mo use kue ayeke na kobela so a iri ni Laurence-Moon-Bardet-Biedla [nduru iri ti kobela so ayeke LMBB], me mawa ni ayeke so yorö ni ayeke dä pëpe.” Na ngoi ni so, kobela ni so, so andu acellule ti zo, asara azo mingi ape nga azo ahinga ye na ndo ni nzoni ape. Azo so ayeke na kobela so alingbi ti duti na kpale ti lê nga na nda ni lê ti ala avuko, ala kono ahon ndo ni, akete li ti maboko ti ala wala akete li ti gere ti ala alingbi ti duti omene, ala yeke maï hio hio ape, ala yeke na kpale ti tambela wala ti sarango ambeni ye, ala yeke na kobela ti diabète, ti yâ ti abio nga arein ti ala alingbi ti sara kua nzoni pëpe. Ye so asara si a yeke kete ye pëpe ti bâ lege ti amolenge ti mbi. Mbeni gingo nda ti ye so a sara ade ti ninga pëpe afa so tongana a mû azo 125 000 na Angleterre, zo oko la ayeke na kobela ti LMBB atâa so azo mingi alingbi ti duti na mbeni kobela so akpa ni, me so ayeke ti lo ngangu mingi ape.

JÉHOVAH AGA “TOUR TI E SO AYO NA NDUZU”

Kete na pekoni so mbi sara mariage, mbi sara lani lisoro na mbeni Témoin ti Jéhovah nga hio mbi hinga so ye so aTémoin ti Jéhovah afa ayeke tâ tënë. Me koli ti mbi asara nzara ti tënë ni pëpe. Kua ti lo asara si lakue e yeke voyagé na mbi wara lege ti gue na abungbi ti congrégation pëpe. Ye oko, lakue mbi yeke diko Bible nga mbi yeke sambela na Jéhovah. Mbi wara dengo bê na ngoi so mbi diko na yâ ti Bible so “[Jéhovah] ayeke Tour so ayo na nduzu teti azo so ye ti ngangu asara ala, Lo yeke Ndo Ti Bata tere na lâ ti vundu” nga so lo yeke ‘zia pëpe ala so agi [lo].’​—Ps. 9:10, 11.

Na ngoi so Gary ayeke na ngu omene, e zia lo na mbeni ekole so ayeke fa ye na azo so ayeke na kpale ti bango ndo so ayeke na mbongo ti Angleterre teti so lo yeke na kpale ti bango ndo. Lo lango na ekole ni kâ. Lo yeke iri mbi lakue na téléphone ti sara na mbi tënë na ndo ti aye so asara si lo yeke gi bê ti lo na mbi yeke mû maboko na lo ti hinga akozo gere ti fango ye ti Bible. Mbi nga kue mbi tï kobela angu kete na pekoni so mbi dü Louise. Mbi yeke na ambeni ngangu kobela use so ayeke son yâ ti tere ti mbi kue. Gary akiri na yanga-da na ngoi so lo yeke na ngu 16. Ye oko, kpale ti lê ti lo angbâ gi ti gue na li ni, a sara si na ngu 1975 a bâ so lo ga waziba awe. Na ngu 1977, koli ti mbi adö e azia.

Kete na pekoni so Gary akiri na yanga-da, e gue na abungbi nga e fa tënë na yâ ti mbeni congrégation so ayeke sara ye na ndoye. Na ngu 1974, mbi wara batême. Na ngoi so mbeni ancien amû maboko na Gary ti hinga so achangement so ayeke si na yâ ti tere ti lo afa so lo to nda ti ga koli awe, a nzere na mbi mingi. Ambeni Témoin amû maboko na mbi na sarango akua ti yâ ti da, nga a si na mbeni ngoi mbeni ndokua so ayeke mû maboko na azo ti mawa na yâ ti kodoro ni asoro ambeni ita ni oku so a yeke futa ala ti duti azo so ayeke bâ lege ti e. So tâ ye ti nzoni si e wara!

Gary ague lani na li ni na lege ti yingo juska lo wara batême na ngu 1982. Lo ye gi ti mû kua ti pionnier auxiliaire, tongaso mbi soro ti mû maboko na lo na fango tënë, na e sara ni teti ambeni ngu. Molenge ti mbi Gary ayeke lani na ngia mingi na ngoi so surveillant ti circonscription ahunda lo atene: “Gary, ngbanga ti nyen mo mû kua ti pionnier permanent ape?” A yeke biani tënë ti mungo ngangu na zo so Gary ayeke lani na bezoin ni. Na ngu 1990, lo ga pionnier permanent.

A zia ambeni ye tongana wen na yâ ti abio ti ngbonda ti Gary, kozoni ayeke na ngu 1999 nga use ni ayeke na ngu 2008. Me kpale ti seni ti Louise ayeke ngangu mingi ahon ti Gary. Mbi dü lo waziba, nga tongana mbi bâ so akete li ti gere ti lo ayeke omene, mbi hinga so lo nga kue lo yeke na kobela ti LMBB. Akizama so a sara ni kete na pekoni afa so aye ti yâ ti tere ti lo mingi ayeke na kpale. Ambeni ngu na pekoni, a sara na lo angangu opéré so na popo ni a opéré arein ti lo fani oku. Lo na Gary kue ayeke na kobela ti diabète.

Teti so Louise ahinga so akpale alingbi ti ga tongana a hunda ti tene a opéré lo, lo fa na adocteur nga na akota zo ti hôpital ndani so lo ye pëpe ti tene a mû mênë na lo. Ye so asara si lo na azo kue so ayeke bâ lege ti seni ti lo amä tere nzoni mingi.

E YEKE NA NGIA NA YÂ TI GIGI TI E

E sara aye mingi na yâ ti da ti e ti voro Jéhovah. Kozo ti tene bungbi ti Jéhovah asigigi na aye tongana akasete na aCD, mbi yeke mû lani angbonga mingi ti diko ambeti ti e na Gary nga na Louise. Laso aCD, aDVD nga ambeni ye so e lingbi ti téléchargé ni na ndo ti site www.pr2711.com amû lege na e kue, na angoi nde nde, ti bâ nzoni na lege ti akapa ti mandango Bible yenga na yenga. Ye so amû lege na e ti mû anzoni commentaire na ngoi ti abungbi.

Na ambeni ngoi, Gary ayeke manda akiringo tënë ti lo na li, nga tongana lo yeke na devoir na Ekole ti Kusala ti aChrétien, lo yeke sara ni na lege ti atënë ti lo wani. Na ngu 1995 lo ga wakua ti mungo maboko nga lo yeke lakue na gbâ ti aye ti sarango ni na Da ti Royaume, lo yeke na ndokua ti yambango azo nga lo yeke sara kua na ndokua ti sonorisation.

Gary na aita la ayeke gue na fango tënë. Teti so lo yeke na kobela ti yâ ti abio, mingi ni aita ayeke pusu lo na puse ti lo. Mbeni Témoin amû maboko na lo ti sara étude na mbeni zo so asara nzara ti tâ tënë. Gary awa nga mbeni ita so afa tënë pëpe a sara ngu 25. Zo ti mandango Bible ni nga na ita so Gary awa lo so, ala kue ayeke gue na abungbi fadeso.

Na ngoi so Louise ayeke na ngu gumbaya, âta ti lo ti wali afa na lo kpongo bongo. Mbi na mbeni oko ti awali so lani ayeke mû maboko na e na yanga-da, e fa na lo sarango broderie. Teti so Louise aye kua ti kpongo bongo mingi, lo yeke kpo apendere couverture na abébé nga na ambakoro so ayeke na yâ ti congrégation. Lo yeke leke nga ambeni mbeti so lo collé akete image dä na so zo alingbi ti sû kete lettre na ndo ni. Azo so awara ambeti so aye ni mingi. Na ngoi so Louise ade maseka mingi, lo manda ti pika mbeti na masini. Teti so lo yeke na mbeni ordinateur so ayeke sû tënë so zo ayeke tene, lo yeke tokua mbeti lakue na akamarade ti lo. Louise awara batême na ngoi so lo yeke na ngu 17. Na ngoi ti ambeni kapa ti fango tënë so ayeke nde, e yeke mû kua ti pionnier. Tongana Gary, Louise ayeke bata na li aversê ti fa mabe so lo yeke na ni na ndo ti mbeni dunia so Nzapa amû zendo ni so na yâ ni “fade lê ti awaziba alungula” nga “wakodoro atene pëpe, Mbi yeke na kobela.”​—És. 33:24; 35:5.

E kiri singila mingi ndali ti apendere tâ tënë so ayeke na yâ ti Bible. Bê ti e asi singo na ngia ndali ti mungo maboko so na ndoye congrégation ti e ayeke mû na e. Tongana fade e wara mungo maboko so ape, ka e yeke wara lege pëpe ti sara mingi ti aye so e sara. Grâce na mungo maboko ti Jéhovah, e yeke na ngia na yâ ti gigi ti e.