Kozo ye ni
Ndoye azo, me ndoye nginza wala akungba pëpe
BIBLE ATENE NYEN? “Ndoye ti nginza ayeke gunda ti asioni ye nde nde kue.”—1 Timothée 6:10.
NGBANGA TI NYEN A YEKE KETE YE PËPE? Azo ti sarango asabango ayeke pusu e ti bâ so aye so e yeke na ni alingbi e pëpe. Ala ye ti tene e mû ngoi ti e kue ti gi gi na nginza tongaso si e lingbi ti vo afini ye, aye so ayeke pendere mingi wala so ayeke kota ahon atanga ni. Nginza ayeke handa zo mingi na a yeke ngangu pëpe ti tene e ndoye ni. Ye oko, Bible agboto mê ti e atene so zo so andoye mosoro, ye ayeke lingbi lo lâ oko pëpe. “Zo so andoye argent, fade argent alingbi na nzara ti lo pëpe; wala lo so andoye ye mingi, fade wungo ni alingbi na nzara ti lo pëpe. So ayeke ye senge senge nga.”—Zo-ti-fa-tene 5:9.
MO LINGBI TI SARA NYEN? Mû tapande ti Jésus na gi ti ndoye azo ahon akungba. Jésus ayeke lani nduru ti ke aye kue so lo yeke na ni, même fini ti lo, ndali ti so lo ndoye azo (Jean 15:13). Lo tene: “Ngia ayeke mingi tongana zo amû ye na zo ahon ti wara ye na maboko ti zo.” (Kusala 20:35). Tongana e yeke mû ka ngoi ti e nga na aye so e yeke na ni ndali ti ambeni zo, azo ayeke sara nga na e tongaso. Jésus atene: “Ala mû ye lakue na azo, na azo ayeke mû ande ye na ala.” (Luc 6:38). Azo so ayeke tomba peko ti nginza wala akungba, ala yeke sara si ala wara vundu nga ala yeke bâ pasi (1 Timothée 6:9, 10). Me zo alingbi biani ti duti na ngia gi tongana lo ye amba ti lo na amba ti lo nga aye lo.
Ngbanga ti nyen mo gbu li ti mo pëpe ti bâ wala nyen la mo lingbi ti sara ti duti na aye mingi pëpe na yâ ti fini ti mo? Lege ayeke dä ti tene mo dö ambeni ye so mo yeke na ni mo zia wala ti zia lege ti ambeni ye so mo yeke gi ti wara ni? Tongana mo sara tongaso, mo lingbi ti wara ngoi mingi nga mo yeke duti na ngangu ti sara aye so ayeke kota ye mingi na yâ ti fini ti zo: ti mû maboko na azo nga ti sara na Nzapa so amû na mo aye kue so mo yeke na ni.—Matthieu 6:24; Kusala 17:28.
[Foto na lembeti 4]
“Ala mû ye lakue na azo, na azo ayeke mû ande ye na ala”