Mä yanga ti aberger so Jéhovah azia ala ti mû li ni

1, 2. Ngbanga ti nyen la Jéhovah atene ni yeke tongana mbeni berger?

JÉHOVAH atene ni yeke tongana mbeni berger (Ézéch. 34:11-14). Ye so amû maboko na e ti hinga asarango ye ti tere ti lo. Mbeni nzoni berger ayeke sara kue ti bâ lege ti angasangbaga so ayeke na gbe ti lo nzoni ti tene ala kui ape nga ala ngbâ na nzoni seni. Lo gue na ala na ndo so afini pere nga na ngu ayeke dä (Ps. 23:1, 2). Lo bâ ndo na ndo ti ala bï na lâ (Luc 2:8). Lo kanga lege na asioni nyama so aga ti sara sioni na ala (1 Sam. 17:34, 35). Lo yô na kate ti lo akete ni so a dü ala fini fini (És. 40:11). Lo gi peko ti ambeni so ahon yongoro na kundu ni na lo bâ lege ti ala so tere ti ala ason.​—Ézéch. 34:16.

² Teti so na ngoi ti giriri mingi ti awakua ti Jéhovah ayeke aberger nga azo ti fango yaka, ala hinga nzoni mingi ndani so Jéhovah atene ni yeke tongana mbeni berger. Ala hinga so angasangbaga ayeke na bezoin ti tene a bâ lege ti ala nga a bi bê na ala si ala ngbâ na nzoni seni nga si ala kui ape. Legeoko na lege ti yingo, azo ayeke na bezoin ti tene Jéhovah abâ lege ti ala nga lo fa lege na ala (Marc 6:34). Tongana Jéhovah abâ lege ti ala ape nga lo fa lege na ala ape ala yeke bâ pasi, mbeni ye ti bata ala ayeke duti dä ape nga ala yeke sara ye kirikiri, tâ gi tongana “angasangbaga so ayeke na berger pëpe”. (1 aGbia 22:17). Me, na nzoni bê Jéhovah amû na awakua ti lo aye so ala yeke na bezoin ni.

3. Aye wa la e yeke bâ na yâ ti article so?

³ E nga kue laso e hinga ndani so Jéhovah atene ni yeke tongana mbeni berger. Jéhovah angbâ ti bâ lege ti azo ti lo so ayeke tongana angasangbaga. E yeke bâ ande tongana nyen la laso Jéhovah afa lege na angasangbaga ti lo nga lo mû na ala aye so ala yeke na bezoin ni. E yeke bâ nga tongana nyen angasangbaga alingbi ti fa so ala yeda na fango lege so Jéhovah ayeke fa na ala na nzoni bê.

BERGER SO AYEKE NZONI AZIA AMBENI KOLI TI MÛ MABOKO NA LO

4. Jésus abâ lege ti angasangbaga ti Jéhovah tongana nyen?

⁴ Jéhovah azia Jésus Li ti congrégation ti aChrétien (aÉph. 1:22, 23). Jésus, “berger so ayeke nzoni mingi”, asara ye tâ gi tongana Babâ ti lo. Jésus andoye angasangbaga ni nga lo bâ lege ti ala. Lo ‘mû même fini ti lo teti angasangbaga ni.’ (Jean 10:11, 15). Fini ti Christ so lo mû na sandaga, a yeke mbeni nzoni matabisi so lo mû teti azo kue (Mat. 20:28). Jéhovah aye ti tene “zo kue so amä na bê na [Jésus], a lingbi ti futi lo pëpe, me lo wara fini ti lakue lakue.”​—Jean 3:16.

5, 6. (a) Azo wa la Jésus azia ala ti bata angasangbaga ti lo? Nyen la alingbi angasangbaga asara ti fa so ala yeda na ye so Jésus aleke so? (b) Kota raison so e yeke woko tere ti e na gbe ti a-ancien ayeke so wa?

⁵ Tongana nyen la angasangbaga ayeke fa so ala yeda so Jésus Christ ayeke Berger ti ala? Jésus atene: “Angasangbaga ti mbi amä go ti mbi, mbi hinga ala, na ala mû peko ti mbi.” (Jean 10:27). Angasangbaga amä go ti berger ti ala so ayeke nzoni mingi na lege so ala yeke mû lakue peko ti fango lege ti lo. Ala yeke sara nga ni na lege so ala yeke mä yanga ti akoli so lo zia ala ti fa lege na kundu ni. Jésus atene lani awe so abazengele ti lo nga na adisciple ti lo ayeke ngbâ ti sara ande kua so lo komanse lani yanga ni so. Ala yeke ‘fa ye’ nga ala yeke “mû kobe” na akete ngasangbaga ti lo. (Mat. 28:20; diko Jean 21:15-17.) Teti so a ngbâ ti fa nzoni tënë, wungo ti adisciple ti Christ angbâ gi ti gue na li ni. Tongaso, Jésus aleke ti zia aChrétien so akpengba na lege ti yingo ti bata acongrégation.​—aÉph. 4:11, 12.

⁶ Na ngoi so bazengele Paul ayeke sara lani tënë na a-ancien so ayeke na congrégation ti Éphèse na ngoi ti akozo Chrétien, lo tene so yingo vulu azia ala a-ancien ti “bata congrégation ti Nzapa”. (Kus. 20:28). Laso nga a yeke na lege ti yingo vulu la si a yeke zia a-ancien na yâ ti congrégation, ndali ti so a soro ala alingbi na aye so a hunda na yâ ti Mbeti ti Nzapa. Tongaso, tongana e mä yanga ti a-ancien e fa so e ne Jéhovah na Jésus, aKota Berger (Luc 10:16). So ayeke kota raison so e yeke woko tere ti e na gbe ti a-ancien ndali ni la. Me ambeni raison ni ayeke nga dä so ndali ni e yeke mû peko ti fango lege ti ala.

7. A-ancien ayeke mû maboko na e tongana nyen ti ngbâ ti kpengba songo ti e na Jéhovah?

⁷ A-ancien ayeke sara kua na awango nga na afango ye so ayeke na yâ ti Bible ti kpengba aita nga ti fa lege na ala. Ye so a-ancien ayeke gi ayeke pëpe ti fa na aita lege so alingbi ala sara ye na fini ti ala (2 aCor. 1:24). Me ala yeke mû maboko na aita na lege ti Bible ti mû anzoni desizion nga ti sara si aye atambela nzoni nga na siriri na yâ ti congrégation (1 aCor. 14:33, 40). A-ancien ‘ayeke bâ ndo na ndo ti a-âme’ na lege so ala yeke na nzara ti mû maboko na zo oko oko kue na yâ ti congrégation ti ngbâ ti duti na kpengba songo na Jéhovah. Ni la ala yeke nduru ti mû maboko hio na mbeni ita so ala bâ so lo ye ti “mû sioni lege” wala lo mû ni awe (aGal. 6:1, 2; Jude 22). E yeke na araison mingi ti “mä yanga ti ala so ayeke mû li ni”.​—Diko aHébreu 13:17.

8. A-ancien ayeke bata congrégation tongana nyen?

⁸ Bazengele Paul so ayeke mbeni nzoni berger amû wango na aita ti lo ti Colosses, lo tene: “Ala sara hange si mbeni zo agbu ala na kûkû pëpe na lege ti senda-ndara na senge tënë ti handa so alondo na ngobo ti azo, so ague oko na aye ti dunia so, so ayeke tongana aye ti molenge, me a gue oko na Christ pëpe.” (aCol. 2:8). Wango so amû maboko na e ti bâ mbeni nzoni raison so ndali ni a lingbi e mä wango so a-ancien ayeke mû na e na lege ti Bible. A-ancien ayeke bata aita ti ala na lege so ala yeke fa na aita ni ti sara hange na azo kue so ayeke gi ti sara si mabe ti ala awoko. Bazengele Pierre amû wango atene so “aprophète ti wataka” nga na “awafango ye ti wataka” ayeke gi ti “handa a-âme so gere ti ala aluti kpô pëpe” ti ke yanga ti Jéhovah (2 Pi. 2:1, 14). Laso, a-ancien alingbi ti mû mara ti wango so tongana bezoin ni ayeke dä. Teti so a-ancien ayeke aChrétien so akpengba na lege ti yingo ala hinga aye so ayeke si na yâ ti gigi. A zia ala a-ancien ndali ti so ala fa so ala mä yâ ti Bible nzoni nga ala hinga ti fa tâ tënë ti Bible na zo (1 Tim. 3:2; Tite 1:9). So ala kpengba na lege ti yingo, ala hinga ti bâ yâ ti ye nga ndara so ala wara na yâ ti Bible amû maboko na ala ti fa lege nzoni na aita.

BERGER SO AYEKE NZONI AMÛ KOBE NA ANGASANGBAGA NGA LO BATA ALA

9. Tongana nyen la Jésus ayeke fa lege nga lo yeke mû kobe na congrégation laso?

⁹ Na lege ti bungbi ti Jéhovah, lo yeke mû gbâ ti kobe ti yingo na aita kue na yâ ti dunia. E yeke wara gbâ ti awango ti Bible na yâ ti ambeti ti e. Na ndo ni, ngoi na ngoi bungbi ti Jéhovah ayeke fa lege droit na a-ancien ti congrégation, na lege ti alettre wala na lege ti afango ye so asurveillant so ayeke gue na ando nde nde afa. Na lege ti aye so kue la angasangbaga ayeke wara mbeni fango lege so ayeke polele.

10. Nyen la a-ancien alingbi ti sara ti mû maboko na aita so ahon yongoro na kundu ni?

¹⁰ Na lege ti yingo, a-ancien ayeke na kua ti bata amembre ti congrégation nga ti bâ lege ti ala. Ala yeke bi bê ti ala mingi na ndo ti aita so awoko wala ala so asara akota siokpari. (Diko Jacques 5:14, 15.) Ambeni ita ni ahon peut-être yongoro na kundu ni awe nga ala zia lege ti sarango akusala ti aChrétien. Nyen la alingbi mbeni nzoni berger asara ti mû maboko na aita so? Lo yeke sara kue ti gi peko ti ala nga ti mû wango na ala ti kiri na yâ ti congrégation. Jésus atene: “A yeke nzoni pëpe na lê ti Babâ ti mbi so ayeke na yayu tongana mbeni oko ti akete zo so agirisa.”​—Mat. 18:12-14.

A LINGBI E BÂ AWOKONGO SO A-ANCIEN AYEKE NA NI TONGANA NYEN?

11. Ngbanga ti nyen ambeni ita alingbi ti bâ so ayeke ngangu na ala ti mä yanga ti a-ancien?

¹¹ Jéhovah na Jésus ayeke aBerger so alingbi kue. Me akoli so ala soro ala ti mû li ni na yâ ti congrégation ayeke na siokpari na tere ti ala. Ye so alingbi peut-être ti sara si a yeke ngangu na ambeni ita ti mä yanga ti ala. Aita so alingbi ti tene: ‘Ala kue ala yeke na siokpari na tere ti ala tongana e. Ngbanga ti nyen ti mä wango ti ala?’ Tâ tënë, a-ancien ayeke na siokpari na tere ti ala. Me, a lingbi e bâ gi pëpe awokongo ti ala nga na afaute so ala yeke sara.

12, 13. (a) Na ngoi ti giriri, afaute wa la ambeni koli so Jéhovah amû lani na ala kua ti sarango ni asara? (b) Ngbanga ti nyen la na yâ ti Bible a sara tënë ti afaute ti akoli so Jéhovah amû na ala kua ti sara?

¹² Bible ahonde pëpe ndo ti afaute ti azo so Jéhovah amû ala ti fa lege na azo ti lo giriri. Na tapande, a tuku lani mafuta na li ti David ti ga gbia nga ti fa lege na azo ti Israël, me na pekoni lo sara siokpari. Lo gi mbeni wali nde nga lo fâ koli ti wali ni (2 Sam. 12:7-9). Pensé nga na tapande ti bazengele Pierre. Atâa so lo yeke na kota kua na yâ ti congrégation na ngoi ti akozo Chrétien, lo nga kue lo sara lani ambeni kota faute (Mat. 16:18, 19; Jean 13:38; 18:27; aGal. 2:11-14). Jésus la alingbi kue, me azo kue so aga na lege ti Adam na Ève ayeke na siokpari na tere ti ala.

¹³ Ngbanga ti nyen la na yâ ti Bible Jéhovah asara tënë ti afaute ti akoli so lo mû lani na ala kua ti sara? Mbeni raison ni ayeke so, Nzapa asara tongaso ti fa so lo lingbi ti sara kua na akoli so siokpari ayeke na tere ti ala ti fa lege na azo ti lo. Lo sara tongaso lakue. Tongaso, a lingbi e bâ pëpe awokongo ti a-ancien laso tongana mbeni raison ti dema tere ti e na tere ti ala wala ti sara sanka ti fango lege ti ala. Jéhovah aye ti tene e ne ala nga e mä yanga ti ala.​—Diko Exode 16:2, 8.

14, 15. Lege so Jéhovah afa ye lani na azo ti lo afa na e nyen?

¹⁴ A yeke kota ye mingi ti mä yanga ti azo so ayeke mû li ni na popo ti e. Pensé na ndo ti lege so Jéhovah ayeke sara lani tënë giriri na azo ti lo na ngoi ti aye ti ngangu. Na tapande, na ngoi so azo ti Israël asigigi lani na Égypte, Nzapa afa ye na ala na lege ti Moïse na Aaron. Ti tene azo ti Israël asö kuâ na yâ ti ye ti ngangu bale-oko so Jéhovah aga na ni na ndo ti Égypte, a lingbi ala yeda na afango lege so a yeke fa na ala. A tene na ala ti te mbeni kobe so ayeke nde nga ti fâ mbeni ngasangbaga na ti kpaka mênë ni na li ti cadre ti porte ti da ti ala nga na tere ti akeke ti cadre ni. Nzapa asara lani tënë so na ala droit na yayu kâ? Ên-ën, ala mä ni na yanga ti a-ancien ti Israël so awara fango lege ni na mbage ti Moïse (Ex. 12:1-7, 21-23, 29). Na sarango tongaso Jéhovah asara kua na Moïse nga na a-ancien ti fa lege na azo ti lo. Laso, a-ancien ayeke sara nga mara kota kusala so.

¹⁵ Peut-être mo hinga ambeni mbaï mingi na yâ ti Bible so na ngoi ni Jéhovah asara kua na azo wala na a-ange ti fa ye na azo ti lo. Na yâ ti mingi ti ambaï ni aye so ala fa asö fini ti azo. Azo so Jéhovah atokua ala ayeke sara tënë na azo ti lo na iri ti lo nga ala yeke fa na ala ye so alingbi ala sara ti mû lege na ala ti sö kuâ na yâ ti angoi ti ngangu. E yeke na nzoni raison ti ku ti tene Jéhovah asara tongaso ndali ti azo ti lo na ngoi ti Harmaguédon. A lingbi a-ancien so ayeke sara kua na iri ti Jéhovah wala bungbi ti lo laso asara hange ti sara ye ahon ti so a hunda na ala ti sara.

“KUNDU OKO, BERGER OKO”

16. “Yanga” so ayeke sara tënë na peko ti e so alingbi e mä ni andu aye wa?

¹⁶ Azo ti Jéhovah ayeke na yâ ti “kundu oko” nga na gbe ti “berger oko”, Jésus Christ (Jean 10:16). Jésus atene lo yeke na tere ti adisciple ti lo “juska na lâ ni so aye ti ngoi so ayeke gue ti hunzi.” (Mat. 28:20). Teti so lo yeke Gbia na yayu, lo yeke bâ ndo na ndo ti aye kue so ayeke si juska ti si na ngoi so lo yeke futi dunia ti Satan. Ti mû lege na e ti ngbâ ti duti beoko nga ti duti nzoni na yâ ti kundu ti Nzapa, a lingbi e mä “yanga” so ayeke sara tënë na ‘peko ti e’ ti fa na e lege so alingbi e mû. “Yanga” so ayeke sara tënë na peko ti e andu aye so Jéhovah afa na e na yâ ti Bible nga na aye so lo na Jésus ayeke fa na e na lege ti a-ancien so ala zia ala na yâ ti congrégation.​—Diko Ésaïe 30:21; Apocalypse 3:22.

17, 18. (a) Kpale wa ayeke hara azo ti Nzapa? Nyen la e yeke na kite dä ape? (b) Nyen la e yeke sara tënë na ndo ni na yâ ti article ti peko?

¹⁷ Bible atene so Satan ayeke “tongana mbeni bamara so ayeke toto, na lo yeke gi mbeni zo ti te lo.” (1 Pi. 5:8). Legeoko tongana mbeni sioni nyama so nzara amû lo mingi, Satan ayeke gi peko ti kundu ni, lo yeke gi mbeni nzoni ngoi ti gbu mbeni ngasangbaga so asara hange ape wala so ahon ayo na kundu ni. So ayeke mbeni nzoni raison so ndali ni alingbi e ngbâ nduru na kundu ni nga na “berger nga zo ti bango ndo na ndo ti âme ti [e].” (1 Pi. 2:25). Apocalypse 7:17 asara tënë ti azo so ayeke sö kuâ na ngoi ti kota ye ti vundu, a tene: “Molenge ti ngasangbaga [Jésus] . . . ayeke bata ala ande tongana berger nga lo yeke fa lege na ala ti gue na ala na ali ti ngu so ayeke mû fini na zo. Na fade Nzapa ayeke mbô ngu ti lê kue na lê ti ala.” So ayeke tâ pendere zendo mingi!

¹⁸ Kua so a-ancien ayeke na ni ti fa lege na congrégation ayeke kota mingi. Nyen la ala lingbi ti sara ti hinga biani so ala sara ye na angasangbaga ti Jésus nzoni? Article ti peko ayeke kiri tënë na hundango ndo so.