Zo alingbi biani ti duti na ngia na yâ ti gigi ti lo?

TËNË so ayeke tâ tënë biani! Gigi ti zo na yâ ti dunia so asi singo na “pono [nga] na vundu”. Peut-être mo hunda tere ti mo, mo tene, ‘Zo alingbi biani ti duti na ngia laso na yâ ti gigi ti lo la?’

Bâ tapande ti Maria. Ândö so lo ngbâ maseka, lo yeke sara kua ngangu, me fadeso, so lo yeke na ngu 84, ngangu ti lo kue ahunzi. Lo ngbâ gi na yanga-da. Hingango ndo ti lo angbâ, me ngangu la ayeke dä ape. Na mara ti ye tongaso, lo lingbi biani ti tene so ni yeke na ngia la?

Ka ti mo? Peut-être a si na mo awe ti hunda tere ti mo wala mo yeke na ngia na yâ ti gigi ti mo wani. Peut-être kua so mo yeke sara afatigué mo kue, ndade gi oko kua la mo yeke sara. Wala azo ayeke bâ nga ngangu kua so mo yeke sara so pëpe. Me même si kua ni akä na mo kamême, mo yeke gi bê ti mo ndali ti gigi ti kekereke. Peut-être a si nga so mo bâ so mo yeke gi mo oko wala vundu ahon ndo ti mo. Mbeni ye ni nga ayeke so peut-être sewa ti mo ayeke na yâ ti kota kpale. Wala mbeni zo so mo ye lo mingi akui. Bâ tapande ti André. Lo na babâ ti lo, ala ye tere mingi, me mo ye ti bâ babâ ti lo atï kobela na lo kui. Ye so asara André nzoni oko ape, na ti lo, ye oko alingbi ti zi vundu ti lo ni pëpe.

Atâa kpale ti e ni ayeke so wa, mbeni ye ayeke dä so e ye biani ti hinga ni nzoni: Zo alingbi biani ti duti na ngia na yâ ti gigi ti lo? E lingbi ti hinga kiringo tënë ni na bango aye so mbeni koli asara ândö angu 2000 tongaso awe. Koli so ayeke Jésus Christ. Atâa akpale kue so lo wara, Jésus ayeke lani biani na ngia na yâ ti gigi ti lo. E nga kue e lingbi ti duti na ngia tongana e mû peko ti tapande ti lo.