Jésus afa na e lege ti duti na ngia na yâ ti gigi ti e

TONGANA ti so e bâ fade na article so ahon, Jésus ayeke lani na ngia na yâ ti gigi ti lo. Ni la, tongana e ye nga ti duti na ngia, zia si e mû peko ti tapande ti lo na e mä awango ti lo.

Jéhovah ahunda na e ti sara tongaso, tongana ti so versê ni afa. Tongana e ye ti tambela na lege so Jésus atambela dä, a lingbi e sara tâ gi tongana ti lo na e sara ye ague oko na afango ye ti lo. Sarango tongaso ayeke nzere na lê ti Nzapa nga ayeke sara si e duti na ngia na yâ ti gigi ti e.

Jésus amû gbâ ti awango ti tene e sara ye tâ gi tongana ti lo. E yeke wara ambeni wango ni na yâ ti ambeni tënë so lo tene, so azo mingi ahinga ni. Zia e bâ awango ni ota nga e bâ tongana nyen si e lingbi ti sara ye ague oko na awango ni so na yâ ti gigi ti e.

KOZO WANGO NI: “Ngia ayeke na ala so ahinga so ala yeke na bezoin ti aye ti yingo.”​—Matthieu 5:3.

WANGO SO ALINGBI TI SARA SI E DUTI NA NGIA TONGANA NYEN?

Jésus afa so a dü e azo na nzara ti voro Nzapa. Ni la si e yeke gi ka lakue ti hinga kiringo tënë na ahunda tongana: A dü e ngbanga ti nyen? Ndali ti nyen si pasi ahon ndo ni na ndo ti sese so? Nzapa apensé nga na e la? Tongana zo akui, lo yeke gue na mbeni ndo? Tongana e ye ti duti na ngia, a yeke nzoni e hinga akiringo tënë ni. Ti Jésus, gi Bible oko la si alingbi ti kiri tënë na ahunda so. Ni la, tongana lo sambela lani Babâ ti lo, lo tene: “Tënë ti mo ayeke tâ tënë.” (Jean 17:17). Mo pensé so Bible alingbi biani ti mû maboko na e ti hinga Nzapa na ti duti na ngia?

TÂ YE SO ASI NA YÂ TI GIGI TI MBENI ZO:

Esa ayeke lani mbeni kota zo ti hengo bia ti rock. Iri ti lo na amba ti lo akomanse ti wu, me atâa so kue, Esa atene so mbeni ye amanke ni. Lo tene: “Atâa so a nzere na mbi lani ti duti na popo ti amba ti mbi azo ti hengo bia ni, mbi bâ so mbeni ye amanke na yâ ti gigi ti mbi.” Mbeni lâ, Esa atingbi na mbeni Témoin ti Jéhovah. Lo tene: “Mbi hunda na lo gbâ ti atënë. Akiringo tënë ti lo ni agbu ngu nga aluti na ndo ti Bible. Ye so apika bê ti mbi mingi, na mbi yeda ti tene lo manda Bible na mbi.” Ye so Esa amanda na yâ ti Bible andu bê ti lo na apusu lo ti mû tere ti lo na Jéhovah. Lo tene: “Ândö akpale ahon ndo ti mbi, me fadeso mbi yeke na ngia.”a

USE WANGO NI: “Ngia ayeke na ala so ayeke sara nzoni bê na amba ti ala.”​—Matthieu 5:7.

WANGO SO ALINGBI TI SARA SI E DUTI NA NGIA TONGANA NYEN?

Sarango nzoni bê na azo andu tënë ti bango mawa ti ala nga ti sarango ye ti nzoni na ala. Jésus asara lani nzoni bê na azo so ye atia ala. Mawa ti ala apusu lo ti zi pasi ti ala (Matthieu 14:14; 20:30-34). Tongana e sara nzoni bê na azo tongana ti Jésus, e yeke duti na ngia na yâ ti gigi ti e. Senge ape, ngbanga ti so azo so asara nzoni bê na amba ti ala ayeke na ngia na pekoni (Kusala 20:35). E lingbi ti sara nzoni bê na azo na lege ti atënë ti yanga ti e nga na asarango ye ti e, si ala so ayeke na yâ ti bezoin awara dengo bê. A yeke tâ tënë so tongana e sara nzoni bê na zo, a sara nzoni na e?

TÂ YE SO ASI NA YÂ TI GIGI TI AMBENI ZO:

Maria na koli ti lo, Carlos, ayeke anzoni tapande ti azo so asara nzoni bê na amba ti ala. Mama ti Maria akui, na babâ ti lo angbâ gi lo oko. Nga na yâ ti angu so ahon, kobela ti diabète asara si lo ngbâ gi na gbogbo. Maria na Carlos amû lo na da ti ala na ala yeke bâ lege ti lo. A si ka mingi so ala yeke lango na bï ape, nga tongana kobela ti lo ni abi lo ngangu, ala yeke sukpe na hôpital. Ala tene so na ambeni ngoi ala nze kue. Me tongana ti so Jésus atene, ala yeke na ngia ngbanga ti so na gbe ti bê ti ala ala hinga so ala yeke mû na babâ ti Maria tâ ye so lo yeke na bezoin ni.

OTA WANGO NI: “Ngia ayeke na ala so asara si siriri amaï.”​—Matthieu 5:9.

WANGO SO ALINGBI TI SARA SI E DUTI NA NGIA TONGANA NYEN?

Zo so asara si siriri amaï ayeke na ngia na yâ ti gigi ti lo tongana nyen? Tongana e gi ti duti na siriri na amba ti e, e yeke duti na nzoni songo na ala. Ni la, a yeke nzoni e sara ye ague oko na wango ti Bible so, so atene: “Tongana lege ni ayeke dä, na ala lingbi ti sara mbeni ye, zia ala duti na siriri na azo kue.” (aRomain 12:18). Tënë “azo kue” andu nga azo ti sewa ti e nga na azo so ayeke na yâ ti bungbi ti vorongo Nzapa ti e ape. Ti duti na siriri na “azo kue” ayeke sara si e yeke biani na ngia na yâ ti gigi ti e?

TÂ YE SO ASI NA YÂ TI GIGI TI MBENI ZO:

Bâ tapande ti wali so iri ti lo ayeke Nair. Teti angu mingi, lo wara gbâ ti akpale, na akpale ni so aye ti buba yâ ti siriri so lo gi ti duti na ni na azo, na mingi ni na yâ ti sewa ti lo wani. Koli ti lo adö lo na amolenge ti lo azia asara ngu 15 awe, na gi lo oko la lo yeke bata ala. Oko ti amolenge ti lo ti koli ayeke nyon mbangi. A sara si mingi ni lo yeke sara ye kirikiri nga lo yeke be lê na mama ti lo nga na ita ti lo ti wali. Nair atene so ye so lo wani lo manda na yâ ti Bible la amû ngangu na lo ti bata siriri, même na yâ ti angangu ngoi so. Lo ye nga ti papa na zo ape wala ti tiri na zo ape. Lo yeke sara kue ti sara ye na nzoni bê nga ti zia tere ti lo na place ti amba ti lo (aÉphésien 4:31, 32). Na lo, so lo manda ti maï siriri, ni la si amû maboko na lo ti duti na nzoni songo na azo ti sewa ti lo nga na ambeni zo nde.

GI TI HINGA YE SO AYEKE KU E KEKEREKE

Tongana e sara ye ague oko na awango so Jésus amû, e yeke duti na ngia na yâ ti gigi ti e. Me a yeke nga nzoni ti gi ti hinga ye so ayeke ku e kekereke. Senge ape, teti tongana gigi ti zo kue ayeke gi ti tene lo ga mbakoro, lo tï kobela na lo kui, fade lo duti na ngia tongana nyen? Mawa ni ayeke so ye so ayeke pasêe na yâ ti dunia so la.

Me e yeke na ngia ti tene na mo so Jéhovah aleke gbâ ti anzoni ye ndali ti ala kue so agi ti “tambela gi na lege so Jésus mveni atambela dä.” Jéhovah amû zendo so lo ga nduru ti ga na fini dunia so mbilimbili ayeke duti na yâ ni na so azo ti lo ayeke duti tâ nzoni, na nzoni seni, tongana ti so lo ye. Mbeti ti lo atene: “Bâ, tente ti Nzapa ayeke na azo, Nzapa ayeke sara ande kodoro na ala, na ala yeke duti azo ti lo. Nga Nzapa wani ayeke duti ande na ala. Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”​—Apocalypse 21:3, 4.

Maria, wali ti ngu 84 so e sara tënë ti lo na yâ ti kozo article ni, ayeke ku kungo na ngia ti bâ tongana nyen la si atënë so ayeke ga tâ tënë. Ka mo, mo ye ti hinga ye mingi na ndo ti “tâ fini” so e yeke duti ande na ni na gbe ti komandema ti Royaume ti Nzapa? (1 Timothée 6:19). Tongana a yeke ye so mo ye la, sara tënë ni na aTémoin ti Jéhovah ti ndo so mo yeke dä wala sû mbeti na azo so asigigi na mbeti so.b