Tour ti Ba Ndo so akpengba pëpe: A sigigi na ni ngbanga ti nyen?

TETI angu mingi azo na ndo ti sese kue abâ nzoni na lege ti afango ye so ayeke na yâ ti Tour ti Ba Ndo. Na juillet ti ngu 2011 a sigigi na kozo Tour ti Ba Ndo ti Anglais so akpengba pëpe ti mandango ni. Na yâ ni, a tene: “A yeke tara ande ni teti ngu oko, na tongana a ga na aye ti nzoni a yeke ngbâ ti sigigi na ni.”

Fadeso, e yeke na ngia ti tene na ala so e yeke ngbâ ti sigigi na ni. Nga, a yeke sigigi ande na ni na français, Portugais nga na Espagnole.

NGBANGA TI NYEN LA AZO AYE NI?

Na pekoni so aita mingi ti Pacifique ti Mbongo awara Tour ti Ba Ndo ti Anglais so akpengba pëpe so, ala tene: “Aita alingbi fadeso biani ti gbu nda ti atënë ti yâ ti Tour ti Ba Ndo nzoni.” Mbeni ita-wali atene: “Ngoi so kozo e mû ti gi na nda ti ambeni mbupa nga na ambeni tënë, fadeso e mû ni ti gi ti hinga nda ti aversê so a fa atënë ti yâ ni pëpe na yâ ti a-article ni nga tongana nyen la aversê ni ague oko na tënë so ayeke na yâ ti a-article ni.”

Mbeni ita-wali, so amanda mbeti na dasendagi ti Amerika, atene: “Mbi mû lani ngu 18 ti sara tënë nga ti sû mbeti na mbeni lege so ayeke ngangu na zo ti gbu ndani. Fason ti sarango tënë ti mbi nga na fason so mbi yeke pensé na ni ayeke tâ ngangu, me a yeke nga kota ye ape. Mbi bâ so a lingbi mbi changé aye mingi na yâ ti fason so mbi yeke pensé na ni nga na sarango tënë ti mbi.” Tour ti Ba Ndo ti Anglais so akpengba pëpe amû maboko na lo ti ga mbeni nzoni wafango tënë. Lo tene: “Tour ti Ba Ndo ti Anglais so akpengba pëpe amû maboko na mbi mingi. Kode so a sara na atënë ni afa na mbi tâ nzoni lege ti sara tënë na mbeni lege so ayeke ngangu pëpe.”

Mbeni ita-wali ti Angleterre so awara batême na ngu 1972 asara tënë ti Tour ti Ba Ndo ti Anglais so akpengba pëpe, lo tene: “Na ngoi so mbi diko kozo numero ni, a yeke mo bâ mo tene Jéhovah aduti na tere ti mbi, lo zia maboko ti lo na ndo ti go ti mbi na mbi na lo e yeke diko ni legeoko. A yeke lani mo bâ mo tene mbeni babâ la ayeke tene mbeni mbaï na molenge ti lo so ade kete kozo si lo lango.”

Mbeni ita-wali, so ayeke na Béthel ti Amerika so awara batême ahon ngu 40, atene so na ambeni ngoi Tour ti Ba Ndo ti Anglais so akpengba pëpe asara si lo hinga ambeni ye nzoni mingi ahon ti kozo. Na tapande, encadré “Nda ti ambeni tënë” so ayeke na yâ ti numero ti lango 15 ti septembre ti ngu 2011 afa nda ti tënë ‘atémoin mingi mingi so ayeke tongana mbinda’ so ayeke na aHébreu 12:1, a tene: “Ala yeke mingi mingi asara si zo alingbi ti diko ala pëpe.” Ita-wali ni atene: “Ye so asara si mbi gbu nda ti versê so nzoni mingi ahon ti kozo.” Lo sara nga tënë na ndo ti Mandango Tour ti Ba Ndo so a yeke sara ni yenga na yenga, lo tene so même tongana mbeni kete molenge adiko kiringo tënë ni droit na yâ ti Tour ti Ba Ndo ti Anglais so akpengba pëpe, ambupa ni ayeke nde na ati so ayeke na yâ ti Tour ti Ba Ndo ti mandango ni. Ni la acommentaire ni akpa mbeni ye so ayeke nde.

Mbeni ita-wali ni nde so ayeke na Béthel, a tene: “Mbi yeke ku kungo ti mä acommentaire ti akete molenge so ayeke na yâ ti congrégation. Tour ti Ba Ndo ti Anglais so akpengba pëpe amû maboko na ala ti mû acommentaire so alondo na gbe ti bê ti ala. Acommentaire ti ala amû ngangu na mbi.”

Mbeni ita-wali so awara batême na ngu 1984 afa ngia ti bê ti lo ndali ti Tour ti Ba Ndo ti Anglais so akpengba pëpe, lo tene: “Mbi bâ so a sû ni tâ gi ndali ti mbi. A sara si a yeke ngangu pëpe na mbi ti mä yâ ti ye so mbi yeke diko. Fadeso mbi lingbi ti kiri tënë na ngoi ti Mandango Tour ti Ba Ndo sân gingo bê.”

MBENI NZONI YE SO ABABÂ NA AMAMA ABÂ NI NA NENE NI

Mama ti mbeni molenge-koli so ayeke na ngu mbasambala atene: “Na ngoi so e yeke leke Tour ti Ba Ndo na sewa, a lingbi mbi fa na lo nda ti gbâ ti atënë so ayeke na yâ ni, ye so ayeke mû ngoi mingi nga asara si mbi woko.” Na lege wa Tour ti Ba Ndo ti Anglais so akpengba pëpe amû maboko na mama so? Lo tene: “Bê ti mbi adö ndali ti so lo lingbi ti mû mbage na dikongo aparagraphe ni nga lo yeke gbu ndani nzoni. Lo sara mbeto pëpe ndali ti so ambupa ni akpengba pëpe nga atënë ni ayeke gi nduru nduru. Lo komanse ti leke acommentaire ti lo lo wani sân ti tene mbi mû maboko na lo, nga lê ti lo ayeke gi na ndo ti Tour ti Ba Ndo ni na ngoi ti mandango ni.”

Mama ti mbeni molenge-wali so ayeke na ngu gumbaya, a tene: “Kozo a lingbi e mû maboko na lo ti mû acommentaire. Ti fadeso, lo wani la lo yeke leke acommentaire ti lo.” Babâ na mama ti molenge-wali so ayeke mû ngoi mingi mbeni pëpe ti fa na lo nda ti atënë so ayeke na yâ ni ndali ti so lo lingbi ti gbu ndani. Fadeso lo ye Mandango Tour ti Ba Ndo mingi.

AMOLENGE ATENE TI ALA NYEN NA NDO NI?

Amolenge mingi abâ so a sigigi na Tour ti Ba Ndo ti Anglais so akpengba pëpe tâ gi ndali ti ala. Rebecca so ayeke na ngu 12, a tene: “Pardon, ala ngbâ ti sigigi na fini Tour ti Ba Ndo so!” Lo kiri lo tene: “Mbi ye mingi mbage so atene: ‘Nda ti ambeni tënë.’ A yeke ngangu pëpe ti tene akete molenge amä yâ ni.”

Tënë ti bê ti Nicolette so ayeke na ngu mbasambala ayeke nga tongaso. Lo tene: “Kozo a yeke ngangu na mbi ti mä yâ ti atënë ti yâ ti Tour ti Ba Ndo. Me fadeso mbi lingbi ti mû acommentaire mbi wani.” Emma, so ayeke na ngu gumbaya, atene: “A mû maboko na mbi mingi nga na ita ti mbi ti koli so ayeke na ngu omene. E lingbi fadeso ti mä yâ ti gbâ ti aye nzoni mingi ahon ti kozo. Merci na ala!”

Biani, azo mingi ayeke wara ye ti nzoni na lege ti Tour ti Ba Ndo so ambupa ni nga atënë ni ayeke ngangu pëpe ti tene zo amä yâ ni. A mû maboko na azo mingi ti gbu nda ti Bible nzoni nga a yeke ngbâ ti sigigi na ni legeoko na Tour ti Ba Ndo ti mandango ni so amû maboko na e mingi ngbene ye na ngu 1879.

[Foto na lembeti 30]

“Ngoi so kozo e mû ti gi na nda ti ambeni mbupa nga na ambeni tënë, fadeso e mû ni ti gi ti hinga nda ti aversê so a fa atënë ti yâ ni pëpe na yâ ti a-article ni nga tongana nyen la aversê ni ague oko na tënë so ayeke na yâ ti a-article ni”

[Foto na lembeti 31]

“Bê ti mbi adö ndali ti so lo lingbi ti mû mbage na dikongo aparagraphe ni nga lo yeke gbu ndani nzoni”