Jéhovah ahinga mo?
“Jéhovah ahinga ala so ayeke ti lo.”—2 TIM. 2:19.
1, 2. (a) Nyen la agbu lani bê ti Jésus mingi nyen? (b) Ahundango tënë wa a lingbi e hunda tere ti e na ni?
MBENI lâ, mbeni Farizien ahunda Jésus atene: “Commandement wa si ayeke kota ahon atanga ni kue na yâ ti Ndia?” Jésus akiri tënë na lo atene: “Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.” (Mat. 22:35-37). Jésus aye Babâ ti lo ti yayu mingi nga lege so lo sara ye na fini ti lo afa biani so lo ye lo. Lo bi nga bê ti lo na ndo ti nzoni iri so lo yeke na ni na gbele Jéhovah, lo fa ni na lege so lo ngbâ be-ta-zo na yâ ti fini ti lo. Ni la, ngoi kete kozoni si lo kui, lo tene so Nzapa ahinga lo tongana mbeni zo so ayeke sara ye lakue alingbi na acommandement ti lo Nzapa ni. Tongaso, Jésus angbâ na yâ ti ndoye ti Jéhovah.—Jean 15:10.
2 Laso azo mingi atene so ala ndoye Nzapa. E nga kue e yeke tene tongaso. Me ambeni kpengba hundango tënë ayeke dä so a lingbi e gbu li ti e na ndo ni. ‘Jéhovah ahinga mbi? Lo bâ mbi tongana nyen? Jéhovah ahinga mbi tongana zo ti lo?’ (2 Tim. 2:19). A yeke mbeni pendere ye mingi ti bâ so e lingbi ti duti na mbeni kpengba songo na Kota Gbia ti dunia kue!
3. Ngbanga ti nyen a yeke ngangu na ambeni zo ti pensé so ala lingbi ti duti azo ti Nzapa? Nyen la alingbi ti mû maboko na ala ti changé bango ndo ti ala?
3 Ye oko, a yeke ngangu même na ambeni zo so andoye Jéhovah ti pensé so ala lingbi ti duti akamarade ti Nzapa. Ambeni apensé so ala kpa pëpe ti duti akamarade ti Nzapa. Ye so asara si ala bâ so ala lingbi pëpe ti duti azo ti Jéhovah. A yeke nzoni ti hinga so bango ndo ti Jéhovah na ndo ti e ayeke ti lo nde (1 Sam. 16:7). Bazengele Paul atene na amba ti lo aChrétien lo tene: “Tongana mbeni zo andoye Nzapa, Nzapa ahinga zo ni so.” (1 aCor. 8:3). Yengo so mo ye na Jéhovah ayeke kozo ye so a lingbi mo sara ni ti tene lo hinga mo. Gbu li kete si: Ngbanga ti nyen mo yeke diko mbeti so? Ngbanga ti nyen mo yeke sara kue ti sara na Jéhovah na bê ti mo kue, na âme ti mo kue, na bibe ti mo kue, nga na ngangu ti mo kue? Tongana mo mû tere ti mo na Jéhovah na mo wara batême awe, mo sara ni ngbanga ti nyen? Bible afa so Jéhovah, so ahinga bê ti zo, ayeke gboto na mbage ti lo azo so bê ti ala ayeke nzoni. (Diko Aggée 2:7; Jean 6:44.) Tongaso, mo lingbi ti tene so mo yeke sara na Jéhovah ndali ti so lo gboto mo na mbage ti lo. Tongana azo so lo gboto ala na mbage ti lo angbâ be-ta-zo na lo, lo yeke zia ala lâ oko pëpe. Jéhovah abâ ala na nene ni mingi, nga lo ye ala mingi.—Ps. 94:14.
4. Ngbanga ti nyen a lingbi e gbu li ti e lakue na ndo ti kpengba songo so e yeke na ni na Jéhovah?
4 Tongana Jéhovah agboto e na mbage ti lo awe, a lingbi e sara kue ti ngbâ na yâ ti ndoye ti lo. (Diko Jude 20, 21.) Girisa pëpe so Bible afa so mbeni zo alingbi ti gue yongoro na Nzapa (aHéb. 2:1; 3:12, 13). Na tapande, kozoni si Paul asara tënë so ayeke na 2 Timothée 2:19, lo sara tënë ti Hyménée na Philète. Akoli use so ayeke lani azo ti Jéhovah teti mbeni ngoi, me na pekoni ala dö tâ tënë azia (2 Tim. 2:16-18). Girisa nga pëpe so, na yâ ti congrégation ti Galatie ândö, ambeni zo so Nzapa ahinga ala angbâ pëpe na yâ ti lumière ti yingo so ala yeke lani na yâ ni (aGal. 4:9). Biani, a lingbi e bâ tongana senge ye pëpe songo so e yeke na ni na Jéhovah.
5. (a) Asarango ye wa a lingbi e duti na ni si Nzapa ahinga e? (b) Atapande wa e yeke gue ti bâ ni?
5 Ambeni sarango ye ayeke dä so a lingbi e duti na ni tongana e ye ti tene Jéhovah ahinga e (Ps. 15:1-5; 1 Pi. 3:4). Use na popo ni ayeke mabe nga na sarango tere kete. Zia e gbu li na ndo ti tapande ti ambeni zo use ti bâ tongana nyen dutingo na mabe nga sarango tere kete asara si Jéhovah aye ala. E yeke bâ nga tapande ti mbeni koli so abâ atene Nzapa ahinga ni me so baba asara lo na ye so asara si Nzapa ake lo. E lingbi ti manda akpangba ye na lege ti atapande so.
Babâ ti azo so ayeke na mabe
6. (a) Nyen la Abraham asara lani so afa so lo mä na bê na azendo ti Jéhovah? (b) Na lege wa Jéhovah ahinga Abraham nzoni?
6 Abraham ayeke lani mbeni zo so ‘amä na bê na L’Éternel’. A iri lo “babâ ti ala kue so ayeke na mabe”. (Gen. 15:6; aRom. 4:11). Teti so Abraham ayeke na mabe, lo yeke lani nduru ti zia da ti lo, akamarade ti lo, kua ti lo, nga na aye kue so lo yeke na ni ti gue na mbeni yongoro ndo (Gen. 12:1-4; aHéb. 11:8-10). Mabe ti Abraham angbâ lani lakue ti kpengba angu mingi na pekoni. Ye so afa ni ayeke so lo yeke lani nduru ti mä yanga ti Jéhovah ti ‘mû Isaac na sandaga’. (aHéb. 11:17-19). Abraham afa so lo mä na bê na azendo ti Jéhovah, ye so asara si Nzapa abâ lo na nene ni mingi; lo hinga Abraham nzoni. (Diko Genèse 18:19.) Ye so afa so Jéhovah ahinga gi pëpe Abraham tongana mbeni zo so ayeke dä; lo ndoye lo tongana mbeni kamarade.—Jacq. 2:22, 23.
7. Nyen la Abraham ahinga na ndo ti azendo ti Jéhovah? Tongana nyen la lo fa so lo yeke na mabe?
7 Jéhovah amû zendo na Abraham atene so “fade ahale ti [lo] akamata yanga ti kodoro” ti awato ti ala nga ala yeke ga “tongana mbutu so ayeke na tere ti kota ngu ti ingo”. (Gen. 22:17, 18). Atâa so azendo so aga lani tâ tënë pëpe na ngoi so Abraham angbâ na fini, lo ngbâ lani ti mä na bê ngangu na Jéhovah. Lo hinga so azendo ti Nzapa ayeke ga lakue tâ tënë, nga lege so lo sara ye na fini ti lo afa so lo yeke na mabe. (Diko aHébreu 11:13.) Jéhovah ahinga e tongana azo so ayeke na mabe tongana ti Abraham?
Zo so ayeke na mabe ayeke ku Jéhovah
8. Aye wa, so ayeke na lege ni, ambeni zo ayeke ku ti wara ni?
8 Ambeni ye alingbi ti duti dä so e ye ni mingi, aye tongana sarango mariage, dungo molenge, nga dutingo na nzoni seni. Aye ni so ayeke sioni pëpe. Me azo mingi na popo ti e alingbi peut-être pëpe ti wara ye so ala ye. Tongana mbeni ye ayeke dä so e ye ni mingi me so e lingbi ti wara ni laso pëpe, e yeke sara nyen? Lege so e yeke sara ye na yâ ti mara ti aye tongaso la ayeke fa wala mabe ti e akpengba wala pëpe.
9, 10. (a) Nyen la ambeni zo ayeke sara ti wara aye so ala ye? (b) Mo pensé ti mo nyen na ndo ti gango tâ tënë ti azendo ti Jéhovah?
9 A yeke na lege ti ndara pëpe ti gi ti wara aye so e ye ni na sarango ye ague nde na fango lege ti Nzapa. Sarango tongaso alingbi ti buba songo ti e na Jéhovah. Na tapande, ti kaï kobela ti ala, ambeni zo ayeke soro akode ti kaïngo kobela so ague nde na ye so Bible afa. Ambeni zo ayeda ti sara akua so akanga lege na ala ti wara ngoi ndali ti sewa ti ala wala ndali ti abungbi ti congrégation. Ambeni ato nda ti sara nzara ti mbeni zo so ayeke pëpe wakua ti Jéhovah. Tongana mbeni Chrétien asara aye so, lo yeke gi biani ti tene Jéhovah ahinga lo la? Tara ti bâ, tongana Abraham akanga bê lani gbä na kungo azendo ti Nzapa, bê ti Jéhovah ayeke duti tongana nyen? Ka tongana Abraham alondo ti sara ye lani lo wani na lo gi ti duti ndo oko ti sara si iri ti lo wani awu ahon ti ku Jéhovah ti sara ye? (Bâ Genèse 11:4.) Jéhovah ayeke ngbâ ti bâ lo tongana kamarade ti lo?
10 Aye wa so mo ye ni mingi mo yeke ku ti wara ni? Mabe ti mo akpengba ti ku Jéhovah ti mû na mo aye ni so? Lo mû zendo ti kaï anzara ti bê ti mo so ayeke na lege ni (Ps. 145:16). Tongana ti so a si lani na Abraham, ambeni zendo ti Jéhovah alingbi peut-être pëpe ti ga tâ tënë hio tongana ti so e ye. Me tongana e ngbâ ti duti na fini na mbeni lege so afa so e yeke na mabe tongana ti Abraham, Jéhovah ayeke girisa e pëpe. Lo yeke futa e.—aHéb. 11:6.
Sarango tere kete nde na baba
11. Nyen la Koré asara peut-être lani teti angu mingi? Ye so afa so lo bâ Nzapa tongana nyen?
11 Tongana a ndu tënë ti bango na nene ni aye so Jéhovah aleke nga na adesizion ti lo, Moïse na Koré ayeke azo so ayeke nde na mba mingi. Sarango ye ti ala asara ye na ndo ti lege so Jéhovah abâ na ala. Koré ayeke lani mbeni zo ti Kehath ti mara ti Lévi. Peut-être lo wara pasa lani ti bâ aye so Jéhovah asara ti zi azo ti Israël na yâ ti Ngu Bengba. Lo mû nga mbage na yâ ti fango ngbanga so Jéhovah afâ na ndo ti azo ti Israël so ake yanga lani na Hoto ti Sinaï, nga lo mû maboko lani ti yô arche mbele (Ex. 32:26-29; Nom. 3:30, 31). Na bango ni lo yeke lani be-ta-zo na Jéhovah teti angu mingi, ye so asara si azo mingi na Israël ane lo.
12. Tongana ti so a fa na lembeti 31, baba asara nyen na ndo ti songo ti Koré na Nzapa?
12 Me na ngoi so azo ti Israël ayeke na lege ti gue na Sese ti Zendo, Koré apensé ti lo so mbeni ye asava pëpe na yâ ti ye so Jéhovah aleke ti fa lege na mara ni. Lo ye ti ga na changement. Tongaso ambeni koli 250 amû peko ti Koré. Ala pensé ti ala biani so ala yeke na nzoni songo na Jéhovah. Ala tene na Moïse atene: “A lingbi awe! azo oko oko kue ti bungbi ni ayeke nzoni-kue, na L’Éternel ayeke na popo ti ala.” (Nom. 16:1-3). So ayeke sarango ye na baba la. Ala pensé so lege so ala sara na aye la ayeke nzoni mingi. Moïse atene na ala atene: “Kekereke na ndapre Jéhovah ayeke fa zo wa la ayeke ti lo, zo wa la ayeke nzoni-kue, zo wa la alingbi ti ga nduru na Nzapa. Zo so Nzapa asoro lo, fade zo ni aga nduru na Nzapa.” (Nom. 16:5, FD). Na hunzingo ti lango so aga na pekoni, Koré nga na azo kue so amû peko ti lo akui.—Nom. 16:31-35.
13, 14. Na yâ ti aye wa Moïse afa so lo sara tere ti lo kete?
13 Sarango ye ti Moïse ayeke ti lo tâ nde na ti Koré. Lo yeke lani “na tâ be-ti-molenge ahon azo kue so ayeke na lê ti sese.” (Nom. 12:3). Lo fa so lo yeke na tâ be-ti-molenge, wala lo sara tere ti lo kete na lege so lo sara tâ gi ye so Jéhovah ahunda na lo ti sara (Ex. 7:6; 40:16). Lâ oko pëpe e diko na yâ ti Bible a tene so Moïse ake lege so Jéhovah ayeke sara na aye wala lo sara ngonzo ndali ti so Jéhovah ahunda na lo ti sara aye gi tongana ti so ni fa na lo. Na tapande, Jéhovah afa na Moïse anzene nzene ye kue na ndo ti lege so a lingbi a leke na tabernacle. Lo fa nzoroko ti kamba nga na wungo ti adû ti bouton so a lingbi azo ti Israël aleke na arideau ni (Ex. 26:1-6). Tongana mbeni zo ti bango ndo na ndo ti congrégation afa na mo ti sara ambeni ye so mo bâ so anzene nzene ye ayeke dä mingi, na mbeni ngoi bê ti mo alingbi ti nze. Me Jéhovah ayeke ti lo zo ti bango ndo ti na ndo ti congrégation so alingbi ti lo kue. Lo mû kusala na azo ti lo ti sara, na lo hinga so ala yeke sara ande ni nzoni. Tongana lo fa na e anzene nzene ye so a lingbi e sara, raison ni ayeke dä. Moïse asara ngonzo na tere ti Jéhovah pëpe wala lo tene pëpe so Jéhovah ane lo pëpe ndali ti so lo fa na lo Moïse ni anzene nzene ye kue so a lingbi lo sara. Moïse atene pëpe so Jéhovah amû na ni liberté pëpe. Moïse atene na azo so ayeke sara kua ni ti sara ni tâ gi tongana ti so Jéhovah ahunda (Ex. 39:32). So ayeke sarango tere kete. Moïse ahinga so kusala ni ayeke ti Jéhovah na lo yeke tongana gbakuru ti kua na yâ ti maboko ti Jéhovah.
14 Moïse afa so lo sara tere ti lo kete même na ngoi so a yeke na lege ni ti tene bê ti lo anze. Na tapande, na ngoi so azo ti Israël adema tere ndali ti so ala yeke na ngu pëpe, Moïse asara ngonzo ngangu na tere ti ala na lo mû gloire na Jéhovah pëpe. Ye so asara si Jéhovah atene Moïse ayeke gue pëpe na azo ni na Sese ti Zendo (Nom. 20:2-12). Lo na ita ti lo, Aaron, akanga bê na gbele dema ti azo ti Israël teti angu mingi. Me fadeso, ndali ti faute oko so lo sara, Moïse ayeke wara pëpe ye so lo ku ni teti angu mingi. Moïse asara ye tongana nyen? Biani bê ti lo anze. Me lo sara tere ti lo kete lo yeda na desizion ti Jéhovah. Lo hinga so Jéhovah ayeke Nzapa ti mbilimbili, “Lo yeke na sioni oko pëpe”. (Deut. 3:25-27; 32:4). Laso, tongana e pensé na ndo ti Moïse, e yeke bâ lo tongana mbeni zo so Jéhovah ahinga lo?—Diko Exode 33:12, 13.
Ti mä yanga ti Jéhovah ahunda ti sara tere kete
15. Tapande ti Koré so baba apusu lo ti sara ye afa nyen na e?
15 Lege so e yeke sara ye na gbele agbiango ye so a ga na ni na yâ ti acongrégation ti aChrétien na yâ ti dunia kue nga na gbele adesizion so azo so amû li na yâ ti congrégation amû ayeke fa wala Jéhovah ahinga e. Koré na azo so amû peko ti lo angbâ akamarade ti Nzapa mbeni pëpe ndali ti so ala zia bê ti ala na ndo ti ala ahon ndo ni, ala sara ye na baba, nga ala yeke na mabe pëpe. Koré apensé ti lo so Moïse aga mbakoro awe na lo yeke sara aye gi na li ti lo wani, me lo girisa so a yeke biani Jéhovah la ayeke fa lege na mara ni. Koré abâ ye so pëpe, ni la lo duti be-ta-zo pëpe na azo so Nzapa ayeke sara kusala na ala. A yeke fade na lege ti ndara ti tene Koré aku Jéhovah ti fa nda ti ye ni polele wala ti changé aye ni tongana bezoin ni ayeke dä. Na nda ni, baba ague na Koré ti buba kua so lo sara na Jéhovah be-ta-zo teti angu mingi.
16. Tapande ti Moïse so asara tere ti lo kete alingbi ti mû maboko na e tongana nyen?
16 Mbaï so ayeke mbeni gbotongo mê ndali ti a-ancien nga na tanga ti azo kue laso na yâ ti congrégation. Ti ku Jéhovah nga ti mä yanga ti azo so Jéhovah ayeke sara kusala na ala ti fa lege na congrégation ahunda ti sara tere kete. E yeke fa so e sara tere ti e kete tongana Moïse? E hinga so Jéhovah ayeke sara kusala na azo so ayeke mû li ni ti fa lege na congrégation nga e yeda na ni? E yeke sara ye alingbi na aye so ala fa na e? E yeke kanga bê ti e na ngoi so bê ti e ason? Tongana e sara tongaso, e yeke nzere na lê ti Jéhovah. Tongana e sara tere ti e kete nga e mä yanga, lo yeke bâ e na nene ni mingi.
Jéhovah ahinga azo so ayeke azo ti lo
17, 18. Nyen la alingbi ti mû maboko na e ti ngbâ lakue ti duti azo ti Jéhovah?
17 A yeke teti e ti gbu li na ndo ti tapande ti azo so Jéhovah aye ala nga so lo tisa ala ti ga akamarade ti lo. Abraham na Moïse ayeke lani azo so alingbi kue pëpe na ala yeke na awokongo legeoko tongana e. Me Jéhovah ahinga ala tongana azo ti lo. Ye oko, tapande ti Koré afa so e lingbi ti gue yongoro na Jéhovah na ti ngbâ mbeni pëpe ti nzere na lê ti lo. A lingbi e oko oko kue e gbu li ti e na ndo ti ahundango tënë so: ‘Jéhovah abâ mbi tongana nyen? Nyen la mbi lingbi ti manda na lege ti atapande so a sara tënë ni na yâ ti Bible so?’
18 Jéhovah abâ awakua be-ta-zo ti lo tongana azo so ayeke azo ti lo. Ye so amû ngangu na e. Tongaso, ngbâ lakue ti sara ngangu ti duti na mabe nga ti sara tere ti mo kete. Asarango ye so nga na ambeni nde ayeke sara si Nzapa ayeke bâ mo na nene ni mingi. A yeke mbeni kota pasa ti tene Jéhovah ahinga mo. Azo so anzere na lê ti lo ayeke na ngia laso na yâ ti fini ti ala na ala yeke wara ande apendere ye ti nzoni mingi na yâ ti ngoi so ayeke ga.—Ps. 37:18.
Mo dabe ti mo na ni?
• Tongana a tene Jéhovah ahinga mbeni zo, a ye ti tene nyen?
• Na lege wa mo lingbi ti mû tapande ti mabe ti Abraham?
• Nyen la e lingbi ti manda na lege ti tapande ti Koré nga na ti Moïse?
[Foto na lembeti 29]
Na tapande ti Abraham, e mä na bê so Jéhovah ayeke sara si azendo ti lo kue aga tâ tënë?
[Foto na lembeti 31]
Koré asara tere ti lo kete pëpe nga lo yeke nduru ti mä yanga pëpe
[Foto na lembeti 32]
Jéhovah ahinga mo tongana zo so ayeke sara tere ti lo kete na ayeke mä yanga?