Fa ye na amolenge ti mo
Na ngoi wa a yeke nzoni e lango pëpe?
PEUT-ÊTRE mo yeke yeda so a yeke kota ye ti lango pëpe na ekole. Amolenge mingi ayeke lango na ngoi so maître ayeke fa ye. Me tongana mo ye ti manda ye, a lingbi mo lango pëpe. Peut-être mo nga kue mo yeke gue ka na bungbi ti manda Bible.
Mo yeke sara ti mo nyen ti lango ape?—a Mbeni ye so mo lingbi ti sara ayeke ti lango hio na bï wala ti lango kete na peko ti midi. E yeke bâ mbeni ye so asi lani na mbeni molenge-koli so alango na ngoi so bazengele Paul angbâ ti fa tënë na mbeni bï. Zia e bâ ye so e lingbi ti manda dä. E zi Bible na mbeti ti Kusala chapitre 20, versê 7 ti si na 12 ti bâ ni.
Paul ague lani na congrégation so ayeke nduru na gbata ti Troas. Bible afa so “na ndade ni” Paul ayeke mû bateau ti hon. Tongaso, “lo gboto yâ ti tënë ti lo ni juska na bê ti bï.” E diko, a tene: “Mbeni maseka-koli so iri ti lo ayeke Eutyche aduti na lê ti fenêtre na lango ahon na lo na ngoi so Paul angbâ ti sara tënë.” Tene na mbi, nyen la apasêe na pekoni, nyen?—
Eutyche ‘alondo na ota da ti nduzu ni lo tï na sese’. Paul na atanga ti azo ni akpe hio ala gue na gbe ni. Ala ye ti bâ, Eutyche la ayeke na sese so, lo kui awe. Vundu asara ala mingi, ni ape?— Bible afa so Paul amû Eutyche na yâ ti maboko ti lo na lo gbu lo na kate ti lo. Kete na pekoni, lo dekongo, lo tene: ‘Ala dë bê ti ala, ye oko asi na lo ape!’ Nzapa akiri na Eutyche na fini.
Ye so asi na Eutyche so afa na e nyen na ndo ti Nzapa?— A fa na e so Jéhovah, Babâ ti e ti yayu, a lingbi ti zingo azo na kuâ, même amolenge. Jéhovah ahinga mo nzoni na lo ye mo, ahon même babâ na mama ti mo. Lani so Jésus ayeke na ndo ti sese ge, lo mû amolenge na yâ ti maboko ti lo na lo bénir ala. Lo zingo même ambeni molenge, so mbeni oko ayeke mbeni molenge-wali ti ngu 12. Na sarango tongaso, lo fa so Babâ ti lo aye nga amolenge.
So mo hinga mo tene Nzapa aye mo so, fa na mbi a sara nyen na mo?— Tâ tënë, a sara si e nga kue e ye Jéhovah na e ye ti sara ye so lo tene na e ti sara. Tene na mbi, e lingbi ti sara nyen ti fa nga na lo so e ye lo?— A lingbi e tene nga na yanga ti e wani so e ye lo. Jésus atene: “Mbi ndoye Babâ.” Me lo ngbâ gi ge pëpe, lo fa ni na lege ti akusala nga.
Jésus amä yanga ti Nzapa. Ni la lo tene: “Mbi yeke sara lakue aye so anzere na bê ti lo.” Tongana e nga kue e mä yanga ti Jéhovah ti nzere na lê ti lo nga na lê ti Molenge ti lo, Jésus, e yeke sara kue ti lango pëpe, atâa na bungbi wala na ekole.
Diko na Bible ti mo
[Kete tënë na gbe ni]
a Tongana mo yeke diko ye na molenge na mo bâ a zia (—), a fa so a lingbi mo luti kete nga mo wa lo ti fa tënë ti bê ti lo.