KOTA MAMA-TENE NI | TONGANA ZO AKUI NYEN LA AYEKE SI NA PEKONI?

Nyen la ayeke si na zo tongana lo kui?

“Mbi pensé ti mbi so aplace ayeke ota so tongana mbeni zo akui lo lingbi ti gue dä: yayu, enfer wala purgatoire. Mbi hinga so mbi peut ti gue na yayu ape nga mbi peut ti gue na enfer ape. Me, ti purgatoire, ade mbi hinga ye so ayeke passé kâ ape, na lâ oko ade mbi bâ mara ti tënë ni so na yâ ti Bible ape. A yeke gi ye so azo la atene ni.”—Lionel.

“A fa na mbi so azo kue ayeke gue na yayu na peko ti kuâ ti ala, me mbi yeke sûr ape. Mbi pensé ti mbi so kuâ ayeke fin ti aye kue, so aye ti tene so azo so akui so, ti ala awe la.”—Fernando.

‘Nyen la ayeke si biani na zo tongana lo kui? Azo so e ye ala mingi si akui ayeke bâ pasi na mbeni ndo? E lingbi ande mbeni lâ ti kiri ti bâ ala? Tongana a yeke tongaso, e hinga ni tongana nyen?’ A si na mo ti hunda tere ti mo tongaso awe? E wa mo ti bâ ye so Bible afa na ndo ni. Kozoni kue, zia e bâ ye so Bible atene na ndo ti akuâ. Na pekoni, e yeke sara tënë na ndo ti beku so Bible amû na e.

Dutingo ti azo so akui ayeke tongana nyen?

YE SO BIBLE AFA: “Ala so ayeke na fini, ala hinga fade ala kui; me akinda ahinga ye oko pëpe, wala futa ayeke pëpe teti ala; teti azo adabe ala na akinda mbeni pëpe. Ye kue so maboko ti mo awara ti sara, mo sara na ngangu ti mo kue; teti kusala, ye ti bibe, hingango ye, na ndara, ayeke na ndo-ti-awakinda pëpe, ndo so mo yeke gue dä.”a—Zo-ti-fa-tene 9:5, 10.

Na nduru tënë, dû ti kuâ ayeke ndo so, tongana azo akui, ala yeke gue dä. A yeke ndo so hingango ye ayeke dä ape nga so azo ayeke sara kua kâ ape. Job, so ayeke kota wakua ti Nzapa, abâ ti lo lani dû ti kuâ tongana nyen? Job agirisa lani aye ti lo kue nga na amolenge ti lo gi na yâ ti lango oko. Na pekoni, a bi na tere ti lo kue akota kä so sanzo ayeke sigigi dä. Lo toto na Nzapa, lo tene: ‘A yeke nzoni mo bata mbi na yâ ti dû ti kuâ [wala ‘enfer,’ TOB].’ (Job 1:13-19; 2:7; 14:13, Tene ti Nzapa, Kozo Mbouki). A yeke polele so Job ahinga so dû ti kuâ ayeke pëpe ndo so wâ ayeke gbi zo dä, wala ndo so lo lingbi ti bâ pasi dä encore mingi. Me, lo bâ ti lo ni tongana mbeni ndo ti wungo tere.

Mbeni lege ti hinga ye na ndo ti dutingo ti azo so akui ayeke ti bâ ye so Bible atene na ndo ti azo miombe so a zingo ala na kuâ.—Bâ encadré so atene, “Bible asara tënë ti azo miombe so a zingo ala na kuâ.”

Zo oko na popo ti azo miombe so atene pëpe so, na ngoi so ni kui, ni gue lani na nzoni ndo wala ni gue na ndo so ni bâ pasi dä. Tongana azo so a zingo ala lani ague na mara ti ndo tongaso na peko ti kuâ ti ala, ka ala sara tënë ni lani na azo ape? Wala a sara tënë ni na yâ ti Bible ti tene e kue e bâ ni ape? Me, a sara nga mara ti atënë ni so kete na yâ ti Bible ape. A yeke polele so, azo miombe so ayeke nga na mbeni tënë ti tene na ndo ni ape. Ngbanga ti nyen? Ngbanga ti so, lani na ngoi so ala kui, ala hinga ye oko ape, tongana ti mbeni zo so alango. Ni la, na ambeni ngoi, Bible ahaka kuâ na lango. Na tapande, Bible atene David nga na Étienne, so ayeke akota wakua ti Nzapa, ‘akui’ wala ala “lango.”—Kusala 7:60; 13:36, kete tënë na gbe ni.

Eskê mbeni beku ayeke dä ndali ti azo so akui awe? A peut ti zingo ala?

[Kete tënë na gbe ni]

[Encadré na lembeti  4]

BIBLE ASARA TËNË TI AZO MIOMBE SO A ZINGO ALA NA KUÂb

Molenge-koli ti mbeni womua: Prophète Élie azingo molenge-koli ti mbeni womua so alango na kodoro ti Sarepta, na Nord ti Israël.—1 aGbia 17:17-24.

Molenge-koli ti Sunem: Prophète Élisée, so a soro lo ti mû place ti prophète Élie, azingo mbeni molenge-koli ti gbata ti Sunem nga lo mû lo na babâ na mama ti lo.—2 aGbia 4:32-37.

Mbeni koli so a gue ti lu kuâ ti lo: A bi lani na loro kuâ ti mbeni koli, so akui ade ti ninga ape, na yâ ti dû ti kuâ so a lu lani Élisée dä. Gi na ngoi so tere ti lo andu bio ti prophète so, lo zingo na kuâ.—2 aGbia 13:20, 21.

Molenge-koli ti mbeni womua ti Naïn: Jésus a-arrêté azo so ague ti lu kuâ ti mbeni molenge-koli na gigi ti kodoro ti Naïn, na Jésus azingo lo nga lo mû lo na mama ti lo.—Luc 7:11-15.

Molenge ti Jaïrus ti wali: Jaïrus ayeke mbeni mokonzi ti synagogue, na lo voro yanga na Jésus ti sava molenge ti lo ti wali so tere ti lo ason. Kete na peko ti so molenge-wali ni akui, Jésus azingo lo na kuâ.—Luc 8:41, 42, 49-56.

Lazare, kota kamarade ti Jésus: Lazare akui a sara lani lango osio awe la Jésus azingo lo na lê ti gbâ ti azo so ayeke lani dä.—Jean 11:38-44.

Dorcas: Bazengele Pierre azingo lani wali so, so azo aye lo mingi, na so a hinga lo ndali ti anzoni ye so lo sara na azo.—Kusala 9:36-42.

Eutyche: Maseka-koli Eutyche akui na ngoi so lo londo na lê ti fenêtre kâ na nduzu lo tï na sese; na bazengele Paul azingo lo na kuâ. —Kusala 20:7-12.

[Kete tënë na gbe ni]