Sara si ngoi ti mo ti mandango Bible anzere nga aga na mo ye ti nzoni
E lingbi ti sara nyen ti wara ngia mingi na mandango Bible? Nyen la e lingbi ti sara ti wara ye ti nzoni mingi na ngoi ti mandango Bible ti e? Zia e bâ na nduru tënë akota ye ota so ayeke mû maboko na e ti wara ye ti nzoni mingi na ngoi ti mandango Bible ti e wani.
1 SAMBELA: Kozo ye ni ayeke ti sambela (Ps. 42:9). Ngbanga ti nyen? A yeke nzoni e bâ mandango Mbeti ti Nzapa tongana mbeni oko ti aye so e yeke sara ti voro na Nzapa. Tongaso, a lingbi e hunda na Jéhovah ti zi bê ti e na bibe ti e ti yeda na ye kue so e yeke manda nga ti mû na e yingo vulu ti lo (Luc 11:13). Barbara, mbeni missionnaire so aninga na yâ ti kua ni atene: “Mbi yeke sambela lakue kozo si mbi diko Bible wala mbi manda ni. Na peko ti sambela ni, mbi bâ so Jéhovah ayeke na tere ti mbi nga lo yeda na ye so mbi yeke sara na ngoi ni so.” Ti sambela kozo si e manda ye ayeke zi bê ti e na bibe ti e ti yeda na gbâ ti akobe ti yingo so ayeke na gbele e.
2 GBU LI TI MO: Teti so ambeni zo ayeke na ngoi mingi pëpe, ala yeke diko Mbeti ti Nzapa gi tongaso. Ye oko, ala wara pëpe aye ti nzoni so ala lingbi ti wara na mandango Bible. Carlos so asara na Jéhovah ahon ngu 50 awe aga ti bâ nene ti mungo mbeni ngoi ti gbu li na ndo ti aye so lo manda na yâ ti Bible tongaso si lo wara aye ti nzoni mingi dä. Lo tene: “Ti fadeso, alembeti ti Bible so mbi yeke diko ayeke mingi tongana ti kozo pëpe: lâ oko oko mbi yeke diko alembeti use. Na pekoni, mbi yeke mû ngoi mingi ti gbu li na ndo ti ye so mbi diko si mbi manda akpengba ye dä.” (Ps. 77:13). Tongana e mû ngoi ti gbu li ti e, a yeke sara si e kiri e hinga nzoni mingi ye so bê ti Nzapa aye nga e yeke kiri ti gbu nda ni nzoni mingi.—aCol. 1:9-11.
3 SARA YE ALINGBI NA YE SO MO MANDA: Tongana e bâ nene ti mbeni ye, e yeke wara ye ti nzoni mingi dä. Mandango Bible nga kue ayeke tongaso. Gabriel, mbeni ita-koli so ade maseka so ayeke manda Bible lakue atene: “Mandango Bible amû maboko na mbi ti hon ndo ti akpale ti lâ oko oko nga aleke mbi ti mû maboko na ambeni zo.” Lo kiri lo tene: “Aye kue so mbi manda, mbi sara ngangu ti sara ye alingbi na ni na yâ ti fini ti mbi.” (Deut. 11:18; Jos. 1:8). Biani, Nzapa afa na e aye mingi so e lingbi ti manda ni na ti sara ye alingbi na ni.—aProv. 2:1-5.
4 NA NDURU TËNË: E yeke na pasa ti manda ye na ndo ti hingango ye so alondo na Jéhovah, Lo so ndara kue alondo na lo (aRom. 11:33). Tongaso, na ngoi ti mandango ye ti mo ti peko, gi kozoni ti sambela Jéhovah nga hunda na lo ti zi bê ti mo nga na bibe ti mo ti yeda na aye kue so mo yeke manda nga ti tene lo mû yingo vulu ti lo na mo. Na pekoni, mû ambeni ngoi ti gbu li ti mo na ndo ti aye so mo diko. Nga sara ye alingbi na ye so mo manda na yâ ti fini ti mo ti lâ oko oko. Tongana mo sara akpengba ye so, mo yeke bâ so mandango Bible ti mo ayeke nzere nga ayeke ga na mo aye ti nzoni mingi.